زبُور 88
88
دُعا بَلدِه کومَک
سرُود و زبُورِ اَولادِه قورَح. بَلدِه سردِستِه خانِنده ها. دَ صَوتِ «مَحَلَت لِعَنّوت» خانده شُنه. قَصِیدِه هیمانِ اِزراحی.
1اَی خُداوند، خُدای نِجات مه،
شاو و روز دَ پیش تُو ناله-و-فریاد مُونُم!
2بیل که دُعای مه دَ حُضُور تُو بِرَسه؛
دَ آه-و-نالِه مه گوش بِدی!
3چراکه جان مه پُر از بَلا-و-بَدبَختی شُده
و زِندگی مه دَ عالمِ مُردا نزدِیک شُده موره.
4ما از جُملِه کسای حِساب شُدیم که دَ خاک موره؛
ما مِثلِ کسی اَستُم که دَزُو قُوَت نَمَنده.
5ما دَ مینکلِ مُرده ھا ایله شُدیم،
رقمِ کُشته شُده های که دَ گور خاو کده؛
رقمِ کسای که دِیگه دَ یاد خُو نَمیری
و از کومَکِ دِست تُو قطع شُده.
6تُو مَره دَ گورِ غَوُج ایشتے،
دَ جای ترِیک و چُقُور.
7قار تُو دَ بَلِه مه گِرَنگی مُونه
و مَره دَ پگِ جلپه های غَضَب خُو گِرِفتار کدے. سِلاه.
8آشنا های مَره از مه دُور کدی
و اُونا ره از مه بیزار کدی.
ما بَند مندیم و دُوتا کده نَمِیتنُم.
9چِیمای مه از غَم-و-غُصّه خِیره شُده.
خُداوندا، هر روز تُو ره کُوی مُونُم
و دِستای خُو ره سُون ازتُو دِراز مُوکنُم.
10آیا کارای عجِیب خُو ره بَلدِه مُرده ها نِشو مِیدی
آیا مُرده ها باله مُوشه که تُو ره حمد-و-ثنا بُگیه؟ سِلاه.
11آیا از رَحمت تُو دَ گور توره گُفته مُوشه،
آیا از وفاداری تُو دَ عالمِ نابُودی یاد مُوشه؟
12آیا کارای عجِیب تُو دَ عالمِ ترِیکی دِیده مُوشه،
آیا کارای عادِلانِه تُو دَ سرزمِینِ فراموشی یاد مُوشه؟
13لیکِن ما، اَی خُداوند، بَلدِه کومَک دَ پیش تُو فریاد مُونُم
و دَ غَیتِ صُبح دُعای مه دَ پیشگاهِ تُو تقدِیم مُوشه.
14اَی خُداوند، چرا مَره رَد مُونی
و رُوی خُو ره از مه تاشه مُونی؟
15ما از جوانی خُو رَنج دِیدیم و نزدِیک دَ مَرگ اَستُم؛
بِیمِ ازتُو دَ بَلِه مه اَسته و ما نَومِید شُدیم.
16قار تُو از سر مه باله پَرِیده
و وَحشَت تُو مَره نابُود کده.
17اُونا تمامِ روز رقمِ آو مَره محاصِره مُونه
و از هر طرف دَز مه نزدِیک شُده موره.
18یارا و دوستای مَره از مه دُور کدے؛
یگانه آشنای مه ترِیکی اَسته.
Currently Selected:
زبُور 88: HAZ
Highlight
Copy
Compare
Share
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
