اعمال 13
13
بارنابا و شائول یوللانیرلار
1اَنطاکیهدهکی کلیسادا نَبیلَر و مُعلّملَر وار ایدی: بارنابا، نیجِر چاغیریلان شَمعون، قیرَوانلی لوکیوس، مَنائن کی هیرودیسِ حاکمینگ قدیمی یولداشی ایدی و شائول. 2اوندا کی اوللار رَبّی پَرست ائدیرلَردی و اوروج ایدیلار، تارئنینگ قُدّوس روحو دئدی: «بارنابایی و شائولی او ایش ایچی کی بئللَرینی اؤنونگ ایچی چاغیرمیشام، منیم ایچی سَچینز.» 3اوندا اوروج توتماکدان و دُعا ائدمَکدَن سورا، اوللار، او ایکّی اوستونه اَل قؤیدولار و بئللرینه برکت وئردیلر و بئللَرینی یوللادیلار.
بارنابا و پولُس قِپرسده
4بئله، بارنابا و شائول کی تارئنینگ قُدّوس روحو طَریقیندَن یوللانمیشلاردی، سِلوکیه بندرینه گئدیلَر و اؤردان دا دریا یولوندان گئتدیلَر قِپرسه. 5سَلامیس شَهرینه ائتیشنده، یهودیلارینگ عبادتگاهیندا تارئ کلامینی اعلام ائدیلَر. مَرقُس چاغیریلان یوحَنّا دا کؤمَک ایچی اوللار اینان ایدی. 6اوندا کی اوللار جَزیرهنینگ واری یئریندَن گچدیلَر، پافوس شَهرینه ائتیشتیلَر، اؤردا بیر یهودی کیشی اینن قَرشیلَشدیلَر کی آدی بارْیِشوع ایدی. او جادوگر ایدی و بیر یالان نَبی ایدی. 7او، روملی والی سِرگیوس پولُسینگ بیر یولداشلاریندان ایدی. بو والی بیر بیلَن آدام ایدی. والی بو سَبریه کی سئیردی تارئ کلامینی ائشیده، بارنابا و شائولی احضار ائدی. 8آما او جادوگر کی اؤنونگ آدینینگ معنیسی، عالِم ایدی، اوللار اینان مُخالفت ائدی و تلاش ائدیردی قؤیمایا کی والی ایمان گتیره. 9آما شائول کی بئلَسینه پولُس دا دئییرلَردی، تارئنینگ قُدّوس روحوندان دؤلدو، او جادوگره سینگه باخدی و دئدی: 10«ای اِبلیس اوغلو، ای سَن کی هَر صالحلیگینگ دشمنیینگ، ای سَن کی حُقّهبازلیگدَن و شَریرلیگدَن دؤلویانگ، رَبّینگ دؤز یوللارینی اَگِری ائدمکدن اَل چَکمئیرَینگ؟ 11ایندی باخ، رَبّینگ اَلی سنینگ ضدّینگه دیر. سن کور اولارانگ و بیر مُدّتنچاز گؤنو گؤره بیلمَینگ.» ائله او آن، دومان و قَرَنگیلیگ او جادوگری توتدو. او اؤز دئییرینه اوغونیردی و آدام گزیردی تا اَلیندَن توتا و یولو بئلَسینه گؤرسَده. 12اوندا کی والی گؤردو کی نیجه اولموش ایمان گتیردی. چونکی رَب بارهسیندهکی تَعلیمدَن مات قالمیشدی.
پولُس و بارنابا اَنطاکیهده
13پولُس و اوللار کی بئلَسی اینن ایدیلار پافوس شَهریندَن، دریا یولوندان گئتدیلَر پِرجه شَهرینه کی پامفیلیه ولایتینده ایدی. او یوحَنّا کی بئلَسینی مَرقُس چاغیریرلاردی اوللاردان آیریلدی و اورشلیمه بؤکولدو. 14اوللار پِرجهدن گچدیلر و ائتیشدیلَر اَنطاکیه شَهرینه کی پیسیدیه منطقهسینده ایدی. مُقدّس شنبه گؤنونده گئتدیلَر یهودیلار عبادتگاهینا و اوتوردولار. 15بوندان سورا کی توراتدان و پیغمبرلَر یازیلیلاریندان اوخولدو، عبادتگاه رئیسلَری پولُس و بارنابایا پیغام یوللادیلار و دئدیلَر: «کاکالار، اگر خلخ ایچی بیر تشویق ائدَن سؤز وارینز، بویورینز.» 16پس پولُس توردو آیاقی و اَلی اینن اِشاره ائدی و دئدی: «ای یهود خلخی و ای تارئدان قورخان غیرییهودیلار، قولاق آسینز! 17بو یهود خلخینینگ تارئسی، بیزیم جَدلَریمیزی سَچدی و بیزیم خلخیمیزی اوندا کی مِصر سرزمینینده غُربتده زندلیگ ائدیرلَردی، بیر بویوک ملّت ائدی و بیر بویوک قُدرت اینن اوللاری اؤردان چیخارتدی. 18تارئ، قیرخ ایله یاخین بو خَلخینگ رووآللارینی بیاباندا تَحمّل ائدی 19و کَنعان تورپاقینداکی یئتدی ملّتی نابود ائدندن سورا اوللارینگ تورپاقینی اؤز خَلخینه میراث وئردی. 20بو ایشلَرینگ واریسی، یاخین، دؤرد یوز اَلّی ایل اولدو. اوندان سورا تارئ، سَموئیل پیغمبر دورانینانچاز، اوللارا قاضیلار وئردی. 21اوندا اوللار بیر پادشاه سئدیلَر و تارئ بنیامین طایفهسیندَن، قِیس اوغلو، شائولی وئردی اوللارا. شائول قیرخ ایل اوللارا حکومت ائدی. 22بوندان سورا کی تارئ، شائولی پادشاهلیگدان قؤیدو قیراقا، داوودو مَعین ائدی تا اوللارینگ پادشاهی اولا و داوود بارهسینده گواهلیگ وئردی و دئدی: ”یَسا اوغلو داوودو کی اؤز گؤینوم سئدیگی دیر بولموشام؛ او منیم سئدیگیمی بوتون یئرینه ائتیردَر.“ 23تارئ ائله اولهیین کی وَعده وئردی، بو آدامینگ نَسلیندن بیر نجات وئرَن، یعنی عیسایی یهود خلخی ایچی یوللامیش. 24عیسا گلمَکیندن ایلَری، یحیا تارئ خلخینینگ واریسینه اعلام ائدمیشدی کی توبه ائدلَّر و تَعمید غُسلی توتالّار. 25اوندا کی یحیا اؤز خدمتینینگ دورهسینی تؤکتدی، دئدی: ”گمان ائدیرَینز کی من کیمَم؟ یو، من او دهییلَم؛ آما باخینز، مَندن سورا بیری گلیر کی من لایق دهییلَم اؤنونگ آیاققابیلارینینگ باغینی ده آچام.“
26«ای کاکالار، ای ابراهیم پیغمبر نَسلی و ای سیزینگ آراینزداکی تارئدان قورخان غیرییهودیلار، بو نجات پیغامی بیزیم ایچی یوللانمیش. 27اورشلیمده زندلیگ ائدَن خلخ و اوللارینگ باشی بویوکلَری، بو سَبریه کی نه عیسایی تانیدیلار نه ده پیغمبرلَر سؤزلَرینی کی هَر شنبه اوخولیردی آنگلادیلار، عیسایی محکوم ائدمَک اینن او سؤزلَری یئرینه ائتیشتیردیلَر. 28با بو حال کی اوللار عیسادا هئچ تَقصیر بولمادیلار کی اؤلومه لایق اولا، پیلاتُس والیدان سئدیلَر تا اؤنو اؤلدوره. 29و اوندا کی هَرنهیی کی اؤنونگ بارهسینده یازیلمیش ایدی، یئرینه ائتیشتیرمیشلَردی، بئلَسینی صَلیبدن گتیردیلر آشاغی و بیر مَقبره ایچینه قؤیدولار. 30آما تارئ اؤنو اؤلومدَن دئرّیتدی. 31عیسا چوخ گؤنلَر او آداملارا کی بئلَسی اینن جَلیل ولایتیندَن، اورشلیم شَهرینه گلمیشلردی ظاهر اولدو. ائله او آداملار کی ایندی اؤنونگ بارهسینده بیزیم خَلخیمیزه گواهلیگ وئریرلَر. 32بیز بو خوش خَبری سیزه وئریرَک کی، تارئ او وَعدهیی کی بیزیم جَدلَریمیزه وئردی، 33عیسایی دئرّیتمَک اینن، بیزیم ایچی کی او آداملارینگ اولادلارییاک یئرینه ائتیشتیرمیش. ائله اولهیین کی ایکّینجی زَبوردا یازیلمیش کی:
«سن منیم اوغلومانگ؛
بوگؤن، من سنینگ بووآنگ اولموشام.“
34«تارئ، بو حقیقت بارهسینده کی اؤنو اؤلومدن دئرّیتدی تا هئچوَخت ائپیرهمئیه بئله دئمیش:
«”من، او مُقدّس و حَتمی بَرکتلَری
کی وَعدهسی داوودا وئریلمیش،
سیزه وئرهرَم.“
35بونا گؤره دا آیری زَبوردا ده دئییر کی:
«سَن قؤیمانگ کی اؤز سَچدیگینگ ائپیریه.“
36«آما داوود، اؤز دورانیندا تارئ هَدفینی یئرینه ائتیشتیرَندَن سورا، اؤلدو و اؤز جَدلَرینه قوشولدو و بَدنی ائپیرَدی. 37آما او کی تارئ بئلَسینی دئرّیتدی، بَدنی ائپیرَمهدی.
38«پس کاکالار بونو بیلینز کی عیسا طَریقیندَن دیر کی گُناهلارینگ باغیشلانماکی سیزه اعلام اولیر. 39هَر کَس عیسایا ایمان گتیره، اؤنونگ طَریقیندَن واری زاددان آزاد اولیر. بوتون او زادلاردان کی موسا شَریعتی طَریقیندن اوللاردان آزاد اولا بیلمهدینز. 40پس گؤزلهیینز تا ائدمئیه او سؤز کی پیغمبرلَر طَریقیندن دئییلمیش، باشینزا گله، ائله او سؤز کی دئییر:
41«”باخینز، ای ریشخند ائدَنلَر،
حیرت ائدینز و نابود اولینز،
بو سَبریه کی سیزینگ دورانینزدا من بیر ایش گؤرورَم.
بیر ایش کی حَتّی اگر بیری بئلَینزه دئیه ده،
اینانماینز.“»
42اوندا کی پولُس و بارنابا عبادتگاهدان گئدیرلَردی یازّیا، خلخ بئللَرینه یالواردیلار تا گلَن شنبه دا بو گپلَر بارهسینده بئللَری اینن دانیشالّار. 43جمعیت عبادتگاهدان گئدَن وخت چوخ آدام یهودیلاردان و تارئیی پَرست ائدَن آداملاردان کی یهود دینینه دؤنموشلاردی، پولُس و بارنابا قولونجوندان یولا دؤشدولار. پولُس و بارنابا اوللار اینان دانیشیرلاردی و بئللَرینی تشویق ائدیرلَردی تا تارئ فِیضینده اِستقامت ائدلَّر.
44گلَن شنبه تقریبا شَهرینگ واری آداملاری ییغیلدیلَر تا رَبّینگ کلامینی ائشیدَلَّر. 45آما یهودیلار جماعاتی گؤرَنده، حَسودلیگدان دؤلدولار و پولُسا سویوش وئره وئره، اؤنونگ سؤزلَری اینن ضِدّ ائدیلَر.
46پولُس و بارنابا جرأت اینن دئدیلر: «لازم ایدی کی تارئ کلامی واری کَسدن ایلَری اَوّل سیزه دئییله. آما بو سَبریه کی سیز بو کلامی رَد ائدینز و اؤزونزو اَبَدی زندلیگه لایق بیلمهدینز، باخینز، ایندی بیز غیریهودیلارا ساری گئدیرَک. 47بو سَبریه کی رَب بیزه بئله فرمان وئرمیش، او دئییر:
«”من، سَنی غیرییهودیلار ایچی بیر ایشّیق ائدمیشَم،
تا نجاتی دنیانینگ واری یئرینه ائتیشتیرَینگ.“»
48غیرییهودیلار بونو ائشیدَنده، خوشحال اولدولار و رَبّینگ کلامینی حَمد و ثنا ائتدیلَر؛ و اوللار کی اَبَدی زندلیگ ایچی مَعین اولموشلاردی ایمان گتیردیلر. 49بئله، رَبّینگ کلامی او منطقهنینگ واری یئرینده داغیلیردی. 50آما یهودیلار، دیندار و سَرشناس آروادلاری و شَهرینگ باشیبویوک کیشیلَرینی، پولُس و بارنابا ضدّینه جوشاردیلار تا پولُس و بارنابایا جور و جَفا ائدلَّر و بئللَرینی او منطقهدن چیخارتدیلار یازّیا. 51پولُس و بارنابا دا اؤرانینگ تورپاقینی، اؤز قیچلَریندن سیلکدیلَر تا اوللار ضدّینه بیر شهادت اولا و قونیه شَهرینه گئتدیلَر. 52شاگردلَر شادلیگدان و تارئنینگ قُدّوس روحوندان دؤلو ایدیلار.
Currently Selected:
اعمال 13: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
