فیلیمون 1
1
1پولُسدان، کی مَسیح عیسا خاطرینه زنداندا دیر و کاکامیز تیموتائوسدان،
عَزیز همکاریمیز فیلیمونا 2و باجیمیز آپْفیایا و هم رَزمیمیز آرخیپوسا و سنینگ ائوینگدهکی کلیسایا: 3بووآمیز تارئ و رَب عیسا مَسیح طرفیندَن سیزه فِیض و صُلح و سلامتلیگ اولسون.
فیلیمونونگ مُحبّتی و ایمانی
4دعالاریمدا سَنی یادا گتیرنده همیشه تارئمی شُکر ائدیرم، 5بو خاطره کی من سَنینگ مُحبّتینگ و ایمانینگ بارهسینده کی رَب عیسایا و واری مَسیحه ایمانی اولانلارا وارینگ ائشیتیرَم، 6دعا ائدیرَم بو کی ایمانینگی شَریک اولیرانگ کؤمَک ائده کی هر خوب زادینگ بارهسینده کی مَسیح خاطرینه بیزده دیر، بیر تمام و کمال مَعرفت اَله گله. 7کاکام، چونکی من سَنینگ مُحبّتینگدَن چوخ شاد اولموشام و تَسلّی توتموشام، بو خاطره کی مَسیحه ایمانی اولانلارینگ اؤرهکی سَنینگ طَریقیندن تازّالانمیش.
پولُسینگ خواهشی
8بونا گؤره ده، با بو حال کی من مَسیحده ائله جِسارت واریم کی سَنه حکم ائدَم تا او ایشی کی سَندَن سئییلیر، گؤرَینگ، 9آما مُحبّت خاطرینه، تَرجیح وئریرَم کی یالوارام بئلینگه: مَن پولُس، کی بیر یاشلی آدامام و ایندی ده بیر زندانییام مَسیح عیسا ایچی، 10من سَنه، اولادیم اونِسیموس بارهسینده یالواریرام، ائله او کی زنداندا اولدوگوم موقعده، اؤنونگ بووآسی اولدوم. 11ایلَرتر او سَنینگ هئچ ایشینگدَن گلمئیردی، آما ایندی گرچکدَن او هم منیم ایشیمدَن گلیر، هم ده سَنینگ ایشینگدَن. 12من اؤنو کی جیگریم گوشاسی دیر سَنینگ یانینگا گئری یوللاییرام. 13من خوشحال اولوردوم کی اؤنو اؤز یانیمدا ساخلایام تا بئله او زاماندا کی اینجیل ایچی زنداندایام سَنینگ یئرینگه مَنی خدمت ائده، 14آما تَرجیح وئردیم بدون بو کی سَن راضی اولانگ هئچ ایش گؤرمهیَم تا بئله سَنینگ خوبلیگ ائدمَکینگ مَجبورلیگ اوستوندَن اولمایا بلکی اؤز میلینگ اوستوندَن اولا. 15چونکی شاید بو خاطره دیر کی او سَندَن بیر مُدّت ایچی آیریلدی تا همیشه ایچی بؤکوله یانینگا. 16آما داها نه بیر غُلام لهیین، بلکی بیر غُلامدان آرتیق، بیر عَزیز کاکا لهیین. علیالخصوص ده منیم ایچی، آما ناغاد آرتیق سَنینگ ایچی، هم جسمده هم ده رَبده.
17پس اگر سَن منی اؤز یولداشینگ بیلیرَینگ، اؤنو بیر رَقم کی اینگار منی قبول ائدیرَینگ، قبول ائد. 18اگر سَنه پیسلیگ ائدمیش یا دا بیر زاد بئلینگه وئرهجَک دیر، اؤنو منیم آیاقیما یاز. 19من، پولُس، بونو اؤز اَلیم اینن یازیرام: بونونگ عَوضینی وئرهرَم، اَلبَت سئمئیر دئیَم کی سَن حَتّی اؤز جانینگی ده مَنه مَدیوناگ. 20بلی کاکا، سئیرَم کی رَبده بیر پارا مَنفعت سَندَن منه ائتیشه. منیم اؤرهکیمی مَسیحده تازّالاد. 21بونو سنه یازیرام چونکی سنینگ اطاعت ائدمَکینگدَن خاطر جَمعَم و بیلیرَم کی دئدیگیمدَن ده آرتیق ائدهرَینگ. 22ائله بو موقعده، مَنیم ایچی بیر اُتاق آماده ائد، چونکی امید واریم کی تارئ سیزینگ دُعالارینزی مُستجاب ائده و اؤز لُطفی اینن منی بؤکه سیزینگ یانینزا.
23اِپافْراس کی مَسیح عیسا خاطرینه منیم اینن زنداندا دیر، سَنه سالام ائتیردیر. 24ائله بئله ده همکارلاریم، مَرقُس، آریستارخوس، دیماس و لوقا سَنه سالام ائتیردیرلَر. 25رَب عیسا مَسیحنینگ فِیضی سیزینگ روحینز اینن اولسون.
Currently Selected:
فیلیمون 1: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
