Yawhaas 17

Yexus Thob Vaajtswb Paas Niz Cob Thwjtid

1Tod qaas kwg Yexus has ni qhai taaz, niz tsaa qhobmuag nuad saw ntuj has has tas, “Vaid, tes txug lus sijhiad liad; thob koj ua kuas leej Tus taw koos meej, leej Tus has ua tu koj taw koos meej, 2tu qhob koj tsaa leej Tus ua tuz kwg muaj fwjchid luj kua tuadtxhij neeg, kuas leej Tus has pus taw txujsa nteb dhaw muz is txhis tu tuadtxhij kwg koj muas tu niz liad. 3Txujsa nteb dhaw muz is txhis qhai, yog qhob kwg cud paws koj has paws has tas koj tuas tuz has yog Vaajtswb, has paws Yexus Khetos tuz kwg koj txis luz. 4Kud ua tu koj taw koos meej hub ntajtes na, tez hujlwd kwg koj kuas kud ua, kud ted ua tab liad. 5Vaid, nizna kud nyos qhais koj lus xusntag, thob koj ua tu kud taw koos meej is yaad ni thaws tseed tsi taw tsid lus ntajtes na, pes istxwd taw koos meej.

6“Kud ted qha koj tu cob neeg kwg koj muas pus tu kud hub ntajtes na tuadtxhij paws liad. Cud yog koj tus, has koj muas cud pus tu kud, has cud ua rias ni koj tej luz. 7Nizna cud paws has tas is puas tsaab yaad kwg koj muas tu kud, puabtsig yog luz qhai koj luz; 8tu qhob tej luz kwg koj has tu kud, kud tes qha hubtsig tu cud liad, cud khiad tej luz qhai ca, cud paws tsees has ntseeg has tas yog koj txis kud luz hub ntajtes na.

9“Kud thob koj paas cud; kud tsi taw thob koj paas neeg ntajtes, tadsis kud thob koj paas cob neeg kwg koj ted muas tu kud liad, tu qhob cud yog koj tus. 10Is puas tsaab yaad kwg kud muaj puabtsig yog koj tus, has is puas tsaab yaad kwg koj muaj puabtsig yog kud tus; has is puas tsaab yaad qhai ua tu kud taw koos meej. 11Nizna kud yiad rob qaas luz cuag koj, kud yiad tsi nyos hub lus ntajtes na ntxib liad, tadsis cud tseed nyos hub lus ntajtes na. Leej Vaid tuz kwg diashub! Thob koj tsodkwd cud qhai koj lus npe kwg muaj fwjchid,#17.11 Thob koj tsodkwd cud qhai koj lus npe kwg muaj fwjchid; tej phaw qus has tas Thob koj tsodkwd cob neeg kwg koj muas pus tu kud qhai koj lus npe kwg muaj fwjchid. kuas cud ha yiad kood taw is lus sas is yaad ni koj has kud kood is lus sas. 12Thaws kwg kud tseed nrug cud nyos, kud tsodkwd cud qhai koj lus npe kwg muaj fwjchid.#17.12 kud tsodkwd cud qhai koj lus npe kwg muaj fwjchid; tej phaw qus has tas kud tsodkwd cob neeg kwg koj muas tu kud qhai koj lus npe kwg muaj fwjchid. Kud tsodkwd cud, cud tsi muaj is tug pluj ni, tsuas yog tuz kwg yeej yiad puadtsuaj, has puadtsuaj nyaz, yeej yiad muaj ni qhai kuas tab rias ni tej luz kwg ted saw tseg liad. 13Nizna kud taastod yiad rob qaas luz cuag koj, thaws kud tseed nyos hub ntajtes, kud has tej luz na kuas kud txuj keb zoo sas muaj pub nkaws hub cud. 14Kud ted qha koj tej luz tu cud liad, neeg ntajtes has heed cud, tu qhob cud tsi yog neeg ntajtes ni is yaad ni kud tsi yog neeg ntajtes ni. 15Kud tsi taw thob kuas koj coj cud tiad hub lus ntajtes na muz, tadsis kud thob koj tsodkwd cud kuas cud tsi xod rawg Daag Ntxwgnyoog daag ntxaz. 16Cud tsi yog neeg ntajtes ni, is yaad ni kud tsi yog neeg ntajtes ni. 17Koj txujlug yog luz tsees; thob muas koj txujlug tsees ntxuab kuas cud hub. 18Koj txis kud luz tu hub lus ntajtes na nyaab, kud txis cud muz qha neeg ntajtes is yaad ni qhai. 19Vid cud, kud has muas kud fij tu koj, kud ua ni qhai, kuas cud ha muas cud fij tu koj.

20“Tsi yog kud thob koj paas cob neeg na nyaz, tadsis kud thob koj paas cob neeg kwg hnob tej luz kwg cud qha has luz ntseeg kud has, 21kuas cud kood is lus sas. Vaid, thob ca cud nyos hub pes, is yaad ni koj nyos hub kud has kud nyos hub koj, Thob koj paas kuas cud ua taw is lus sas, neeg ntajtes has ntseeg has tas koj txis kud luz. 22Kud pus koos meej tu cud is yaad ni koj pus koos meej tu kud, kud ua ni qhai kuas cud kood taw is lus sas is yaad ni pes kood taw is lus sas. 23Kud nyos hub cud has koj nyos hub kud, kud ua ni qhai kuas cud has kood taw is lus sas, neeg ntajtes has paws has tas koj txis kud luz, has paws has tas koj hlus cud is yaad ni koj hlus kud.

24“Vaid, kud nyos qhob twg, kud xaab kuas cob neeg kwg koj muas pus tu kud liad, nrug kud nyos qhob qhai, cud has pud lus fwjchid kwg koj pus tu kud, tu qhob koj yeej hlus kud thaws tsi taw tsid lus ntajtes luz liad.

25“Vaid, koj yog tuz kwg ncaajnceeg, neeg ntajtes tsi paws koj, tadsis kud paws koj; cob neeg na puabtsig paws has tas koj txis kud luz. 26Kud qha koj lus npe tu cud paws liad, has kud tseed yiad naj hnoos qha cud, kuas cud muaj txuj keb hlus kwg koj hlus kud nyos hub cud, has kud yiad nyos hub cud.”

Currently Selected:

Yawhaas 17: CQD2024

Highlight

Copy