کاریا رسول‌یا 23
23
1پولُس گِز بُری وِ اعضا شورا وُ گُت: «بِرارُو، مِه تا وِ اِیمرو وا وجدانِ پاک دِ حضورِ خدا زِنِه‌ئی کِردِمَه.» 2هِه کِه یَه نِه گُت، کاهِنِ اعظم، حَنانیا، وِ وِنُو کِه دِ لِفِ پولُس اِیسایینی، هُد کِرد تا دِیئَن دِ گُپِش. 3پولُس وِش گُت: «خدا تو نِه مِی‌زِنَه، اِ دیوارِ اِسبی بی‌یَه! تو نِشِسیَه اوچِه مِه نِه طبقِ شریعت قضاوت بَکی! ایسِه وا ایی حال تو بَرخِلافِ شریعت، هُد می‌کی مِه نِه دِیئَن؟»
4وِنُو کِه اِیسایینی نِزیکِ پولُس، گُتِن: «وِ کاهِنِ اعظمِ خدا نُوم‌نَسَق می‌نی؟»
5پولُس گُت: «بِرارُو، نُئُونِسِم کاهِنِ اعظم اَ، سی یَکِه دِ تورات نیسَنَه بی‌یَه: ”وِ پیشوا قُومِ خُوت گَن نُو.“
6اوسِه پولُس کِه دُونِس قَری دِشُو دِ فِرقَه صَدوقی وَ قَری دِ فِرقَه فَریسی‌اَن، وا دَنگِ بُلِن دِ شورا گُت: «اِ بِرارُو، مِه فَریسی وَ فَریسی‌زادَه‌آم، وَ وِ سُنَه اُمیدِم وِ زِنَه‌بی‌یِه‌نِ مُردَه‌یا اَ کِه محاکمَه موئِم.» 7هِه کِه یَه نِه گُت، دَم‌رِگَه اُفتا دِ مینِ فَریسی‌یا وُ صَدوقی‌یا وَ جماعت دو دَسَه بییِن، 8سی یَکِه صَدوقی‌یا مُنکِرِ زِنَه‌بی‌یِه‌نِ مُردَه‌یا وَ فرشتَه وَ روح اَن، اما فَریسی‌یا وِ گِردِ یِنُو اِتقاد دارَن.
9رُوکِلَه اُفتا دِشُو! قَری دِ معلم‌یا تورات کِه فَریسی بییِن، وِریسان وُ اعتراض کِردِن، گُتِن: «خَبطی دِ ایی پیا نِمِئینیم. دِ کجا دیار اَ کِه روح یا فرشتِه‌ای واش قِصَه نَکِردوئَه.» 10دَم‌رِگَه چِنُو بالا گِرِت کِه فَرمُوندَه زَلَه‌ش رَت نَکَه پولُسِ نِه کُت‌کُت بَکَن. پس وِ سَروازیا هُد کِرد رُوئَن وِ هار وَ او نِه دِ قَپِشُو دِرارَن وِ دَر، بُورَن وِ مینِ قلعَه.
11هِه دِ او شُو، خداوند دِ لارِگِ پولُس اِیسا وَ گُت: «دِلِت قُرص با! هِه چِنُو کِه دِ اورشلیم وِ مِه شاهادَتی دِئی، دِ روم هَم بایِس شاهادَتی بِئی.»
نَشخَه قتلِ پولُس
12وا صُوش، یهودیُو دَس وِ یَکی کِردِن، قِسَم حَردِن تا پولُسِ نِه نَکُشَن، نَه اُو بُحُورَن نَه نُو. 13بالا چِل نفر دِ ایی نَشخَه دَس داشتِن. 14وِنُو رَتِن وِ تِه سَرُونِ کاهِن‌یا وُ مشایخ وَ گُتِن: «اِیما قِسَم حَردیمَه کِه تا پولُسِ نِه نَکُشیم، لُوء وِ چیئی نَزِنیم. 15پس ایسِه شِما وَ اعضا شورا دِ فَرمُوندَه رومی باحایت او نِه بیارَه وِ تِه‌تُو، وِ ایی بُونَه کِه می‌حایت بیشتِر زیرتَشِه دِراریت. اِیما آمادَه‌آیم وِرَز یَکِه بَرَسَه ویچِه او نِه بَکُشیم.»
16اما خُووَرزا پولُس دِ ایی نَشخَه واخَوَر بی وُ رَت وِ قلعَه، پولُسِ نِه خَوَر کِرد.
17پولُس هِنا کِرد وِ یَکی دِ اَفسریا وُ گُت: «ایی جِوُو نِه بُور وِ تِه فَرمُوندَه، سی یَکه خَوَری سیش دارَه.» 18پس افسر او نِه بُرد وِ تِه فَرمُوندَه وُ وِش گُت: «پولُسِه زِندُونی، مِه نِه هِنا کِرد وُ دِم حاس کِه ایی پیا جِوُو نِه بیارِم وِ تِه‌تُو، می‌حا چیئی وِتُو بُوئَه.»
19فَرمُوندَه دَسِ پیا جِوُو نِه گِرِت، کَشی والائی وُ پُرسی: «می‌حای چی وِم بُوئی؟»
20او کُر گُت: «یهودیُو دَس وِ یَکی کِردِنَه دِتُو باحان کِه صُو پولُسِ نِه بیاری وِ شورا، وِ ایی بُونَه کِه می‌حان بیشتِر زیرتَشِه دِرارَن. 21اما دَرخواسِشُو نِه قبول نَکیت، سی یَکِه بالا چِل نفر دِشُو هان دِ کِرِش. وِنُو قِسَم حَردِنَه کِه تا او نِه نَکُشَن، نَه اُو بُحُورَن نَه نُو. ایمدال آمادَه‌آن، وَ تَنیا چَش وِ رَه‌آن کِه شِما دَرخواسِشُو نِه قبول بَکیت.»
22فَرمُوندَه، جِوُو نِه مرخص کِرد وَ او نِه قدغن کِرد، گُت: «وِ هیشکَه نُو کِه ایی چیا نِه وِم خَوَر دِئیَه.»
جُوواز کِردِه‌نِ پولُس وِ قیصریَه
23اوسِه فَرمُوندَه دو تا دِ اَفسَریاشِه هِنا کِرد وُ وِشُو گُت: «دُویس پیادَه نظام، هفتاد سُوارَه نظام وَ دُویس نیزَه‌دار آمادَه بَکیت تا دِ ساعتِ نُهِ شُو رُوئَن وِ قیصریَه. 24سی پولُس هَم اَسبی زین بَکیت وَ او نِه اَمن‌وُاَمُو تحویلِ فلیکسِ والی بِئیت.»
25نُومِه‌ای هَم وِ چِنی نیسَن:
26«دِ کلُودیوس لیسیاس
وِ عالیجناب فلیکسِ والی:
سِلام،
27یهودیُو ایی پیا نِه گِرِتِن، می‌حاسِن بَکُشَنِش، اما مِه وَ سَروازیام رَتیم وُ نجاتِش دِئیم، سی یَکِه اِشنَفتیم رومی اَ. 28دوچِه کِه حاسِم بَفَمِم سی چی وِش بُختُوم مِی‌زِنَن، او نِه بُردِم وِ شورا وِنُو. 29فَمِسِم کِه اِتهامِشُو مربوط وِ شریعتِشُونَه وَ چِنُو جُرمی نَکِردَه کِه قابلِ اعدام یا حَبس با. 30اوسِه هِه کِه فَمِسِم کِه وِ تیشکِش دَس وِ یَکی کِردِنَه، جَلدی او نِه کِل کِردِم وِ تِه‌تُو. وِ شاکی‌یاش هَم هُد کِردِم تا شکایَتِشُو نِه بیارَن وِ تِه شِما.»
31وِ ایی ترتیب، سَروازیا طبقِ هُد، شَبُونَه پولُسِه وا خُوشُو بُردِن تا آنتیپاتریس. 32دِ اوچِه وا دِما، وا صُوش تَنیا سُوارَه نظام او نِه هُمراهی می‌کِرد وَ باقی سَروازیا وِرگَشتِن وِ قلعَه. 33هِه کِه سُوارَه نظام رَسِس وِ قیصریَه، نُومَه نِه دَن وِ والی وَ پولُسِه اُوِردِن وِ تِه‌ش. 34والی نُومَه نِه حَن وَ دِ پولُس پُرسی اَهلِ کُوم وِلات اَ. هِه کِه فَمِس اَهلِ کیلیکیَه آ، 35وِش گُت: «هِه کِه شاکی‌یات رَسِسِن ویچِه، وِ حرف‌یات گوش مِی‌ئِم.» اوسِه هُد کِرد تا پولُسِ نِه دِ کاخِ هیرودیس زیرِ نظر نِئَه دارَن.
Currently Selected:
کاریا رسول‌یا 23: NLB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
