1 Timoteusa 2
2
Omu kandererere navenye
1Pomuhoverera tani mu pamperekeda asi omu likwambere oku tomu kanderere, one hena omu hundilire oku tomu pandwire Karunga morwavantu navenye, 2nohompa nava va kara momapangero navenye, asi atu kare mompora nomombili, ose hena atu tjireni Karunga, tu pire nonkango mwanayinye. 3Eyi yiyo yiwa po, ayo ya za Karunga komutjima. Age Muzowoli gwetu, 4ogu ga hara asi vantu navenye va paruke, awo hena va ka sike kediwo lyousili. 5Yeevi Karunga gumwe tupu, ano ogu a gwanekedesa Karunga novantu, nage gumwe tupu, age muntu, Jesus Kristusa, ogu ga ligava mwene, a kare sizoweso zokuzowora vantu navenye. 6Undipo wendi ou, kwa u gavere posiruwo sosiwa wokuhamena keharo lyaKarunga asi, kwa hara kuparura vantu navenye. 7Eyi yiyo va tulira nge moupositoli nomoudisi, yiyo va tura nge kovapagani asi ni ka va udisire Mbudi zepuro nousili. Kapi nina kuuyunga yimpempa, yosili nina kuuyunga!
8Ame kuna hara asi vagara ava kanderere nakunye, awo kuna zerura mawoko gawo moupongoki, va hana ehandu nositangalimba.
Eyi ga hepa kusikisa mo mukadi
9Ame kuna hara asi, vakadi nawo ava dware yidwara yoyiwa yokuliza nonkareso zongwa, walye ava litakere yikoka ndi asi va litjapere ngorodo noyiranda ndi va dware yikoverero yondiro. 10Yirugana yoyiwa yiyo ayi wapeke vakadi ava ava gava undipo asi kwa tjira Karunga. 11Mukadi a lironge mokumwena nomokulinunupika. 12Ame nokuhara si asi mukadi a ronge ndi asi a pangere yendi, nye a mwene. 13Yeeyi Adamu yige va hova kuunga, ntani Eva. 14Adamu kapisi yige va pukisire, nye mukadi yige va pukisire, makura ta zono Veta zaKarunga. 15Nye mukadi nga ka parukira mokureta vanona, nsene asi a kara mepuro nemeharo nomoupongoki nomoukuhuki.
Currently Selected:
1 Timoteusa 2: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
