تیتوس 3
3
هَر خوب ایش ایچی آماده اولینز
1اوللارینگ یادینا گتیر کی رَئیسلَردن و حکم سؤرَن صاحب مَنصبلَردَن اطاعت ائدلَّر، فرمان آپاران اولالّار و هَر خوب ایش ایچی آماده اولالّار؛ 2هئچ کَسدَن پیس دئمهیهلَّر، جَر و مُرافادان اوزاق تورالّار، مُلایم اولالّار و واری خَلخ اینن بیر تمام و کمال مُلاحظه اینن رووآل ائدلَّر.
3چونکی بیزیم اؤزوموز ده بیر زامان نافَهم و اِطاعت ائدمهیَن ایدیک و یولدان چیخمیش ایدیک، رَقم به رَقم هَوی و هَوسلَره و خوشلیگلارا اَسیر ایدیک؛ گؤنلَریمیزی بدجنسلیگده و حَسودلیگده گچیردیردیک. باقّی آداملار بیزدن نفرت وارلاریدی و بیز دا بیر بیردن نفرت واریمیز ایدی. 4آما اوندا کی نجات وئرنیمیز تارئنینگ خوبلیگی و آداملارا اولان مهربانلیگی آلهیینه چیخدی، 5او بیزی نجات وئردی. بو نجات، ائدیگیمیز صالح عَمللَر سَبرسینه دهییلدی، بلکی اؤنونگ اؤز رَحمینه گؤره و اؤرهکلَریمیزینگ یویولماگی اینن ایدی کی اؤنونگ طریقیندن، تارئنینگ قُدّوس روحو بیزه دوبارادان دوغولماک و تازّا زندلیگ وئردی؛ 6ائله او قُدّوس روح کی تارئ اؤنو، نجات وئرنیمیز عیسا مَسیح طریقیندن، فروانلیگ اینن بیزیم اوستوموزه تؤکدی، 7تا اؤنونگ فِیضی اینن صالح ساییلاک و او امیده گؤره کی اَبدی زندلیگه واریمیز، وارِثلَر اولاک. 8بو سؤز اعتماد ائدمهلی دیر و سندن سئیرم کی بو زادلار اوستونه اِصرار وارینگ اولا، تا اوللار کی تارئیا ایمان گتیرمیشلَر، هوشکار اولالّار کی اؤزلَرینی خوب عَمللَره وَقف ائدلَّر. بو زادلار خلخ ایچی چوخ خوب و فایدهلی دیر.
9آما اَبلهلیگ اوستوندَن اولان جَنگ و جَدللَردَن، شَجرهنامهلَردَن، تَفرقهلَردَن و شَریعت اوستونه اولان جَر و مُرافالاردان اؤزونگو ایراق ساخلا، بو سَبریه کی بوللاردا نه فایده وار، نه ده اَرزش. 10او آدام بارهسینده کی تَفرقه سالیر، بیر دفعه و اوندان سورا دا ایکّینجی دفعه ایچی بئلسینی هوشکار ائد و اوندان سورا ده رابطهینگی اؤنونگ اینن کَس. 11چون بیلیرَینگ کی بیر بئلهیین آدام فسادا چکیلمیش و گُناهکار دیر. اؤنونگ اؤزو، اؤزونو مَحکوم ائدیر.
آخیرکی نَصیحتلَر و سلاملار
12اوندا کی آرتِماسی یا دا تیخیکوسی یوللادیم یانینگا، اؤز تلاشینگی ائد کی گلَینگ نیکوپولیس شَهرینه یانیما، بو سَبریه کی تصمیم توتموشام کی قیشی اؤردا گچیردَم. 13اؤز تلاشینگی ائد کی وکیل زیناسا و آپولُسا کؤمک ائدَینگ تا سَفرلَرینه ادامه وئرلَّر، گؤزله کی هئچ کَم و کَسر یوخلاری اولا. 14قؤی تا خلخیمیز اؤرگنلَّر کی اؤزلَرینی خوب ایشلَره وَقف ائدلَّر تا بئله، ضروری احتیاجلاری بَرطرف ائدمکده بیر کؤمَک اولالار و ثَمرسیز اولمایالّار.
15منیم اینن اولانلارینگ واریسی بئلینگه سلام ائتیردیرلَر. اوللارا کی ایماندا بیزی چوخ سئیرلَر سلام ائتیرد.
تارئنینگ فِیضی سیزینگ وارینز اینان اولسون.
Currently Selected:
تیتوس 3: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
