اعمال 16
16
تیموتائوس، پولُسا و سیلاسا قوشولیر
1پولُس دِربِه و لِستْره شَهرلَرینه گلدی. اؤردا بیر تیموتائوس آدلی شاگرد زندلیگ ائدیردی. تیموتائوسینگ آناسی یهودی ایدی و ایماندار ایدی، آما بووآسی یونانلی ایدی. 2لِستْرهده و قونیهدهکی کاکالار اؤندان خوب دئییرلَردی. 3پولُس کی سئیردی تیموتائوس بئلَسینه قوشولا، اؤرالاردا زندلیگ ائدَن یهودیلار خاطرینه آپاردی اؤنو سُنّت ائدی، چونکی واری کَس بیلیرلَردی کی اؤنونگ بووآسی یونانلی دیر. 4اوللار ائله بئله کی یوللاریندا، بو شَهردَن او شَهره گئدیرلَردی او قانونلاری کی اورشلیمدهکی حَواریلار و شیخلَر قؤیموشلاردی اؤرانینگ آداملارینا وئریرلَردی تا او قانونلارا گؤره رووآل ائدلَّر. 5بئله، کلیسالارداکی آداملار ایماندا قوّت توتیرلاردی و گؤن به گؤن سایقوشلاری آرتیق اولیردی.
پولُس رؤیاسی
6اوللار فْریجیه و غَلاطیه منطقهلَریندَن گچدیلَر، چونکی تارئنینگ قُدّوس روحو اوللارا اجازه وئرمهدی کی آسیا منطقهسینده تارئ کلامیندان دانیشالّار. 7اوندا کی میسیه منطقهسینه ائتیشدیلر، تلاش ائدیلَر بیطینیه ولایتی ایچینه گئدَلَّر، آما عیسا روحو اوللارا اجازه وئرمهدی. 8پس میسیهدَن رَد اولدولار و گئدیلَر تْروآس شَهرینه. 9پولُس گئجه بیر رؤیا گؤردو. گؤردو کی بیر مَقدونیهلی کیشی اؤردا تورموش و بئلَسینه یالواریر دئییر کی: «مَقدونیهیه گل و بیزه کؤمَک ائد.» 10پولُس بو رؤیایی گؤرَنده، بیز فیالفور مَقدونیهیه ساری یولا دؤشدوک، بو سَبریه کی داها بو نتیجهیه ائتیشدیک کی تارئ بیزی چاغیرمیش تا اینجیلی اوللارا اعلام ائدَک.
لیدیه ایمان گتیرمَکی
11بئله، بیز کشتی اینن تْروآس شَهریندَن مستقیم گئتدیک ساموتْراکی جَزیرهسینه و صاباسی ده نیاپولیس شَهرینه ائتیشدیک. 12اؤردان دا فیلیپی شَهرینه گئتدیک کی مَقدونیه منطقهسینینگ بیر مهم شَهرلَریندَن ایدی و روملیلار اؤردا زندلیگ ائدیرلَردی و نئچه گؤن او شَهرده قالدیک.
13یهودیلارینگ مُقدّس شنبهسینده گئتدیک شَهرینگ دروازهسیندان یازّیا بیر چئ قیراقینا، بیر یئره کی گمان ائدیردیک اؤرا دُعا ائدمَک یئری دیر. اوتوردوک و او آروادلار اینان کی بئلینه ییغیلمیشلَردی دانیشدیک. 14اوللارینگ آراسیندان بیر لیدیه آدلی آرواد بیزیم گپلَریمیزه قولاق آسیردی. او تیاتیرا شَهرینینگ آداملاریندان ایدی و ایشی ده بو ایدی کی اَرغوانلی پارچالاری کی چوخ ده گران ایدیلار، ساتیردی. بو آرواد تارئیی پَرست ائدیردی. رَب اؤنونگ اؤرهکینی آچدی تا پولُسینگ گپلَرینه قولاق آسا گؤره نه دئییر. 15لیدیه و اوباسی آدامی تَعمید غُسلی توتاندان سورا، لیدیه اِصرار اینان بیزه دئدی: «اگر اینانیراینز کی رَبّه ایمان گتیرمیشم، منیم ائویمه گلینز و قالینز.» بیز دا اؤنونگ دئدیگینه بوین اَیدیک.
پولُس اینان سیلاس زنداندا
16بیر گؤن کی گئدیردیک دُعا ائدمَک یئرینه، بیر جاهال کنیز اینن قَرشیلَشدیک کی بیر روح اؤنونگ وجودی ایچینه گیرمیشدی کی باعث اولیردی او کنیز فالگیرلیگ ائده. او بو فال توتماک اینان چوخ سود اؤز اَربابلارینا ائتیشدیریردی. 17او کنیز دؤشدو پولُس و بیزیم قولونجومیزا و لیکلهییردی کی: «بوکیشیلَر، مُتعال تارئنینگ نوکرلَری دیرلَر کی نجات یولونو سیزه اعلام ائدیرلَر.» 18چوخ گؤنلَر قیز ائله بئله بو ایشی گؤروردو. آخیر پولُسینگ صَبری باش اولدو، دؤندو و او روحا دئدی: «عیسا مَسیحینگ آدیندا سنه فرمان وئریرَم کی بو قیزدَن یازّیا چیخینگ!» او روح ائله او آن قیزدَن چیخدی یازّیا. 19آما اوندا کی او کنیزینگ اَربابلاری گؤردولَر کی داها او کنیز طریقیندن بیر زاد گیرلرینه گلمَز، پولُس و سیلاسی توتدولار و بئللَرینی سئریده سئریده چَکدیلَر شَهرینگ میدانینا، رئیسلَر حُضورونا. 20اوللاری قاضیلار یانینا گتیرنده، دئدیلَر: «بو کیشیلَر یهودی دیرلَر و بیزیم شَهریمیزده شلوغ سالیرلار. 21بیر پارا رَسملر خلخه اعلام ائدیرلَر کی بیز روملیلار ایچی جایز دهییل کی اوللاری قبول ائدَک یا دا اوللارا عَمل ائدَک.»
22جمعیت ده پولُس و سیلاسا حمله ائدمَکده او آداملارا قوشولدولار. او قاضیلار دستورینا، پولُس و سیلاسینگ رَختلَرینی داللاریندا اوردولار و اوللاری چُماق اینان ووردولار. 23پولُس و سیلاسی چُماق اینان چوخ ووراندان سورا، بئللَرینی آتدیلار زندانا و زندانبانا دا دستور وئردیلر کی اوللاردان گؤز گؤتورمهیه. 24زندانبان دا کی بیر بئلهیین دستور آلمیشدی، اوللاری او ایچَریدهکی زندانا آتدی و قیچلَرینی آغاج کُندهسینا زَنجیرلهدی.
فیلیپیهلی زندانبان ایمان گتیریر
25تقریبا گئجه یاری ایدی کی پولُس و سیلاس دُعا ائدیرلَردی و تارئیا حمد و ثنا ییری ییرلهییرلَردی. زندانیلار اوللار سَسینه قولاق آسیرلاردی 26کی بیردن بیر بویوک زلزله گلدی، ائله کی زندانینگ پییی تیترَدی و ائله او آن واری دَرلَر آچیلدیلار و واری زندانیلارینگ زَنجیرلَری آچیلدی تؤکولدو. 27وختی کی زندانبان اویاندی و گؤردو کی زندانینگ درلَری آچیق دور، قیلیجینی چَکدی تا اؤزونو اؤلدوره، بو سَبریه کی گمان ائدیردی زندانیلَر قَچمیشلر. 28آما پولُس اوجا سَساینن چاغیردی دئدی: «اؤز باشینگا قَضّا سالما، چونکی بیزیم واریمیز ائله بوردایاک!» 29زندانبان چیراغلار سئدی و تلهسیق زندانینگ ایچینه گئتدی و ائله بئله کی قورخودان تیترهییردی پولُس و سیلاس قیچینه دؤشدو. 30اوندا اوللاری گتیردی یازّیا و خبر آلدی: «آقالار، نه ایش گؤرهسیم تا نجات توتام؟» 31اوللار جواب وئردیلر: «رَب عیسایا ایمان گتیر و نجات توتارانگ. سن و اوبانگ آدامی.» 32پولُس و سیلاس رَبّینگ کلامی بارهسینده اؤنونگ اینان و واری او آداملار اینان کی اؤنونگ اوباسیندا ایدیلار دانیشدیلار. 33گئجه ائله او ساعات، زندانبان اوللاری آپاردی و یارالارینی یوودو؛ زندانبان فیالفور تَعمید توتدو، اؤزو و بوتون اوباسی آدامی. 34اوندا اوللاری آپاردی اؤز ائوینه و اوللارا خورَکی وئردی. او زندانبان و اوباسینینگ باقّی آداملاری خوشحال ایدیلار کی تارئیا ایمان گتیرمیشلَر.
35یئر آچیلاندا، قاضیلار، مأمور یوللادیلار او زندانبان یانینا و دئدیلر: «او کیشیلَری ویل ائد تا گئدَلَّر.» 36زندانبان بوللاری پولُسا خبر وئردی و دئدی: «قاضیلار دستور یوللامیشلار کی سیزی آزاد ائدم. داها ایندی گلینز یازّیا و سلامتلیگاینن گئدینز.» 37آما پولُس بئللَرینه دئدی: «اوللار بیزی کی روم تَبعهسییاک، بوندان ایلَری کی بئلَمیزی محاکمه ائدَلَّر خلخ جلوسیندا وورموشلار و زندانا آتمیشلار؛ و ایندی سئیرلَر بیزی پناهدا آزاد ائدَلَّر؟ یو، اصلاً! قؤی تا اؤزلَری گلَلَّر و بیزی بوردان چاخارتالار یازّیا.»
38مأمورلار بو گپلَری او قاضیلارا خبر وئردیلر. اوللار ائله کی ائشیتدیلر کی پولُس و سیلاس روم تَبعهسی دیرلار، قورخدولار. 39پس گلدیلر و اوللاردان عُذر خواهلیگ ائدیلَر. پولُس و سیلاسی گتیردیلار یازّیا و بئللَریندَن سئدیلَر تا او شَهردَن گئدَلَّر. 40پس اوللار زنداندان چیخدیلَر و گئتدیلَر لیدیه گؤرمَکینه. کاکالاری گؤرَنده اوللاری تشویق ائدیلَر. اوندان سورا دا اؤردان گئدیلَر.
Currently Selected:
اعمال 16: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
