کارَلِ رسولَل 8

شائول کلیسا نَه عذاب اییِه

1وِ شائول رأیِش وَ کُشتَنِ اِستیفان بی. مِنِه او روز، عذابِ سختی وَ ری کلیسِی اورشلیم اومَه، طوری که غیرَ رسولَل، هَمَه وَ طرفِ ولاتِ یهودیَه وِ سامِرَه پَخشِ‌پَلا وابی‌یِن. 2عِدِه‌ای مِردِ دیندار اِستیفانَ کِردِن زِرِ گِل وِ سیش عزاداری مهلی گَپویی وَپا کِردِن. 3امّا شائول سخت وَ کلیسا ایتاخت وِ حونَه وَ حونَه ایگَشت، وِ زَنَل وِ مِردَلَه ایکَشی وَدَر وِ وِرِشون ایدا مِنِه زندان.

فیلیپُس مِنِه سامِرَه

4امّا اونگَل که پخشِ‌پَلا وابی‌یَه بییِن، هر جا که پا اینَهان، کلامِ خدا نَه تعلیم ایدان. 5فیلیپُس هَم رَت وَ یکی وَ شهرَل سامِرَه وِ مسیحَ سی مردمِ وُچِه موعظَه کِه. 6مردم دَسَه دَسَه وختی گَپَلِ فیلیپُسَ اِشنُفتِن وِ نِشونِه‌یَلی نَه که وِّ ایکِه دییِن، هَمَشون بِی یَک یِه‌دل وَ هر چیئی که ایگُت خوب گوش ایدان؛ 7سی‌یِکِه روحَلِ ناپاک در حالی که قیرَه ایزَن وَ خیلی‌یَل که گرفتارِ ای روحَل بییِن، ایومَن وَدَر وِ یِکِلی وَ فَلَجَل وِ شَلَل شفا ایگِرُتِن. 8سی یُو شایی گَپویی او شهرَ گِرُت.

شَمعون جادوگر ایمون ایارِه

9امّا مِنِه او شهر مِردی زِندِیی ایکِه وَ نومِ شمعون که وَ نَهاتَر مردمِ سامِرَه نَه بِی سِحر وُ جادویَلِش حیرت‌زَیَه کِردَه بی وِ اِدعا ایکِه آیَمِ گَپویی یَه. 10همَه وَ خُرد وُ گَپو، قبولِش داشتِن وِ ایگُتِن: «ای مِرد هَمو قدرتِ خدا یَه که وَش ایگُن "عظیم".» 11اونگَل قبولِش داشتِن، سی‌یِکِه خیلی وخت بی که بِی جادویَلِش، اونگَلَه حیرت‌زَیَه ایکِه. 12امّا وختی وَ بشارتِ فیلیپُس درموردِ پادشاییِ خدا وِ نومِ عیسی مسیح ایمون آوُردِن، هَمَشون، مِرد وُ زَن، تعمید گِرُتِن. 13حتی شمعون خُوش هَم ایمون آوُرد وِ بعدَ تعمید گِرُتَن همیشَه بِی فیلیپُس بی وِ بِی دییَنِ نشونه‌یَل وِ معجزه‌یَلِ مهلی گَپویی که ایابی، حیرت‌زَیَه بی.

14وختی رسولَل مِنِه اورشلیم باخَوَر وابی‌یِن که مردمِ سامِرَه کلامِ خدا نَه قبول کِردِنِه، پطرس وِ یوحنا نَه بِسی کِردِن طِیشون. 15اونگَل هر دِتاشون اومَن وَ سامِرَه، سی ایموندارَل دعا کِردِن تا روح‌القدس وَشون عطا وابو، 16سی‌یِکِه هَنی روح‌القدس وَ ری هیچ کویَکیشون قرار نَگِرُتَه بی، بلکم تِنا وَ نومِ عیسی خداوند تعمید گِرُتَه بییِن وُ بَس. 17اوسِه پطرس وِ یوحنا دَسَلِ خِشونَه نَهان وَ ریشون وِ اونگَل روح‌القدسَه جُسِن.

18وختی شمعون دی که بِی دَس نَهایَنِ رسولَل وَ ری مردم، روح‌القدس وَ مردم عطا ایابو، یِچِی پیل آوُرد وُ 19وَ رسولَل گُت: «وَ مِ هَم ای اقتدارَ بِئیت تا وَ ری هر کس که دَس بِنُم، روح‌القدسَه بِجورِه.»

20امّا پطرس گُت: «خُوت وِ پیلِ نُقرَت نابود وابِیت! سی‌یِکِه گَمون کِردی عطِی خدا نَه ایابو بِی پیل بِسونی! 21تِ مِنِه ای خذمت هیچ سَهم وُ بَهری نَیاری، سی‌یِکِه دِلِت بِی خدا راس نی. 22وَ ای شرارَتِ خُوت توبَه کُ وُ وَ خداوند بِخوا تا اَر ایابو ای فکرِ دِلِت آمرزییَه وابو؛ 23سی‌یِکِه ایبینُم که پُر وَ زَهرِ تَل وِ اسیرِ زنجیرَلِ شرارتی.»

24شمعون گُت: «ایشا سی مِ طِی خداوند دعا کِنیت تا اوچیئی که گُتیت وَ سَرُم نیا.»

25پطرس وِ یوحنا بعدَ شهادت دایَن وِ اعلامِ کلامِ خداوند، وَرگَشتِن وَ اورشلیم وِ مِنِه رَه وَ خیلی وَ دهاتَلِ سامِرَه خَوَرِ خَشِ نجاتَه موعظَه ایکِردِن.

فیلیپُس وِ خواجه‌سَرِی حبشی

26اوسِه یِه فرشتۀ خداوند وَ فیلیپُس گُت: «وَری وِ بِرَه وَ طرفِ جنوب، وَ رَیی که وَ اورشلیم ایرَه وَ طرفِ غَزَه، هَمو رَه بیابونی.» 27پَ وَریسا وِ رُونَه وابی، که یِه دَفَه مِنِه رَه خواجه‌سَرِی حبشی نَه دی که وَ گَپویَلِ دربارِ«کَنداکَه» ملکۀ حَبَشَه وِ خزانه‌دارِ وِّ بی، وِ سی عبادت اومَیَه بی وَ اورشلیم. 28وِّ مِنِه رَه وَرگشتَن وَ دیارِش، نِشَسَه بی وَ ری دِرُشکَش وِ کتابِ اِشعیایِ پیغمبرَ ایخُوند. 29اوسِه روح‌القدس وَ فیلیپُس گُت: «بِرَه نِزِنگ وِ بیُفت وَ دینِ او دِرُشکَه.»

30فیلیپُس دُویِس وَ طرفِ دِرُشکَه وِ اِشنُفت که خواجه‌سَرِی حبشی کتابِ اِشعیایِ پیغمبرَ ایخونِه. پَ وَش گُت: «اوچیئی نَه که ایخونی، ایفَمی؟»

31گُت: «چطو ایتَرُم بِفَمُم، اَر کسی رانَماییم نَکِنِه؟» پَ وَ فیلیپُس خواس که سُوار وابو وِ بِشینِه طِیش. 32جِیی وَ نوشتۀ مقدس که ایخُوند، یِه بی:

«مِی میشی که ایبَرِنِش سی قُربونی،

وِ مِی بَرَه‌ای که پَشمَلِشَه ایچینِن بی‌صیا یَه،

هَموطو دِهونِشَه واز نیکِنِه.

33مِنِه خوارِ زاریش، عدالت وَش دریغ وابی؛

کی ایتَرِه وَ نسلِ وِّ گَپ بِزَنِه؟

سی‌یِکِه حیاتِ وُّ وَ ری زمین وَگِرُتَه وابی.»

34خواجه‌سَرا وَ فیلیپُس گُت: «وَت ایخوام وَم بِگِی که پیغمبر وِیچِه وَ کی گَپ ایزَنِه، وَ خُوش یا وَ کسی دَ؟» 35اوسِه فیلیپُس شروع کِه وَ گَپ زَیَن وُ وَ هَمو جِی نوشتۀ مقدس شروع کِه، درموردِ عیسی وَش خَوَرِ خَشِ نجاتَه بشارت دا.

36هَمیطو که داشتِن ایرَتِن، رَسییِن وَ اُویی. خواجه‌سرا گُت: «سِی کُ، ایسِه اُو آمادَه یَه! مَه سی تعمید گِرُتَنُم مانعی هِسی؟» 37[فیلیپُس گُت: «اَر بِی تمومِ دل ایمون آوُردی‌یِی، هیچ مانعی نیسی.» خواجه‌سرا گُت: «ایمون دارُم که عیسی مسیح کِرِ خدایَه.»]

38پَ خواجه‌سَرا دستور دا دِرُشکَه نَه وادارِن، وُ فیلیپُس وِ خواجه سَرا، هَر دِتاشون رَتِن مِنِه اُو وِ فیلیپُس وِّ نَه تعمید دا. 39وختی وَ اُو اومَن وَدَر، روحِ خداوند فیلیپُسَ وَگِرُت وِ بُرد وِ خواجه‌سرا دَ وِّ نَه نَدی، امّا بِی شایی رَشَه گِرُت وِ رَت. 40فیلیپُس خِشَه دی که مِنِه اَشدودِه. وِّ مِنِه تَمومِ شهرَلِ او منطَقَه ایگَشت وِ خَوَرِ خَشِ نجاتَه بشارت ایدا، تا رَسی وَ قیصَریَه.

Currently Selected:

کارَلِ رسولَل 8: SLB

Highlight

Copy