1 King Nani 1
1
Debit almuk takan ba
1King Debit ba almuk pali takan kata, yua ailal pali iwan ba mita pat dama kata. Bamna kwala nani pura praki kan ba, baha sin witin ra sip lapta yaras kan. 2Baku bamna ai albika nani witin ra win: “Dawanki king tara na main kaikaia mairin tiara kau ai maya briras kum pliks, bal king main kaiki kabia, bara sin ai dukia dauki kaia bara ai tnaya ra sin yapi kabia, baku lika wihtki tara king lapta dauki kabia.”
3Bamna Israel tasbaya aiska ra mairin tiara kum plikan kan, tiara pain ba, bara saki banhwan Abisag Sunem tawanka wina ba, baha ba king ra brih balan. 4Abisag ba tiara painkira pali kata, bara witin bui king ra main kaiki dukia dauki kan, ban sakuna king bui aima kumi sin tiara painkira ba tânka kaikras kata.
Adonías king kaia wisi aisisa
5Bamna Haguit luhpia waitna Adonías,#2 Sa 3.4. witin yakan tit bûi aisin witin ba king aimakbia. Bara wagin nani, aras ulaia uplika nani ridi daukan, baku sin waitna nani 50 sakan ai kainara impaki waia. 6Bara ai rayaka yua sut ra, ai aisika bui diara wiras kata dîa muni baku dauki ba. Baha purkara witin ba waitna ai mawan pain pali bri kan, witin na sin Absalón ningkara aisubi takan kata. 7Bamna lika Joab Seruiá luhpia waitna ba wal bara prîs Abiatar wal sin pat lâ kum daukan kan, baha nani mita sin Adonías ra hilp muni kan. 8Ban sakuna, prîs Sadoc bara Benaías Joiadá luhpia waitna ba, prapit Natán, Simí bara king bui tara kulki kan waitnika ba sin, Debit suldiarka aiklaklabra pain nani ba sin, Adonías aisi ba wal waras kata.
9Bara baha yua nani ra, Adonías lika pata tara daukan, bara sîp nani, bîp nani bara daiwan batanira nani sut ikan Zohélet walpaya lamara, baha ba Roguel tingnika lamara sa. Bara paiwan ai muihni king luhpia nani ba, baku sin Juda waitnika nani, bara king albika nani ba sut sin paiwan. 10Ban sakuna, paiwras kata prapit Natán bara Benaías wal ba, baku sin Debit suldiarka nani, bara ai muihni Salaman ra sin paiwras kan. 11Bara Natán bui Salaman yaptika Betsabé ra#2 Sa 12.24. win:
—¿Man walras katma ki, Adonías Haguit luhpia waitna ba king aimakisa, Debit wan wihtka tara ba baha tânka briras sa? 12Bamna nanara, bal bara mai smalkaisna na dauks, baku mita man rayakam bara luhpiam Salaman rayaka ba sin swaki sâkma. 13King Debit ra was bara naku wis: ‘Wan Kingka sma ba, man albikam mairin ra pramis dauki wiram kata Salaman luhpiam waitna ba man ningkamra king aimakbia, bara witin king iwaika ra iwbia. ¿Bara dîa muni Adonías ba king aimakisa?’ 14Bara man kau king wal aisisma ba piua ra, yang lika man ninamra dimi wamna, bara aisaram ba tâ baikamna.
15Bamna Betsabé king rumka ra dimi wan, bara king lika almuk pali kan, Abisag sunamita ba mita dukia dauki kata. 16Bara Betsabé king ra ai lal bawan tasba kat bara tara kulkanka lâka yan. Bara king bui win:
—¿Dîa takisa ki?
17Bara mairka ba bui pana win:
—King tara, man bui albikam mairin ra Dawan Gâd nina ra mâki swer takram man ningkamra luhpiam waitna Salaman ba, king aimakbia, bara witin ba man iwaikam ra iwbia. 18Bamna kaiks, nanara Adonías ba king aimakisa, bara man king tara, naha awarka na kat tânka briras sma. 19Bamna witin bîp nani ikan sa, daiwan batanira nani, sîp nani sin ailal, bara paiwan sa king luhpia nani sut, prîs Abiatar, suldiar lalka tara Joab aiklaklabra lalka ba sin, ban sakuna man albikam Salaman lika paiwras sa. 20Baha sut tilara, king tara, Israel luhpia nani sut man bîlam kaikisa, man ningkamra ya king kabia ba, man param pali maisa pakma. 21Baku apia kaka, king tara ba mahka prubia piua ra, yang bara luhpi Salaman wal lika pruaia pâtka ra wan lakan kabia sa.
22Mairin ba kau king wal aisi kan ba ra, prapit Natán ba bal diman, 23bara king ra maisa paki banhwan. Prapit Natán ba king ra dimi wan piua ra, ai mawan ra bawi tasba kat kangban, 24bara witin ra makabi walan:
—King tara, ¿man bui wiram sa ki, Adonías ba man ningkamra king aimakbia sa? 25Kan naiwa pali sika ikan sa bîp nani, daiwan batanira nani bara sîp nani sin ailal. Bara paiwan sa king tara luhpia nani sut, suldiar nani lalka nani ba bara prîs Abiatar ba sin. Bara kaiks, witin nani ba ai mawanra plun pîsa bara sin dîsa. Bara witin nani sut wisa: ‘¡King Adonías ba raya kabia!’ 26Ban sakuna, baha paiwanka ra paiwras ba lika albikam yang, prîs Sadoc, Joiadá luhpia waitna Benaías, bara albikam Salaman king tara luhpia ba sin. 27¿Naha na king tara adarka sa ki, ai albika nani ra sin maisa pakras ba, baha uplika ya iwaikam ra iwaia ba king tara ba ningkara?
Debit param wisa Salaman ai watlika ra king kabia
28Bamna king Debit adar yaban Betsabé ba paiwka balbia. Bamna mairin ba king mawanra dimi wan ba ra, witin king mawanra bûi kan. 29Bara king bui swer taki win:
—Dawan nina mâki swer takisna, trabil nani sut wina sulki pri sakan ba, 30baku yang bui Dawan Israel Gâdka nina ra man ra swer takri ba, naiwa pali yang daukamna: yang ningkira man luhpiam waitna Salaman ba king aimakbia, yang waitlika ra iwaiki ra iwbia.
31Bamna Betsabé king mawanra bawan ban ai mawan ba tasba kat, bara king ra mayuni win:
—¡Yang wihtki tara, king Debit ba raya ban kabia!
32Ningkara king Debit adar yaban prîs Sadoc bara prapit Natán wal, Benaías Joiadá luhpia ba sin paiwka balbia. Bara witin nani king mawanra bal buan ba ra, 33king Debit bui witin nani ra win:
—Man nani, dawankam albika na alki bris, bara luhpi Salaman ba brih muyulki ra suni Guihón ra brih was. 34Bahara prîs Sadoc bara prapit Natán bui batana yûkbia, Israel aiska kingka mangkbia, bara trumpit ba puhbi wibia: ‘¡King Salaman ba raya kabia!’ 35Ba ningkara man nani lika witin ninara wama, witin ban bal iwaiki ra iwbia; kan yang bui witin ba bâk sakri sa, wihta tara aimakaia Israel luhpia nani purara, bara Juda ra sin.
36Bamna Joiadá luhpia waitna, Benaías bui pana wibia:
—¡Baku kabia, bara baku wibia Dawan, king tara Debit Gâdka ba mita! 37Dîa natka ra Dawan king tara Debit wal kan ba baku, Salaman wal sim baku kabia, bara yaka ai kingka lâka ba sin kau tara daukbia, man king tara brisma ba purkara, dawanki Debit.
38Ningkara iwi wih banhwan prîs Sadoc, prapit Natán, Joiadá luhpia waitna Benaías, bara quereteo nani bara Pélet uplika nani bui Salaman ba king Debit muyulka ra suni Guihón ra brih wan. 39Bara prîs Sadoc tint watla ba wina batana laya ba bara bîp aringka ba sin brin, bara Salaman ra Dawan yamnika yan. Bara trumpit puhban, upla nani sin wini naku aisin: “¡King Salaman ba raya kabia!” 40Baha ningkara upla nani witin ai nina bliki wan, bara upla nani plut puhbi aiwani banhwi kan. Lilia tara pali sin dauki banhwi kata, upla nani wini yahwi kan ba mita, tasba sin ai mâyara slakwi baku kan.
41Bara Adonías baha ba walan, paiwan uplika nani witin wal kan ba sin witin nani plun ba pih danh takan piua ra. Bara Joab sin trumpit binka ba wali aisin:
—¿Dîa muni tawan ra ban bin tara dauki yahwi banhwisa ki?
42Witin kau aisi ba ra, Janatan prîs Abiatar luhpia waitna ba balan, baha ra Adonías bui win:
—Bal dims, man ba waitna tara mai kulkan sa, bara ban kra sturi raya nani brih aulma kaia sa.
43Janatan bui pana Adonías ra win:
—Baku apia sa, wan wihtka tara king Debit bui Salaman ba king mangkan sa. 44Bara king Debit bui witinka ba aikuki blikan prîs Sadoc, prapit Natán bara Joiadá luhpia waitna Benaías, baku sin quereteo nani bara Pélet uplika nani; bara witin nani pali bui Salaman ba king muyulka ra sunan. 45Bamna prîs Sadoc bara prapit Natán wal bui Guihón ra witin ba king kabia wisi batana laikan. Baha binka sika wali banhram ba. 46Baha purkara, Salaman ba pat king iwaika ra iwan sa, 47bara king dukia dadaukra nani king Debit ra lakula wiaia aidrubi bal bara aisi banhwan: “Gâd bui Salaman nina ba kau bukbia, man ninam ba wal. Ai king lâka ba sin kau tara daukbia, man kingkam lâka ba wal.” Bara king ai krikrika pura kat ai lal makupi Dawan ra mayunan; 48baku sin king bui naku aisi, win: ‘Dawan ba yamni pali kabia, witinka Israel Gâdka ba, kan yang iwaiki ra iwaia uplika naiwa saki wankan ba, naikra pali ni kaikisna ba.’
49Adonías bui paiwan nani ba sut sibri tatatwan; bara ningkara alsut bûi muni, kumi bani ai yabalka bâk mahka wan. 50Baha purkara, Adonías Salaman mawan sibrinka bri witin mahka taki Dawan tintka watla ra wih altar ra aringka nani tilara yukuwan. 51Upla kum Salaman ra wih win:
—Kaiks, Adonías lika king tara ba sibrinka brisa, bamna witin Dawan tintka watla ra wih, bîp aringka nani tilara yukuwisa. King tara ra makabisa naiwa pali swer takbia witin ai albika ra ikbia apia.
52Bara Salaman bila:
—Witin ba waitna pain sa kaka, ai lal tâwa kumi sin tasba ra kauhbia apia, sakuna witin ra saurka sakamna kaka lika, witin ba prubia sa.
53Bamna king Salaman bui blikan wih bri balaia altar ba wina. Witin king Salaman mawanra ai mawan tasba kat bawan, bara Salaman bui win mahka witin ai watla ra wabia.
Currently Selected:
1 King Nani 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua