ລູກາ 9
9
ພຣະເຢຊູເຈົ້າແຕງສາວົກສິບສອງນະລໍ້ປໍ້້
(ມທ 10:5-15; ມຣກ 6:7-13)
1ເຢີພຣະເຢຊູເຈົ້າກາວອັກຄະສາວົກສິບສອງນະເຕິລວມມະຕຼຸຕໍ່ບຣານພຣະອົງແລະພຣະອົງກໍໂຢນຣິດເດດ ແລະສິດອໍານາດເຢີຈຸມປີດໍ ເພື່ອໄລ່ຢຼາງເລິ້ຍອໍຄູຕະໂປຼລ ແລະເພື່ອປິ່ນປົ່ວພະຍາດໂຣຄາຕ່າງໆ. 2ຢຼ້າຍເກີດກຼີພຣະອົງກໍແຕງຈຸມອັກຄະສາວົກລໍ້ປໍ້້ປະກາດເລື່ອງວິທີ່ພຣະເຈົ້າປົກຄອງເໜືອປະຊາຊົນຂອງພຣະອົງ(ອານາຈັກຂອງພຣະເຈົ້າ) ແລະຕະໂຢນກຸ້ຍໄອໂຊອໍພະຍາດ. 3ພຣະເຢຊູສັ່ງເຢີຈຸມປີດໍຣ້ວຍ, “ເຢີຫະດ້າວປໍ້້ຄະນ້າກຼີ ຊິນອິດອະໄມ້ປໍ້້ດອງ ເລິ້ຍຣ້ວຍ ແຕ່ລອ້ງທະລອງ, ກະຖົງ, ແນວຈ້າ, ພຣະ, ແຕ່ປຼອງເສິບກໍເລິ້ຍບອນໂຢນຖືປໍ້້ເພື່ອປ່ຽນ. 4ດຸງມໍ້ທີ່ຕອນຣຳ້ຈຸມແປຼ ຈົ່ງອັດເຕິດຸງກຼີ ຈົນກ່ວາກະເລີ້ຍເວລາທີ່ຈຸມແປຼລໍ້ປໍ້້ເກີດບອນກຼີ. 5ເມືອງມໍ້ ທີ່ເລິ້ຍບອນຣຳ້ຈຸມແປຼ ຈົ່ງຫະລຸ້ເກີດເມືອງກຼີ ແລະຕະບຣຸ້ບໍ້ລໍ້ເກີດຢື່ງຂອງຈຸມແປຼ ເພື່ອເກີດພະຍານຕໍ່ສູ້ຈຸມດໍ ສິ່ງນໍທີ່ສະແດງໂຢນປີດໍຣ້ວຍ ຈຸມປີດໍຣຳ້ຜິດຊອບສຳລັບການປະຕິເສດຂໍ້ຄວາມຂອງພຣະເຈົ້າທີພຣະເຈົ້າຈະແຊ້ງໂທດຈຸມປີດໍ.” 6ເກີດກຼີຈຸມສາວົກກໍພາລໍ້ຫະດາ້ວຄະນ້າປໍ້້ ຕາມຄູເວລ ຄູເມືອງປະກາດຂ່າວປະເສີດ ແລະຕະໂຢນກຸ້ຍໄອຈະໄອໂຊອໍພະຍາດ.
ເຮໂຣດເກີດເວີຍຄວາມກັງວົນໃຈ
(ມທ 14:1-12; ມຣກ 6:14-29)
7ເຢີເຮໂຣດອັນຕີປາ ຜູ້ປົກຄອງເມືອງຄາລີເລບອນຊັງເລື່ອງເອີ້ຍມະກຼີ ທີ່ເກີດຊໍ້. ອຼີກຼີ ດໍຈິ່ງອຸກພະໄຫ້ງ ເພາະບາງນະໂຊລຣ້ວຍ, “ດໍຄຣາຍໂຢຮັນຜູ້ໂຢນບັບຕິສະມາພຣະເຈົ້າບອນຕະໂຢນດໍລ້າມົ໋ງເວິຍຊີວິດ ແອັ້ນເຢີ.” 8ຫະຣ້າກຸ້ຍກະນໍ້ໂຊລຣ້ວຍ ພຣະເຢຊູຜູ້ປະກາດພຣະທາໍເອລີຢາຜູ້ຊຶ່ງບອນລ້າເຕິເກີດສະຫວັນ “ແລະກຸ້ຍກະນໍ້ໂຊລຣ້ວຍ” ຄຣາຍຜູ້ທໍານວາຍກຸ້ຍມະນະຕອນສະໄໝບູຮານບອນລ້າມົ໋ງເວິຍຊີວິດແອັ້ນ. 9ແຕ່ເຮໂຣດອັນຕິປາຢຼະໂຊລຣ້ວຍ, “ກືຢຼະກັ້ນປະລໍໂຢຮັນຢ້ຼາຍ, ແຕ່ກຸ້ຍທີ່ກືເວິຍຊັງກະເລິ້ຍເລື່ອງນໍ ຄຣາຍນູ້ມໍ້ນິ?” ຢ້ຼາຍເກີດກຼີເຮໂຣດອັນຕິປາກໍຫລັ້ງໂອກາດທີ່ຈະທຣຸ້ມພຣະເຢຊູເຈົ້າ.
ພຣະເຢຊູເຈົ້າບອນບັ້ນກຸ້ຍຫ້າພັນນະ
(ມທ 14:13-21; ມຣກ 6:30-44; ຢຮ 6:1-14)
10ຢຼ້າຍຈຸມອັກຄະສາວົກກໍບອນຣ້າເຕິແອັ້ນ ເຢີຈຸມປີດໍລາຍງານເຢີພຣະເຢຊູເຈົ້າ ກະເລິ້ຍສິ່ງທີ່ຈຸມບອມຢຼະຕະ ຢ້ຼາຍພຣະອົງກໍພາຈຸມປີດໍປໍ້້ຕ່າງຫາກ ທີ່ເມືອງມະໄຫ້ລພະນຶ້ຣ້ວຍ ເບັດສາອີດາ. 11ເຢີປະຊາຊົນບອນຊັງກະເລິ້ຍເລື່ອງນໍ ຈຸມປີດໍກໍຕິດຕາມພຣະອົງປໍ້ ຫະຣ້າພຣະອົງກໍຕອນຣຳ້ຈຸມປີດໍ ແລະອ້າຈຸມປີດໍກະເລິ້ຍເລື່ອງວິທີທີ່ພຣະເຈົ້າປົກຄອງ (ອານາຈັກຂອງພຣະເຈົ້າ) ທັງປິ່ນປົ່ວຮັກສານູ້ທີ່ຕ້ອງການໄອ້ເປິ້ດອໍເກີີດການໄອຈະ ບອນໂຊ. 12ເຢີມະຕຼາງຫະໂຕ້ເຢີ ຈຸມອັກຄະສາວົກກໍເຕິເຢີພຣະອົງ ແລະໂຊລຣ້ວຍ, “ຈົ່ງອ້າປະຊາຊົນເລີກໂຈ້ສາເພື່ອໂຢຼນຈຸມປີດໍປໍ້ເຢີເວລປະດາຍເວລຫະແຣແຖບນໍ ຫລັ້ງບ້ອນພັກແລະແນວຈ້າ ເພາະທີ່ນໍເກີດບອນມິດງຽບ.” 13ແຕ່ພຣະເຢຊູເຈົ້າກ່າວເຢີຈຸມປີດໍຣວ້ຍ, “ໂຢນຈຸມແປຼເກີດຜູ້ບັ້ນຈຸມຮີສາ.” ຈຸມອັກຄະສາວົກທະອອຍຣ້ວຍ, “ຈຸມກືເວິຍໂດຍໂບ໋ຫ້າກ້ອນນັງເປ້ບາ່ລໂຕມະກີຼ ທ່ານຕ້ອງການໂຢນຈຸມຮີປໍ້້ຈອງແນວຈາ້ໂຢນປາຊາຊົນເອີ້ຍມະກຼີນໍຈາລະ?” (14ເຕິບອນກຼີເວິຍກຸ້ຍໂກນປະມານຫ້າພັນນະ) ພຣະເຢຊູເຈົ້າສັ່ງຈຸມສາວົກຂອງພຣະອົງຣ້ວຍ,“ຈົ່ງຈັດປະຊາຊົນໂຢນຕະກູແຊ້ງເກີດກຸ່ມ ກຸ່ມປະມານລະຫ້າສິບນະ.” 15ຈຸມສາວົກກໍປະຕິບັດຕາມ ແລະຈັດປະຊາຊົນຄູນະຕະກູແຊ້ງເກີດກຸ່ມ. 16ເກີດກຼີພຣະອົງກໍຣຳ້ອິດໂດ້ຍໂບ໋ຫ້າກ້ອນນັງເປ້ບາລຕະໂປຼລ ຕະເຫງິ້ງບະຣານຊໍ້ເຢີຟຣ້າແລະໂມທະນາຂອບພຣະຄຸນພຣະເຈົ້າພຣະເຈົ້າສາໍລັບແນ້ວຈ້າ ພຣະອົງບອນແບ່ງແນວຈ້າກຼີ ແລະມອບໂຢນຈຸມສາວົກ ເພື່ອອິດປໍ້້ຢາຍໂຢນປະຊາຊົນ. 17ຈຸມປີດໍບອນຈ້າປະສາຍຄູນະ ແລະສ່ວນທີ່ນັງໄດເຫຼື່ອກຼີກໍເຣິບອນເຕັມສິບສອງກະບຸງ.
ເປໂຕປະກາດຣ້ວຍພຣະເຢຊູເຈົ້າເກີດພຣະຄຣິດ.
(ມທ 16:13-19; ມຣກ 8:27-29)
18ອັດເຕິມູຕະງາຍ ເຢີພຣະເຢຊູເຈົ້າກຳລັງພາວັນນາອະທິຖານອັດຕາ່ງຫາກ ເວິຍແຕ່ຈຸມສາວົກຂອງພຣະອົງອັດບ້ອນກຼີ ພຣະອົງຕະມໍ໋ຈຸມສາວົກຣ້ວຍ,“ກຸ້ຍກະເລິ່ງນະໂຊລມະຕຼຸຣ້ວຍ ກືຄຣາຍງ້າຍນິ້?” 19ຈຸມປີດໍທະອອຍຣ້ວຍ, “ບາງນະໂຊລຣ້ວຍ ທ່ານຄຣາຍໂຢຮັນບັບຕິສະໂຕກຸ້ຍກະນໍ້ໂຊລຣ້ວຍ ທ່ານຄຣາຍເອລີຢາ ສ່ວນກຸ້ຍກະນໍ້ກະນໍ້ແອັນໂຊລຣ້ວຍທ່ານຄຣາຍຜູ້ທຳນວາຍກຸ້ຍມະນະນຸງບັນດາຜູ້ທໍານວາຍຣູສະໄໝບູຮານ ທີ່ລ້າມົ້ງເວິຍຊີວິດ.” 20ຢ້າຼຍພຣະອົງຕະມໍ໋ຈຸມປີດໍຣ້ວຍ, “ຫະຣ້າຈຸມແປຼເດ ຣ້ວຍກືຄຣາຍງ້າຍນິ້?” ເປໂຕທຣະອ້ອຍຣ້ວຍ, “ທ່ານຄຣາຍພຣະຄຣິດພຣະຜູ້ຊ່ວຍໂຢນພົ້ນຊຶ່ງພຣະເຈົ້າບອນສັນຍາຣ້ວຍຈະຢຼວນເຕິ.”
ພຣະເຢຊູເຈົ້າທຳນວາຍກະເລິ້ຍການກະເຈດຂອງພຣະອົງ
(ມທ 16:20-28; ມຣກ 8:30-9:1)
21ຢຼ້າຍພຣະເຢຊູເຈົ້າກໍສັ່ງຄຣ້າຈຸມປີດໍຢ່າງເດັດຂາດ ເລິ້ຍໂຢນອ້າເລື່ອງນໍເຢີນູ້ມໍ້ 22ແລະ ກ່າວຕື່ມຣ້ວຍ, “ບຸດມະນຸດຕ້ອງທົນທຸກທໍລະມານທີ່ເກີດຕາກຼໍ້ຢ່າງໜັກກະເລິ່ງປະການ ບັນດາກຸ້ຍເຄ້ຣງ ບັນດາຫົວໜ້າປະໂຣຫິດ ແລະຈຸມທໍາມະຈານຈະເລິ້ຍຍອມຣຳ້ກື ເກີດພຣະຄຣິດພຣະຜູ້ຊ່ວຍໂຢນພົ້ນ, ກືຈະຄຣາຍກະເຈຼດ, ແຕ່ເຕິຕະງາຍທີ່ສາມ ກືຈະຄຣາຍຊົງບັນດານໂຢນລ້າມົ໋ງເກີດກະເຈດ.” 23ເຢີພຣະອົງກໍກ່າວເຢີປະຊົນເອີ້ຍມະກຼີທີ່ອັດບອນກຼີພ້ອມນັງສາວົກຂອງພຣະອົງຕ້ອງການປະຕິບັດຢ່າງລະແລັນ, “ຄັນນູ້ມໍ້ນຸງຈຸມແປຼຕິດຕາມກືເຕິ ນູ້ກຼີຕ້ອງປະຕິເສດຄວາມປາຖະນາທີ່ເຫັນແກ່ຕົວຈຸມແປຼຕ້ອງເຊື່ອຫະແງ້ພຣະເຢຊູເຈົ້າແລະກຸ້ຍກຼີຈະພ້ອມທົນທຸກທໍລະມານແລະຍອມກະເຈດເພື່ອຈະຕິດຕາມພຣະເຢຊູເຈົ້າຣຳ້ດັ້ວລ້ອງກາງແຂນບອມຢຼະຄູໆຕະງາຍ ແລະເຕິປໍ້ປິນກື. 24ຄັນນູ້ມໍ້ທີ່ຕ້ອງການທີ່ຈະຮັກສາວິທີການດຳເນີນຊີວິດຫະຣ້າໂລກຂອງບອມຢຼະດໍຈະເລິ້ຍບອນຣຳ້ຊີວິດນິລັນດອນມະຕຼຸ້ນັງພຣະເຈົ້າແຕ່ນູ້ມໍ້ທີ່ພ້ອມສະຫຼະຊີວິດຂອງບອມຢຼະເພາະດໍເຊືອນຸງກື ດໍຈະບອນຣຳ້ຊີວິດນິລັນດອນມະຕຼະນັງພຣະເຈົ້າ. 25ເຫດອັນກຼີ ຄັນນູ້ມໍ້ບອນສິ່ງຂອງທັງໂລກ,ແຕ່ຈະເປິ້ດຊີວິດນິລັນດອນຂອງບອມຢຼະ ນູ້ກຼີຈະບອນປະໂຫຍດອະໄມ້? 26ອັນກຼີ ຄັນນູ້ມໍ້ເວິຍຄວາມກະດ້າກະລຸງເລື່ອງກື ແລະນຸງເລື່ອງຖ້ອຍຄຳຂອງກື ບຸດມະນຸດກໍຈະເວິຍຄວາມກະດ້າກະລຸງເລື່ອງຂອງນູ້ກຼີ ເຢີກືລ້າເຕິເຢີແຜ່ນບິ້ໂລກດ້ວຍຣິດອຳນາດເອີ້ຍມະນໍ້ຂອງກື ແລະຄວາມເຄິ້ຣຍສຸດຂອງພຣະເຈົ້າແຫ່ງພຣະບິດາຂອງກືແລະນຸງຄວາມເຄິ້ຣຍສຸດຂອງບັນດາເທວະດາທີບໍຣິສຸດທີ່ຈຸມປີດໍບອນເວິຍມະຕຼຸນັງພຣະເຈົ້າ. 27ກືອ້າແປຼກະເລິ່ງນະຕາມຄວາມຈິ່ງຣ້ວຍ, ເວິຍບາງນະເຕິບອນນໍຈະເລິ້ຍຮອຍຣົດແຫ່ງຄວາມກະເຈດ ຈົນກ່ວາຈຸມແປຼຈະບອນຫອມການປົກຄອງຂອງພຣະເຈົ້າເໜືອປະຊາຊົນຂອງພຣະອົງຍຸງຈຸມແປຼກະເຈດປໍ້(ອານາຈັກຂອງພຣະເຈົ້າ).”
ພຣະເຢຊູເຈົ້າບອນປ່ຽນພຣະລັກສະນະ
(ມທ 17:1-8; ມຣກ 9:2-8)
28ຢຼ້າຍເກີດທີ່ພຣະເຢຊູເຈົ້າກ່າວຖ້ອຍຄຳອັນນໍເຢີ ປະມານມູອາທິດພຣະອົງກໍພາເປໂຕ,ໂຢຮັນ ແລະ ຢາໂກໂບຊໍ້ປໍ້້ເຕິໂກ໋ຫະຢົ້ງນັງພຣະເຢຊູເຈົ້າ ເພື່ອພາວັນນາອະທິຖານ. 29ຂະນະທີ່ທີ່ພຣະເຢຊູເຈົ້າພາວັນນາອະທິຖານຕອນກຼີ ບຣານຂອງພຣະອົງກໍຊົງປ່ຽນປໍ້້ ແລະປຼອງເສິບຂອງພຣະເຢຊູເຈົ້າກໍບະລ້າຍເຫຼື້ອມຕະງ້າ(ອ້າງແຈ້ງ). 30ເຕິອັນກຼີ ກໍເວິຍບາລນະກຳລັງຫະຣ້ວຍອັດນັງພຣະເຢຊູເຈົ້າ ບາລນະກຼີຄຣາຍໂມເຊ ແລະເອລີຢາ 31ບອນເຕິຫະຟຼ້າຄວາມກະເຄຣິ້ຍທີ່ສຸດນັງສະຫງ່າຣາສີເກີດສະຫວັນທີແຈ້ງທີ່ສຸດ ເອີ້ຍບາລນະ(ໂມເຊແລະເອລີຢາ)ຫະຣ້ວຍອັດນັງພຣະເຢຊູເຈົ້າ ກ່າວກະເລິ້ຍການທີ່ພຣະອົງ ຈະສະເດັດໂລກປໍ້ເຊິ່ງເລື່ອງນໍສຳເລັດເຕິນະຄອນເຢຣູຊາເລັມ. 32ຫະຣ້າເປໂຕນັງໝູ່ນູ້ຂອງອາຢຼະ ຕ່າງກໍບິດງຸ້ລ,ແຕ່ເຢີຈຸມປີດໍບອນຫະຢຼືຊໍ້ເຢີ ຈຶ່ງຫອມດ້ວຍຄວາມສະຫວ່າງເກີດສະຫວັນຄວາມສະຫວ່າງທີສຸດນັງພຣະເຈົ້າພຣະອົງບອນເວິຍນັງພຣະເຈົ້າ ນັງບາລນະທີ່ກຳລັງຕະເຢິ່ງອັດນັງພຣະເຢຊູເຈົ້າ. 33ເຢີບາລນະກຼີກຳລັງລໍ້ເກີດພຣະເຢຊູເຈົ້າປໍ້້,ເປໂຕຈຶ່ງກ່າວເຢີຕໍ່ພຣະເຢຊູເຈົ້າຣ້ວຍ, “ພຣະອາຈານເອີຍ, ເກີດການອໍລືໆທີ່ຈຸມກືອັດບ້ອນນໍ ໂຜດໂຢນຈຸມກືໂຈ໋ປຼູ່ແປ້ຫັລງຊໍ້ ຄືຫັລງມະໄຫ້ລສຳລັບທ່ານ ຫລັງມະໄຫ້ລສຳລັບໂມເຊ ແລະຫລັງມະໄຫ້ລແອັ້ນສຳລັບເອລີຢາ.” (ເປໂຕເລິ້ຍຫະຢຼືຈະຣ້ວຍບອມຢຼະກຳລັງໂຊລອະໄມ້.) 34ຂະນະທີ່ເປໂຕກຳລັງໂຊລອັນກຼີ ກໍເວິຍກ້ອນຕະລຸກໂລ້ຍແຊ້ງເຕິກະເດິ໋ລຈຸມປີດໍດ້ວຍກະໂດະ ແລະຈຸມສາວົກກໍກຼໍ້ເຢີອັດເຕິກ້ອນຕະລຸກກຼີ. 35ຢຼາຍກໍເວິຍສຽງມະໄຫ້ລກະຊ້າງລໍ້ເຕິເກີດກ້ອນຕະລຸກກຼີຣ້ວຍ, “ທ່ານນູ້ນໍເຫີ້ຍ ເກີດບຸດຂອງແຮນູ້ທີ່ບອນເລືອກດໍ້ ຈົ່ງເຊື່ອຫະແງ້ພຣະເຢຊູເຈົ້າ.” 36ເຢີສຽງຂອງພຣະເຈົ້າກຼີຫະອຽດຢຼາ້ຍກໍເວິຍແຕ່ພຣະເຢຊູເຈົ້າອົງມະນະອັດເຕິກຼີ ສ່ວນສາວົກເອີ້ຍແປ້ກໍດໍ້ເລື່ອງເອີ້ຍມະກຼີນໍດໍ້ກະລຸງພະໄຫ້ງ ແລະເລິ້ຍບອນອ້ານູ້ມໍ້ເຕິເວລາກຼີກະເລິ້ຍສິ່ງທີ່ຈຸມປີດໍບອນຫອມ.
ພຣະເຢຊູເຈົ້າປິ່ນປົວໄບ້ໄກ້ມະນະທີ່ຢຼາງເລິ້ຍອໍໂມດອັດ
(ມທ 17:14-18; ມຣກ 9:14-27)
37ຕະງາຍຕະແມ້ເຕິ ຂະນະທີ່ພຣະເຢຊູເຈົ້ານັງສາວົກເອີ້ຍແປ້ ບອນແຊ້ງເຕິເກີດຫະຢຼົ້ງໂກ໋ກຼີກໍເວິຍປະຊາຊົນຢ່າງກະເລິ່ງປູດເຕິເຢີພຣະອົງ. 38ຂະນະກຼີ ເວິຍກຸ້ຍໂກນມະນະເຕິເກີດປະຊາຊົນກຼີໂອ້ຍຊໍ້ຣ້ວຍ, “ອາຈານເອີຍກືແສ້ ໂຢນຄວາມຫະເອກໂຢນແນ້ໄກ້ໂກນຂອງກືນໍໂຢຼ. ດ້ວຍຣ້ວຍ, ດໍຄຣາຍໄກ້ໂກນມະນະອັນກືຢຼະ. 39ຢຼາງເລິ້ຍອໍທີ່ໂມດຈະໃບ້ໄກ້ເທື່ອມໍ້ ໃບ້ໄກ້ກໍໂອ້ຍຊໍ້ເທື່ອກຼີ ທັນທີ່ໂລດ ຕະໂຢນໃບ້ໄກ້ຊັກດິ້ນຈົນແຣງຈົນເດີ໋ ລະວີ້ປູມປຼ່ອຍ ດໍຕະໂຢນຈະໃບ້ໄກ້ຟົກຊຳ້ ແລະເລິ້ຍຍອມຫະລຸ້ລໍ້ປໍ້້ໂດຍງ່າຍ. 40ກືຢຼະບອນແສ້ວອນໂຢນຈຸມສາວົກຂອງທ່ານ ບັງຄັບໄລ່ຢຼາງເລິ້ຍອໍລໍ້ ແຕ່ຈຸມປີດໍຕະເລິ້ຍເກີດ.” 41ພຣະເຢຊູເຈົ້າທຣະອອຍຣ້ວຍ, “ໂອ ກຸ້ຍເຕິຍົກສະໄໝທີ່ເລິ້ຍບອນຄວາມເຊື່ອ ແລະຊົ່ວຊ້າເອີຍ ກືຈະຕ້ອງອັດນັງຈຸມແປຼແອັ້ນດິນສາໍມໍ້?ກືຈະຕ້ອງອົດທົນນັງຈຸມແປຼແອັ້ນດິນມະມໍ້?” ຢ້ຼາຍພຣະເຢຊູເຈົ້າກໍກ່າວເຢີກຸ້ຍໂກນກຼີຣ້ວຍ “ຈົ່ງພາໄກ້ໂກນຂອງມາຍເຕິດໍລະແມ້.” 42ຂະນະທີ່ໄກ້ໂກນກຳລັງເຕິກຼີ ຢຼາງເລິ້ຍອໍກໍບອນຕະໂຢນໃບ້ໄກ້ເດິ້ມແຊ້ງເຢີພື້ນບິ້ຊັກດີ້ນໂປລເກືອກປໍ້ລາ້ໂລດ, ແຕ່ພຣະເຢຊູເຈົ້າບອນໂຢນຄຳສັ່ງຊຳລະຢຼາງເລິ້ຍອໍກຼີແລະປິ່ນປົ່ວໃບ້ໄກ້ໂຢນເປິ້ດອໍ ຢຼາ້ຍຢຼວນລ້າໂຢນເຢີອຳຂອງໄກ້ໂກນກຼີ. 43ປະຊາຊົນເອີ້ຍມະກຼີຕ່າງກໍງຶດກະລັກພະໄຫ້ງປູດ ເຕິຣິດເດດອຳນາດອັນເຄິ້ຣຍຂອງພຣະເຈົ້າ.
ພຣະເຢຊູເຈົ້າທຳນວາຍກະເລິ້ຍຄວາມກະເຈດຂອງພຣະອົງ
(ມທ 17:22-23; ມຣກ 9:30-32)
ຂະນະທີ່ປະຊາຊົນນັງກະລັກພະໄຫ້ງນັງຄູສິ່ງ ທີ່ພຣະເຢຊູເຈົ້າບອນຕະກຼີ ພຣະອົງກໍກ່າວເຢີຈຸມສາວົກຂອງພຣະອົງຣ້ວຍ, 44“ຈົ່ງຈົດຈຳຖ້ວຍຄຳທີ່ກືກ່າວເຢີຈຸມແປຼນໍໂຢນອໍ ບຸດມະນຸດຈະຄຣາຍມອບດໍ້ກະລຸງຕີຂອງກຸ້ຍກະເລິ່ງນະ.” 45ແຕ່ດ້ວຍອຳນາດຂອງຈຸມສັດຕູຂອງຈຸມແຮຈຸມສາວົກເລິ້ຍເຂົ້າໃຈຖ້ອຍຄຳອັນນໍ ເພາະຖ້ອຍຄຳກຼີບອນຄຣາຍປິດບັງດໍ້ເກີດຈຸມປີດໍ ເພື່ອຣ້ວຍຈຸມປີດໍຈະເລິ້ຍສັ່ງເກດບອນ ແລະຈຸມປີດໍກໍກຼໍ້ທີ່ຈະຕະມໍ໋ພຣະອົງກະເລິ້ຍເລື່ອງນໍ.
ນູ້ມໍ້ຈະເກີດເຄິ້ຣຍກ່ວານູ້
(ມທ 18:1-5; ມຣກ 9:33-37)
46ເຢີບອນເກີດການທະຖຽງມະຕຼຸເຕິລະຫ່ວາງຈຸມສາວົກຣ້ວຍເຕິເຄິ່ງທຣະດີຂອງຈຸມປີດໍກຼີນູ້ມໍ້ເກີດເຄິ້ຣຍກ່ວາ ນູ້. 47ຫະຣ້າພຣະເຢຊູເຈົ້າຮອຍຄວາມຄິດກະຣຸງພະໄຫ້ງຂອງຈຸມປີດໍ.ອັນກຼີ ພຣະອົງຈຶ່ງໂຢນໃບ້ໄກ້ກຸ້ຍມະນະເຕິຕະເຢິ່ງອັດຕະໝັ້ນພຣະອົງ. 48ເຢີພຣະອົງກໍກ່າວນັງຈຸມສາວົກຣ້ວຍ, “ນູ້ມໍ້ທີ່ຕອນຣຳ້ໃບ້ໄກ້ກຸ້ຍນໍ ເຕິພະນຶ້ຂອງກື ນູ້ກຼີກໍຍອມຣຳ້ກື (ພຣະເຢຊູເຈົ້າ) ແລະນູ້ທີ່ຕ້ອນຣຳ້ກື ກໍຕ້ອນຣຳ້ນູ້ທີ່ບອນແຕງກືເຕິທຣະເລິຍ ເພາະຣ້ວຍ ນູ້ທີ່ຈຽມຈະທີສຸດແລະນູ້ທີ່ຣຳ້ໃຊ້ກຸ້ຍກະນໍ້ເຕິຈຸມແປຼ ນູ້ກຼີເຫິ້ຍ ເກີດກຸ້ຍເຄຣິ້ຍທີ່ສຸດ.”
ນູ້ມໍ້ເລິ້ຍຕໍ່ສູ້ແປຼກໍເກີດຫະຣ້າແປຼ
(ມຣກ 9:38-40)
49ເຢີໂຢຮັນກໍໂຊລນັງພຣະເຢຊູເຈົ້າຣ້ວຍ, “ພຣະອາຈານເອີຍ, ຈຸມຮີບອນຫອມກຸ້ຍໂກນມະນະ ບັງຄັບໄລ່ຢຼາງເລິ້ຍອໍລໍ້ບອນ ເຕິພະນຶ້ຂອງມາຍ ແລະຈຸມຮີ ບອນຄຣ້າໂຢນດໍຫະເອີ້ຍ ເພາະດໍເລິ້ຍບອນຕິດຕາມພຣະອົງນັງຈຸມຮີ.”
50ແຕ່ພຣະເຢຊູເຈົ້າທຣະອອຍໂຢຮັນ ແລະຈຸມສາວົກກຸ້ຍກະນໍ້ກະນໍ້ຣ້ວຍ, “ຊິນຄຣ້າດໍເລີຍເພາະນູ້ມໍ້ທີ່ເລິ້ຍຕໍ່ສູ້ແປຼ ກໍເກີດຫະຣ້າຈຸມແປຼເຢີ.”
ຊາວຊາມາເຣຍມູເວລເລິ໋ຍຍອມຣຳ້ພຣະເຢຊູເຈົ້າ
51ເຢີຕະໝັ້ນເວລາທີ່ພຣະເຢຊູເຈົ້າຈະຄຣ້າຍຣຳ້ຊໍ້ເຢີພຣະເຈົ້າຜູ້ສະຖິດນຸງແຜ່ນບິ້ສະຫວັນເຢີ ເພາະພຣະອົງກໍຕັ້ງພະໄຫ້ງຢ່າງຄັກແນ່ທີ່ຈະປໍ້້ນະຄອນເຢຣູຊາເລັມ. 52ພຣະເຢຊູເຈົ້າບອນແຕງນູ້ຣຳ້ໃຊ້ປໍ້້ຍຸງພຣະອົງຈຸມປີດໍບອນໂມດປໍ້້ກະລຸງເວລມະໄຫ້ລຂອງຊາວຊາມາເຣຍ ເພື່ອຈັດຕຽມຄູສິ່ງດໍ້ສຳລັບພຣະອົງແລະຈຸມສາວົກຂອງກຸ້ຍກະນໍ້ຂອງພຣະອົງ. 53ແຕ່ປະຊາຊົນເຕິເວລກຼີເລິ້ຍຍອມຣຳ້ພຣະອົງ ເພາະພຣະອົງ ຕໍ້ບຣານຈະປໍ້້ນະຄອນເຢຣູຊາເລັມ. 54ເຢີສາວົກຂອງພຣະອົງຄືຢາໂກໂບ ແລະ ໂຢຮັນຫອມ ອີກຼີ ເຢີ ກໍໂຊລຣ້ວຍ, “ພຣະອົງເຈົ້າເອີຍ, ພຣະອົງໄອ້ໂຢນຈຸມຮີສັ່ງອຸ໋ຍແຊ້ງເຕິເກີດຟຣ້າສະຫວັນເພື່ອຈ໋ອງຜານປີດໍລະ?” 55ແຕ່ພຣະເຢຊູເຈົ້າປິນບຣານເຕິກ່າວຕິຕຽນຈຸມປີດໍ ແລະກ່າວຣ້ວຍ, “ຈຸມແປຼເລິ້ຍຮອຍລະຈຸມແປຼເວີຍພຣະໄຫ້ງອີມໍ້ພຣະເຈົ້າເກີດທຳມະຊາດ ແລະເວິຍລັກສະນະແຫ່ງພຣະວິນຍານຂອງພຣະເຈົ້າ ດ້ວຍຣ້ວຍ,ບຸດມະນຸດບອນເຕິ ເລິ້ຍບອນເພື່ອທຳລາຍຊີວິດກຸ້ຍ,ແຕ່ເຕິເພື່ອໂຜດມະນຸດໂຢນພົ້ນ.” 56ຢ້ຼາຍພຣະເຢຊູເຈົ້ານັງຈຸມສາວົກຂອງພຣະອົງກໍປໍ້້ທີ່ເວລກະນໍ້.
ນູ້ສະໝັກຈະຕິດຕາມພຣະເຢຊູເຈົ້າ
(ມທ 8:19-22)
57ຂະນະທີ່ພຣະເຢຊູເຈົ້ານັງຈຸມສາວົກປໍ້້ຕາມຄະນ້າເຢຣູຊາເລັມກຼີ ກໍເວີຍກຸ້ຍໂກນມະນະໂຊລນັງພຣະອົງຣ້ວຍ, “ພຣະອົງຈະປໍ້້ບອນມໍ້ ກືຢຼະກໍພ້ອມທີ່ຈະປໍ້້ບອນກຼີນັງພຣະອົງ.” 58ພຣະເຢຊູເຈົ້າທະອອຍດໍຣ້ວຍ,“ຈໍ້ໝາຈອກນັງເວີຍບອນບິດ ແລະໄກ້ເຫລ້ມເຕິຟຣ້າກໍເວິຍໂສມອັດສ່ວນກືບຸດມະນຸດເລີ້ຍບອນດຸງທີ່ຈະບິດ ກ່າວຣ້ວຍ ເວລດຳເນີນຊີວິດກໍ່ເລິ້ຍບອນ.” 59ພຣະອົງກໍກ່າວເຢີກຸ້ຍໂກນມະນະແອັ້ນຣ້ວຍ, “ຈົ່ງປິນກືເຕິ.”ແຕ່ກຸ້ຍໂກນກຼີທຣະອ້ອຍຣ້ວຍ,“ພຣະອົງເຈົ້າເອີຍ ແສ້ອະນຸຍາດໂຢນກືລາ້ໂຈ້ເຕິບສົບອຳຂອງກືຢຼະວາຍ.” 60ພຣະເຢຊູເຈົ້າທະອອຍໂກນນູ້ກຼີຣ້ວຍ, “ຈົ່ງຕ້າໂຢນກຸ້ຍກະເຈດເຕິບສົບງ້າຍຢຼະເທາະ,ນູ້ທີ່ເລິ້ຍເຊື່ອຫະແງ້ພຣະເຈົ້າແຕ່ສຳລັບມາຍ ຈົ່ງປໍ້້ປະກາດວິທີ ທີ່ພຣະເຈົ້າປົກຄອງ (ອານາຈັກຂອງພຣະເຈົ້າ) ປະຊາຊົນຂອງພຣະອົງ.” 61ເວິຍກຸ້ຍໂກນມະນະແອັ້ນບອນໂຊລຣ້ວຍ,“ພຣະອົງເຈົ້າເອີຍ ກືຈະປິນທ່ານປໍ້້ແຕ່ແສ້ອະນຸຍາດໂຢນກືລ້າໂຈ້ສັ່ງລາຄອບຄົວຂອງກືຢຼະວາຍ.” 62ພຣະເຢຊູເຈົ້າກ່າວເຢີດໍຣ້ວຍ, “ນູ້ມໍ້ທີ່ມະຢຼັ້ວປຼໍ້ຢຼ້າຍນັງຕະເປິ້ງລ້າໂກນ ນູ້ກຼີເລິ້ຍສົມຄວນນັງອານາຈັກຂອງພຣະເຈົ້າ ທຣະເລິຍເກີດຜູ້ຣຳ້ໃຊ້ສຳລັບພຣະເຈົ້າຄື່ທີ່ພຣະເຈົ້າທີປົກຄອງເໜືອປະຊາຊົນຂອງພຣະອົງ.”
Currently Selected:
ລູກາ 9: IRR
Highlight
Copy
Compare
Share
Want to have your highlights saved across all your devices? Sign up or sign in
Inh/In Bible by Beyond Translation is licensed under Creative Commons Attribution-ShareAlike 4.0 License.
