نامَه دوّم تیموتائوس 4
4
1ما، تِی حضور خدا و مسیحْ عیسی که اُ زندَیّا و مُردَیّا حُکم اَکو، و وَخاطر آشکار بُدَش و پادشاهیش، اُ تو کَدَغان اَکنام که: 2کلوم خدائا اعلام بِکو؛ وَخت و بی وَخت آمادَه بِش و وَ صبر و تعلیم کامل، نِهِب هادِ و توبیخ و تشویک بِکو. 3اَسِی که زَمونی اَدا که مردم طاکَت گاش کَر کِردَ اُ تعلیم وَلما شُنی، بلکه معلمِی دور خوشو جمع اَدَکنِت تا مِ چِی که گاشیاشو شَئِه و خاد هوی و هَوسیاشو جور در اَدا از آنایا بِشناوِت؛ 4آنایا از گاش کَر کِردَ اُ حکیکت لو اَدَگَردِنِت، و اُ طرف کِصَهیّا از رَه اُدَر اَچِت. 5ولی تو، همیشَه هوشیار بِش، تِی عذاب طاکَت بیا، کَر اعلام انجیلا اَنجوم هادِ و خدمتُت کامل اُ اَنجوم بِرَسِن.
6اَسِی که خون ما، هَمِ آلَه هم چُنِ هَدیَه شراب لِتَه بُدا، و وَخت چِدَم از اِ دُنیَهوا رَسِدِ. 7تِی جنگ خَش، اُمجَنگِدِ، مسابکَهوا تَموم ماکِردِ، ایمونا نِگَه اُمکِردِ. 8اِلا مِم بعد تاج صالحی مُسِه آمادَئِه، تاجی که خداوند، مِ حاکم عادلا، تِی آن رازا اُ ما جایزَه اَدَ - نِه فَکَط اُ ما، بلکه اُ هَمَهِ آنایایی هم که مُشتاک آشکار بُدَش هِت.
کَدَغانِی شخصی
9تَموم تلاشُت بِکو بُری زود مُحَد بِلگِش. 10اَسِی که دیماس وَخاطر اِکِه خاطر اِ دُنیَهوا شَئِه وِل اُشکِردِستام و اُ شهر تِسالونیکی چِدِ. کْریسکیس اُ منطکَهِ غَلاطیه و تیتوس هم اُ منطکَهِ دَلماتیه چِدِ. 11فَکَط لوقا خاد مائِه. اُ مَرقُس واسِه و اُمرَهِ خوت بیا، اَسِی که اَسِی خدمت بُری مُسِه مفیدِه. 12اُ تیخیکوس مُ شهر اَفِسُس فِرِستَدِ. 13موکَهِ اُندَت، عبایی که تِی شهر تْروآس حَدِ کارپوس اُمنَه، و هَمینا هم کتابیا و مخصوصا نوشتَهئِی پوستیا اُمرَهِ خوت بیا.
14اسکندر مِسگَر، بُری شُ ما بَدی کِه. خداوند طِبک کَریاش سزاش اَدَ. 15تو خوت هم از آنا دوری بِکو، اَسِی که خاد پیغوم اَما سخت مخالفت اُشکِه.
16اوّلین دَفَهای که از خوم دفاع اُمکِه، هِسکَه پشتُم اُشنِگِرِت، بلکه هَمَه وِل شُکِردام. نِکو اِ اُ حسابشو نوشتَه بِبِه. 17ولی خداوند حَدِ ما وَایستَ و شُ ما کُوّت دَ تا مِ پیغوما اُ واسطَهِ ما کامل اعلام بِبِه و هَمَهِ غیریهودِنیا آنا بِشناوِت. پَ ما از کَپ شیر خلاص بُدام. 18خداوند اُ ما از هر کَر نِ وَلمی آزاد اَکو و اُ ما وَ سلامت اُ پادشاهِنِ آسِمونِنِ خوش اَدارِ. جلال خاد آنا بِه تا اَبَدالآباد. آمین!
سلامِی آخر
19اُ پْریسکیلا و آکیلا و اهل خونَهِ اونیسیفوروس سلام بِرَسِن. 20اِراستوس تِی شهر قُرِنتُس آمود، و ما اُ تْروفیموس که مریض هاد، تِی شهر میلیتوس وِل اُمکِه. 21تَموم تلاشُت بِکو کَبل از زِمستو بِلگِش. یوبولوس و هَمینا هم پودِنْس، لینوس، کْلودیا و هَمَهِ کاکَیّا اُ تو سلام اَرَسِنِت.
22خداوند خاد روح تو بِه. فیض خدا خاد شما بِه.
Currently Selected:
نامَه دوّم تیموتائوس 4: LAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
