Luka 3
3
Kuɓari ku Yahaya Kalyuɓugi
(Matiyu 3:1-12; Marku 1:1-8; Yahaya 1:19-28)
1A kayen ka kupa n u tawun ka tsugono tsu Kaisa Tibariya magono ma pige ma Roma, a yan ta̱ ngono n nishi aza ɗa a lyai tsugono tsu iyamba i Isaraꞌila a kere ka ne, alya: Bontu Bilatu wa̱ri gomuna u Yahuda, Hiridu Antiba wa̱ri magono ma Galili, vangu u ne Filibu wa̱ri magono ma Ituriya n Tarakunita, Lisaniya wa̱ri magono ma Abiliya. 2Aꞌayin a Hanana n Kayafa ngono m aɗara̱kpi, kadyanshi ka Kashila̱ ka tuwa̱i ara Yahaya maku ma Zakariya a kakamba. 3U banai gba̱ a iyamba iꞌya iꞌa̱ri uɓongu u Aga̱ta̱ u Urudu n u yanyi kuɓari: ama a kpatala ubana a asu u Kashila̱ a a̱sa̱ka̱ tsicingi tsu le, aku a lyuɓugu le tsa̱ra̱ u wenike an a cimbusuka̱ le. 4Tyoku ɗa wa̱ri ukorongi a Tagara̱da u Ishaya matsumate a ukuna u Yahaya Kalyuɓugi: “Kala̱ga̱tsu ka uza roku ka sala̱sa a kakamba, ‘Lapulukai Asheku Kawauwi ure, i shamkpa u ɗa mai tsa̱ra̱ u wala. 5A ka shaɗangu ta̱ gba̱ ara̱ra̱, kpam a betelikpe gba̱ nsasa n aga̱la̱la̱. A shamkpa ire iꞌya i kotolusoi, aku a gbandala iꞌya iꞌa̱ri n aɗa̱ka̱. 6Kpam ama gba̱ a ka wene ta̱ iwauwi i Kashila̱.’ ” #Isha. 40:3-5.
7Yahaya tonukoi kakuma̱ ka ama ka ka tuwusa̱ tsa̱ra̱ u lyuɓugusu le vi, “Eɗa̱ aꞌeku! Ya ɓarana ɗa̱ i suma unamgbukatsuma̱ u Kashila̱ u ɗa wa tuwa̱? 8Yanyi ili iꞌya ya wenike ukpatala u ɗe. Kotsu i bidya a asuvu a atakasuvu a ɗe Ibirahi ɗa asheku a ɗe wa, nala wa ɓa̱nga̱ ɗa̱ wa. N tonuko ɗa̱, Kashila̱ ka fuɗa ta̱ ka ꞌya̱nga̱sa̱ka̱ Ibirahi mmuku a asuvu a atali a na yi. 9N gogo‑na naha a taɗangu ɗe kagovu a ami a nɗanga. Maɗanga ma baci dem ma kpa̱ɗa̱i u na̱ka̱ ilimaci i maci, a ka kapa ta̱ ma, a varangu a asuvu a akina.”
10Kakuma̱ ka ama ka wece yi, “Ndya wa̱ tsa yan gogo‑na?”
11U wushuki, “Uza u ntogo n re, u peci n uza ɗa bawu wa̱ri n ma. Uza u ilikulya kpam dem u yain nala.”
12Awushi a utafa a roku a tuwa̱i tsa̱ra̱ a lyuɓugu le, a wece yi, “Kawenishiki, ndya tsa yan?”
13U tonuko le, “Kotsu i pasa̱ka a ili iꞌya a da i wushi wa.”
14Aku asoje a roku a wece yi, “A̱tsu tani, ndya tsa yan?”
U tonuko le, “Kotsu i wusa uza ikebe wa. Ko i dana uza u nusa ta̱, kpam u nusa wa. I kawunku gai n katsupi ka ɗe.”
15Ama gba̱ aꞌa̱ri a ka vana ta̱ utuwa̱ u Kirisiti Kawauwi, aku aꞌa̱ri a uyawunsa a atakasuvu a le, ko Yahaya ɗa Kawauwi ki. 16Yahaya wushunku le gba̱, u danai, “Mpa gai n mini ma ma lyuɓugusu ɗa̱, shegai uza ɗa u la mu wa tuwa̱ ta̱. Uza ɗa mpa n ra̱tsa n surukpa isirikatsu i akpata i aꞌene a ne wa. Aya wa lyuɓugu ɗa̱ n Kulu Keri n akina. 17Kasasu ka uwelimkpe ka ne ka̱ ta̱ a kukere ku ne, wa wujuma̱ ta̱ asu u ulapa ilya vi, aku u cira̱ngu ilya yi u tsungu iꞌya a mapon. Shegai wa runukpa ta̱ kopo ki n akina† a ɗa bawu a ka cimba̱.” 18N icun i kuɓari ku na ki ushani, ka Yahaya yankai ama Kadyanshi ka Shinga ka Kashila̱.
19Shegai Yahaya ɓaranai Hiridu Antiba magono a kaci ka Hiridiya, uka u vangu u ne u ɗa u zuwai, n ukuna u cingi u roku u ɗa u yain. 20Adama a nala u gbagiryai Yahaya a kuwa ku aꞌali, u dokunki kaci ka ne unyushi u cingi u na vi.
A lyuɓugi Yesu
(Matiyu 3:13-17; Marku 1:9-11)
21An a lyuɓugusi ama gba̱, a lyuɓugi dem Yesu. Tyoku ɗa Yesu wa̱ri a kavasu, zuba u kukpa̱i. 22Pini nala, Kulu Keri ku cipa̱i ara ne yavu kaɗya. A panai kala̱ga̱tsu ka wuta̱i a zuba, ka danai, “Aɗa Maku ma va̱ ma ma ciga. Ma pana ta̱ kayanyan n avu cika.”
Nkoshi n cau n Yesu
(Matiyu 1:1-17)
23Aꞌayin a ɗa Yesu gita̱i manyan ma ne, wa̱ ta̱ n ayen evu n kamankupa. Tyoku ɗa kpam ama a bidyai Yesu maku ma Isuhu ma.
Isuhu maku ma Heli ma.
24Heli maku ma Matat ma.
Matat maku ma Levi ma.
Levi maku ma Mala̱ki ma.
Mala̱ki maku ma Yana ma.
Yana maku Isuhu ma.
25Isuhu maku ma Matiya ma.
Matiya maku ma Emos ma.
Emos maku ma Nahum ma.
Nahum maku ma Hasa̱li ma.
Hasa̱li maku ma Najaya ma.
26Najaya maku ma Maꞌata ma.
Maꞌata maku ma Matiya ma.
Matiya maku ma Shimeya ma.
Shimeya maku ma Isuhu ma.
Isuhu maku ma Yahuda ma.
27Yahuda maku ma Yowana ma.
Yowana maku ma Risa ma.
Risa maku ma Zerubabe ma.
Zerubabe maku ma Shayala̱tiya ma.
Shayala̱tiya maku ma Niri ma.
28Niri maku ma Mala̱ki ma.
Mala̱ki maku ma Adi ma.
Adi maku ma Kosuma ma.
Kosuma maku ma Alumadama ma.
Alumadama maku ma Iri ma.
29Iri maku ma Yosi ma.
Yosi maku ma Eliyaza ma.
Eliyaza maku ma Yorima ma.
Yorima maku ma Matat ma.
Matat maku ma Levi ma.
30Levi maku ma Saminu ma.
Saminu maku ma Yahuza ma.
Yahuza maku ma Isuhu ma.
Isuhu maku ma Yunam ma.
Yunam maku ma Eliyakim ma.
31Eliyakim maku ma Malaya ma.
Malaya maku ma Mainana ma.
Mainana maku ma Matata ma.
Matata maku ma Natan ma.
Natan maku ma Dawuda ma.
32Dawuda maku ma Yese ma.
Yese maku ma Ubida ma.
Ubida maku ma Boza ma.
Boza maku ma Salumuna ma.
Salumuna maku ma Nashon ma.
33Nashon maku ma Aminadabu ma.
Aminadabu maku ma Aram ma.
Aram maku ma Hesuruna ma.
Hesuruna maku ma Farisa ma.
Farisa maku ma Yahuza ma.
34Yahuza maku ma Yakubu ma.
Yakubu maku ma Ishaku ma.
Ishaku maku ma Ibirahi ma.
Ibirahi maku ma Tera ma.
Tera maku ma Naho ma.
35Naho maku ma Seru ma.
Seru maku ma Reyu ma.
Reyu maku ma Fele ma.
Fele maku ma Eba ma.
Eba maku ma Shela ma.
36Shela maku ma Kenan ma.
Kenan maku ma Afaka̱sha ma.
Afaka̱sha maku ma Shem ma.
Shem maku ma Nuhu ma.
Nuhu maku ma Lame ma.
37Lame maku ma Metusela ma.
Metusela maku ma Anuhu ma.
Anuhu maku ma Jare ma.
Jare maku ma Mahalalel ma.
Mahalalel maku ma Kenan ma.
38Kenan maku ma Enos ma.
Enos maku ma Shitu ma.
Shitu maku ma Ada̱mu† ma.
Ada̱mu kpam uza ɗa u wuta̱i a asu u Kashila̱ ɗa.
Currently Selected:
Luka 3: kdlNT
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.