ایکّینجی نامه، تیموتائوسا 4
4
1تارئنینگ و مَسیح عیسانینگ حُضوروندا، کی اؤلولَره و دئرّیلَره حکم ائدهر و اؤنونگ ظاهر اولماکی و پادشاهلیگی خاطرینه، سنه تاپشیریرام کی، 2تارئ کلامینی اِعلام ائد، وَخت و بی وَخت آماده اول، بیر تمام و کمال صَبر و تَعلیم اینن هَیله، تَشَر ائد و نَصیحت ائد. 3چونکی بیر زامان گلیر کی خَلخ دؤز تَعلیمینگ ائشیتمَکی تَحمّلینی یوخلاری اولور، بلکی بیر پارا مُعلّملَر اؤز دئییرلَرینه غالاط ائدلَّر تا او سؤزلَری کی قولاقلاری سئیر و هَوی و هَوسلَری اینن جور دور، اوللاردان ائشیتلَّر. 4اوللار حَقیقته قولاق آسماکدان ایز بؤکرلَر و افسانهلَره ساری، یولدان چیخرلَر. 5آما سن، همیشه هوشکار اول، زَجرده اِستقامت ائد؛ اینجیلی داغیدماک ایشینی گؤر و اؤز خدمتینگی تمام و کمال یئرینه ائتیشتیر.
6چونکی منیم قانیم ائله ایندیسی ده شراب هدیهسی لهیین، تؤکولیر و منیم بو دنیادان گئدمَکیم وَختی ائتیشمیش. 7خوب جَنگی، ایلَری آپارمیشام، مُسابقهیی تؤکدمیشَم، ایمانی ساخلامیشام. 8داها ایندیدَن بئله صالحلیگ تاجی منیم ایچی آماده اولموش، ائله او تاج کی رَب، او عادل حکم ائدَن، او گؤن منه جایزه وئرَر و نه ده فقط منه، بلکی واری اوللارا ده کی اؤنونگ ظاهر اولماکینینگ ذوقینی وارلاری ایمیش.
شخصی سفارشلَر
9اؤز تلاشینگی ائد تا تئز گلَینگ یانیما. 10چونکی دیماس بو دنیایی چوخ سئمَک اوستونه مَنی ویل ائدمیش و گئدمیش تَسالونیکی شَهرینه. کْریسکیس گئدمیش غَلاطیه منطقهسینه و تیتوس ده گئدمیش دَلماتیه منطقهسینه. 11بیر تَک لوقا منیم اینن دیر. مَرقُسی گؤتور و اؤزونگ اینن گتیر، چونکی خدمت ایچی چوخ ایشیمدَن گلیر. 12تیخیکوسی یوللامیشام اَفِسُس شَهرینه. 13گلدیگینگده تروآس شَهرینده کارپوس یانیندا قؤیدوگوم عبایی و ائله بئله ده کتابلاری و علیالخصوص ده طومارلاری اؤزونگ اینن گتیر.
14مِسگر اِسکندر، منه چوخ پیسلیگ ائدی؛ رَب اؤنونگ عَمللَرینه گؤره بئلَسینه عَوض وئرَر. 15سَنینگ اؤزونگ ده اؤندان هوشکار اول، چونکی او بیزیم پیغامیمیز اینان سَخت ضدّ ائدی.
16اَوّلکی دفعه کی اؤزومدَن دفاع ائدیردیم، هئچکَس منه پُشت چیخمهدی، بلکی واری کَس بئلَمی ویل ائدی. بو اوللارینگ آیاقینا یازیلماسین. 17آما رَب منیم یانیمدا توردو و منه قوّت وئردی تا بئله منیم طریقیمدَن او پیغام تمام و کمال اعلام اولا و غیری یهودیلارینگ واریسی اونو ائشیتلَّر. بئلهیین من، شئر آغیزیندان قورتولدوم. 18رَب منی هر پیس عَملدَن قورتارار و منی اَمن و اَمانلوقدا گتیرَر اؤز گؤیدهکی پادشاهلیگینا. اَبددَن، اَبدَنچاز اؤنا شوکت اولسون. آمین!
آخیرکی سلاملار
19پریسکیلایا ،آکیلایا و اونیسیفوروس اوباسی آداملارینا سلام ائتیرد. 20اِراستوس قُرِنتُس شَهرینده قالدی و من تْروفیموسی کی ناخوش ایدی میلیتوس شَهرینده، ویل ائدیم. 21اؤز تلاشینگی ائد تا قیشدَن ایلَری گلَینگ. یوبولوس سنه سالام ائتیردیر، ائله بئله ده پودِنْس، لینوس، کْلودیا و واری کاکالار.
22رَب سَنینگ روحونگ اینان اولسون. تارئنینگ فِیضی سیزینگ اینن اولسون.
Currently Selected:
ایکّینجی نامه، تیموتائوسا 4: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
