دوّمتا نامه قُرنتیانِ ره 3
3
تازه عهدِ خیدمتکاران
1مگه بازم بنا بُکودیم اَمی جا تعریف کودَن؟ یا اَنکی امان احتیاج دَریمی بعضیان مانستن شمرأ سفارش نامه فَدیم یا شیمی جا سفارش نامه فیگیریم؟ 2شُمان خودتان اَمی سفارش نامه ئید، ایتا نامه کی اَمی دیلان سر بینیویشته یِ کی همتان تانیدی اونَ بخوانید و بشناسید. 3شُمان نیشان بدَئید کی مسیح نامه ایسید، کی بواسطه ی امان شمرأ فارسِه، کی مُرکّب اَمرا بنیویشته نُبوسته، بلکی خُدا ی زنده روح اَمرا بینیویشته بُبوسته و نه لوح سنگی سر، بلکی آدمان دیلانِ لوحِ سر بینیویشته بُبوسته.
4اَمان مسیح خاطریِ کی اَجور اطمینانی خُدا محضر درون دَریم. 5نه اونکی خودمان لیاقت بدَریم کی ادعا بُکونیم کی اَمی دَس جا ایچی بر اَیه، بلکی اَمی لیاقت خُدا جا ایسه. 6خُدا بو کی اَمرا لیاقت فدَه تا تازه عهد خیدمتکاران بیبیم، عهدی کی خُدا روحِ سر برقرارِ، نه اونچی سر کی ایتا بینیویشته ویشتر نیه. چونکی بینیویشته کوشه، ولی خُدا روحْ زیندگی بخشه.
7هسّا، اگه اُ خیدمت کی مرگَ ختم بوستی و سنگی لوح سر حک بُبوسته بو، جلالِ اَمرا ظهور بُکود اوجور کی اسرائیل مردوم نتانستیدی موسی دیمِ جلال واسی اونَ فندرید، هرچن اُ جلال از بین شئون دُبو، 8چنقد ویشتر، اُ خیدمتی کی بواسطۀ خُدا روح ایسه جلال اَمرا ایسه. 9چونکی اَگه خیدمتی کی محکوم بوستنَ ختم بوستی جلال اَمرا بو، چنقد ویشتر خیدمتی کی صالح بوستنَ فارسه جلالِ جا پُره. 10چون اونچی کی یه موقعی پُر جلال بو، هسّا در مقایسه با اَ جلال کی سرتره، دِه جلالی ناره. 11و اَگه اونچی کی نابودَ بوستی جلال اَمرا بو، اونچی کی باقی مانه چنقد ویشتر جلال اَمرا ایسه.
12پس چونکی اَجور اُمیدی دَریمی، جرأتِ مرا گب زنیم، 13نه موسی مانستن کی ایتا نقاب خو دیمِ سر فاکشه تا اسرائیل مردوم آخربسر اونچیَ کی از بین شئون دُبو، نیدینید. 14ولی اَشانِ فیکران تاریکَ بوستِ، چونکی هو نقاب عهد عتیق خواندن موقع تا ایمروج باقی بمانسته و اوساده نُبوسته، چونکی فقط مسیح درون اوساده به. 15حتّی تا ایمروج، هر وقت کی موسی توراتَ خوانیدی، ایتا نقاب اوشان دیل سر قرار گیره. 16ولی هر وقت ایکَس خُداوند ورجه واگرده، نقاب اوساده به. 17خُداوند، روح ایسه و هر جا خُداوند روح بمانه، اویا آزادی نَئه. 18و تمان امان کی بینقابِ دیمِ مَرا، خُداوندِ جلالَ، ایتا آینه مانستن فَندریم، هو شکل مانستن، جلال جا به ایتا جلال کی ویشترَ به عوضَ بیم؛ و اَن خُداوند جا شروع به کی روح ایسه.
Currently Selected:
دوّمتا نامه قُرنتیانِ ره 3: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
