Lukas 14

Yexus Khu Is tus Yiag Kwg Muaj Mos

1Muaj is hnoos kwg yog hnoos Xanpataws, Yexus muz noj mo hub cob Falixais is tug thiaj lus tseb; muaj neeg nuad ntsoob Yexus. 2Muaj is tug yiag tez tia xaas xaas luz cuag Yexus, 3Yexus noog cob xisfws kwg qha Vaajtswb txuj Kebcai has cob Falixais has tas, “Pes txuj kebcai puas pus pes khu mos hnoos Xanpataws los tsi pus?”

4Tadsis cud tsi tes ni. Yexus tuab nkaws tuz yiag qhai, Yexus khu niz tuz mos zoo has kuas niz muz liad. 5Yexus has tu cud tas, “Hnoos Xanpataws, yog mej tuz twg muaj is tug minyuas lossis is tug nyuj muz poos tu hub qhobdej liad, txiad yog hnoos qhai yog hnoos Xanpataws los mej yeej yiad muz muas nriad nroog nyaz los sab?”

6Cud tes tsi taw Yexus lu luz qhai ni.

Txu Fwjchid thaws Muz Ua Qhua

7Yexus pud cob neeg kwg tuaj noj mo muaj qeetuz xaib nyos pes hawb tsud, Yexus has is zaaj luz pibtxwb tu cud has tas, 8“Thaws muaj neeg hu koj muz noj tshoos, koj tsi xod xus muz xaib nyos pes hawb ntej. Nyos tsaad tuz tswb tseb ted hu is tug kwg tseedcees kua koj tuaj, 9has tuz tswb tseb kwg hu mej os tug tuaj, yiad luz has tu koj tas, ‘Ca tuz na nyos lus chia ko.’ Thaws qhai koj yiad poos ntsejmuag heeb, has koj yiad taw muz nyos tod qaas. 10Thaws muaj neeg hu koj muz noj mo, koj yiadtsud xus muz nyos tod qaas, thaws tuz tswb tseb luz, niz yiad hu koj has tas, ‘Phoojywz, koj ca ni muz nyos pes hawb ntej.’ Ces koj yiad taw ntsejmuag taasmeeg cob neeg kwg nrug koj nyos noj mo ua ke qhai. 11Tu qhob tuadtxhij kwg khaab has tas niz muaj fwjchid, tuz qhai yiad poos fwjchid, tadsis tuadtxhij kwg txu fwjchid, yiad taw fwjchid.”

12Yexus has tu tuz tswb tseb qhai has tas, “Thaws koj noj sus lossis noj hmo, koj tsi xod muz hu koj tej phoojywz, koj tej kwbtij neejtsaa, has tej neeg zej zoz kwg npluanuj tuaj nyaz, tu qhob cud yeej yiad ua is rooj mo pawj tu koj. 13Thaws koj muaj noj muaj haws, koj ca ni muz hu tej neeg pluag, tej neeg qhuab tez qhuab tia, tej neeg cegtiab, has tej neeg xyuadtxwb tuaj noj; 14koj ha yiad taw kooshmoob, tu qhob cud cob qhai pawj tsi tawz koj txaj ntsig. Thaws Vaajtswb tsaa cob neeg ncaajnceeg siab hub qhob tuag rob qaas luz, Vaajtswb yiad muas nqai zug tu koj.”

Tuz Kwg Ua Is Rooj Mo Luj

15Cob neeg kwg nrug Yexus nyos qhais rooj mo hnob Yexus has ni qhai, muaj is tug has tu Yexus has tas, “Tuz kwg taw muz noj mo hub Vaajtswb lus teschias, tuz qhai yiad zoo sas heeb ni!”

16Yexus has tu niz tas, “Muaj is tug yiag ua is rooj mo luj, niz muz hu ntaw tuz tuaj noj. 17Thaws txug lus sijhiad noj liad, niz txis is tug tusqhe muz hu cob neeg kwg niz ted hu liad has tas, ‘Mej ca ni muz, ted raws mo txhij liad!’ 18Tadsis cob neeg qhai tuadtxhij yig has tas, tsi xyeej muz. Thiaj tuz has tu tuz tusqhe qhai has tas, ‘Kud yuab taw is thaaj laj, kud yiad muz nuad; koj rob muz has tu koj tuz tswb kuas niz tsi xod tu sas.’ 19Muaj kua is tug has tas, kud yiad taw tsis nkiad nyuj, kud yuab muz muas kud cob nyuj sid laij laj. Koj rob muz has tu koj tuz tswb kuas niz tsi xod tu sas. 20Muaj kua is tug has tas, ‘Kud qhos ni yuab puj, yog ni qhai kud tsi muz.’ 21Tuz tusqhe rob muz qha tej na tu niz tuz tswb. Tuz tswb chid heeb, niz has tu tuz tusqhe has tas, ‘Koj ca ni muz tu tod tej keb luj keb yaw hub nroog, coj tej neeg pluag, tej neeg qhuab tez qhuab tia, tej neeg xyuadtxwb has tej neeg cegtiab tuaj noj.’ 22Tuz tusqhe rob luz has tu niz tuz tswb has tas, ‘Kud ted muz ua rias ni koj has tu kud liad, tadsis tseed tshuab chia has.’ 23Tuz tswb rob has tu tuz tusqhe qhai tas, ‘Koj ca ni muz tu tod tej keb luj has keb yaw, koj ntsis tuz twg, koj ca ni coj tuaj kuas pub kud lus tseb. 24Kud qha tu mej has tas, cob neeg kwg ted hu liad, tsi muaj is tug yiad taw saaj kud rooj mo hlo ni!’ ”

Tuz Kwg Ua Taw Yexus Thwjtid

25Muaj neeg coos coos nrug Yexus ua ke muz, Yexus tig luz has tu cud tas, 26“Yog tuz twg yiad luz cuag kud, tuz qhai yiadtsud hlus kud heeb kua ni niz hlus niz nad niz vaid, niz puj minyuas, niz kwb niz tij, niz nkawj niz muag, has heeb kua ni niz hlus niz txujsa, niz ha ni ua taw kud tuz thwjtid. 27Tuz kwg tsi kwb niz tuz ntoo khawslig nrug kud muz, tuz qhai ua tsi taw kud tuz thwjtid. 28Mej cob yog muaj is tug yiad ua is lus chia tsodfaaj, tuz qhai yiadtsud xus nyos tuasyws ua tuaszoo xaab nuad yiad sib nyaj npawd nyaab, has niz puas yiad muaj nyaj txaws ua taw. 29Yog niz tsi xus ua ni qhai, ces thaws txhus taw ncej liad, niz yiad ua lus chia tsodfaaj qhai tsi tab. Cob neeg kwg pud ni qhai yiad thuad niz 30has tas, ‘Tuz yiag na chib ua, tadsis niz tsi muaj peebxwd ua kuas tab!’ 31Tuz vaajntxwb kwg muaj tusrog kawd txhas tuz, thaws niz yiad muz ua rog tu is tug vaajntxwb kwg muaj tusrog neez nkawd txhas tuz, niz yeej yiad xus ua tuaszoo xaab nuad, niz cob tusrog puas yiad muz ntaws yeej tuz vaajntxwb kwg muaj tusrog neez nkawd txhas tuz qhai. 32Yog niz xaab has tas niz yiad tua tsi yeej, thaws niz tseed nyos kes, niz yeej yiad xus txis neeg muz thob tuz vaajntxwb tod, kuas os toz sis rawg zoo.” 33Yexus xaws luz has tas, “Is yaad nkaws ni qhai, tuz kwg tsi tso txhua yaad kwg niz muaj tseg, tuz qhai ua tsi taw kud tuz thwjtid.

Cob Ntseb Kwg Tsuag Liad

34“Ntseb yog yaad kwg zoo, tadsis yog ntseb tsuag liad, yiad ua nyaab kuas rob qaas ntseb taw. 35Cob ntseb qhai tsi zoo sib ua daastsi, muas tu aab los aab tsi zoo, has muas xyia chib los tsi zoo, tsuas muaj yiad muas laidtaa nyaz. Yog tuz twg muaj qhobntsej ca ni noog!”

Currently Selected:

Lukas 14: CQD2024

Highlight

Copy