Exodus 36

1“Besareli naOholiyaba nononkurungu nadinye, edi ga pere Hompa nondunge nounongo, edi da divire nkenye kaninke dokuhepa mokutunga upongoki, yiwo wokurugana nayinye, moomu ga yi tente Hompa.”

Mbunga tazi reta yigava yoyinzi

2Mosesa makura ta zigida Besareli naOholiyaba novagara navenye wonondunge, ava ga pere Hompa unongo, nava navenye va liwapaikilire kukwafa, makura ta va tantere, va tameke yirugana. 3Awo makura tava gusa kwaMosesa yigava nayinye, eyi va gavere Vaisraeli, morwetungo lyoupongoki. Mbunga zaIsraeli ngazi reta nonzambo nkenye ngurangura kwaMosesa. 4Vagara navenye wonondunge, ava asi yiwo wokurugana upongoki, kwa zumbire yirugana yavene, va ze, 5makura tava tantere Mosesa asi: “Vantu vana pitakanesa kureta eyi va hepa moyirugana, eyi ga tanta Hompa.”

6Mosesa makura ta tumu mbudi ezi mwaza kamba asi: “Pa ha kara hena mugara ndi mukadi, ogu ana kukwafa mokupongaikira upongoki yuma.” Makura vantu nawo tava hageke nye kutwara yuma. 7Yininke eyi va twere, yinzi, kwa pitakanene pweyi va hepere mokumana yirugana nayinye.

Etungo lyoNkongoronzugo zoMagwanekerero

(Ex 26:1-37)

8Nonkurungu dene‐dene pwava vana kara moyirugana, yiwo wokurugana Nkongoronzugo. Azo kwa zi rugene nomakehe gomawa gomazera murongo, nonongodi dosineguru nedi dopurupuli nedi donongeha, amo hena kwa honzera mo maurenga govakerubi. 9Nkenye ekehe li kare nometa murongo nane monaure, ano nometa mbali monompatji, nagenye ga hetakane. 10Makehe gatano ta ga honzakana, ga kare kumwe, ano aga gatano nago ngosikwawo. 11Ta ruganene ko nombururu komakehe gosineguru, konontere ponze zankenye ekehe lyokuhonzakana. 12Ta honzo hena nombururu nomurongo ntano kombinga zimwe zekehe lyomuhowo, ntani nombururu hena nomurongo ntano kekehe lyauvali. 13Age makura ta rugana hena yinkongo yongorodo nomurongo ntano. Makura ta pandaikisa ko ogo makehe gavali. Makura taga kara nye Nkongoronzugo.

14Ta rugana hena makehe murongo nalimwe gonohuki doyikombo, ga kare kontunda zoNkongoronzugo. 15Nkenye ekehe monaure walyo nometa murongo nantano, ano monompatji nometa mbali, nagenye kwa hetakana. 16Makehe gatano ta ga honzakana, tali kara limwe tupu, aga gatano‐nalimwe nago ngosikwawo. 17Kekehe lyokosikondo ta tura ko nombururu nomurongo ntano, ano oku kweli lyauvali nako ngosikwawo. 18Ta rugana yinkongo yongoporo yokupandaikisa ogo makehe gavali kumwe, makura tazi kara nye Nkongoronzugo zimwe tupu. 19Age kwa ruganene ukudumikiso woNkongoronzugo woyipapa yoyigeha yononzwi, ano ou umwe wosipapa sa pya kusunta wokukara kontunda zowo.

20Ga hongere hena nongundi dokusikama domusu doNkongoronzugo, 21-22nkenye ngundi kwa zi rugene zonometa ntano momusika, ano mounene mbali noharufa, kumwe nonompigetji dokudigwanekedesa. Nongundi nadinye doNkongoronzugo age kwa di rugene nonompigetji dado. 23Age ta ruganene korwaMbindakano nongundi nomurongo mbali, 24nomatako nomurongo ne gosisiliveli mokudihwilida, gavali kwankenye ngundi, nompigetji di vyukilire. 25Age kwa rugene hena nongundi nomurongo mbali dokorwaMuzogo‐zogo, 26nomatako nomurongo ne gosisiliveli, gavali mwankenye ngundi. 27KorwaUtokero konyima zoNkongoronzugo, kwa ruganenene ko nongundi ntano‐nazimwe, 28makura ta rugana hena nongundi mbali domomakovhu konyima zoNkongoronzugo. 29Nongundi edi domomakovhu kwa gwanekerere konhi, tadi zi ngorooro dogoro keguru, kongondo zomuhowo. Nongundi mbali edi da peke po makovhu gavali yimo nye va di rugene ngoso. 30Taku kara nye nongundi ntano‐nantatu nomatako gosisiliveli murongo nagatano‐nalimwe, gavali kwankenye ngundi.

31Age kwa rugene nonompatji domusu, ntano dokoruha oru roNkongoronzugo, 32ntano dokoruha rwina, edi ntano dokonongundi dokorwaUtokero, konyima. 33Sizediliso sopokatji konongundi kusivindika kutameka koruha oru dogoro korukwawo. 34Ta vambaike nongundi ngorodo, ta di korekesa konongondo dongorodo mokuhwilida yizediliso eyi ga vambaikire nayo ngorodo.

35Age ta rugana hena ekehe lyonongodi dosineguru nopurupuli, nougeha nekehe lyezera tooto lyokulimbagura, ta honzere mo mafano govakerubi. 36Age ta rugana hena nongundi ne dositji somusu dokukwata makehe, ta di vambaike ngorodo, ta koreke nondungu dado noyinkongo yongorodo. Ta rugana hena matako gane gosisiliveli, di sikamene ko nongundi. 37Perungavero lyoNkongoronzugo ta ruganene po ekehe lyonongodi dosineguru nopurupuli nougeha, nekehe lyezera tooto lyokulimbagura. 38Age ta rugana hena nongundi ntano, ta tura ko yinkongo. Konomutwe dado nokonongondo dado, ta vambaike ko ngorodo. Ta rugana matako gonongundi gatano gongoporo.

Currently Selected:

Exodus 36: KWN

Highlight

Copy