تیتوس 1
1
1تارئ غُلامی و عیسا مَسیحنینگ بیر حَواریسی، پولُسدان. من مَعین اولموشام تا تارئ سَچیلیلَرینینگ ایمانینی تَقویت ائدَم و او حَقیقتی کی دیندارلیگ اوستوندَن دیر، دئیَم. 2بو حَقیقت او اَبدی زندلیگینگ امیدی اوستوندَن دیر، کی او تارئ کی هئچ وَخت یالان دئمئیر، زمانالار باشلانماکیندان ایلَری اؤنونگ وَعدهسینی بیزه وئردی، 3و بیر مُناسب وَختده او وَعده آلهیین اولدو، او کلامدا کی اؤنونگ اِعلام ائدمَکی نجات وئرَنیمیز تارئ اَمرینه منه تاپشیریلدی.
4تیتوسا، کی بیر ایمانا گؤره کی واریمیزینگ نَصیبی اولموش، منیم حَقیقی اولادیم دیر:
بووآ تارئ طرفیندَن و نجات وئرَنیمیز مَسیح عیسا طرفیندَن فِیض و صُلح و سلامتلیگ اولسون.
کلیسانینگ آغسَقّللَری نهیین اولاسیلار
5بو سَبریه دیر کی من سَنی کْرت جَزیرهسینده ویل ائدیم تا یاری یاریمچیلیق ایشلَری مَطلبه ائتیشتیرَینگ و ائله او طور کی سَنه اَمر ائدیم، هَر شَهرده بیر پارا آغسَقّل قؤیانگ.
6کلیسا آغسَقّلینینگ زندلیگینده بیر زاد اولمایاسی کی اؤنونگ اوستونه سَرزنشت اولونا؛ او، بیر تَک آروادینگ اَری اولاسی و اولادلاری ایمانلی اولاسیلار کی اوساری سرّیقلیگدَن یا دا یاغیلیگدَن آرّی اولالّار. 7بو خاطره کی بیر ناظر کی تارئ مُباشری دیر، زندلیگینده بیر زاد اولمایاسی کی اؤنونگ اوستونه سَرزنشت اولونا. او، تَکبّرلی یا تئز خشم ائدَن یا عَرق خور یا گؤج دئیَن اولمایاسی یا دا پیل ایچی حِرص وورمایاسی، 8بلکی قوناق سئین، خوبلیگی چوخ سئین و نَفْسی جلوسینی توتان اولاسی، او بیر عَملی دؤز و مُقدّس و مُنظّم آدام اولاسی؛ 9او سِفت یاپیشاسی او اعتماد ائدمهلی کلاما کی تعلیم وئریلمیش، تا بئله باشارا خلخی دوز تعلیم اوستوندن نصیحت ائده و ائله بئله ده ضِدّ ائدنلَره تَشَر ائده.
10بو سَبریه کی یاغی و ویل دانیشان و حُقّهباز آدام چوخ وار، علیالخصوص ده او بئیله کی سُنّت ائدمَکه اِصرار وارلاری. 11بو آداملارینگ آغیزی باغلاناسی، بو سَبریه کی اوللار، مَنفعت طمعیسی اوستوندَن بیر تَعلیملَر وئریرلَر که وئرمئیهسیلَر و بئلهیین اوبالاری بوتون نابودلیگه چکیرلَر. 12اوللارینگ اؤز نَبیلَرینینگ بیری دئمیش کی: «کْرِتلیلَر همیشه یالانچی دیرلار، شَریر وَحشی جاناوارلار دیرلار، بیعار و قارنَکی دیرلر.» 13بو گواهلیگ دوز دیر. پس اوللارا سخت تشر ائد تا ایماندا دوز اولالّار و 14اؤزلَرینی وَقف ائدمهیلَّر یهودی اَفسانهلَره و حَقیقتدَن دؤنن خَلخینگ حکملارینا. 15آرّی آداملار ایچی واری زاد آرّی دیر، آما نَجس و ایمانسیز آداملار ایچی، هئچنه آرّی دهییل، بلکی هم فکرلَری، هم ده وجدانلاری نَجس دیر. 16اوللار اِدّعا ائدیرلَر کی تارئیی تانییرلار، آما عَمللَری اینن اؤنو حاشا ائدیرلَر. اوللار نفرت ائدیلمیش و اطاعت ائدمهین دیرلر، و هئچ رَقم دؤز ایشه یاراشمئیرلار.
Currently Selected:
تیتوس 1: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
