Luka 1
1
pungaway na ngay
1Tēofilus yawan a:
kazuwan lra na kikarun kana venavalray, pakalrazam kana mupana kanta i savak na lremak. 2nantu i pakalralrazam nazu maw initurus kanazu na kemay kemirakaz pamatra mena'u kananni na lremak, pawnung na palenak lra kanini na vati na trau tu nirengayan. 3ini peniya mu patulre'ay mena'u ku lra kemay rakaz, semeneng maranger ku paturusanay tu pinakalrangan pakalrazam kannu, 4na pauwayan mu pakalrazam kannu za nu ninadaman na vati mawna tatena'.
putralri marengay kanantu pinialrakan na semasuwap i Yohanē
5na yawan i Hērodē a demikes i Yodaya mu, ulra sasa a rahan, mingadan kani Zakaliya, mawna muravak kana sevang ni Apiya na rahan; tu 'azin mingadan kani Ēlisabēt, zi maw a niruma'enan ni Aron tu temuwan. 6tu iyana'u kana Viruwa i itras, nazu na zazuwa maw a patezelr na trau, pakirungetr miturus kanantu seratr ziya ni Luzu zi na kuret. 7nazu iniyan za alrak; 'alrana i Ēlisabēt 'azi maruwa mialrak, zi dawadawan lra nazu na zazuwa.
8ulra a saya wari, i Zakaliya pinutrepa kikarun, kazu i ngawayan kana Viruwa i itras kikarun kanantu kiyakarunan na rahan. 9kurelranganay na kakuwayanan na rahan mivus mu, maruwa musavak kana vangesar ruma' ni Luzu semungehiyu i intaw. 10a semuwangehiyu i intaw mu, na zinekalranan kazu i patraran kiyanun. 11maherareher za, ulra a tēnsi ni Luzu matikezir kana hiyu na patavangan i tarawalran pakurena'u kantaw; 12mena'u lra i Zakaliya mu, mare'alav zi makaud. 13mawmu izu na tēnsi marengay kantaw: <<Zakaliya, ikakaud! na Viruwa i itras kinger lra kanannu i kiyaanun; nannu 'azin i Ēlisabēt piaalrak za sasa a ma'inayan veray kannu, pungadani kani Yohanē i inu. 14kasemamangal u; kazuwan a trau kasemamangal kanantu inupanayan. 15a iyana'u ni Luzu, uri kaayawan a trau i intaw. na laveni' zi na panana na kutra, 'azi tratrekel peniya i intaw; kazu ziya kana tiyalr ni tainataw mu, katemuyay za Vangesar Lu'em i intaw#1.15 <<kazu ziya kana tiyalr ni tainataw mu, katemuyay za Vangesar Lu'em i intaw>> karuwa marengay za <<a mupana kamay tu tiyalr ni tainataw mawmu katemuyay za Vangesar Lu'em i intaw>>.. 16i intaw aurung kazuwan na Iseraēl na trau mareveliyas kani Luzu -- nantu Viruwa i itras. 17rarawak i ngawayan kani Luzu i intaw, kerevat mikezang, kamawan kana patralritralri i Ēliya. i intaw pareka'inavayaw masalr na ma'izangan zi na lralrak, pareveliyasaw paka'inava na malemu na trau, maruwaya mukuwa kana patezelr na trau na misayhuwan na dalan; puwalrang kana zinekalranan i intaw zuwa kiyatrevunga kani Luzu.>>
18marengay i Zakaliya kana tēnsi: <<pakalrang ku za eman malrazam kanini na lremak nay? dawadawan ku lra; zi ma'izang lra za 'ami ku 'azin.>>
19marengay na tēnsi: <<maw ku na matikezir i ngawayan kana Viruwa i itras i Gabriēl; kipakarun ku paredeka za ngay kannu, pakalrazam kannu kanini na kasemangalan na lremak. 20mawmu, 'alrana 'azi u kiputatena' kananku nirengay, kazu penauwa za wari mu ula'esi nazu na ngay, uri ka'umuy u, palru kananku iyatuvang za mula'esi kanizu na wari mu karuwa u marengay lra.>>
21a azu, kazu mapapiya mengangara kani Zakaliya, 'azi malrazam za kemuda kana sawariyan i vangesar ruma'. 22palru za mupatraran i intaw, 'azi maruwa kimazayar kanazu, zi malrazam lra mapapiya kantaw za kazu kana vangesar ruma' mena'u za pakamelri za nirekudayan. 'azi maruwa marengay i intaw, kemazu lra mataralimalima pakalrazam kanantu anger kanazu mapiya.
23kazu kana vangesar ruma' kikarun na wari a mukipiya, zi muruma' i Zakaliya. 24melavat za 'azi sawariyan, tu 'azin i Ēlisabēt tatena' za malii lra, lruwatra vulan za kasawariyan 'azi mupatraran. 25marengay i intaw: <<i Luzu tatena' lra kuwaniyaw ku kema'inava temara, puelakay ku lra za irayan i ngawayan kana zinekalranan.>>
putralri marengay za pinialrak i Yēsu
26kaenem vulan tu kalii ni Ēlisabēt, na Viruwa i itras pakarun kana tēnsi i Gabriēl mukuwa i Galili kana kazekalran i Nazalē kinuwa. 27paredeka za ngay veray kana sasa a vulavulayan, mingadan kani Maliya; ini na vulavulayan mu kinirazuk lra kana niruma'enan ni Davidē a sasa mingadan kani Yosēf a ma'inayan. 28mukuwa na tēnsi kantaw i ngawayan, marengay: <<kiyalriman za ping-an u! maw u na pasalaw kilraman na vavayan, kurekasa i Luzu kannu!>>
29i Maliya 'alrana maw ini nantu ngay na tēnsi, salaw mare'alav makaud zi mavangavang, masamasalr kemianger kanini na mumalr tu pauwayan. 30marengay na tēnsi kantaw: <<Maliya, ikakaud, 'alrana tu kalramanaw u na Viruwa i itras. 31kalii u zi piyaalrak za sasa a ma'inayan, pungadani kani Yēsu. 32i intaw uri utu ayawayawan za trau, i intaw tu Alrak na maraitraitras na Viruwa i itras kinuwa. i Luzu na Viruwa i itras patikezir kantaw kiyatuluz tremungulr kani temuwantaw i Davidē na yawan tu kakayanan. 33utu ayawan munayun kanantu ruma' ni Yakob, tu kezang na yawan iniyan za paalruwan!>>
34marengay i Maliya kana tēnsi: <<'azi ku ziyan mukuwa musavaka, na kemani na lremak kemuda zi karuwa mupana ziyamaw?>>
35temuvang na tēnsi: <<mulusu na Vangesar Lu'em kannu i zazek; 'atripaw u tu kezang na maraitraitras na Viruwa i itras. mawna kemani, izu na uri pinialrak na Vangesar Vu'enin tu Alrak kana Viruwa i itras kinuwa. 36na'ui nu niruma'enan i Ēlisabēt, ara dawadawan i intaw, 'azi piyaalrak kema kantaw na trau, mawmu harem malii lra za nanema vulan i intaw. 37'alrana kana Viruwa i itras iniyan za 'azi maruwa kemakuda za sasaya.>>
38marengay i Maliya: <<nintaw ku pakarunan a vavayan ni Luzu; kiyalriman nannu ngay mula'esiya kaninku.>> kemazu zi muveruk lra na tēnsi kantaw.
mukuwa mena'uwa kani Ēlisabēt i Maliya
39'azi sawariyan, masikasik mukuwa i Maliya, mahelr piyazenan mukuwa. meredek i Yoda za saya a kazekalran. 40musavak lra kana ruma' ni Zakaliya, mumalr kani Ēlisabēt. 41a kinger i Ēlisabēt tu mumalr ni Maliya mu, mahuwahu tu alrak i tiyalr lra. tu katemuyay kana Vangesar Lu'em i Ēlisabēt, 42kematamuni 'emuy'uy: <<maw u na marakinalraman kana vavayan i savakan; nu alrak i tiyalr mu maw kemazu kilraman! 43i tainataw ku Luzu zuwa mena'uwa kaninku, a kirepa'uwa ku za eman awa?. 44a kinger ku kanannu i mumalr mu, ku alrak i tiyalr mu semangal mahuwahu. 45na pakutatena' patulre'ay kanantu nirengay na vati ni Luzu za 'azika'azi mela'esi kema na vavayan mu kemudakuda kana mika'inavayan a!>>
kemaira pulihu kani Luzu i Maliya
46marengay i Maliya:
ku anger kemaira pulihu maw na Ma'izang i Luzu;
47ku tinavawan kema kana Viruwa i itras -- misemangalan ku kani Luzu na venaaw;
48'alrana tu piangeraw nantu pakarunan na 'azi kirungetr na vavayan.
kemay harem, na tratrautrau ziyan kema kaninku za mika'inavayan,
49'alrana na ma'izang za kezang na Viruwa i itras muramawan kaninku papula'esi za ma'izang a lremak.
tu ngadan pasalaw lra vangesar;
50i intaw pasalaw melraman kana kemaira kemakaud kantaw,
kana trungulran iniyan za paalruwan.
51pupana kanantu lima na mikezang,
puelakaw na kapalavatan matras na trau tu nirangeran na kuwatreng ziya.
52tu sukunanay putani na kerevat na yawan kemay kana pazangal na kakayanan;
zi tu puitrasaw na 'azi kirungetr na trau.
53tu pakavetrekeraw za imaran na aekanen kana savavelawan na trau,
paluwaluwaw puveruk na miyaeman na trau.
54-55i intaw tematena' paturus kanantu nirengay kananta temuwamuwan.
puwalrang kanantu pakarunan i Iseraēl.
tu piangeraw i Aburaham, pasalaw melraman kantaw,
pawnung palru kanantu temuwan, patari velretreng!
56i Maliya mukasa kaazu kani Ēlisabēt karazuwa teluwa vulan, zi muruma'.
tu inupanayan na semasuwap i Yohanē
57meredek lra tu piyaalrakan na wari ni Ēlisabēt, mialrak za sasa a ma'inayan. 58tu 'uda'udar zi na niruma'enan a kinger kani Luzu za veray kantaw kemani kana ma'izang a kalramanan mu, kurelrang kantaw semangal.
59saliyusan lra tu inupanayan na alrak, muramawan kana kakuwayanan za kikeret zuwa nazu, pawnung maranger tremungulr tu ngadan ni temamataw pungadan kani Zakaliya. 60mawmu marengay i tainataw: <<'azi! pingangadan kani Yohanē i intaw.>>
61marengay na niruma'enan kantaw: <<nu niruma'enan i savakan iniyan za mingadan kanini na ngadan.>> 62pataralimalima kani temamataw nazu, kiyumalr kantaw za papungadan za eman kana alrak.
63kiveray za saya a vavalrayan i Zakaliya, venavalray za: <<tu ngadan maw i Yohanē.>> salaw maherareher mapapiya. 64kazu a azu, i Zakaliya masalr lra maruwa marengay, zi semenay pulihu kana Viruwa i itras i intaw. 65na 'uda'udar salaw maherareher mapiya. ini na lremak paketrepay mupalenak lra kana zenazenan i Yodaya; 66na kinger lra na trau kemiangeanger za: <<ini na alrak uri utu eman trauwan awa?>> 'alrana kurena'uwan za ulra tu kezang ni Luzu kurekasa kantaw.
iputralri marengay ni Zakaliya
67temamataw ni Yohanē i Zakaliya tu redekay na Vangesar Lu'em, zi palenak pakalrazam kanantu vati na Viruwa i itras, marengay:
68semenaya ta kani Luzu -- kana Viruwa i itras na Iseraēl!
tu kirungetraw menau' tu zinekalranan, lapusay lra kanazu.
69i intaw kemay kanantu pakarunan kani Davidē tu ruma' i savak,
muramawan kanta patikezir za sasa a pukasa za kezang na venavaaw i Luzu.
70a awatr ziya mu, tu pakalranganay kana vangesar na patralritralri marengay lra:
71tu vaawaw ta puwaday kana 'alra,
lapusaw na kezang na awiles ziya kanta na trau.
72tu i kalramanaw pakirev nanta temuwamuwan,
pawnung piangeraw na vangesar tu kuret.
73-75temuvang paturus i intaw kananta temuwamuwan kani Aburaham,
putani za ngay venaaw kanta pakiruwaday kana 'alra,
pakemazu kananta kinavaawan,
iniyan za kakaudan kazu kantaw i ngawayan,
pakalranganay za mukirungetr zi patezelran semungal kikarun kantaw.
76ku alrak a,
kinuwa u za patralritralri kana maraitraitras na Viruwa i itras.
kazu u i ngawayan kani Luzu, pudalan kantaw;
77pakalrazamay zantu zinekalranan:
mawna kilapus tu pinamelriyan nazu,
uri kiyavaaw nazu.
78nanta Viruwa i itras lralraman miapelran;
tu pasenanay ta za lramanan venaaw na senan,
79zi kemay i itras pasenan ziya
kana ulra ziyan vaaw kana kiyanatrayan na trau,
kemezeng kanta mukuwa kana mareka'inavanava na dalan.
80marekama'a'izang lra na alrak, dalikedik marukezang. kaazu i alalas i intaw, palru za kazu kemakuda i ngawayan kana Iseraēl na trau.
Currently Selected:
Luka 1: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023
