လုကာ 8
8
အခန်း (၈)
ဓမ္မအမူတော်ဝင် ကူညီပံ့ပိုးဟေက တာဆာလောင်ရက်
1နာရာရိကအိမ် ကိုယ်တော်ယေရူစာ မြို့ရွာအနှံငါလင်ကို့ ဘုရားရှင်ကသာသနာတော် အကြောင်းအိမ်ဆိုင်ဟေကား သတင်းကောင်းငင် ငါ့ဆနပ်လင်ကဟေ။ ကိုယ်တော်အိမ်မက်တာ သာဝကတစ်ဆယ့်နှစ်ဦးယေ့ ယောလင်ကဟေ။ 2အိမ်မှဒေလင်ဟေကရပ် အမန်ရောဂါပျောက်တက်ကလူးရက်အိမ် မကောင်းဆိုးဝါး ပူးကပ်ဟေကားမဘင်း ပျောက်တက်ဟေကား အချို့တဆလောင်ရက်အ(လ်) ကိုယ်တော်အိမ်မက်တာယိုဝန်ဂါဟေ။ အိမ်မားတာဆာလောင်ရက်ကမား မကောင်းဆိုးဝါးခုနှစ်ကောင်က လက်မှလွတ်မြောက်ဒက်ကား မာဂဒလထိန်ဆီမ်း မာရိ၊ 3အုပ်ချူပ်သူဟေရုဒ်က အမူထမ်းဖြစ်ဟေကားခုဇဂါအအီတာ ယောဟန္နအပါအဝင် ရှုရှန္နအိမ် တစ်ခြားတာဆာလောင်ရက်အ(လ်) မက်တာယောဝန်လင်ကဟေ။ အိမ်မှတာဆာလောင်ရက်နာ အမာရက်က ကိုယ်ပိုင်စရိတ်အိမ် ကိုယ်တော်ယေရူအိမ် တပည့်တော်ရက်အင် လိစ်ကျွေးထောက်ပံ့လင်ကဟေ။
အတူးဆိုက်ဟေကား လူဂါပုံဥပမာ
(မဿဲ ၁၃:၁-၉။ မာကု ၄:၁-၉)
4ယက်တာကရပ် လူအုပ်ကြီးနာ စုဗန်ကို့ ဘောင်းကိုကလူးရက်နာ မြို့အနှံ့ငါဘင်း ကိုယ်တော်ယေရူကမား ထုန်ဗာ(ဖ်)လင်ကဟေ။ အိမ်မှနောက်အာ ကိုယ်တော်ယေရူနာ အိမ်မားလူးရက်အင် ပုံဥပမာဆူးဝါအိမ် ငါ့ဆနပ်လင်ကဟေ။ 5ဟက်တာကရပ် "လယ်သမားဟူးဝါနာ လယ်ပြင်ငါ အင်မလေ့အဟြတ်ကဇိစ်လင်ကဟေ။ လယ်သမား အင်မလေ့အဟြတ်နက်ကရပ် တစ်ချို့အတူ(ဖ်)ရက်နာ လင်းဖုံးငါဟြရ်ကလင်ကို လူးရက်ပျက်ဟေကား ဟင်းပေါ်ကို အူဆီရက်ကလိင်ဆာကယဲ့ ဟင်းလင်ပေါ်ကဟေ။ 6တစ်ချို့အတူ(ဖ်)ရက်စာ ကဇက်အငါကား တလုံငါဟေကားနေရာဟြတ်ကို အဖင်းဖော်ကယဲ့ အစိုဓာတ်ဆန်းကတောင်း နိန်းယက်အိမ် ရကူး(ဖ်)ကိုဆိန်းလင်ကဟေ။ 7တစ်ချို့အတူးရက်ယေ့ မရက်နင်နူကြားဟြတ်ကလင်ကို အဖင်းရက်ဖော်ယောဝန်လင်ကဟေ။ ညီးငါ့ဒင့်ယေ မရက်ဖင်းရက်နာ အင်ဖင်းရက်အိမ်မက်တာ ပြောင်ယောဝန်လင်ကို့ အိမ်မှအဖင်းရက်အင် ဟြုရ်ပီးနက်ကတောင်း အဆီးပါနံအဖြစ်ပါ(လ်)။ 8တစ်ချို့အတူးရက်က(လ်) မှီဟေကား ကဇက်ဖုန်ငါဟြတ်ကိုး အဖက်ရက်ဖော်ယောဝန်ကို့ အဆီရက်အဆတစ်ရာမကာ ဆီဟေ" ငါးဂို့ ငှားလင်ကဟေ။ မှဒေငှားကျီကရပ် ကိုယ်တော်နာ "အကာနားငါကို အတေးလှုကားလူးရက်၊ အာရုံစိုက်ကို အတေးယင့်"ငါ့ကို ဟော်ကို့ င့ါလင်ကဟေ။
ပုံဥပမာဂါးရည်ရွယ်ချက်
(မဿဲ ၁၃:၁၀-၁၇။ မာကု ၄:၁၀-၁၂)
9ကျီးကအိမ် တပည့်တော်ရက်နာ ကိုယ်တော်ယေရူငင် ပုံဥပမာဂါ ဆိုလိုရင်းငင် ကတာလင်ကဟေ။ 10အိမ်မကရပ် ကိုယ်တော်နာ "ဘုရားရှင်နာ နနိန်ရက်အင် အမာကသာသနာတော်က လျှို့ဝှက်နက်နဲ့ဟေကား အကြောင်းအရာရက်အင် တတ်ပေါ်ကအခွင့်ငင် အီပီယင်နန်းဖြစ်ဟေ။ ညီးင့ဒင့်ယဲ့ အယောက်ကလူးရက်က(လ်)
# 8:10 ဟေရှာယကျမ်း ၆း၉ ယူက(လ်)ယေ့ အပေါ်ပါ(လ်)၊
တတ်ကယေ့ နားအလည်ကအတွက်
အမာရက်အင် အတတ်ကဒေလေကပုံဥပမာရက်အိမ် ရှင်းပြဆနပ်ပေါ်ကားဖြစ်ဟေ" ငါ့ကို င့ါလင်ကဟေ။
အင်မလေ့တိန်းဟေကပုံဥပမာက အဓိပ္ပာယ်
(မဿဲ ၁၃:၁၈-၂၇။ မာကု ၄:၁၃-၂၀)
11အယောက်ဟက်တာ ကိုယ်တော်နာ "အင်မလေ့တိန်းဟေက ပုံဥပမာက ဆိုလိုရင်းအဓိပ္ပာယ်နာ အင်မလေ့နာ ဘုရားရှင်ကနူတ်ကပတ်တော်ဖြစ်ဟေ။ 12လင်းဖော်ငါဟြတ်ဟေကား အတူ(ဖ်)ငါ့ဟေကနာ ဘုရားရှင်က နူတ်ကပတ်တော်ယင် အတေးပေါ်ကအခါ မာရ်နတ်နာ ထုန်ဗာ(ဖ်)ကို အိမ်မာလူးရက်ကား ယုံကြည်ခြင်းအိမ် ဘုရားရှင်က ကယ်တင်ဟေကအဟင်းပိုမှာ အမာရက်က နှလုံးသားထဲယာက ဘုရားရှင်ကနူတ်ကပတ်တော်ရက်အင် လာကလင်ကားဟင်းပေါ်ကားလူးရက်အိမ် တူဟေ။ 13တလုံဖုန်ငါဟြက်ဟေကားအတူ(ဖ်)နာ ဘုရားရှင်က နူတ်ကပတ်တော်ရက်အင် တတ်ပေါ်ကရပ် ဝမ်းသာကယေ့ အမာရက်ကစိတ်နှလုံးထဲယာ အတည်မြဲထမ်း အချိန်နာရာဆာမယ် ယုံကြည်လက်ခံကို ဘဝယာခက်ခဲကြမ်းတမ်းမူရက်အိမ် ရင်ဆိုင်ကြုံတွေ့ပေါ်ကရပ် အမာရက်ကယုံကြည်ချက်ရက်နာ ချက်ချင်းဒင့် ရပ်တန့်ကလင်ကား လူးရက်ဖြစ်ဟေ။ 14မရက်ခြုံပုတ်အာဂါ ဟြက်ဟေကားအတူ(ဖ်)နာ ဘုရားရှင်ဂါ နူတ်ကပတ်တော်ရက်အင် အတေးပိုကယေ့ အမာရက်နာ လောကီအိမ်ဆိုင်ဟေကားစိုးရိမ်ပူပန်မူရက်၊ ကြွယ်ဝချမ်းသာဟေကာအိမ် ကာမဂုဏ်ရက် ကာဆီးပိတ်ဆို့ပီကို့ အမာရက်နာ အဆီပန်းအဖြစ်ကအဖင်းရက်အိမ်တူဟေကား လူးရက်မယ်ဖြစ်ဟေ။ 15မှီဟေက ကဇက်ဖုံးငါ ဟြတ်ဟေကအတူးနာ ဘုရားရှင်ကနူတ်က ပတ်တော်ရက်အင် အတေးပိုကရပ် အမာရက်ကဖြောင့်မတ်စင်ကြယ်ဟေကား စိတ်နှလုံးထဲယာ ကနင်းဖူးဆာသိမ်းကို လိုက်နာဟေကတောင်း အဆီရက်ဖြစ်ထွန်းကအဖင်းရက်အိမ်တူကို ဘုရားရှင်နှစ်သက်ဟေကဟင်းပိုကလူးရက်ဖြစ်ဟေ။
တောင်အိမ်အုပ်ပီကားမီးအိမ်
(မာကု ၄:၂၁-၂၅)
16အယောက်ဟက်တာ ကိုယ်တော်နာ "မီးအိမ်ငင်ထွန်းဂို တောင်းအိမ်အုပ်ပီကားလူး မဒေအရိနဲ့ ကုတင်အမုတ်အာ အဆေးပီဟေငါ့ဟေက လူးအငါ့ပါ(လ်)။ ဆင်ဗာ(ဖ်)ကလူးရက် အလင်းရောင်လှုမနီး မီးအိမ်ယင် မီးတိုင်ဖုံးငါ ချိတ်ဆွဲပီလင်ကဟေ။ 17အပေါ်မား အဆေးပီလှုကားအူဇာအငါ့ပါ(လ်)။ အချေးမနီး ပီလှုကား လျှို့ဝှက်ချက်ငါ့ကယေ အငါပါ(လ်)။ 18မှအကြောင့် အာရုံစိုက်ကို့ အတေးယင့်ဂီး။ အဇာရိကို့အငါနဲ့က(လ်) ငါဆနိန်အီကရက်အင် နားလည်ကက်ကလူးရက်ဇိစ် ဘုရားရှင်စာ နားလည်လှုကအခွင့်ငင် ပါ(လ်)အီလင်ကား။ ညီးငါ့ဒင့်ယေ နားအလည်ကက်ကလူးရက်ဇိစ် ဘုရားရှင်နာ အမာရက် နားလည်က အူဇာရက်အင်ဒင့် လာဓူ(ဖ်)လင်ကား"ငါ့ကို ငါ့လင်ကဟေ။
တော်စပ်မူအစစ်အမှန်
(မဿဲ ၁၂:၄၆-၅၀။ မာကု ၃:၃၁-၃၅)
19ယက်တာကရပ် ကိုယ်တော်ဂါးအနူးအိမ်အနေးဆီရက်အ(လ်) ကိုယ်တော်ယင်လက်ကဇိစ် ဗန်(ဖ်)ကရပ် လူပရိသတ်ရက်ပြိစ်ကို ကိုယ်တော်ကမား အထုန်ထမ်းငါ့လင်ကဟေ။ 20မှအကြောင့် လူဟူးဝါနာ ကိုယ်တော်ငင် "ကိုယ်တော်ဂါးအနူးအိမ် အနေးဆီရက် ကိုယ်တော်ယင် လက်ကက်ကို အပြင်ငါစက်ကို စောင့်တုန်းဟေ" ငါးဂို လျှောက်တင်လင်ကဟေ။ 21အိမ်မကရပ် ကိုယ်တော်နာ "ဘုရားရှင်ဂါး နှုတ်ကပတ်တော် တရားရက်အင် အတေးဂို့ လိုက်နာဂါးလူးရက်နာ ငါက အနူး(ဖ်)အိမ်အနေးဆီရက်ဖြစ်ဟေ" ငါးဂို့ ငါ့လင်ကဟေ။
လှိုင်းအိမ်မုန်ရက်နာ ကိုယ်တော်ယင်နာခံဟေကား
(မဿဲ ၈:၂၃-၂၇။ မာကု ၄:၃၅-၄၁)
22အယောက်ကယက်တာ ကိုယ်တော်ယေရူနာ တပည့်တော်ရက်အိမ်မက်တာ ဟိုးတစီးဖုံးငါချေဂို့ "မှပေဆီယင် ကူးဒက်မက်" ငါးဂို့ ငါ့လင်ဟေကရပ် အမာရက်အ(လ်) ဟိုးအိမ်ရက်ကို့ လင်လင်ကဟေ။ 23အမာရက် အိမ်မာဒေလေ ဖြတ်ကူးတုန်းကရပ် ကိုယ်တော်နာ အိပ်မောဟြတ်လင်ကဟေ။ ရုတ်တရက် မုန်တိုင်းတိုက်ကို ဟိုးယေ မြုပ်ကရိ(လ်)ယောဝန်ကို အန္တရာယ်ကြုံလင်ကဟေ။ 24အိမ်မအခါ တပည့်တော်ရက်စာ ကိုယ်တော်ယင် ရမိ(လ်)ကိုအဆူကို "ကိုယ်တော်၊ ကိုယ်တော် ငါရက်ဆိန်းပေါ်ကဟေ"ငါ့ကို လျှောက်တင်လင်ကရပ် ကိုယ်တော်နာ အိပ်ဟြရ်ငါဘင်းရိကို မုန်တိုင်းအိမ် လှိုင်းလုံးပြောင်ရက်အင် တန့်ကဇိစ် အမိန့်အီနက်ကရပ် ချက်ချင်းဒင့် မုန်တိုင်းအိမ် လှိုင်းလုံးပြောင်ရက်နာ ရပ်တန့်ကလင်ကို့ ငြိမ်ကလင်ကဟေ။ 25မှနောက်အာ ကိုယ်တော်နာ တပည့်တော်ရက်အင် "နနိန်ရက်ကားယုံကြည်ချက်နာ အဆာမာယာ" ငါးဂို့ ကတာလင်ဟေကရပ် တပည့်တော်ရက်နာ တဗျင်းအံ့ဩကို့ "မှလူးနာ အဆာမီကလူးဝါး။ လှိုင်းလုံးရက်အိမ် မုန်တိုင်းရက်တင့် အမာကအမိန့်အင် နာခံပိုဟေကျော့" ငါးဂို့ အချင်းချင်း ငှားတုန်းလင်ကဟေ။
အမီကားဟမန်ရက်အင် ကတောက်ဟေကား
(မဿဲ ၈:၂၈-၃၄။ မာကု ၅:၁-၂၀)
26အိမ်မှနောက်အာ ကိုယ်တော်ယေရူအိမ်တပည့်တော်ရက်စာ ဂါလိလဲပြည်ကတစ်ဖက်ကမ်းငါငါ့ဟေကား ဂါရစမြို့အနားဆာက ကမ်းခြေဆူးဝါနာ ရွက်လွင့်ကို့လင်ကဟေ။ 27အိမ်မာနေရာယာထုန်ကို ကိုယ်တော်နာ ကမ်းဖုန်ငါဟေချေကားအခါ အိမ်မာမြို့ဝါက မကောင်းဆိုးဝါးရက် ပူးကပ်စာဟင်းတုန်းပိုဟေကား လူးဟူးဝါနာ ကိုယ်တော်ယင် ဗန်(ဖ်)ကိုလက်ဗာ(ဖ်)ကဟေ။ အမာထနဲ့ မကောင်းဆိုးဝါးပူးကပ်တုန်းကို့ အမာနာ ကိန်းငါယေ့အတုန်းပါ(လ်)၊ အဝတ်အစားရက်အ(လ်) အချိန်ကြားမှအတူထန်း သင်္ချိုင်းဂူကြားရက်အာမယ် လန်းကိုးတုန်းလင်ကဟေ။ 28အိမ်မားလူးနာ ကိုယ်တော်ဝင်ပေါ်ကရပ် ဟော်ကို့ ရှေ့ယာကနင်းဖူး(ဖ်)ဆာဒူးထောက်ကိုး " အမြင့်ဆုံးက ဘုရားရှင်ဂါအဆား ကိုယ်တော်ယေရှု၊ ငင်အဇာလိစ်ကာဇိစ်ငါဟေယာ။ ငင်အနှိပ်စက်အန်ယေ့ တောင်းပန်ငန်နက်မက်"ငါးဂို့ ချက်ကို့ လျှောက်တင်လင်ဂါဟေ။ 29အိမ်မဒေလေလျှောက်ပီပေါ်ကနာ ကိုယ်တော်နာ မကောင်းဆိုးဝါးယင် အိမ်မားလူးထနဲ့ဘင်း ပြုဝန်ငါကို အမိန့်အီနက်ကအကြောင့်ဖြစ်ဟေ။ အိမ်မလူးယင် မကောင်းဆိုးဝါးစာ အဟက်ဟက် ပြင်းပြင်းထန်ထန် ထိန်းပီလင်ကဟေ။ လူးရက်နာ အိမ်မာလူးက အတာ၊တာဟူးရက်အင် ဆိမ်ရဖူးအိမ်တိုင်ကို စောင်ပီကယဲ့ အမာစာ ဆိမ်ရဖူရက်အင် အထုစ်ကို တိတ်ဆိတ်ကို့ လူးအ့ငါကအရပ်အာ မကောင်းဆိုးဝါက အော်ဟေက ဟင်းလင်ပေါ်ကဟေ။ 30ကိုယ်တော်ယေ့ အိမ်မှလူးဝင် "နင်ဂါးအမိန်းအဇာအော်ဟေယား" ငါ့ဂို ကတာလင်ကရပ် အိမ်မှလူးကအထဲယာ မကောင်းဆိုးဝါးမွတ်မွတ်ပူးကပ်တုန်းကတောင်း အိမ်မှလူးနာ "လေဂေါင်ဖြစ်ဟေ#8:30 အရေအတွက်ပြိစ်ဟေတောင်း လေဂေါင်ငါ့ကို ငါ့ပိုဟေကားဖြစ်ဟေ။"ငါးဂို့ ပြန်ကို့ဖြေလင်ကဟေ။ 31အိမ်မားမကောင်းဆိုးဝါရက်စာ အမာရက်အင် မကောင်းဆိုးဝါရက်အင် အပြစ်အီဟေကား ဂြိတ်(လ်)ငါအပါ#8:31 တွင်းနက်ကြီးထဲယာငါ့ဟေကနာ အောက်ခြေအငါကားတွင်းငင် ဆိုလိုဟေကဖြစ်ဟေ။ အိမ်မှတွင်းနာ မကောင်းဆိုးဝါးရက်က နောက်ဆုံးပြစ်ဒဏ်အီကား စောင်တုန်းဇမ်း အမာရက်အင် ပီးဟေကနေရာယင် ငါ့ဟေကဖြစ်ဟေ။(လ်)ကဇိစ် ကိုယ်တော်ယင် အဟက်ဟက် တောင်းပန်လင်ကဟေ။ 32အိမ်မာအချိန်ငါ ဗက်(ဖ်)အုပ်ပြောင်တစ်အုပ်နာ တဂိုးဖုံးငါ အကြိုဆာတုန်းလင်ကရပ် မကောင်းဆိုးဝါးရက်နာ အိမ်မားဗက်(ဖ်)ရက်ထနဲ့ ဆင်ကဇိစ်ခွင့်ပြုဂါးအတွက် ကိုယ်တော်ငင် တောင်းပန်လင်ကရပ် ကိုယ်တော်ယေ့ ခွင့်ပြုလင်ကဟေ။ 33မှကြောင့် မကောင်းဆိုးဝါးရက်နာ အိမ်မှလူးထနဲ့ဘင်းပြူဂို့ ဗက်(ဖ်)ရက်ထနဲ့ ဆင်ကလင်ကို့ အိမ်မားဗက်(ဖ်)အုပ်ရက်စာ တဂို့ကင်ဘာအတိုင်း ပေဆီထဲယာ တစ်ဟုန်ထိုးကတ်ဂို့ အိန်းမြုပ်လင်ကဟေ။ 34အိမ်မအခါ ဗက်(ဖ်)ကျောင်းဟေကားလူးရက်နာ ဖြစ်ပျက်ဟေကအူဇာစုတ်ရက်အင် ပိုဟေကအခါ ကပ်ယောလင်ကို့ အိမ်မှသတင်းငင် မြို့ရက်အိမ် ဒေသပတ်ဝန်းကျင်စုတ်ရက်အာ ငါ့ကိုဆနပ်လင်ကဟေ။။ 35လူရက်အ(လ်) အိမ်မှအဖြစ်အပျက်ရက်အင် ယူကဇိစ်ကအတွက် မြို့ထဲယာဘင်းပြုယောဝန်ကဟေ။ အမာရက်စာ ကိုယ်တော်ယေရှုထနဲ့ထုန်ဗားကခါ မကောင်းဆိုးဝါးပူးကပ်ဟေကဘင်း လွတ်တက်ကလူးနာ ပါဇူကမူးတူဂို့ ကိုယ်တော်ဂါ အတာရင်းငါ အကောင်းပကတိအတိုင်း တုန်တုန်းဟေကာပေါ်ဟေကရပ် အစက်လင်ကဟေ။ 36အိမ်မားအဖြစ် ပျက်ရက်အင် ကိုယ်တိုင်ပေါ်နက်ပေါ်ကလူးရက်နာ ထုန်ဗာ(ဖ်)ဟေကလူးရက်ဇိစ် ကိုယ်တော်ယေရူ မကောင်းဆိုးဝါးပူးကပ်တုန်းကလူးယင် အဆာမီကုသအီနက်ဟေကား ငါ့ဆနပ်လင်ကဟေ။ 37အိမ်မှအခါ ဂါရစမြို့ဝန်းကျင်ယာဘင်း ဗန်(ဖ်)ဟေကလူးရက်စာ တဗျင်းအစကလင်ဂို့ ကိုယ်တော်ယင် အိမ်မှာရက်ကမှာဘင်း ပြူကလင်ဂါဇီ တောင်းပန်လင်ကတောင်း ကိုယ်တော်ယေ့ တပည့်တော်ရက်အိမ်မက်တာ ဟိုးဖုန်းငါချေဂို့ အိမ်မှအရပ်အာဘင်း ပြန်ငန်လင်ကဟေ။ 38အိမ်မအခါ မကောင်းဆိုးဝါးပူးကပ်စာဟင်းကဘင်း လွတ်တက်ကလူးနာ ကိုယ်တော်အိမ်မက်တာ ယိုးဂါဇီစ် လျှောက်လင်ကဟေ။ ညီးငါ့ဒင့်ယေ ကိုယ်တော်ယေရူနာ အိမ်မာလူးယင် လင်းစံဗြောင်ငါဖြောင့်ကို ငါ့ဆနပ်ကနာ 39"နင်ဂါကိန်းငါ ပြန်ဂို့ ဘုရားရှင်နာ နင်ဂါအပေါ်ဝါ အဆာတတ် ကောင်းကျိုးလိစ်အီဒက်ဟေငါ့ဟေကင် လူတိုင်းဇီငှားဆနပ်အာ" ငါ့ဂို့ ငါ့လင်ကဟေ။ မှအကြောင့် အမာယေ့ မြို့အနှံ့လင်ဂို့ ဖြစ်ပျက်တက်ဟေကားစုတ်ရက်အင် ငှားဆနပ်လင်ကဟေ။
ယာဣရုကအဆာအိအိမ် အဝတ်အင်တို့ဟေက တာဆာလောင်
(မဿဲ ၉:၁၈-၂၆။ မာကု ၅:၂၁-၄၃)
40အယောက်ဟက်တာ ကိုယ်တော်ယေရူစာ ပေဆီကဟိုက်တာနီးယာ ပြန်ကိုကြွဗန်(ဖ်)ကရပ် လူထုပရိသတ်ရက်စာ စောင့်မျှော်ကိုကြိုဆိုတုန်းလင်ကဟေ။ 41အိမ်မနေရာယာ ဂျူးအမျိူးသားဖြစ်ဟေက ယာဣရုငါ့ကို အော်ဟေကား ဓမ္မာရုံတာဝန်ခံဟူးဝါင့လင်ကဟေ။ အိမ်မလူးစာ ကိုယ်တော်ကရှေ့ယာဗန်(ဖ်)ကို ဒူးထောက်တုန်းကို ကိုယ်တော်ယင် အမာကကိန်းငါယောကဇိစ် တောင်းပန်လင်ကဟေ။ 42အဇာအကြောင်းငါးနဲ့ တစ်ဆယ့်နှစ်နှစ်အရွယ်ငါဟေကား အမှာဂါဟူးဝါးတည်းက အဆာအိနာ ဆိန်းကရိတုန်းကိုဖြစ်ဟေ။ ကိုယ်တော်ယေရူစာကြွလင်ကရပ် လူးရက်အ(လ်) ကိုယ်တော်ယင် ဝန်းကို ကြိတ်ကြိတ်တိုးကို ယောဝန်လင်ကဟေ။ 43လူထုပရိသတ်ထဲယာ တစ်ဆယ့်နှစ်နှစ်လုံးလုံး သွေးသွန်ဂါးရောဂါစွဲကပ်တုန်းဟေကား #8:43 မောရှေပညတ်ကျမ်းငါ တာဆာလောင်ရက်နာ ဓမ္မတာဗန်တုန်းချိန်ငါ အသန့်ရှင်းပါ(လ်)ငါ့ကို ယူဆကတောင်း ဟူးဝါယေ့ အတိုးပိုပါ(လ်) ဝတ်ပြုရာကျမ်း ၁၅း၁၉-၃၀တဆလောင်ဟူးဝါငါလင်ကဟေ။ မှတာဆာလောင်နာ ငါဟေက တင်္ဂါအကုန်ကျခံကို ဆေးဆရာရက်အိမ် ကုသကယေ့ ဟူးဝါယဲ့ အမာကရောဂါယင် ပျောက်မနီး ကုသအီလှုကား အငါပါ(လ်)။ 44မှအကြောင့် အိမ်မှတဆာလောင်နာ ကိုယ်တော်က အလိုဝါဗန်ဂို့ ကိုယ်တော်ဂါပါဇူငင် တဟူးအိမ်တိုနက်ကအိမ်ချက်ချင်းဒင့် အမှာဂါသွေးသွန်ရောဂါနာ ပျောက်ကလင်ဂါဟေ။ 45မှအခါ ကိုယ်တော်နာ "ငါငင် အယူတိုးဝန်ဟေကယား" ငါးဂို့ ကတာလင်ကဟေ။ လူထုပရိသတ်ရက်အ(လ်) အမာရက်အရီကားအကြောင်း ငြင်းလင်ကို့ ပေတရုနာ #8:45 တချိူ့ကျမ်းစာယာ ပေတရုအပါဝင်၊ ပေတရုအိမ်မက်တာငါ့ဒက်ကားလူးရက်ငါ့ကို ရေးပီဟေ။" ဆရာ၊ ကိုယ်တော်ကပတ်လည်ယာ လူအုပ်ပြောင်ဝိုင်းရံဂို့ တိုးကြိတ်တုန်းဟေကတောင်း ဟူးဝါပါဆာနာ တိုးတိ(လ်)ကမယ်ငါ့လင်ကား" ငါးဂို့ လျှောက်တင်လင်ကဟေ။ 46ညီးငါ့ဒင့်ယေ ကိုယ်တော်နာ "ငင် ဟူးဝါပါဆာတိုးဟေ။ အဇာရိကို့အငါနဲ့ ငါကမားဘင်း တန်ခိုးရက်ပြူကလင်ကား ငါသတိပီနက်တိ(လ်)"ငါ့ကို ပြန်ကိုငါ့လင်ကဟေ။ 47အိမ်မှတဆာလောင်င(လ်) အမာကအမာ ဖုံးကွယ်အပီလှုနန်းကတောင်း အစက်ကို့ ကိုယ်တော်ရှေ့ယာ ဒူးထောက်တုန်းကို လူးရက်ကရှေ့ယာ အဇာရိကို့ ကိုယ်တော်ယင်တိုးပိုကအိမ် အမာစာချက်ချင်း ရောဂါပျောက်ကလင်ကား ငါ့ဆနပ်လင်ကဟေ။ 48ကိုယ်တော်ယေ့ မှတာဆာလောင်ငင် အဆာအိပ် "နင်ကယုံကြည်ချက်စာ နင်ကရောဂါယင် ပျောက်ဇိစ်ဒက်ကားဖြစ်ဟေ။ စိတ်ချမ်းချမ်းသာသာအိမ်လင်ဒက်" ငါ့ကို င့ါလင်ကဟေ။ 49ကိုယ်တော်ယေရှု အိမ်မာဒေလေင့တုန်းကရပ် ဓမ္မာရုံတာဝန်ခံဣရုကကိန်းငါက လူးဟူးဝါထုန်ဗာ(ဖ်)ကို ယာဣရုအင် "နင်ကအဆာအိ ဆိန်းကန်နန်းဖြစ်ကို့ ကိုယ်တော်ယင် အနှောက်ယှက်တက်ဟေ" ငါ့ကို ဗန်(ဖ်)ကို င့ါဗာ(ဖ်)ကဟေ။ 50ညီးငါ့ဒင့်ယေ့ အိမ်မှတူးဝင် ကိုယ်တော်ယေရူတတ်ဟေကရပ် ယာဣရုငင် "အစိုးရိမ်ယေ့။ ယုံကြည်ခြင်းမေပီးယင်း၊ နင်ဂါအဆာအိပ်ပြန်ဂို့ အဆက်ဆိမ်းငန်ကဟုန်း" ငါးဂို့ ငါ့လင်ကဟေ။ 51မှနောက်အာ ကိုယ်တော်ယေ့ ယာဣရုက ကိန်းအတာဟုန်းငါ ကြွလင်ကအချိန်ငါ ပေတရု ၊ယောဟန်၊ ယာကုပ်အိမ် တဆာလောင်ဆာဂါးအနူ(ဖ်)ဗား(ဖ်)လွှဲဂို့ ကျန်ဟေကားလူရက်အင် ကိန်းအတာဟုန်းငါ ဆင်ဂါးခွင့်အအီပါ(လ်)။ 52လူတိုင်းနာ တဆာလောင်ဆာဆိန်းကနန်းကတောင်း တဗျင်းဝမ်းနည်းကို့ ဟြက်တုန်းလင်ကဟေ။ ညီးင့ဒင့်ယေ့ ကိုယ်တော်နာ "အဟြက်ရ်ဂီးယေ့။ မှာတဆာလောင်ဆာနာ အဆိန်းနိမ့်ပါ(လ်)။ အိပ်တုန်းဟေကဖြစ်ဟေ" ငါးဂို ငါ့လင်ကဟေ။ 53ညီးငါ့ဒင့်ယေ လူးရက်နာ အိမ်မာတဆလောင်ဆာ ဆိန်းကန်နန်းကအကြောင်းငင် ချေးပီယင်နန်းဖြစ်ကိုး ကိုယ်တော်ယေရှုငင် ဆာရိုကို့အနေးလင်ကဟေ။ 54ညီးငါ့ဒင့်ယေ ကိုယ်တော်ယေရှုနာ ဆိန်းတုန်းဟေကား တဆာလောင်ဆာဂါ တဟူးငင်အကို့ပီးဂို့ "မန်ဆာ ရိငင်းဒက်" ငါးဂို့ ငါ့လင်ကအိမ် 55အိမ်မှတဆာလောင်ဆာနာ အဆက်ဆိမ်းဂို့ ချက်ချင်းရိကို့တုန်းလင်ကဟေ။ မှနောက်အာ ကိုယ်တော်ယေရှုနာ မန်ဆာဇီစ်ဆာကဇမ် ဆူးဝါပါဆာကျွေးကဇိစ် အမာကအနူ(ဖ်)ဗာ(ဖ်)ရက်အင် ငါ့လင်ကဟေ။ 56အိမ်မှကရပ် မန်ဆာက အနူး(ဖ်)ဗား(ဖ်)ရက်အ(လ်) တဗျင်းအံ့ဩလင်ကဟေ။ ညီးငါ့ဒင်ယေ ကိုယ်တော်နာ မှအဖြစ်အပျက်အင် ဟူးဝါးစီအငှားယေ့ငါးဂို့ ငှားပီဒက်ကဖြစ်ဟေ။
Currently Selected:
လုကာ 8: CKH
Highlight
Share
Copy
Want to have your highlights saved across all your devices? Sign up or sign in
Thet (သက်) Bible by Beyond Translation is licensed under Creative Commons Attribution-ShareAlike 4.0 License.
