لوقا 19
19
عیسا و زَکّی
1عیسا اَریحا شَهرینه گلدی و او شَهر ایچیندن گچیردی. 2بیر زَکّی آدلی کیشی اؤردا ایدی. او، باج ییغَنلَرینگ رئیسی ایدی و چوخ ده دارا ایدی. 3او سئیردی گؤره عیسا کیم دیر، آما جمعیتینگ چوخ اولدوگو ایچی اؤنو گؤره بیلمئیردی چونکی بویو کوتایدی. 4پس زَکّی ایلَریتر قاچدی و بیر چنار آغاجینینگ باشینا چیخدی تا عیسایی گؤره، بو سَبریه کی عیسا ائله او تئزلیگده او یولدان گچهسی ایدی. 5عیسا او چنار آغاجینا ائتیشَنده، اوخاری باخدی و زَکّییه دئدی: «زَکّی، تئز اول گَل آشاغی، بو سَبریه کی بوگؤن من سَنینگ ائوینگده قالاسیم.» 6او دا تئز آشاغی گلدی و چوخ شادلیگ اینن عیسایی اؤز ائوینه آپاردی. 7خَلخ بونو گؤرَنده واریسی، توغّولادیلار و دئدیلَر: «عیسا بیر گُناهکار آدامینگ قوناقی اولموش.» 8ائوده زَکّی توردو آیاقی و رَب عیسایا دئدی: «باخ، آقا، دارالیگیمینگ یاریسینی یوخسوللارا وئرهرَم. هَر کَسینگ مالینی کی ناحَق آلمیشام، اؤنونگ دؤرد برابرینی او آداما گئری وئرهرَم.» 9عیسا اؤنا دئدی: «تارئنینگ نجاتی بوگؤن بو ائوه گلمیش، بو سَبریه کی بو کیشی ده ابراهیم پیغمبر سویوندان دیر. 10چونکی انسان اوغلو گلدی تا لایلانانلاری بولا و اوللاری نجات وئره.»
طلا سِکّهلَرینینگ مَثَلی
11عیسا بو گپلَری ائشیدَن آداملار ایچی، بیر مَثَل ده چَکدی، بو سَبریه کی اورشلیم شَهرینه یاخین ایدی و خَلخ گمان ائدیرلَردی کی تارئ پادشاهلیگی هر آن دیر کی ظاهر اولا. 12پس عیسا دئدی: «بیر اَصیل زاده، بیر ایراق مملکته گئتدی تا اؤزو ایچی پادشاهلیگ مَقامی اَله گتیره و گئری دؤنه. 13آما گئدمَکدَن ایلَری، اؤز نوکرلَریندَن اون آدام چاغیردی و اوللارا اون طلا سِکّهسی وئردی کی اوتوز آیینگ دستمزدی ایدی و دئدی: ”من گئری گلَننچاز بو سِکّهلَر اینان ایش گؤرونز.“ 14آما او آداملار کی قرار ایدی او بئللرینه پادشاهلیگ ائده اوندان نفرت وارلاریدی. اوللار او کیشینینگ آردی سورا ائلچی یوللادیلار تا دئیهلَّر کی: ”بیز سمئیرَک کی بو کیشی بیزه پادشاهلیگ ائده.“ 15او آدام پادشاهلیگ مَقامینی اَله گتیرَندَن سورا، گئری دؤندو و اَمر ائدی تا او نوکرلَرینی کی اوللارا سِکّه وئرمیشدی، گتیرَلَّر یانینا تا گؤره کی ناغاد مَنفعت ائدمیشلَر. 16بیرینجیسی گلدی و دئدی: ”آقا، سَنینگ سِکّهینگ اون برابر مَنفعت گتیرمیش.“ 17پادشاه اؤنا دئدی: ”آفرین، ای خوب نوکر، بو سَبریه کی بیر کوچوک ایشده امانت دار ایمیشَینگ، اون شَهرینگ حاکملیگینی سنه وئرهرَم.“ 18ایکّینجیسی گلدی و دئدی: ”آقا، سَنینگ سِکّهینگ بئش برابر مَنفعت گتیرمیش.“ 19پادشاه اؤنا دا دئدی: ”سَن دا بئش شَهرینگ حاکمی اول.“ 20اؤچونجوسو گلدی و دئدی: ”آقا، بویور، بو سَنینگ سِکّهینگ، اؤنو بیر یاقلوقا دولادیم و بیر قیراقا قؤیدوم. 21چونکی سَندَن قورخیردیم، بو سَبریه کی سن بیر چَتین آدامانگ؛ او یئردَن کی پول یاتیردمامیشانگ، مَنفعت گؤتورورَینگ و او یئردَن کی اَکمهمیشَینگ بیچیرَینگ.“ 22پادشاه جواب وئردی: ”ای شَریر نوکر! سَنی اؤز سؤزونگ اینَن محکوم ائدیرَم. سَن کی بیلیردینگ من بیر چَتین آدامام کی او یئردَن کی پول یاتیردمامیشام، مَنفعت گؤتورورَم و او یئردَن کی اَکمهمیشم بیچیرَم، 23اَقلّاً منیم پیلیمی صَرّافلار یانینا قؤیسایدینگ تا گئری گلدیگیمده اؤنو مَنفعتی اینَن گئری آلام.“ 24پادشاه اؤرداکی آداملارا دئدی: ”سِکّهیی اوندان آلینز و او نوکره کی اون سِکّه واری وئرینز.“ 25اوللار پادشاها دئدیلَر: ”آقا، اوندا کی اون سِکّه وار!“ 26پادشاه دئدی: ”سیزه دئییرم هَر کَسه کی واری، آرتیق وئریلَر. آما او آدام کی یوخو، ائله او ده کی واری، اَلیندن آلینار. 27آما او دشمنلَریمی کی سمئیرلَردی من اوللارا پادشاهلیگ ائدَم، گتیرینز بورا و گؤزوم دَمینده بویونلارینی وورونز.“»
عیسانینگ اورشلیم شَهرینه گلمَکی
28عیسا بوللاری دئیهندَن سورا، اوللاردان ایلَری، اورشلیم شَهرینه ساری گئتدی. 29زیتون داغینداکی، بِیتفاجی و بِیتعَنیا کَندلَرینه یاخین اولاندا، شاگردلَرینینگ ایکّیسینی یولا سالدی و دئدی: 30«قَرشیدهکی کَنده گئدینز. ائله او کَند ایچینه گئتدیگی اینَن بیر باغلی قودوقو بولاراینز کی ایندییانچاز هئچ کَس اونا مینمهمیش. اونو آچینز و گتیرینز بورا. 31اگر بیری خَبر آلدی: ”نه ایچی اؤنو آچیراینز؟“ دئیینز: ”رَبّینگ ایشیندَن دیر.“»
32او ایکّی آدام گئتدیلَر و گؤردولَر کی واری زاد ائله اولهیین دیر کی عیسا بئللرینه دئمیش ایدی. 33قودوقو آچاندا، قودوقونگ اَیهلَری خَبَر آلدیلار: ”قودوقو نه ایچی آچیراینز؟“ 34شاگردلَر ده جواب وئردیلَر: ”رَبّینگ ایشیندَن دیر.“ 35اوللار قودوقو عیسا یانینا گتیردیلَر، اؤز قابالارینی قودوقونگ اوستونه آتدیلار و عیسایی اونا میندیردیلَر. 36عیسا یولدا گئدَنده، آداملار اؤز قابالارینی عیسا یولو اوستونه سَردیلَر. 37زیتون داغینینگ اؤزوقولوسونا یاخین اولاندا، شاگردلَرینینگ واریسی شادلیگ اینَن، بوتون اوندان گؤرَن قوّتلی ایشلَر ایچی، اوجا سَس اینَن تارئیی حمد و ثنا ائدمَکه باشلادیلار 38و دئییرلَردی: «مُتبارک اولسون او پادشاه کی رَبّینگ آدیندا گلیر! گؤیده صُلح و سلامتلیگ و گؤیلَرینگ ائنگ اوخاریسیندا عِزّت اولسون.»
39فَریسی عالِملَرینینگ بیر پاراسی کی جمعیت آراسیندا ایدیلار، عیسایا دئدیلَر: «اُستاد، شاگردلَرینگی هَیله تا بو گپلَری چالمیالار.» 40عیسا دا جواب وئردی: «سیزه دئییرم کی اگر بوللار بی سَس اولالّار دا، بو داشلار سَسه گلَرلَر.»
41عیسا اورشلیم شَهرینه یاخین اولاندا و شَهری گؤرَنده، اؤرا ایچی آغلادی 42و دئدی: «کاشکی سَن، بَله سَن، بوگؤن بیلَیدینگ کی نه زادلار سَنینگ ایچی صُلح و سلامتلیگ گتیریر! آما ایندی بو زادلار سَنینگ گؤزلَرینگدَن پناه دیرلَر. 43چونکی بیر زامان گلَر کی دشمنلَرینگ سَنینگ ضدّینگه سنگر چَکرلَر و سَنینگ دئییرینگی واری یاندان آلارلار و هَر یاندان سَنه فشار گتیرَرلَر 44و سَنی، یئر اینَن بیر ائدهرلَر؛ سنی و سَنینگ ایچیندهکی اولادلاری. اوللار قؤیمازلار کی داش داش اوستونه قؤیولو قالا. بو ایشلَر باشینگا گلر، بو سَبریه کی سن تارئ گؤرمَکینگه گلَن وختی بیلمَدینگ.»
عیسا معاملهگرلری مَعبددَن یازّیا سالدی
45عیسا گئتدی مَعبده و او آداملاری کی مَعبد ایچینده معامله ائدیرلَر ایدی، مَعبددَن یازّیا آتدی 46و دئدی: «مُقدّس یازیلیلاردا یازیلمیش کی: ”منیم ائویم، دُعا ائوی چاغیریلار،“ آما سیز اؤنو اوغرولار یووآسی ائدمیشَینز.» 47عیسا هَر گؤن مَعبدده تَعلیم وئریردی. باش کاهِنلَر کی مَعبدینگ عالِملَری ایدیلر، تورات معلّملَری و یهود خَلخینینگ رئیسلَری سئیرلَردی عیسایی نابود ائدَلَّر، 48آما بیر یول بولمادیلار کی سئدیگیلَری ایشی گؤرَلَّر، چونکی واری خَلخ اشتیاق اینان عیسا سؤزلَرینه قولاق آسیرلاردی.
Currently Selected:
لوقا 19: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
