II Kô-rir-tô 10
10
III. Phao-lô kar dađaup rapajan Xêh Pachai drei
(10:1 – 12:21)
Gruk mưrat hatai anưd Phao-lô
1Dahlak, Phao-lô, mưk gruk dhi dhau thong siam tian anưd Dê Krist bloh adan tajai dei ai – dahlak nạn mưnuix aneh drei tuk gōk dei ai, min gilaic lar khang thong dei ai tuk atah hađoh! 2Tuk dahlak hu ƀok, likau dei ai jôi tatơk dahlak xang angui ganap payah lar khang bloh dahlak jarô angui jom thong dôm urang brei laic khol dahlak dok dang tui rilo darah. 3Kanê khol dahlak diup dalam rup pabhap ni min ôh mưthuh kalin tui ganap rilo darah. 4Akha khol dahlak angui ôh njaup laic dôm agha rilo darah, min nạn gon xagta anưd Pô Lingik piêh tong tayah dôm dhan biuh, 5tong paglơh dôm panôic đôm thong dôm gruk paki pakang mưradhag vơk gruk dul thau Pô Lingik, thong ep abih thangka xang halar tui Dê Krist. 6Khol dahlak lijang thudia pamưk pakrang abih ra ôh halar tui tha tuk dei ai krung hu purmưta halar tui.
7Dei ai ciêt mong gah lingiu, mưyah hu thei đôm laic drei bha di Dê Krist yơ êng khol nhu xang xanưng vơk iơk, mưyah khol nhu bha di Dê Krist yơ khol dahlak lijang yau nan. 8Bahkan tuk khol dahlak hu mưyeh mưyom tapa di ka ganuh gon Pô ƀai brei ka khol dahlak, aco gon piêh darap, mih ôh njaup piêh jrah jalơh dei ai, yơ dahlak lijang ôh tachaup ƀok. 9Dahlak ôh ưng ngak tabiak mưnuh yau krưh dok ran angui blah harak piêh gham tam dei ai. 10Kaywa hu urang đôm: “Tuk vak harak yơ ong nan hu trak panôic thong danưh, min tuk hu ƀok yơ gilaic liman limuic thong panôic đôm ôh tabiak haget.” 11Mưnuix đôm yau nan xang thau laic tuk khol dahlak dađaup ƀok, panôic dalam harak yau halei, yơ tuk hu ƀok, dahlak lijang ngak yau nan.
12Kardak nạn khol dahlak ôh khin bak bira ngan pagap drei thong dôm urang êng paglong dêh. Min tuk khol nhu êng mưk drei duk drei, ngan mưk êng drei pacoh drei, yơ khol nhu u dul thau. 13Dok nôk khol dahlak, khol dahlak ôh mưyeh mưyom tapa nưm min ciêt dalam thia Pô Lingik krung hu jao ka khol dahlak; dalam thia nan hu bih dei ai. 14Kaywa khol dahlak ôh tagar tapa thia drei, yau mưda khol dahlak ô ka bhian mưrai tom dei ai; min biak nao khol dahlak nạn mưnuix ba Khao Siam Dê Krist mai ka dei ai dahlau di bih. 15Khol dahlak ôh mưyeh mưyom tapa di thia, sidah mưyeh mưyom ka bruk kaywa mưnuix pakan ngak. Min pachôm laic sagar dei ai paƀlwak yơ bruk anưd khol dahlak lijang mưca cak rôk krưh dei ai, dalam thia krung bihu jao ka khol dahlak, 16thangak khol dahlak hu mưda rao lang Khao Siam dalam dôm bhum atah hơl bloh ôh mưyeh mưyom ka dôm bruk krung hu ngak dalam mưnal anưd mưnuix pakan. 17“Min thei mưyeh mưyom, xang mưyeh mưyom dalam Pô.” 18Kaywa ôh njaup thei êng paglong drei nạn bihu halar ciup, min nạn mưnuix bihu Pô paglong.
Currently Selected:
II Kô-rir-tô 10: CJM2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
