Maruko 12

paruwalruwan kana kuwatreng na kivulas kana 'uma

(Matay 21.33-46; Luka 20.9-19)

1i Yēsu manay ziya za paruwalruwan panadam kanazu. marengay i intaw: <<ulra sasa a trau meravi za saya budo na 'uma, 'alazaw i paliyus, kemerutr i savakan kana 'uma za danaw kana papere'an za kutra, parahan za saya a tatungelan, zi tu pavulasanay na budo na 'uma kana kivulas kana 'uma, zi mupatraran mukuwa muzangiya lra i intaw. 2palru lra kana kiyabudo na vulan mu, i intaw pakarun za sasa a pakarunan mukuwa kana kivulas kana 'uma kiveraya kanantu tratrepa kiyaverain. 3na kivulas kana 'uma 'emevang kanizu na pakarunan, temengez kantaw, tu paluwaluwaw puveruk. 4na miya'uma mu masalr ziya pakarun za zuma sasa na pakarunan mukuwa; nazu temengez venuli' kanantu tranguru', pawnung temariyaeman kantaw. 5na miya'uma masasalr ziya pakarun za sasa kana pakarunan mukuwa, nazu tu pinatrayaw lra i intaw. nazu mararesan ziya kima'etrev za kazuwan, ulra na tinengez, ulra na pininatray. 6na miya'uma mawmau musama' lra nantu kinalraman na alrak na ma'inayan. talikuzakuzan tu pakarunay i intaw mukuwa kirepana'uwa kana kivulas kana 'uma. zi kemianganger: <nazu 'azika'azi kemaira kananku alrak.> 7mawmu, nazu na kivulas kana 'uma mu mazayazayar marengay: <ini na trau mu mawna kiyatuluz tremungulr kana miya'uma na trau, alamu a, ta pinatrayaw i intaw, tu pinieman mu nintaya lra!> 8zi 'emevang kanizu na alrak nazu, pinatray lra kantaw, na zazek 'atelranay kana budo na 'uma i patraran.>>

9kemazu zi kiyumalr i Yēsu: <<nu kemani mu, na miya'uma kana budo mu kuwadakuda awa? i intaw 'azika'azi zuwa pinatraya kananni na kivulas kana 'uma, zi asalraw ziya pavulas kana zuma na trau na budo na 'uma. 10'azi mu ziya miip kanini na ngay i Sēsiyo ziyamaw?

tu i'atelr na daykusang ini na varasa'

mutu marapazangazangal na pukaarekezan i makadare' na varasa'.

11i ini maw tu kinakuda ni Luzu,

kazu kananta iyana'u mu kemuda kana kari'eri' a!>>

12'alrana nantu kemakezeng i Yodaya na trau mu malrazam kanantu nirengay ni Yēsu na paruwalruwan maw masaselru kanazu, zi maranger 'emevang kantaw. mawmu makakaud kana zinekalranan nazu, zi kemazu lra kiruwaday kantaw muveruk lra.

na kiyaumalran kana puwasata kani Kaysa Hongti i Roma

(Matay 22.15-22; Luka 20.19-26)

13ulra papida na Palisay na trau zi na sevang ni Hērodē kipakarun zuwa kirepana'uwa kani Yēsu, maranger kemay kanantu ngay miya' za kuwarelrangan pakakuwatreng kantaw. 14marengay kantaw nazu: <<sinsi, malrazam mi za maw u a penatezelr na trau; 'azi u milingaw za kemuda mianger na trau, 'azi u menana'u tu pinimudingan za trau, kemazu u marayas penatezelr panadam kana trau kanantu vati na Viruwa i itras. 'alrazi rengayaw mi, pusata veray kani Kaysa na Hongti i Roma mu veneliyas kananta kuret aulranay? puwasata ta zi za 'azi nay?>>

15patulre'ay mena'u i Yēsu kanazu kanantu piniangeran na kuwatreng, zi marengay: <<kemuda zi maranger mu kemuwatreng kaninku? elak za saya kana ginpiya pana'uway ku!>>

16veray kantaw a saya za ginpiya nazu, kiyumalr i Yēsu: <<i itras ini na sasing zi na ngadan ni eman?>>

temuvang nazu: <<maw na Hongti i Roma.>>

17marengay i Yēsu: <<nu kemazu mu, tu eman na Hongti i Roma mu verayan kana Hongti i Roma, tu eman na Viruwa i itras mu verayan kana Viruwa i itras.>>

kinger nazu kanini na ngay mu, salaw maherareher kantaw.

na kiyaumalran kana marevaaw

(Matay 22.23-33; Luka 20.27-40)

18ulra papida na 'azi pakutatena' kana marevaaw na lremak na Satukay na trau zuwa kirepana'uwa kani Yēsu. 19marengay nazu: <<sinsi, muramawan kaniyam zi patikezir i Mosē za kuret: <nu minatray lra a trau mu, muvilin na 'azin na vavayan, iniyan za alrak, i waditaw na ma'inayan 'azika'azi mi'azin kani kuravaktaw na inavangulr, venulas kani vautaw tremungulr mialrak.> 20kazu a maruwadiyadi a papitu: na marama'izang mu mi'azin lra, minatray lra, 'azi mialrak; 21na pukazuwa mu mi'azin kani kuravaktaw, kemazu minatray lra, 'azi mialrak; na pukatelu maw mararesan. 22na papitu na maruwadiyadi mi'azin lra mapiya kanizu na vavayan, minatray lra mapiya, 'azi mialrak mapiya. i likuzan mu izu na vavayan minatray lra. 23kemani mu, kazu kana karevavaawan na wari mu, nazu nu kemay kana minatray marevaaw mu, ini na vavayan mu ni eman lra 'azin awa? 'alrana papitu na maruwadiyadi mu mi'azin kantaw.>>

24temuvang i Yēsu kanazu: <<pamelri mu lra, kemuda ziyamaw? 'alrana 'azi mu patulre'ay malrazam kana Sēsiyo, zi 'azi malrazam kanantu kezang na Viruwa i itras. 25nazu nu marevaaw kemay kana minatray mu, mararesan kana tēnsi i itras, 'azi mi'a'azin 'azi musavak. 26na kireeman kana minatray na trau marevaaw na lremak, 'azi mu miip kana valray ni Mosē na vinavalrayan izu na muwavatri' na su'ar na vativatiyan ziyamaw? na Viruwa i itras marengay kani Mosē: <maw ku na Viruwa i itras ni Aburaham, na Viruwa i itras ni Isak, na Viruwa i itras ni Yakob.> 27tu pauwayan mu marengay za, na Viruwa i itras maw tu Viruwa i itras kana vaaw na trau, amelri tu Viruwa i itras kana minatray na trau. tatena' za pamelri mu lra!>>

marama'iza'izang na kuret

(Matay 22.34-40; Luka 10.25-28)

28ulra a sasa sinsi kana Sēsiyo kinger kanazu za matuvatuvang mu, salaw 'inava kema tu iyatuvang ni Yēsu kana Satukay na trau, zi zuwa kani Yēsu pupana saya za kiyaumalran: <<na kuret i savakan maw na iyaiyan na marapazangazangal?>>

29tumuvang i Yēsu: <<na pukaisa maw: <Iseraēl a, kingeri i inu! i Luzu -- nanta Viruwa i itras maw na sasa i Luzu. 30peniya nu anger, peniya nu ikalraman, peniya nu nirangeran, peniya nu kezang sahar kani Luzu -- nannu Viruwa i itras.> 31na pukazuwa maw: <kalramanu na 'udar, kamawan za lraman u kannu.> iniyan lra za pakazuma na kuret za marapazangal lra kananni.>>

32izu na sinsi kana Sēsiyo marengay kani Yēsu: <<sinsi, pamaw nannu nirengay! penauwa kamawan kanannu nirengay, na Viruwa i itras mu mawmau a sasa, iniyan lra za pakazuma kantaw. 33peniya nu anger, peniya nu nirangeran, peniya nu kezang sahar kani Viruwa i itras, zi kalraman za 'udar, kamawan za lraman u kannu. ini marapazangal kazu kana patavangan i itras venatri' patavang zi na zuma na ipatavang veray kana Viruwa i itras.>>

34malrazam mena'u i Yēsu kanantu iyatuvang salaw misayhuwan, zi marengay kantaw: <<'azi u lra adawilr kana kanatal na Viruwa i itras.>>

kemay harem lra mu, iniyan lra za trau malemu kiyumalr kani Yēsu za kakuwalengan.

na kireeman kani Kiristo na kiyaumalran

(Matay 22.1-46; Luka 20.41-44)

35i Yēsu kazu kana vangesar ruma' a panadam za trau mu pupana saya za kiyaumalran: <<na sinsi kana Sēsiyo mu kemuda zi maruwa marengay za i Kiristo maw temuwan ni Davidē kema awa? 36i Davidē kipuanger lra kana Vangesar Lu'em zi marengay:

i Luzu marengay kananku Luzu:

kayan kaninku i tarawalran i inu,

ngangara kaninku za puilusaw nannu 'alra kanannu kuy i makalusu.

37i Davidē i intaw <Luzu> kema kantaw, i Kiristo kemuda zi maw nintaw temuwan ni Davidē ziyamaw?>>

taranapaw kana sinsi na Sēsiyo

(Matay 23.1-36; Luka 20.45-47)

na zinekalranan sahar kinger kanantu i vavati ni Yēsu. 38a kazu panadam kanazu mu, marengay i intaw: <<taranapaw kana sinsi na Sēsiyo; nazu sahar mikavang kana tatelraw na lrungpaw zi mu'iva'ivat makadadalan, sahar kazu kana inukasakasayan za trau kisungal kimumalr za 'inavayan nazu, 39zi sahar ziya kana waazukan ruma' i savakan na pakamelri na kakayanan zi na kakayanan i ngawayan kana semasaharan. 40tu elakay kanantu pinieman na inavangulr nazu, zi kematatelraw kitukiyanuanun. 'azika'azi kipasavung za marapakirekirev nazu!>>

tu isunan na inavangulr

(Luka 21.1-4)

41i Yēsu kazu kemayan kana vangesar ruma' na 'alili i ngawayan, mena'una'u kana trau za kemuda puwa za paisu i savakan kana sasunan na vangvang. kazuwan na mipaisu na trau mu putani i savakan sazu za paisu; 42i likuzan lra zuwa a sasa kalramalraman a inavangulr, meretra' savakan za zuwaya tangpiya, karuwa za saya himpiya. 43i Yēsu venina pazuwa kanantu temakesi mapiya, marengay kanazu: <<penatezelra ku marengay kanmu, ini na kalramalraman na inavangulr nantu pinutani pusavak kana sasunan na vangvang mu marasazu kana zuma na trau. 44na trau mu kemay kanantu pinieman na sama' pupana semunan; mawmu kalramalraman lra i intaw, mawmu tu sunananay lra peniya nantu kavaawan na paisu.>>

Currently Selected:

Maruko 12: TPN

Highlight

Copy