Yahaya 12
12
Meri tsuwa̱yin Yesu maniꞌin
1Ana u buwai rana ta̱li a fara A̱buki a Mapasa, a̱vu Yesu ka̱ra̱ a̱ tyo Batanya, reve u rawa o uꞌwa wa Liꞌazaru, za na u ꞌya̱sa̱in a̱tsuma̱ a̱ a̱a̱kwa̱kwa̱. 2Reve o foɓoo yi pe malyuwaa. Marta ɗa ta̱wa̱i ni ilyalyaꞌa, Liꞌazaru waru u shi ta̱ oɓolo na aza a na a lyuwai oɓolo na̱ Yesu. 3Reve Meri tara meden ma maniꞌin ma̱ ma̱guru, za vi ikebe lon, a̱vu u tsun yi a ana e Yesu. Reve u tasa le na̱ a̱nji a̱ yi. Reve ma̱guru mo shiton uꞌwaꞌa.
4Oojoro o ro za na a̱ tsu ɗe Yahuza Iskariyoti shi ta̱ lo. A̱yi ɗa za na aa wina Yesu, a̱vu u damma, 5“Maniꞌin mo ndolo ma ta rawa ikebe i na i rawai ikebe yu ulivu ukpakutaꞌatsu (300).#12:5 Danshi na a yuwayin ulinga pa nda na̱ Tsuheleni a̱yi ɗa “dinari ukpakutaꞌatsu (300).” Ka̱lyuwa̱ Ucuɗuwu wi “Ikebe.” A̱ shi ta wina yi reve a ca alambi ikebeꞌe.” 6Agba Yahuza yuwan adanshi a alambi na amayun shi. U damma ta̱ ne ana wo oꞌwoi a̱yi vivu ɗa. A̱yi ɗa u da̱na̱i za vu uzuwa wi ikebe, waru u tsu tarasa ta̱ ikebe pe adama a aciya̱yi.
7A̱vu gba Yesu damma, “She vu damaton yi wan. U yuwan ta̱ ne e ifoɓi ya̱ a̱ciɗa̱ a̱ va̱. 8I ta̱ da̱na̱ na alambi kuci, agba ya̱a̱ da̱na̱ oɓolo na̱ a̱mu kuci shi.”
A yuwan ta̱ mpolo o una Liꞌazaru
9Ana ama a uwwai a na Yesu rawa ta̱, a̱ ta̱wa̱ ta̱ na̱ a̱bunda̱ adama e ene Yesu na̱ Liꞌazaru, vuma na u ꞌya̱sa̱in a̱tsuma̱ o ukwa̱. 10-11Ama na̱ a̱bunda̱ a lyawa ta̱ itoni i nan ganu va aza a Israꞌila, reve a uwa itoni ya̱ Yesu adama a Liꞌazaru. Ili i ndolo i ɗa i zuwai nan ganu a gbagbain a yuwain ifoɓi i na oo una Liꞌazaru fo.
Yesu uwai Urishelima
(Mat. 21:1-11; Mak. 11:1-11; Luk. 19:28-40)
12Ana usana u tawai, reve oɓolo a ama na̱ a̱bunda̱ a na a̱ ta̱wa̱i adama a̱ A̱buki a Mapasa† a uwwa a na Yesu ta̱ lo a̱ ta̱wa̱ Urishelima. 13Ɗaɗa a tarai ashuwa-shuwa reve a̱ ꞌya̱wa̱ a gaꞌan na̱ Yesu, a yisaali,
“Husana!† A ciɓala A̱sula̱!”
“A̱sula̱ a zuwaa za na ta̱wa̱i a̱tsuma̱ a ala a̱ A̱sulazuva abaꞌun!”
“A̱sula̱ a zuwaa Mogono ma Israꞌila abaꞌun!”
14A̱vu Yesu zami molloli reve u kumba yi. A̱yi ɗa ili i na Zakariya vumava̱sula̱ dammai,
15“Ama a̱ Urishelima#12:15 Zak. 9:9. Aatagada a Adanshi a̱ A̱sula̱ a Tsugana tsa yuwan ta̱ ulinga na̱ Sihiyona, amma aala o ro a̱ Urishelima a ɗa waru. she yu uwwa wovon wan!
Mogono ma̱ ɗu mo ta̱ lo a̱ ta̱wa̱, waru u ta kumba molloli.”
16A mantsa mo ndolo, ojoro a̱ yi a gura reve ili i ndolo shi. Amma a̱ tyo ɗe a mantsa ma na a̱ ꞌya̱sa̱n niyi a̱ tyo a tsugbain, reve a cuwan a na Adanshi a̱ A̱sula̱ a dammai ne adama a̱ yi, waru a yuwaan yi ta̱ ili i nda.
17Ama na̱ a̱bunda̱ a̱ shi ta̱ oɓolo na̱ a̱yi, ana u ꞌya̱sa̱in Liꞌazaru a̱tsuma̱ a̱ a̱kwa̱kwa̱, a̱vu u damma yi wu uta̱ a aason. A̱ shi ta̱ a dansaa ozo o ro ili i na Yesu yuwain. 18Ama na̱ a̱bunda̱ o uta̱ ta̱ aa cina yi, adama a na a uwwai ili ya asalama i nda. 19Ɗaɗa Afarishi† a dammulai, “Ye ene ta̱, tsu tsura̱ ulyuwu wa aci shi suru suru! Ka̱lyuwa̱i, uvaɗi suru u to tono yi!”
Nheleni n ciga ta̱ me ene Yesu
20Nheleni† n ro n ꞌya̱wa̱ ta̱ fo Urishelima a yuwan a̱ga̱nda̱ a mantsa ma̱ A̱buki a Mapasaꞌa. 21Reve a̱ ꞌya̱wa̱ uba̱ta̱ wa̱ Filibu (vuma na uta̱i diga a̱ lyuci va Besaida a̱tsuma̱ a̱ Ga̱lili) a̱vu a damma, “Manlu, tsu ciga ta̱ tse ene Yesu.” 22A̱vu Filibu ꞌya̱wa̱ u damma Andarawu, reve ele ra a̱ ꞌya̱wa̱ a damma Yesu.
23A̱vu u damma le, “Mantsa ma yuwan ta̱ ana Mawun ma Vuma† ma̱a̱ ushi tsugbain tsa̱ yi. 24Amayun a ɗa maa dansaa ɗu, cuꞌun vu shina ta̱ na riya̱i e iɗa waa ka̱mba̱ a̱bunda̱ shi, she nu u kuwa̱. Agba nu u kuwa̱, u ta matsan a̱bunda̱. 25Za na cigai wuma wa̱ yi a̱tsuma̱ o uvaɗi u nda u ta lamba yi. Za na wasain wuma wa̱ yi o uvaɗi u nda u ta̱ tsura̱ wuma u na woo koto shi. 26Za na cigai u yuwaan mu tsugbashi suru, u ciga u ꞌyuwan u ta̱wa̱ u kuru mu, adama aagbashi a̱ va̱ a̱ da̱na̱ oɓolo na̱ a̱mu uba̱ta̱ u na n ri suru. Waru Dada va̱ ta ca za na yuwaan numu tsugbashi suru tsugbain.”
Yesu yuwan ta̱ adanshi o ukwa̱ wa̱ yi
27A̱vu Yesu lyuwa elime na adanshi, “Gogo nda n ta̱ a̱tsuma̱ a addama. N damma, ‘Dada wawa mu na̱ mantsa ma nda?’ Ne ɗa shi, n ta̱wa̱ ta̱ a mantsa ma nda adama a nda, adama n sowo a̱tsuma̱lima̱. 28Dada, roco ama tsugbain tsa̱ wu!”
Ɗaɗa uɗyo wu uta̱i diga zuva a̱vu u damma, “N roco ta̱ ɗe cine n ri na̱ tsugbain waru n ta̱ da̱shi roco.”
29Oɓolo a ama a na a̱ da̱na̱i lo mishin a uwwa ta̱ uɗyoꞌo, reve ozo o ro e le a damma tsata tsa ɗa. Ozo o ro gba a damma, “Malingata ma̱ A̱sula̱ ma ɗa ma yuwain adanshi na̱ a̱yi!”
30A̱vu Yesu damma le, “Adama a̱ ɗu a ɗa uɗyoꞌo u ta̱wa̱i, adama a̱ va̱ a ɗa shi. 31Gogo mantsa ma ɗa na A̱sula̱ e geꞌeto ama o uvaɗi. Waru mantsa ma ɗa ana A̱sula̱ a̱a̱ gba̱ra̱ Male za na aa yuwusan tsugono tsu uvaɗi tsa nda. 32Agba na̱ a̱ ꞌya̱sa̱n mu a akpata a̱tsuma̱ o uvaɗi, n to rono koyan a̱ ta̱wa̱ ya̱ꞌa̱ va̱.” 33Yesu damma ta̱ ne adama u roco cine wa̱a̱ kuwa̱.
34Reve oɓolo a amaꞌa a̱ usu, “Wila̱ u tsu u damma tsu ta̱ a na Zamawawaꞌa u ta̱ da̱na̱ lo kuci. To, cine tsa ɗa, vaa damma a̱ ta̱ ꞌya̱sa̱n Mawun ma Vuma zuva va akpata? Zane ɗa Mawun ma Vuma ma ndaꞌa?”
35A̱vu Yesu usu, “I ta̱ tsura̱ ekan a na a jima keꞌen. I lyuwa elime na̱ mmalu ekaꞌan ubuwu lo. Ni i yuwan ne, to, ya̱a̱ ta̱ɗa̱tsa̱ shi ni irumbu i ta̱wa̱. Amma ni i yuwan mmalu a̱tsuma̱ e irumbu, yee reve uba̱ta̱ u na yee tyo shi. 36Cayi za na ta̱wa̱i ne ekan okolo a̱ ɗu, a̱yi ubuwu oɓolo na̱ a̱ɗu. Ɗaɗa yoo oꞌwo ama a na a̱ ri nden a̱tsuma̱ e ekan.”
Ama o ro a ꞌyuwan ta̱ a ca Yesu okolo e le
Ana Yesu dammai ne, reve u ka̱ra̱ u ꞌya̱wa̱ u paꞌan adama e ene yi wan. 37Ko na u yuwain iroci yi linga va asalama a nda a̱ ma̱ka̱ka̱n me le, a̱ ushi yi shi. 38A yuwan ta̱ ne adama e ili i na Ishaya vumava̱sula̱ dammai wo oꞌwo amayun,
“A̱sulazuva, zane ɗa usuyi ili i na tsu damma nle?
Waru zane ɗa enei ucira wa̱ wu?” #Isha. 53:1.
39Ishaya† waru u damma ta̱ ili i na i zuwai a̱ kuɗa̱i a̱ usu a̱yi ɗa:
40“A̱sulazuva a̱ rumba̱na̱to ta̱ esu a ama,
reve waru u zuwa o oꞌwo aza a aciyogbamu.
U yuwan ta̱ ne adama e ene ko e reve wan,
waru adama a̱ ka̱mba̱ uba̱ta̱ wa̱ A̱sulazuva u ka̱mbuwa̱ le gbaga wan.” #Isha. 6:10.
41Ishaya damma ta̱ ne, adama a na we enei tsugbain tsa̱ Yesu, a̱vu u yuwan adanshi a̱ yi.
42A mantsaꞌa, reve azagbain na̱ a̱bunda̱ a ca yi okolo e le. Agba adama a na aa uwwusa wovon wa Afarishi, a yuwan adanshi a̱ yi a alanga eteshe shi, adama Afarishi a̱ gba̱ra̱ le a̱tsuma̱ a̱ a̱a̱ꞌisa̱ꞌa̱ wan. 43A laꞌa ta̱ ciga ama a cuwa le a na A̱sula̱ a cuwa le.
Yesu ta̱wa̱ ta̱ adama u wawa uvaɗi
44A̱vu Yesu damma koyan a uwwusa, “Za na ushi numu suru, u ushi mu ta̱ oɓolo na̱ za na lyungu numu. 45Za na suru ene numu, we ene ta̱ za na lyungu numu. 46N ta̱wa̱ ta̱ a̱tsuma̱ o uvaɗi ana za na ta̱wa̱yi ne ekan a̱tsuma̱ o uvaɗi, adama za na ca numu okolo waa buwa a̱tsuma̱ e irumbu shi.
47“Za na suru uwwai adanshi a̱ va̱, reve u ꞌyuwan a̱ kuru le, a̱mu ɗa moo kototo yi shi. Adama a na n ta̱wa̱ adama n kototo uvaɗi shi, amma adama n wawa yi. 48Agba ili i na yoo kototo za na ꞌyuwan numu na adanshi a̱ va̱ o ta̱ lo. Adanshi a na n dammai, a̱yi ɗa ili i na yoo kototo yi o urana wu ukosu. 49Ili i na moo ritosu ili ya aciya̱va̱ i ɗa shi. Dada na lyungu numu, a̱yi ɗa u damma numu ili i na maa damma ni ili i na moo rito. 50N reve ta̱ ili i na u dammai ama a yuwan, iliꞌi i zuwa ta̱ ama a̱ tsura̱ wuma u na woo koto shi. A̱yi ɗa i zuwai maa dansaa ɗu ili i na Dadaꞌa u damma numu gan.”
Currently Selected:
Yahaya 12: tswNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.