اعمال 11
11
پِطرُس کلیسایا گزارش وئریر
1بوتون یهودیه ولایتیندهکی حَواریلَر و کاکالار ائشیتدیلَر کی غیرییهودیلار دا تارئ کلامینی قبول ائدمیشلَر. 2پس اوندا کی پِطرُس گلدی اورشلیم شَهرینه، او بئیله کی سُنّت ائدمَکه اِصرار وارلاری ایدی، پِطرُسدان ایراد توتدولار و دئدیلر: 3«سن گئتدینگ او آداملار یانینا کی سُنّت اولماموشلار و اوللار اینان خورَکی یئدینگ.» 4پِطرُس ده باشلادی و واری زادی اَوّلدَن آخیرا اوللار ایچی توضیح وئردی، دئدی: 5«من یافا شَهرینده دُعا ائدیردیم کی حالدان گئدیم و بیر رؤیا گؤردوم. گؤردوم کی بیر بویوک سُفره لهیین زاد کی دؤرد گوشاسیندان آسیلی ایدی، گؤیدَن گلدی آشاغی و ائتیشدی منه. 6خوب کی باخدیم، حیوانلاری، وحشی جاناوارلاری، یئرده سؤرّونَنلَری و گؤیینگ قوشلارینی اؤنونگ ایچینده گؤردوم. 7اوندا بیر سَس ائشیتدیم کی بئلمه دئییردی: ”پِطرُس، تور آیاقی، کَس و یئ!“ 8آما من دئدیم: ”یا رَبّ، اصلاً اولماز؛ بو سَبریه کی من هئچوخت بیر حرام یا دا نَجس زاد آغیزیما قؤیمامیشام.“ 9آما او سَس ایکّینجی دفعه ایچی گؤیدَن گلدی کی: ”او زادا کی تارئ حلال ائدمیش، سَن دئمه حرام.“ 10بو اؤچ دفعه اولوندو و اوندا واری زاد گئنه گؤیه آپاریلدی. 11بیردَن، ائله او موقع اؤچ کیشی کی بئللَرینی قیصریه شَهریندَن منیم قولونجوما یوللامیشلاردی، ائتیشدیلَر او ائوه کی بیز اؤردا قالیردیک. 12تارئ روحو بئلَمه دئدی کی اوللار اینن گئدَم و هئچ فَرق قؤیمایام. بو آلتی کاکا ده منه قوشولدولار و گئتدیک او اؤچ آدامی یوللایان کیشینینگ ائوینه. 13کیشی بیزه تعریف ائدی کی نهیین گؤرموش کی بیر فرشته اؤنونگ ائوینده تورموش و بئلَسینه دئمیش: ”آدام یوللا یافا شَهرینه تا بیر شَمعون آدلی کیشییی کی بئلَسینی پِطرُس چاغیریرلار گتیرَلَّر بورا؛ 14او سنه بیر پیغام گتیرَر کی او پیغام طَریقیندَن سن نجات توتارانگ. هم سن هم ده بوتون اوبانگ آدامی.“ 15ائله کی من دانیشماگا باشلادیم، تارئنینگ قُدّوس روحو اوللارا نازل اولدو، ائله اولهیین کی اَوّلده بیزه نازل اولموشدو. 16اوندا رَبّینگ بو سؤزو یادیما گلدی کی دئمیشدی: ”یحیا سو اینان تَعمید غُسلی وئردی آما سیز تارئنینگ قُدّوس روحو اینان تَعمید توتاراینز. 17پس اگر تارئ ائله او عَطایی کی رَب عیسا مَسیحه ایمان گتیردیگیمیزده بیزه وئردی، اوللارا دا وئرمیش، من کیم ایدیم کی باشارام تارئ ایشینه مانع اولام؟»
18اوللار بو سؤزلری ائشیدَنده، بیسَس اولدولار. اوللار تارئیی حمد و ثنا ائدیلَر و دئییرلَردی: «پس تارئ، او توبه فُرصتینی کی زندلیگه ساری آپاریر، غیریهویلارا دا وئرمیش.»
اَنطاکیه کلیساسی
19او ایماندارلار کی او جور و جَفا سَبرسینه کی اِستیفانینگ اؤلدورمَکیندن سورا اولونیردی، داغیلمیشلاردی فینیقیه و اَنطاکیه و قِپرسنچاز گئتدیلَر. اوللار تارئ کلامینی یهودیلاردان آیری هئچکَسه اعلام ائدمئیرلَردی. 20آما اوللار آراسیندا بیر نئچه نفر وار ایدی کی قِپرس و قیرَوان آداملاریندان ایدیلار و اوندا کی اَنطاکیهیه ائتیشدیلَر او یهودیلارا کی دیللَری یونانلی ایدی دا، رَب عیسا بارهسیندهکی خوش خَبری اعلام ائدیلَر. 21رَبّینگ اَلی اوللار اینان ایدی و چوخ آدام ایمان گتیردیلَر و رَبّه ساری دؤندولَر. 22بو خبر اورشلیمدهکی کلیسانینگ قولاقینا ائتیشدی و اوللار بارنابایی اَنطاکیهیه یوللادیلار. 23اوندا کی بارنابا گلدی اؤرا و تارئ فِیضینی گؤردو، خوشحال اولدو و واری کَسی نَصیحت ائدی تا بوتون اؤرهکلَری اینن رَبّه وفالی قالالّار، 24چونکی بارنابا بیر خوب آدام ایدی و تارئنینگ قُدّوس روحوندان و ایماندان دؤلو ایدی. و بئله، بیر بویوک جماعت خلخدَن رَبّه ایمان گتیردیلَر. 25پس بارنابا تارسوس شَهرینه گئتدی تا شائولی بولا. 26اوندا کی اؤنو بولدو بئلَسینی اَنطاکیهیه گتیردی. اوللار بیر ایل تمام کلیسا آداملاری اینان قالدیلار و خَلخینگ بیر بویوک جماعتینه تَعلیم وئریرلَردی. اَنطاکیهده ایدی کی شاگردلر اَوّلکی دفعه ایچی مَسیحی چاغیریلدیلار.
27او گؤنلَرده نئچه نَبی، اورشلیمدن اَنطاکیهیه گلدیلر. 28اوللارینگ بیری کی آدی آگابوس ایدی، توردو آیاقی و تارئ روحو طَریقیندَن پیشگولیگ ائدی کی دنیانینگ واری یئرینده بیر بویوک قَحطلوق دؤشَر. بو قَحطلوق روم پادشاهی، کْلودیوس حکومتینینگ دورانیندا دؤشدو. 29پس شاگردلَر تَصمیم توتدولار کی هَر کَس، هَر ناغاد کی باشاریر یهودیه ولایتینده زندلیگ ائدَن کاکالارا کؤمَک یوللایا. 30پس بو ایشی گؤردولَر و وئریلَن هدیهیی، بارنابا و شائول اَلی اینن یوللادیلار شیخلَره.
Currently Selected:
اعمال 11: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
