Exodus 37
37
Erugano lyoSikesa sEgwanekero
(Ex 25:10-22)
1Besareli makura ta pangere sikesa sositji somusu, monaure waso nosentimeta 114 ngoso, monompatji daso nosentimeta 69 ngoso. 2Age makura ta si vambaike nongorodo zene‐zene monda nokontunda zaso. Ano konontere daso nadinye nako ta ruganene ko ngorodo. 3Age ta ruganene ko hena nongondo ne dongorodo dokusisimbira. Ta di tura komaguru gaso gane. Koruha oru mbali, oku nako mbali. 4Ta rugana tupu hena yitji yonomudigo yomusu, ta vambaike ko nako ngorodo. 5Age ta yi zweke monongondo dekesinya eli nolina yokusisimbisa. 6Nswiko kwa zi rugene nongorodo zene‐zene, monaure nosentimeta 114 ngoso, monompatji nosentimeta 69 ngoso. 7Komaruha nagenye gonswiko kwa ruganenene ko vakerubi vavali wongorodo, 8nkenye ogu koruha rumwe. Age kwa va ruganene mwasimwe tupu nonswiko. 9Vakerubi kwa zanzumwinine mavava gawo koSikesa soVeta, va gamene nswiko zako. Awo kwa lipere yipara. Nkenye ogu kwa tere ponswiko.
Erugano lyositafura sonomboroto dokuzambera Karunga
(Ex 25:23-30)
10Age ta rugana sitafura sositji somusu, monaure waso nosentimeta 91 ngoso, monompatji nosentimeta 46 ngoso, ano momusika nosentimeta 69 ngoso. 11Kositafura ta vambaike ko ngorodo zene‐zene, makura konontere daso nako ta kundurukida ko ngorodo. 12Ta toona ko evaro lyosentimeta noharufa, makura ta vambaike ko ngorodo. 13Ta rugana nongondo dongorodo ne, ta di tura komakovhu gane, di livyuke nomaguru gane. 14Nongondo tadi likara pepi nevaro, ntani va wapa kuzweka mo yitji yonomudigo dokusimbisa sitafura. 15Age makura ta rugana yitji yonomudigo yomusu, ta vambaike ko ngorodo. 16Age makura ta rugana yipako yopositafura, yongorodo zene‐zene eyi: yiyaha, nonkinda, yikana nomarupasa gokuruganesa ponzambo zoyinwa.
Erugano lyositenteko sonoramba
(Ex 25:31-40)
17Age makura ta rugana uzweko wongorodo zene‐zene. Etako lyawo noruhatji rwawo kwa kere yongorodo zene‐zene. Maurenga gonombya dokudumata nedi dokumanyuka. Nayinye eyi kwa yi rugene mosininke simwe tupu.
18Awo kwa kere nomawoko gatano‐nakumwe, nkenye koruha mawoko gatatu. 19Nkenye kuwoko, pwaga gatano‐nakumwe, kwa kara ko urenga wonombya ntatu, ado kwa manyuka ngwendi nombya dositji somandeli. 20Ruhatji rouzweko kwa kere nonombya ne, ngwendi nombya dositji somandeli, notupumina twawo notumbya twawo. 21Konhi zankenye kuwoko kwa kere mbya zokudumata. 22Nombya dokudumata nomawoko, nayinye simwe tupu nouzweko, nayinye yokuhambura mongorodo zene‐zene zimwe tupu. 23Age kwa rugene noramba ntano‐nambali dokouzweko. Yipiragwiso noyikangero nayo kwa yi rugene yongorodo zene‐zene. 24Age kwa ruganesere nokilogarama nomurongo ntatu-nantano dongorodo zene‐zene mokuhambura uzweko noyiruganeso nayinye.
Erugano lyosizambero sokuswakerererera yedumba lyewa
(Ex 30:1-5)
25Age ta rugana sizambero somusu sokuswakererera yedumba lyewa. Aso sosikwambando, monaure nosentimeta 46 ngoso, ano momusika nosentimeta 7 ngoso. Nombinga daso nado kwa tunda moomo mwaso. 26Age makura ta vambaike ko ngorodo zene‐zene kontunda zaso nokomaruha gaso nagenye gane nokonombinga daso. Ta toona ko hena evaro lyongorodo. 27Ta si ruganene nongondo mbali dongorodo, makura ta di roterere konhi zevaro komaruha gavali, mokuzweka yitji yonomudigo yokusisimbisa. 28Ta rugana yitji yonomudigo yomusu, ta yi vambaike ngorodo.
Erugano lyomagadi gokugwava noyidumba yoyiwa
(Ex 30:22-38)
29Age kwa rugene hena murora gokupongoka noyidumba yene‐yene yedumba lyewa, kuyivhonga‐vhonga moomu a rugana murugani gomurora.
Currently Selected:
Exodus 37: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
