ລູກາ 8
8
ຈຸມກຸ້ຍກັນທີ່ປໍ້້ນັງພຣະເຢຊູເຈົ້າ
1ຢຼ້າຍເກີດກຼີເລິ້ຍບອນດິນ ພຣະເຢຊູເຈົ້າບອນຫະດ້າວຄະນ້າປໍ້້ຕາມເມືອງ ແລະຕາມເວລຕາ່ງໆເພື່ອປະກາດຂ່າວປະເສີດກ່ຽວນັງການປົກຄອງຂອງພຣະເຈົ້າໃນຊີວິດຂອງກຸ້ຍກະເລິ່ງນະ ເລື່ອງອານາຈັກຂອງພຣະເຈົ້າ,ສາວົກສິບສອງນະກໍປໍ້້ນັງພຣະອົງ 2ພ້ອມນັງຈຸມກຸ້ຍກັນບາງນະທີ່ບອນຄຣາຍປິ່ນປົວໂຢນພົ້ນເກີດຢຼາງເລິ້ຍອໍແລະໂຢນອໍພະຍາດຕ່າງໆຄື ມາຣີ (ນູ້ທີ່ກຸ້ຍກາວກັນຣ້ວຍໄທມັກດາລາ)ນູ້ທີ່ພຣະເຢຊູເຈົ້າບອນໄລ່ຢຼາງເລິ້ຍອໍເຈັດໂຕລໍ້, 3ໂຢຮັນນາ ກະປຼາຍຂອງຈູຊາຜູ້ທີ່ເກີດກົມມະວັງ (ຈູຊາຜູ້ບໍລິຫານນຸງຣາຊວັງ) ຂອງເຮໂຣດອັນຕິປາ ແລະ ນາງຊູຊັນນານັງກຸ້ຍກັນກະນໍ້ກະນໍ້ແອັນກະເລິ່ງນະ ທີ່ເຄີຍໃຊ້ຊັບສິນຂອງບອມຢຼະ ເພື່ອບົວລະບັດພຣະເຢຊູເຈົ້າ ແລະຈຸມສາວົກຂອງພຣະອົງ.
ຄຳອຸປະມາເລື່ອງນູ້ຫະຣ້າຍ
(ມທ 13:1-9; ມຣກ 4:1-9)
4ມູຕະງາຍ ກໍເວິຍປະຊາຊົນເກີດເມືອງຕາ່ງໆ ບອນສືບຕໍ່ເຕິເຢີພຣະເຢຊູເຈົ້າ ຈຸມປີດໍເຕິເຕົ້າໂຮມມະຕຼຸຢ່າງປູດປູດ ເຢີພຣະເຢຊູເຈົ້າກໍກ່າວຄໍາອຸປະມານໍຣ້ວຍ, 5“ນັງເວິຍໂກນມະນະລໍ້ປໍ້້ຫະຣ້າຍກະລ້ອງໂກ້ນກະລຸງປໍ້້ຼເຕິກຼີ ບາງກະລ້ອງກໍຫະໂຕ້ຕາມຄະນ້າກຸ້ຍຫະດ້າວກໍຄຣາຍກະເດນຈົ້ວ ແລະຟູງໄກ້ເຫລ້ມເຕິຟຣ້າກໍເຕິຕໍ໋ຈ້າກະລ້ອງກຼີເປິດ. 6ບາງກະລ້ອງກໍຫະໂຕ້ຄຣາຍບິ້ກະແຕ້ທີ່ເວິຍຕະມໍ້ ແລະເຢີໃບ້ຊໍ້ເຢີ ກໍສ້ຽມແທ້ຣງປໍ້້ເພາະບິ້ເລິ້ຍບອນຊຶມ. 7ບາງກະລ້ອງກໍຫະໂຕ້ຄຣາຍເຄິ່ງທຣະດີຫະປ່ຼຸລຫະລ້າ ຢຼ້າຍຫະປຼຸ່ລຫະລ້າກໍເຄິລຍຊໍ້ໂອບຮັດເປິດ. 8ແລະບາງກະລ້ອງຫະໂຕ້ຄຣາຍບິ້ອໍ ໂກ້ນຈຶ່ງໃບ້ອໍມາມຊໍ້ ແລະເກີດຜົນບອນລ້ອຍຕໍ່.” ເຢີພຣະເຢຊູເຈົ້າກໍໂອ້ຍຊໍ້ຣ້ວຍ,“ນູ້ມໍ້ເວິຍກະໂຕລຫະແງ້ ຈົ່ງຫະແງ້ອິດ ຈົ່ງຕັ້ງໃຈຫະແງ້ໂຢນອໍ.”
ຈຸດປະສົງຂອງຄຳອຸປະມາ
(ມທ 13:10-17; ມຣກ 4:10-12)
9ເຢີຈຸມສາວົກຂອງພຣະອົງ ກໍຕະມໍ໋ພຣະເຢຊູເຈົ້າ ກະເລິ້ຍຄໍາອຸປະມາກຼີຣ້ວຍເວິຍຄວາມໝາຍອີມໍ້. 10ພຣະອົງຊົງກ່າວຣ້ວຍ,“ສຳລັບຈຸມແປຼກຼີ ພຣະເຈົ້າບອນໂຜດໂຢນຈຸມແປຼຮອຍກະເລິ້ຍຄວາມເລິກລັບຢຼະຣູ ແຫ່ງອານາຈັກຂອງພຣະເຈົ້າ,ແຕ່ສຳລັບກຸ້ຍກະນໍ້ກຼີກືກ່າວເກີດຄໍາອຸປະມາ ເພື່ອຣ້ວຍ ເຢີຈຸມປີດໍແນ້ ແຕ່ຈະເລິ້ຍບອນຫອມ ແລະເຢີຈຸມປີດໍຫະແງ້ ແຕ່ຈະເລິ້ຍຮອຍ.”
ພຣະເຢຊູເຈົ້າອະທິບາຍຄຳອຸປະມາເລື່ອງນູ້ຫະຣ້າຍ
(ມທ 13:18-23; ມຣກ 4:13-20)
11“ຄໍາອຸປະມາກຼີເວິຍຄວາມໝາຍອີນໍ: ກະລ້ອງໂກ້ນກຼີ ຄຣາຍພຣະທຳຂອງພຣະເຈົ້າ. 12ກະລ້ອງໂກ້ນທີ່ຫະໂຕ້ຕາມຄະນ້າຫະດ້າວກຼີ ບອນເຢີຈຸມກຸ້ຍທີ່ບອນຊັງພຣະທຳ,ແຕ່ຢຼາງເລິ້ຍອໍເຕິຍາດອິດພຣະທຳປໍ້້ເກີດພະໄຫ້ງຂອງຈຸມປີດໍ ເພື່ອເລິ້ຍໂຢນຈຸມປີດໍເຊື່ອແລະພົ້ນບອນ. 13ກະລ້ອງທີ່ຫະໂຕ້ຄຣາຍກະແຕ້ ທີ່ເວິຍຕະມໍ້ປູດບິ້ເຢ້ຍ ບອນເຢີກຸ້ຍທີ່ບອນຊັງພຣະທຳ ແລະຣຳ້ອິດດ້ວຍຄວາມເຫິ້ນລ້າງອໍ,ແຕ່ຈຸມປີດໍເລິ້ຍໂຢນພຣະທຳກຼີເຕິບຣ໋ຽລແຊ້ງຢຼະຣູກະລຸງພະໄຫ້ງ ຈຸມປີດໍເຊື່ອໂຢຼແຕ່ພຽງຊົ່ວຄາວ ແລະເຢີຈຸມປີດໍຄຣາຍການທົດລອງເວິຍຄວາມຍາກລຳບາກທີ່ທ້າທາຍນັງຈຸມປີດໍກໍເປິ້ດປໍ້ຄວາມເຊື່ອຂອງຈຸມປີດໍນຸງພຣະເຈົ້າແລະປີດໍປິນຫະລຸ້ເກີດການຕິດຕາມພຣະຄຳຂອງພຣະເຈົ້າ. 14ກະລ້ອງທີ່ຫະໂຕ້ຄຣາຍເຄິ່ງທຼະດີຫະປຼຸ່ລຫະລ້າ ບອນເຢີຈຸມທີ່ບອນຊັງພຣະທຳ,ແຕ່ຈຸມປີດໍປອຍໂຢນຄວາມກັງວົນນັງຊັບສົມບັດ ຕະຫລອດທັງຄວາມສຸກຂອງຊີວິດ ຜົນຂອງປະຊາຊົນອັນນໍທີ່ເລິ້ຍສືບຕໍ່ເຊື່ອນຸງພຣະຄຳພຣະເຈົ້າ ແລະເຊື່ອນຸງຈຸມປີດໍຢຼະເພື່ອຣ້ວຍຈຸມປີດໍຕະໂຢນພຣະອົງພໍໃຈ. 15ສ່ວນກະລ້ອງທີ່ຫະໂຕ້ຄຣາຍບິ້ອໍກຼີ ບອນເຢີຈຸມທີ່ບອນຊັງພຣະທຳ ແລະຍຶດຖືອິດດໍ້ດ້ວຍພະໄຫ້ງສັດຊື່ແລະເຊື່ອຫະແງ້ ຈຶ່ງທົນບອນຈົນເກີດຜົນແລະການອໍກະເລິ່ງຢ່າງທີ່ເກີດຜົນເຕິເກີດວິທີທີ່ຈຸມປີດໍສືບຕໍ່ເຊື່ອນຸງພຣະເຈົ້າຢ່າງອົດທົນແລະສັດຊື່ ແລະເຊື່ອຫະແງ້ຖ້ອຍຄຳອັນກຼີ ແລະພຣະຄຳຂອງພຣະອົງກຼີກະເລິ້ຍຄຣາຍຣ້ວຍຈຸມປີດໍປະເສີນບຣານນັງຄວາມຍາກລຳບາກກະເລິ່ງຢ່າງ.”
ຄຳອຸປະມາ (ຄາໍປຽບທຽບ) ເລື່ອງໂຄມອຸ໋ຍ
(ມຣກ 4:21-25)
16“ເລິ້ຍບອນນູ້ມໍ້ເຢີກັ້ນໂຄມອຸ໋ຍເຢີ ຈະເຣິໂມດດໍ້ກະລຸງກະບຸງ ຫືຼປະຕ້າດໍ້ຫະຣ້າຕຽງບິດ,ແຕ່ຈຸມປີດໍຕັ້ງໂຄມດໍ້ເຕິບອ້ນ ຫະຢົ໋ງ ເພື່ອຣ້ວຍ ກຸ້ຍທີ່ໂມດເຕິຈະຫອມແສງສະຫວ່າງ. 17ມູຕະງາຍ,ເລິ້ຍບອນເວິຍສິ່ງມໍ້ທີ່ຄຣາຍຫະເຄຣະດໍ້ ຈະເລິ້ຍບອນຄຣາຍອິດລໍ້ເຕິເປີດເຜີຍ ແລະເລິ້ຍບອນເວິຍສິ່ງມໍ້ທີ່ຄຣາຍເກິບດໍ້ ຈະເລິ້ຍບອນເປີດເຜີຍ ແລະອິດລໍ້ໂຢນຮອຍ.” 18“ເຫດອັນກຼີ, ຈົ່ງຫະແງ້ຢ່າງລະມັດລະວັງນຸງສິ່ງທີກືສອນ,ເພາະຣ້ວຍກຸ້ຍກະເລິ່ງນະນູ້ທີ່ຕ້ອງການໄອຮອຍສິ່ງທີ່ກືກຳລັງສອນ,ພຣະເຈົ້າຈະໂຢນຈຸມປີດໍເວິຍຄວາມເຂົ້າໃຈປູດຊໍ້,ແຕ່ກຸ້ຍກະເລິ່ງນະນູ້ທີ່ເລິ້ຍເຂົ້າໃຈຈະສູນເປິ້້ດຄວາມຮູ້ສຶກເຢ້ຍໆຊຶ່ງດໍຄຶດຢ່າງຜິດພາດຣ້ວຍດໍເວີຍ.ພຣະເຈົ້າຈະອິດດໍປໍ້ເກີດດໍ.”
ອຸຍ ແລະ ແອ້ມ ຂອງພຣະເຢຊູເຈົ້າ
(ມທ 12:46-50; ມຣກ 3:31-35)
19ມູຕະງ່າຍອຸຍແລະແອ້ມໂກນຂອງພຣະເຢຊູເຈົ້າ ບອນເຕິເຢີພຣະອົງ ແຕ່ໂມດປໍ້້ກະເລິ້ຍພຣະອົງເລິ້ຍຮອຍບອນ ເພາະກຸ້ຍປູດ. 20ເວິຍກຸ້ຍມະນະໂຊລນັງພຣະເຢຊູເຈົ້າຣ້ວຍ,“ອຸຍແລະແອ້ມໂກນຂອງດໍກຳລັງຕະເຢິ່ງອັດຫະຣ້າເຄົ້ຣາໄອ້ທຣຸ້ມດໍ.” 21ພຣະເຢຊູເຈົ້າທະອອຍປີດໍຣ້ວຍ,“ອຸຍແລະແອ້ມຂອງກືກຼີ ຄຣາຍນູ້ທີ່ບອນຊັງພຣະທຳຂອງພຣະເຈົ້າ ແລະປະຕິບັດຕາມ.”
ພຣະເຢຊູເຈົ້າຄຣ້າຕະກຼັ້ນພະຍຸ
(ມທ 8:23-27; ມຣກ 4:35-41)
22ອັດເຕິມູງ້າຍ ພຣະເຢຊູເຈົ້າບອນຊໍ້ຕົວະປໍ້້ນັງສາວົກຂອງພະອົງ ແລະກ່າວເຢີຈຸມປີດໍຣ້ວຍ. “ໂຢນຈຸມແຮຂ້າມທະເລສາບປໍ້້ຫະຣ້າໂຣ້ຍໂຢຼ” ອັນກຼີ ຈຸມປີດໍຈຶ່ງເລີ່ມຕົ້ນຖອຍຕົວະຂ້າມທະເລສາບຄາລີເລລໍ້ປໍ້້. 23ຂະນະທີ່ຈຸມປີດໍ້ຂ້າມປໍ້້ກີຼ ພຣະເຢຊູເຈົ້າກໍບິດເອລເຢີ ເວິຍຕະກຼັ້ນແຣງປຸ້ແຊ້ງເຕິສູ່ທຣະດີທະເລສາບ ແລະເດີ໋ກໍເລີ່ມຊັດໂມດຕົວະຕະໝັ້ນຈະເປິ້ນ ຕະໂຢນຄູນະກໍຫະໂຕ້ອັດກະລຸງອັນຕະລາຍອັນເຄິ້ຣຍທີ່ໄອຫະມິກເດິ໋. 24ຈຸມສາວົກຈຶ່ງປໍ້້ຫັ້ລງພຣະເຢຊູເຈົ້າ ບອນປະໂຢຼລພຣະອົງໂຢນໂຢຼລຊໍ້ ໂດຍໂຊລຣ້ວຍ, “ພຣະອາຈານເອີຍ,ຈຸມກືຢຼະກຳລັງຈະກະເຈດເຢີນໍ.” ພຣະເຢຊູເຈົ້າໂຢລຊໍ້ສັ່ງຄຣ້າຕະກຼັ້ນແລະເດີ໋ກະເຢິ້ຼ ຕະກຼັ້ນແລະຟອງເດີ໋ກະເຢິ້ຼກໍເປິ້ດແຊ້ງແລະເວິຍຄວາມສະຫງົບແຊ້ງທັນທີ່. 25ຢຼ້າຍພຣະອົງກໍຕະມໍ໋ຈຸມສາວົກຣ້ວຍ,“ຄວາມເຊື່ອຂອງຈຸມແປຼປໍ້້ມໍ້?” ແຕ່ຈຸມສາວົກງຶດກະລັກພະໄຫ້ງແລະກຼໍ້ ຈຶ່ງຕະມໍ໋ທຣະລໍ໋ບອມຢຼະຣ້ວຍ,“ທ່ານນູ້ນໍເກີດງາ້ຍນິ?ທີ່ສັ່ງຕະກຼັ້ນນັງເດີ໋ກະເຢຼິ້ ແລະຈຸມດໍກໍຍອມຫະແງ້ຄວາມທ່ານ.”
ພຣະເຢຊູເຈົ້າປິ່ນປົວກຸ້ຍໂກນທີ່ຢຼາງເລິ໋ຍອໍ້ໂມດອັດ
(ມທ 8:28-34; ມຣກ 5:1-20)
26ເຢີພຣະເຢຊູເຈົ້າ ແລະ ຈຸມສາວົກ ກໍບອນຕູນຕົວະເຕິຈອດ ບ່ອນເຂດແດນເຄຣາເຊນ ຊຶ່ງອັດກຸ້ຍລະຫະຣ້ານັງແຂວງຄາລີເລ. 27ເຢີພຣະເຢຊູເຈົ້າລໍ້ເກີດຕົ້ວະຊໍ້ປໍ້້ເຕິຫະຢົ້ຼງ ກໍເວິຍກຸ້ຍໂກນມະນະເຕິເກີດເມືອງນໍເຕິເຢີພຣະອົງ ກຸ້ຍໂກນນໍເວິຍຢຼາງເລິ້ຍອໍກະເລິ່ງໂຕໂມດອັດ ເກີດເວລາດິນຕະໂຕ້ຍເຢີທີ່ດໍເລິ້ຍບອນ ເສິບປຼອງ ແລະເລິ້ຍບອນອັດເຕິດຸງ ແຕ່ອາໄສອັດຕາມປິງກຸ້ຍກະເຈດ. 28ເຢີກຸ້ຍໂກນນໍຫອມພຣະເຢຊູເຈົ້າ ດໍກໍໂອ້ຍຊໍ້ທັງນົບແຊ້ງເຢີບຣານພຣະອົງ ແລະໂຊລຊໍ້ດ້ວຍສຸດຫະໂນລແຣງໆຣ້ວຍ, “ບຸດຂອງພຣະເຈົ້າອົງເຄິ້ຣຍທີ່ສຸດ ແສ້ຊິນທໍລະມານກື?ແສ້ຊິນແຊ້ງໂທດກືເລີຍ.” 29ດໍຣ້ວຍອັນກຼີ ກໍເພາະພຣະອົງບອນສັ່ງຢຼາງເລິ້ຍອໍໂຢນລໍ້ປໍ້້ເກີດກຸ້ຍໂກນກຼີ. (ດ້ວຍຣ້ວຍ,ຢ່າງເລິ້ຍອໍບອນຄັບຢ່າງຮຸນແຣງບອນອິດກູຸ້ຍກຼີປໍ້້ກະເລິ່ງເທື່ອ ແລະເຄີຍເຈາະຕະຢອກດ້ວຍໂສ້ຂັງດໍ້ ,ແຕ່ດໍກໍເດະຟຼອງເຈາະກຼີເປິ້ດຢຼ້າຍບັງຄັບໂມດປໍ້້ກະລຸງຣື໋ລມິດງຽບ.) 30ພຣະເຢຊູເຈົ້າຕະມໍ້ດໍຣ້ວຍ, “ມາຍພຣະນຶ້ອີມໍ້?”ດໍທະອອຍຣ້ວຍ, “ພະນຶ້'ກອງທັບ.” ເພາະເວິຍຢຼາງເລິ້ຍອໍກະເລິ່ງຕະໂປຼລໂມດອັດກະລຸງກຸ້ຍໂກນນໍ. 31ເວິຍຢຼາງເລິ້ຍອໍອັນນໍແສ້ນັງພຣະເຢຊູເຈົ້າຊິນໂຢນຢຼວນຈຸມດໍແຊ້ງປໍ້້ກະລຸງພຣຸງຢຼະຣູ. 32ອັດຕະໝັ້ນກຼີ ເວິຍຟູງລິກທີ່ກຳລັງຫັ້ລງແນວຈ້າອັດຕາມຈ້າຍໂກ໋ ຢຼາງເລິ້ຍອໍອັນນໍຈຶງແສ້ນັງພຣະເຢຊູເຈົ້າ ອະນຸຍາດໂຢນຈຸມດໍໂມດປໍ້້ໂມດອັດກະລຸງຈຸມລິກ ແລະພຣະອົງກໍອະນຸຍາດໂຢນໂມດປໍ້້ອັດນຸງຈຸມຝູງລິກ. 33ເຢີຢຼາງເລິ້ຍອໍອັນກຼີ ກໍລໍ້ເກີດກຸ້ຍໂກນນໍໂມດປໍ້້ອັດກະລຸງຈຸມລິກ,ແລະຈຸມລິກເອີ້ຍຈຸ່ມທຣະຢ໋ອລແຊ້ງໜ້າຝາທີ່ຫະເເຢັດ ຂອງທະເລສາບ ປໍ້ເຢີເດີ໋ແລະຫະມິກເດີ໋ກະເຈດເອີ້ຍ. 34ສ່ວນຈຸມບັ້ນລິກ ເຢີບອນຫອມເຫດການອີນໍ ຕ່າງກໍທຼະຢຼອລຫະລຸ້ ແລະປໍ້້ເລົ່າເລື່ອງໂຢນກຸ້ຍອັດກະລຸງເມືອງ ແລະອັດເຄົ້ຣາເມືອງຫະແງ້. 35ຢຼ້າຍກຸ້ຍທັງປວງກໍລໍ້ເຕິແນ້ເຫດການທີ່ຊໍ້ປໍ້້ກຼີ ແລະເຢີເຕິກະເລິ້ຍພຣະເຢຊູເຈົ້າ ຈຸມປີດໍບອນຫອມກຸ້ຍໂກນທີ່ຢຼາງເລິ້ຍອໍລໍ້ເກີດຈະກຼີ ເສິບຈະແຮ ເວິຍສະຕິອາລົມອໍ ຕະກູອັດຕະໝັ້ນຢື່ງຂອງພຣະເຢຊູເຈົ້າ ຈຸມປີດໍຈຶ່ງເວິຍພະໄຫ້ງກຼໍ້. 36ຈຸມທີ່ທຣຸ້ມເຫດການທີ່ເກີດຊໍ້ກຼີ ບອນເລົ່າໂຢນປະຊາຊົນຫະແງ້ ກະເລິ້ຍເລື່ອງກຸ້ຍທີ່ຢຼາງເລິ້ຍອໍໂມດ ຄຣາຍປິ່ນປົວໂຢນເປິ້ດອໍເກີດປົກກະຕິບອນອີມໍ້. 37ຢ້ຼາຍປະຊາຊົນຄູນະເຕິເກີດເຂດແດນເຄຣາເຊນ ກໍແສ້ພຣະເຢຊູເຈົ້າໂຢນຫະລຸ້ປໍ້້ເກີດເຂດແດນເມືອງເຄົ້ຣາຊາວເມືອງຂອງປີດໍ ເພາະຈຸມດໍຕ່າງກໍກຼໍ້ທີ່ສຸດແລະພຣະເຢຊູເຈົ້າຈຶ່ງແຊ້ງຊໍ້ຕົວະລ້າປໍ້້ໍ່ແອັ້ນບ້ອນກະນໍ້. 38ກຸ້ຍໂກນທີ່ຢຼາງເລິ້ຍອໍເກີດກອງທັບຄຣາຍໄລ່ປໍ້້ເຢີກຼີ ແສ້ນັງພຣະເຢຊູເຈົ້າຣ້ວຍ, “ໂຜດໂຢນກືປໍ້້ນັງທ່ານໂຢຼ.” ແຕ່ພຣະເຢຊູເຈົ້າອ້າໂຢນດໍລ້າປໍ້້ແອັ້ນ ໂດຍກ່າວຣ້ວຍ, 39“ຈົ່ງລ້າໂຈ້ເຢີຄອບຄົວຂອງມາຍ ແລະອ້າສິ່ງທີ່ພຣະເຈົ້າບອນກະທຳເຢີມາຍ.”ຢຼ້າຍໂກນກຸ້ຍກຼີ ກໍປໍ້້ປະກາດທົ່ວເອີ້ຍເມືອງເຄົ້ຣາຊາ ກະເລິ້ຍສິ່ງເອີ້ຍມະກຼີທີ່ພຣະເຢຊູເຈົ້າບອນຕະສຳລັບບອມຢຼະ.
ໄກ້ກັນຂອງຢາອີໂຣນັງກັນເກີດຮາມລໍ້ທີ່ປຶ້ຼຍຈະແຮພຣະເຢຊູເຈົ້າ
(ມທ 9:18-26; ມຣກ 5:21-43)
40ເຢີພຣະເຢຊູເຈົ້າລ້າເຕິເກີດທະເລສາບຫະຣ້າກຼີ ຢ້າຍປະຊາຊົນກໍເຕິຣຳ້ພຣະອົງ ເພາະຈຸມປີດໍເປິ້ນການລ້າເຕິຂອງພຣະອົງແອັ້ນ. 41ເກີດກຼີ ຈົ່ງຕັ້ງໃຈຫະແງ້ສິ່ງນໍເວິຍໂກນມະນະພະນຶ້ ຢາອີໂຣ ເກີດຫົວໜ້າໂຮງທໍາມະສາລາເຕິທ້ອງຖິ່ນກຼີ ບອນເຕິນົບແຊ້ງທີ່ຢື່ງຂອງພຣະເຢຊູເຈົ້າ ແລະທູນອອນວອນແສ້ພຣະອົງໂຢນປໍ້້ທີ່ດຸງຂອງບ້ອມຢຼະ, 42ເພາະໄກ້ກັນມະນະຂອງດໍອາຍຸສິບສອງປີ ໂຊຕະໝັ້ນຈະເອີ້ຍທຣະງຶ້ໄອກະເຈດເຢີ,ຂະນະທີ່ພຣະເຢຊູເຈົ້າກຳລັງປໍ້້ບ້ອນດຸງກຼີ ກໍເວິຍປະຊາຊົນຈ້ຽນພຣະອົງປໍ້້ຢ່າງກະເບິ້ນກະເສີ້ຍ. 43ນຸງກຼີ ເວິຍກັນກຸ້ຍມະນະ ທີ່ເກີດພະຍາດຮາມຫະໂຕ້ ບອນສິບສອງປີເຢີ ນາງບອນຈ່າຍພຣະເອີ້ຍມະກຼີທີ່ບອມຢຼະເວິຍໂຢນຈຸມທ່ານໝໍ ແຕ່ເລິ້ຍບອນທ່ານໝໍກຸ້ຍມໍ້ສາມາດປິ່ນປົວນາງໂຢນເປິ້ດອໍບອນ. 44ນາງຈິ່ງຫຍັບໂມດເຕິຄະນ້າໂກນຂອງພຣະເຢຊູເຈົ້າ ແລະປຶ້ຼຍເກ່ງຈະແຮຄຸມຂອງພຣະອົງ ແລະພະຍາດຮາມຫະໂຕ້ກຼີກໍເຄຣິ້ນທັນທີ. 45ພຣະເຢຊູເຈົ້າຕະມໍ໋ຣ້ວຍ,“ເວິຍນູ້ມະນະປຼຶ້ຍກື?” ເຢີຈຸມປີດໍຄູນະຕ່າງກໍປະຕິເສດ ເປໂຕຈຶ່ງໂຊລຣ້ວຍ, “ພຣະອາຈານເອີຍ ກໍຄຣາຍປະຊາຊົນທີ່ກະເບິ້ນກະເສິ້ຍກຳລັງຈ້ຽນທ່ານກຼີ.” 46ແຕ່ພຣະເຢຊູເຈົ້າກ່າວຣ້ວຍ,“ເວິຍມະນະບອນປຼຶ້ຍກື.ດ້ວຍຣ້ວຍ,ກືຮອຍເຢີ ຣິດອໍານາດບອນລໍ້ເກີດກືປໍ້້.” 47ເຢີຫອມຣ້ວຍ ຈະຫະເຄຣະຈະ ເລິ້ຍຮອຍບອນເຢີ ກຸ້ຍກັນກຼີ ຈຶ່ງໂມດເຕິເຢີທັງຕະຕິດຈະ ນົບແຊ້ງທີ່ຢື່ງຂອງພຣະເຢຊູເຈົ້າ ເຢີບຣານຄູນະເຕິບອນກຼີ ນາງອ້າພຣະອົງຣ້ວຍ,ດ້ວຍເຫດອະໄມ້ບອມຢຼະບອນປື້ຼຍພຣະອົງ ແລະບອມຢຼະບອນເປິ້ດອໍພະຍາດໃນທັນທີ ບອນອີມໍ້ນິ້? 48ພຣະເຢຊູເຈົ້າກ່າວເຢີນາງຣ້ວຍ, “ໄກ້ກັນທີ່ຮັກເອີຍ ຄວາມເຊື່ອຂອງມາຍບອນຮັກສາໂຢນມາຍເປິ້ດອໍເຢີ ຈົ່ງປໍ້້ເກີດສຸກໂຢຼ.” 49ເຕິຂະນະພຣະເຢຊູເຈົ້າກຳລັງກ່າວຕອນນໍ ກໍເວິຍກຸ້ຍມະນະເຕິເກີດດຸງຂອງຢາອີໂຣ ຜູ້ນຳຂອງທໍາມະສາລາ ດໍອ້າຣ້ວຍ,“ໄກ້ກັນຂອງມາຍກະເຈດເຢີຊິນລົບກວນອາຈານ ປໍ້້ແອັ້ນເລີຍ.” 50ແຕ່ພຣະເຢຊູເຈົ້າບອນຊັງຂ່າວກຼີ ຈິ່ງກ່າວເຢີຢາອີໂຣຣ້ວຍ,“ຊິນກຼໍ້ເລີຍ,ຈົ່ງເຊື່ອມະໄຫ້ລກຼີ ຢຼ້າຍນາງກໍຈະເປິ້ດອໍ.” 51ເຢີເຕິກະເລິ້ຍດຸງເຢີ ພຣະອົງເລິ້ຍໂຢນນູ້ມໍ້ໂມດປໍ້້ນັງພຣະອົງ ເວັ້ນດໍ້ແຕ່ເປໂຕ,ໂຢຮັນ,ຢາໂກໂບ ແລະອຳອຸຍຂອງໄກ້ນູ້ກຼີ ແລະໂມດປໍ້ກະລຸງດຸງ. 52ເຕິບ້ອນກຼີ ກຸ້ຍກະເລິ່ງນະກຳລັງໂອ້ຍຍາມວອນທຸກໂຢນໃບ້ໄກ້ກຼີ ພຣະເຢຊູເຈົ້າກ່າວຣ້ວຍ,“ຊິນໂອ້ຍຍາມເທາະ ໃບ້ໄກ້ກຼີເລິ້ຍກະເຈດດອກ ນາງພຽງແຕ່ບິ້ດເອລອັນກຼີ.” 53ຢຼ້າຍຈຸມປີດໍກໍພາກະຈັ້ງຫະວາຍພຣະອົງ ເພາະປີດໍຕ່າງກໍຮອຍຣ້ວຍ ນາງກະເຈດເຢີ. 54ແຕ່ພຣະເຢຊູເຈົ້າຄຶງຕີ້ໃບ້ໄກ້ກຼີ ແລະ ໂອ້ຍຊໍ້ຣ້ວຍ, “ໄກ້ເອີຍ ຈົ່ງໂຢຼລຊໍ້ສາ.” 55ທຣະງຶ້ຂອງນາງຈຶ່ງລ້າເຕິແອັ້ນ ແລະນາງກໍໂຢຼລຊໍ້ເຢີທັນທີ ພຣະເຢຊູເຈົ້າສັ່ງໂຢນອິດແນວຈ້າໂຢນນາງຈ້າ. 56ຫະຣ້າອຳອຸຍຂອງໄກ້ກໍງຶດກະລັກພະໄຫ້ງທີ່ສຸດ,ແຕ່ພຣະເຢຊູເຈົ້າສັ່ງເລິ້ຍໂຢນອ້ານູ້ມໍ້ ກະເລິ້ຍເຫດການທີ່ບອນເກີດຊໍ້ກຼີ.
Currently Selected:
ລູກາ 8: IRR
Highlight
Copy
Compare
Share
Want to have your highlights saved across all your devices? Sign up or sign in
Inh/In Bible by Beyond Translation is licensed under Creative Commons Attribution-ShareAlike 4.0 License.
