نامۀ اَوَل وَ کِلیسِی قُرَنتُس 14
14
عَطِی نبوت کِردَن وِ گَپ زَیَن وَ زُوونَلِ دَ
1وَ دینِ محبت بِیت، وِ بِی شوق عَطایَلِ روحانی نَه بِخِیت، مخصوصاً یِکِه نبوّت کِنیت. 2سییِکِه وِه که وَ زُوونِ دَ گَپ ایزَنِه، نَه بِی آیَمَل بلکَم بِی خدا گَپ ایزَنِه. سییِکِه هیشکَه گَپِشَه نیفَمِه؛ امّا وِّ سِرَّلَه، مِنِه روح ایگُ. 3امّا وِه که نبوّت ایکِنِه، بِی مردم گَپ ایزَنِه تا ایمونِشونَه تقویت کِنِه، اونگَلَه تشویق کِنِه وِ آرومِشون کِنِه. 4وِه که وَ زُوونِ دَ گَپ ایزَنِه ایمونِ خِشَه تقویت ایکِنِه، امّا وِه که نبوّت ایکِنِه ایمونِ کلیسا نَه تقویت ایکِنِه. 5ایسو اُرزویِ مِ یِنِه که هَمَتون وَ زُوونَلِ دَ گَپ بِزَنیت، امّا بیشتَر ایخوام که نبوّت کِنیت. وِه که نبوت ایکِنِه، گَپوتَرِه وَ وِه که وَ زُوونَلِ دَ گَپ ایزَنِه، غیرَ یِکِه یکی تَرجِمَه کِنِه تا کلیسا مِنِه ایمون تقویت وابو.
6ایسو، ای کَکایَل، اَر مِ بیام طِیتون وُ وَ زُوونَلِ دَ گَپ بِزَنُم، چه نفعی سیتون دارُم، غیرَ یِکِه مکاشِفَه یا علم یا نبوّت یا تعلیمی سیتون داشتَه بوم؟ 7حتی سازَلِ بیجونی مِی نِی وِ چنگ اَر رِنگِشون خوب نَدَرا، چطو ایابو فَمی چه قَصی زَیَه ایابو؟ 8اَر صییِی شیپور خوب نَدَرا، کی آمایۀ جنگ ایابو؟ 9درموردِ ایشا هَم هَمیطورِه. اَر وَ زُوونِ خِتون گَپَلی بِگِیت که نیابو فَمیشون، چطو کسی ایفَمِه که چه ایگِیت؟ سییِکِه مِی یِنِه که بِی هوا گَپ ایزَنیت. 10بیگَمون مِنِه دنیا زُوونَلِ جورواجوری هِسی، وِ هیچ کویَکی نَه بیمعنی یَه. 11امّا اَر مِ نَتَرُم معنیِ گَپَلِ کسی نَه بِفَمُم، سی وِه که گَپ ایزَنِه غَریبَه یَم وُ وِه هَم سی مِ غریبَه یَه. 12در موردِ ایشا هَم هَمیطورِه. وَ وُچه که مِنِه شوقِ یِنیت که عطایَلِ روحِ خدا نَه نِشون بِئیت، تلاش کِنیت تا مِنِه تقویتِ ایمونِ کلیسا تَرقی کِنیت.
13پَ، وِه که وَ زُوونِ دَ گَپ ایزَنِه بایِس دعا کِنِه تا بِتَرِه ترجِمَه کِنِه. 14سییِکِه اَر مِ وَ زُوونِ دَ دعا کِنُم، روحُم دعا ایکِنِه، امّا عقلُم نَفعی نیبَرِه. 15پَ چه کِنُم؟ وَ روح دعا ایکِنُم امّا وَ عقل هَم دعا ایکِنُم؛ وَ روح سِرو ایخونُم امّا وَ عقل هَم سِرو ایخونُم. 16وَ غیرَ یو، اَر تِ مِنِه روح شکر کِنی، چطو کسی که زُوونِتَه نیفَمِه وَ شکر کِردَنِت آمین بِگُ؟ سییِکِه نُونِه چه ایگِی! 17سییِکِه ایشِهِه تِ مَهلی خوب شکر ایکِنی، امّا ای شکر کردَنِ تو ایمونِ او یِکیدَه نَه تقویت نیکِنِه. 18خدا نَه شکر ایکِنُم که بیشتَرَ هَمَتون وَ زُوونَلِ دَ گَپ ایزَنُم؛ 19امّا یِنَه بِختَر دونُم مِنِه کلیسا پنج کَلَمَه بِی عقلِ خُوم گَپ بِزَنُم تا بقیَه نَه تعلیم دایَه بوم، تا یِکِه هزارون کَلَمَه بِی زُوونِ دَ بِگُم.
20ای کَکایَل، مِنِه درک وِ فهم مِی بَچَه نَبِیت، بَلکَم مِنِه بَدی کِردَن مِی طفلِ کُشکِلو بِیت. امّا مِنِه درک وُ فهم گَپو بِیت. 21مِنِه تورات ایطو نِوشتَه وابییِه:
«خداوند ایگُ،
"وَ زُوونَلِ دَ
وِ بِی لُویَلِ غَریبهیَل
بِی ای قوم گَپ ایزَنُم.
بِی ای هَمَه وَم گوش نیگِرِن."»
22پَ زُوونَلِ دَ، نشونهای یَه سی بیایمونَل نَه سی ایموندارَل؛ دَر حالی که نبوّت نشونهای یَه سی ایموندارَل نَه سی بیایمونَل. 23پَ، اَر تَمومِ اَعضِی کلیسا جَم وابون دورِ یَک وِ هَمَشون وَ زُوونَلِ دَ گَپ بِزَنِن، وِ مِنِه ای موقَع آیَمَلِ غَریبَه یا بیایمون بیان داخل، مَه نیگُن که ایشا کَلویِیت؟ 24امّا اَر هَمَه نبوّت کِنِن، وِ یِه بیایمون یا غَریبهای بیا داخل، وَ طرفِ هَمَه محکوم ایابو که گِناکارِه، وِ هَمَه بازخواسِش ایکِنِن، 25سِرَّلِ دِلِش آشکار ایابو. اوسِه ری وَ زمین اینِه، خدا نَه ایپَرَستِه وِ اعلام ایکِنِه که: «وَراسی خدا مابینِ ایشایَه.»
26پَ منظور چِنِه، ای کَکایَل؟ موقِی که دورِ یَک جَم ایابِیت، هر کویَکیتون سِرویی، تعلیمی، مکاشفَهای، زُوونی وِ یا ترجِمَهای دارِه. بِلیت گِردِ اینگَل سی تقویتِ ایمون وَ کار بِرَه. 27اَر یکی وَ زُوونِ دَ گَپ بِزَنِه، دو یا زیادِش سه نفر، وِ هر کویَکی وَ گارَه گَپ بِزَنِن، وِ یکی هَم ترجِمَه کِنِه. 28امّا اَر دیلماجی نَبو، هَر کویَکی وَ اونگَل مِنِه کلیسا بیصیا وِیسِه وِ بِی خُوش وِ خدا گَپ بِزَنِه.
29وُ وَ نبییَل، دو یا سه نفر نبوّت کِنِن وِ بقیَه گَپَلِشونَه سبک وِ سنگین کِنِن. 30وِ اَر کسی دَ که وُچِه نِشَسِه مکاشفَهای بِگِرِه، او اَوَلی بایِس بیصیا بو. 31سییِکِه هَمَه ایتَریت وَ گارَه نبوّت کِنیت تا هَمَه تعلیم بِگِرِن وِ تشویق وابون. 32روحِ نبییَل مطیعِ نبییَلِه. 33سییِکِه خدا، نَه خِدِی هَردَمبیلی، بلکم خِدِی صلح و آرامشِه، هَموطو که مِنِه تَمومِ کلیسایَلِ ایموندارَلِ وَ مسیح ایطورِه،
34زَنَل بایِس مِنِه کلیسا بیصیا بون. سییِکِه وَشون اجازۀ گَپ زَیَن دایَه نَوابییِه، بلکم بایِس هَموطو که شریعت ایگُ، مطیع بون. 35اَر چیئی هِسی که ایخوان یای بِگِرِن، مِنِه حونَه وَ میرَشون بِپُرسِن؛ سییِکِه ناشایِسِه که زَن مِنِه کلیسا گَپ بِزَنِه.
36مِی کلامِ خدا وَ ایشا سرچشمَه گِرُتِه؟ مِی تِنا وَ ایشا رَسییِه؟ 37اَر کسی خِشَه نبی دونِه یا آیَمی دونِه که روحِ خدا نَه دارِه، وِّ باید تصدیق کِنِه که اوچیئی که سیتون اینِویسُم دستوری وَ طرفِ خداوندِه. 38اَر کسی یِنَه قبول نَکِنِه، خُوش هَم قبول نیابو.
39پَ ای کَکایَلُم، بِی شوقِ تموم وَ دینِ نبوّت کِردَن بِیت وِ گَپ زَیَن وَ زُوونَلِ دَ نَه مَنع نَکِنیت. 40امّا هَمَه چی بایِس بِی وقار وِ نظم بو.
Currently Selected:
نامۀ اَوَل وَ کِلیسِی قُرَنتُس 14: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
