Vagaratiya 1

Ekundo

1Mbilive ezi kuna kutunda kwaPaurusa, ogu va tura moupositoli, kapisi muntu ga u mu pa ndi muntu ga yi gazara, nani nye Jesus Kristusa naKarunga Guhwe yige ga yi mu pa, ogu ga mu pindura koufe. 2Vakwetu navenye ava twa kara nawo kumwe, tatu tumu makundo natuvenye, konombungakriste daGarata:

3Karunga Guhyetu naHompa Jesus Kristusa va mu fire nkenda oku tava mu pe mbili.

4Kristusa kwa ligavera morwanonzo detu a tu parure mo mouzuni ou woudona, moomu ga yi harerere Karunga Guhyetu. 5Karunga va mu fumadeke narunye‐narunye! Amen.

Mbudi zoNgwa zimwe tupu

6Ame nina mu tetuka! Apa ntani nye nare muna zumbu Karunga ogu ga mu zigidira monkenda zaKristusa, mu hame kombudi nazopeke. 7Kutupu ko hena Mbudi zoNgwa nazopeke. Nye poveli vamwe ava vana kumuyipaika ava vana hara kupukisa Mbudi zoNgwa zaKristusa. 8Nampili nyose ndi muengeli gokutunda meguru, nye a mu udisire mbudi nazopeke za hana asi zezi twa mu udisira, va mu fingilire! 9Moomu twa mu tantera nare, tani rugurura mo hena asi: nsene pweli ogu ana kumuudisira mbudi zokulilimba nezi mwa tambura, va mu fingilire!

10Ngesi ame kuna hara nye ni wapere vantu, ndi Karunga na hara ni wapere? Ndi kuna kukondjera asi vantu va hare nge? Ngano asi simpe ha na sikamena mokuwapera vantu, ngano kapi na kara mukereli gwaKristusa.

Omu ga gwana Paurusa upositoli

11Vakwetu, sigeni ni mu tantere ko eyi asi: Mbudi zoNgwa ezi ani udisa, kapisi movantu za tunda. 12Kapi na zi gwana komuntu, ndi asi muntu a zi ronge nge. Nye kwa zi gwana kwaJesus Kristusa, apa ga monekerere nge.

13Yikara yange yanare yopaSijuda mwa yi zuvha, omu ngani hepeke mbungakriste zaKarunga momudona, ni kondje paapa na hulira asi ni zi hanagure po. 14Ame kwa pitakanene vakwetu wovanzi mokusikisa mo eruganenokarunga lyoVajuda. Ame ngani kondjere unene nompo dozinyakurwetu.

15Nye karunga kwa horowora nge, ame simpe nokureta nge si, yiyo ga zigidira nge monkenda zendi. 16Ano apa ga tokwere kuhorwera nge Munwendi, asi ni udisire vapagani Mbudi zendi zoNgwa, kapi na zire komuntu a ka pukurure nge, 17ndi asi ni ze koJerusarema kwava va hovere kwange moupositoli. Nye ame kwa vyukire koArabiya, makura ntani na tengura hena koDamasikusi. 18Eyi pa pita nomvhura ntantu, makura tani zi koJerusarema tu ka lidive naPeturusa, makura tani ka kara pwendi mazuva murongo nagatano. 19Ame kapi na kere hena novapositoli peke, ntudi Jakopo mumbyaHompa, makura.

20Eyi nina kumutjangera, yosili, kapi nina kumukumbagera! Karunga ta yi zuvhu. 21Na tunda opo, tani zi konomukunda daSiliya naKilikiya. 22Siruwo oso nombungakriste domoJudeya kapi da divire nge. 23Awo matwi tupu ngava yi zuvhu asi, “Ani mugara ogu nga tu hepeke nare, kuna kuudisa epuro eli ga here kuzungurura.” 24Awo makura tava hambererere Karunga mwarwange.

Currently Selected:

Vagaratiya 1: KWN

Highlight

Copy