Maruko 14

mianger mulrek pinatray kani Yēsu

(Matay 26.1-5; Luka 22.1-2; Yohanē 11.45-53)

1a pakangawayan zuwaya wari kana palalavat na wariyan zi na puwaelak za paresasemak na wariyan mu, na ma'izang na rahan zi na sinsi kana Sēsiyo mu mianger za kuwatreng maranger mulrek 'emevang kani Yēsu, piyanatray kantaw. 2marengay nazu: <<amanan na 'emevang nu kazu kana semasaharan na wariyan, munu venavutrung na zinekalranan.>>

kida'us i Yēsu i Bētaniya

(Matay 26.6-13; Yohanē 12.1-8)

3i Yēsu kazu i Bētaniya kana ruma' ni Simon na malripay. a penauwa za maekan mu, ulra a sasa vavayan murung za giyok na dalilr, inavakan patemuy kana salaw pazangal na lrawlraw na mu'eres narudo. tu pisa'aw na dalilr, tu 'ilrayanay na ulringulr na lrawlraw kani Yēsu i tranguru'. 4ulra papida na kazu kemayan na trau salaw 'azi semangal, zi mazayazayar nazu: <<kemani kana meraranak kana ulringulr na lrawlraw mu mipauwayan za eman? 5ini na ulringulr na lrawlraw karuwa mutrima' za teluwa leman ginpiya, melak kanini na paisu puwalrang kana kalramalraman na trau kemudakuda kana 'inava!>> mawna kemani zi salaw 'ilremes kanizu na vavayan nazu.

6mawmu marengay i Yēsu: <<kalrawalrawai i intaw! amanan na pakavangavang kantaw ziyamaw? i intaw muramawan kaninku kemakuda za saya a 'inava na lremak. 7'alrana marayas ulra kurekasa kanmu na kalramalraman na trau, nu muwai mu, karuwa mu marayas puwalrang kanazu, mawmu 'azi ku maruwa marayas mukasa kanmu. 8kipiyayaw lra nantu kinaruwayan i intaw; tu 'ilrayanay kananku zazek na ulringulr na lrawlraw mu maw muramawan kananku uwatrevelran iyanguwayan penadang. 9penatezelra ku marengay kanmu, kana rukup makalusu ziya, na fukuing nu mupalenak meredek i iyan mu, na tratrautrau ziyan vavati kanantu kinakuda na lremak, patuanger kantaw.>>

meniwan kani Yēsu i Yoda

(Matay 26.14-16; Luka 22.3-6)

10nantu sito ni Yēsu na papulu' zi zazuwa mu, ulra a sasa i Iskaliotē na trau i Yoda, mukuwa kirepana'uwa kana ma'izang na rahan i intaw, tu tratrima'anay i Yēsu veray kanazu. 11a kinger nazu kani Yoda za kema marengay mu, kasemangal, temuvang muwai veray za paisu kantaw. kemay a azu lra, maaya' kanantu kalre'ayanan meniwan kani Yēsu i Yoda.

i Yēsu zi na temakesi mukasa keravi kana palalavat na wariyan

(Matay 26.17-25; Luka 22.7-14, 21-23; Yohanē 13.21-30)

12kana puwaelak za paresasemak na wariyan kana pukaisa wari, mawna katruwakan kana siri na palalavat na wariyan kanizu na sayawari, zuwa na temakesi kiyumalr kani Yēsu: <<maranger u pauwa kaniyam i iyan muramawan kannu penadanga za keravien kana palalavat na wariyan ziyamaw?>>

13kemazu zi, pakarun lra za zazuwa kana temakesi i Yēsu, patalru marengay kanazu: <<uwa usavak i kazekalran i inmu, kiretratrevung mu sasa za trau midinikesan za sadalilran za zanum, zi kurelrang kantaw i inmu. 14nu musavak kana i iyan na ruma' i intaw mu, zi kiyumalri izu na miraruma': <marengay i sinsi: i inku zi nanku temakesi kaazu kana iyaiyan na rawang keravi kana palalavat na wariyan?> 15tu i pilralrangaw mu mena'u i makatras na tre'elr na pinakavulay lra a saya ma'izang na rawang; zi kazuwa mu i kazu paruveli kanta penadang mu.>>

16na zazuwa na temakesi mupatraran, musavak i kazekalran, na kiniretrevung ziya na lremak mu penauwa kamawan kanantu nirengay kanazu ni Yēsu; zi kazu i kazu penadang lra kanantu keravien nu palalavat na wariyan nazu.

17a karaurauv mu, i Yēsu zi na papulu' zi zazuwa na sito zuwa lra. 18a kemayan nazu zi maekan mu, marengay i Yēsu: <<marengaya ku kanmu, kanmu i savak mu, na mukasa kaninku mekan mu, ulra a sasa naniwan kaninku.>>

19salaw mavangavang kemianger nazu, zi kiyumalr kantaw na sasa sasa: <<amelri i inku 'alra?>>

20tumuvang i Yēsu: <<maw kanmu na papulu' zi zazuwa i savakan a sasa; izu na kurelrang kaninku kazu i sara tematimus za pang mekan mu pamaw. 21kamawan kana nirengay i Sēsiyo, Alrak na trau uri kipakuwatreng; mawmu izu na trau na meniwan kana Alrak na trau mu mikuwatrengan lra! ini na trau mu mara'inava nu 'azi pinialrak!>>

keraraviyan ni Luzu

(Matay 26.26-30; Luka 22.14-20; 1 Kolinto 11.23-25)

22a maekan nazu mu, melak kana pang i Yēsu, zi piyanguwayan ziya semunan kana lrayuwan na kiyanun, zi penisa' kana pang, panini veray kana temakesi, marengay: <<ekan i inmu; i ini mu maw nanku zazek.>>

23melak ziya kana takilr i intaw, lrayuwan kana Viruwa i itras, zi tuluzanay veray kanazu; tremekel lra mapiya nazu. 24marengay i Yēsu: <<ini mu maw nanku dara', maw uwasay kana Viruwa i itras zi na trau tu pinatikezir kemuret na dara', muramawan kana trau mapiya zi mu'enun. 25marengaya ku kanmu, 'azi ku lra aasalr tremekel kanini na kutra, palru za i inku zi i inmu kazu kanantu kanatal na Viruwa i itras tremekel kana vekal na kutra kanizu na wari.>>

26semenay za saya a senay nazu, zi mupatraran, mukuwa i Olēv zenan.

putralri marengay i Yēsu 'azi pakanu malrazam kantaw i Pētēro

(Matay 26.31-35; Luka 22.31-34; Yohanē 13.36-38)

27marengay i Yēsu kanazu: <<uwaaday mu 'ematelr kaninku mapiya, 'alrana marengay na Sēsiyo: <na Viruwa i itras piyanatray kana purarikan, zi tatepi' lra na mulepun na siri.> 28mawmu nu marevaaw ku mu, kinganguwayan ku kanmu mukuwa i Galili.>>

29marengay i Pētēro: <<nu maw kemazu 'ematelr kannu na trau mapiya mu, 'azi ku 'a'atelr kannu!>>

30marengay i Yēsu kani Pētēro: <<penatezelra ku marengay kannu, nu karauv 'azi ziya maruni za parepuwan na terukuk mu, uri paretatelun u 'azi pakanu malrazam kaninku.>>

31marakerevat marengay i Pētēro; <<arusay lra nu 'azi ku ka'azi mukasa kannu minatray, zi 'azi ku i pakanu 'azi malrazam kannu!>>

na zuma na temakesi mu kemani marengay mapiya.

kazu kana 'uma i Gētsēmanē kiyanun

(Matay 26.36-46; Luka 22.39-46)

32mukuwa za saya a kinazuwan nazu, i Gētsēmanē kinuwa; marengay kana temakesi i Yēsu: <<kayan i kani i inmu, ngarayaw ku kaya ku kiyanuna.>>

33kemazu zi tu pilralrangaw i Pētēro, Yakob, Yohanē mukasa mukuwa. puteha lra nana i anger i intaw, 34marengay kanazu: <<salaw nana ku anger, uri kiyanatranatray. uvilin i kani i inmu, taranapaw kasenekin a!>>

35mungawayan za pida lawang, zi mihelrupu i dare', kiyanun kiyami kana Viruwa i itras marengay, nu kararuwa mu, amanan na pakalrang kantaw kanini na nanayan. 36kiyami marengay i intaw: <<Ama, Amalri a, maruwa u za lremak ziya; kiyami ku kannu puelaku ini na 'apelrin na takilr! mawmu, amanan na iturusay nanku niranger, mawmau iturusi nannu nirangeran.>>

37a mareveliyas i intaw, mena'u kana tatelu na temakesi za turin lra alrup'e mapiya; marengay kani Pētēro: <<Simon, alrupe' u? 'azi u kararuwa masenekin za saya tuki ziyamaw?>> 38marengay ziya i intaw: <<kasenekin kiyanun, munu mukezeng zi zemelengan mu. maw kemazu muwai nanmu anger, mawmu salaw apelr na zazek.>>

39zi mukuwa ziya i intaw, kemazu kiyanun mararesan za ngay. 40kemazu zi masalr ziya mareveliyas ziya mukuwa kana temakesi i kazu, mena'u kanazu za trurin alrup'e ziya. 'azi maruwa pali'atr za matra nazu, zi 'azi lra malrazam za rarengay za eman kanazu.

41i Yēsu karetatelun mareveliyas zuwa, marengay kanazu: <<alralrupe'an mu ziyan, temalaulep ziyan? na'uwi a, meredek lra na tuki, na Alrak na trau tu naniwanay lra kana mipinamelriyan na trau! 42karahan, arelra a! na'uwi a, izu na meniwan kaninku na trau mu zuwa lra!>>

ki'evang i Yēsu

(Matay 26.47-56; Luka 22.47-53; Yohanē 18.3-12)

43a mararengay ziya i Yēsu mu, na papulu' zi zazuwa na sito kana sasa i Yoda zuwa lra. ulra salepun a trau murung za tazaw zi puwakepuk salrangan kantaw zuwa; nazu mu maw na ma'izang na rahan, na sinsi kana Sēsiyo, zi na ciyoro na pakarun zuwa. 44izu na meniwan kani Yēsu na trau mu pungaway venulri veray kanazu za kalrazaman, marengay: <<nu mukuwa ku umaya kani eman mu, maw i eman nanmu 'a'evangen na trau. 'evangu i intaw, tareilrani, pilralrangu muveruk.>>

45a meredek i Yoda, payas mukuwa i ngawayan kani Yēsu, venina: <<sinsi!>> zi muma ziya kantaw. 46kemazu zi 'emevang kani Yēsu nazu. 47na matikezir i trapingiran na trau, ulra a sasa penelretrus za tazaw, tremepa kana kuli na tinuma'izang na rahan veneresa, ladipay putani kanantu tralinga na saya. 48marengay i Yēsu kanazu: <<murung mu za tazaw zi puwakepuk zuwa 'emevanga kaninku, kamawanaw ku kana malemu na trau ziyamaw? 49kana wariwari ziya kazu ku kana vangesar ruma' panadam za trau, marayas mukasa kanmu, 'azi mu 'emevang kaninku. mawmu, na ngay i Sēsiyo 'azika'azi mula'esi.>>

50a azu, na ulra ziya na temakesi 'ematelr kantaw mapiya, penapusar lra.

51ulra a sasa vangesaran, mawmau semapay i zazek za inuwan kana muwa, kurelrang kani Yēsu i likuzan. 'emevang kantaw nazu. 52mawmu tu 'atelranay izu na inuwan, maluwalu penusar lra.

kisayvang i gikay

(Matay 26.57-68; Luka 22.54-55, 63-71; Yohanē 18.13-14, 19-24)

53nazu tu urungaw i Yēsu mukuwa kanantu ruma' na tinuma'izang na rahan; na ulra ziyan na ma'izang na rahan, na ciyoro, zi na sinsi kana Sēsiyo kazu muwazuk mapiya i kazu. 54i Pētēro kazu i dawilr kurelrang kani Yēsu, palru meredek kanantu ruma' na tinuma'izang na rahan i vavalu, kurezaul kemayan kana ki'alra'alra i savakan, kuridu. 55na ma'izang na rahan zi kana gikay peniya kemianganger miya' za uwasay kokso kani Yēsu, piyanatray kantaw, mawmu 'azi pakaatrevung za emaeman za uwasay. 56kazuwan na trau mupana venavetra' kokso kantaw mu, mawmu tu uwawasay na ngay nazu 'azi marepauwauwa.

57i likuzan mu kazu papida a trau matikezir, demawadaway venavetra' wasay kokso kani Yēsu marengay: 58<<kinger mi kantaw za marengay: <ini na pinarahanan kana lima za trau na vangesar ruma' mu ku i aivasaw lra, teluwa wariyan parahan za zuma a saya amelri pinarahan kana lima za trau na vangesar ruma'.> >> 59arusay ini na kokso, nantu nirengay nazu mu marepiyamelri.

60kemazu zi na tinuma'izang na rahan matikezir i ngawayan kana trau, kiyumalr kani Yēsu: <<tu kokso kannu nazu, iniyan u za tatuvangen za eman ziyamaw?>>

61mapeng i Yēsu, 'azi marengay za saya saya. na tinuma'izang na rahan masalr ziya kiyumalr kantaw: <<maw u i Kiristo, maw izu na kirepa'uwa kisenay puitras na Viruwa i itras tu Alrak?>>

62tumuvang i Yēsu: <<maw ku! nana'u mu kana Alrak na trau kemayan kana pukasa za kezang i tarawalran, muitras kana kutrem i lingatr mulusu zuwa!>>

63na tinuma'izang na rahan tu papirisaw tu kavang i intaw, marengay: <<amanan ta lra za trau puwasay! 64kinger mu lra kantaw marengay za semiri kana Viruwa i itras na ngay. 'alrazi rengay i inmu za kuwadakudain?>>

kemuret kantaw za mipinamelriyan nazu mapiya, pauwayanay mu piyanatrain.

65ulra a trau temama kantaw, zi atravaw ziya tu matra, kemelreveng ziya kantaw, kiyumalr kantaw: <<talram marengay, i eman na kemelreveng kannu?>> zi nazu na ki'alra'alra mu kemezeng kantaw, semelretra' kantaw.

'azi pakanumaw i Pētēro kani Yēsu

(Matay 26.69-75; Luka 22.56-62; Yohanē 18.15-18, 25-27)

66a azu mu, i Pētēro kazu ziya muvilin i makalusu na patraran. ulra a sasa tu pakarunan a vavayan na tinuma'izang na rahan zuwa. 67mena'u kani Pētēro kazu kuraridu, zi tremeketrek mena'u kantaw, marengay: <<maw u na salrangan kana Nazalē i Yēsu.>>

68i Pētēro 'azi pakanumaw zi marengay: <<'azi ku malrazam, zi 'azi ku malrazam mararengay u za eman.>> kema marengay, zi muwaliki mukuwa i ngawayan kana patraran. kazu a azu, maruni lra na terukuk.

69'azi sawariyan, izu na pakarunan na vavayan mu mena'u ziya kantaw, marengay ziya kana matikezir i trapingiran na trau: <<ini na trau mu maw na salrangan kanazu!>> 70i Pētēro masalr ziya 'azi pakanumaw.

'azi sawariyan, nazu na matikezir i trapingiran na trau mu masasalr marengay kani Pētēro: <<'azi u karuwa 'azi pakanumaw za salrangan u kanazu, 'alrana maw u i Galili na trau!>>

71zi penunang marengay i Pētēro: <<'azi ku malrazam kananmu kinakuwa izu na trau! nu 'azi tatena' ku nirengay mu, tu i pasavungaw ku na Viruwa i itras!>>

72maw a azu, karepapuwan maruni lra na terukuk; i Pētēro mu patuanger lra kanantu nirengay kantaw ni Yēsu: <<karepapuwan maruni na terukuk pakangawayan mu, paretatelun u 'azi pakanumaw kaninku.>> i Pētēro 'azi lra maruwa penezepez tu anger zi trematrangis.

Currently Selected:

Maruko 14: TPN

Highlight

Copy