۱قورئنتلیلره 7
7
اِولنمک حاقّیندا
1ائندی یازدیقلاریزا گلئنجه:
«یاخشیدیر کی، کئشی آروادا توخونماسین» 2آمّا عئفّتسئزلئکلره گؤره، هر کئشئنئن اؤز آروادی اولسون، هر آروادین دا اؤز اَری اولسون. 3اَر اؤز آروادینا اولان وظئفهسئنی یرئنه یتئرسئن، آرواد دا اَری ائنن بله الهسئن. 4آرواد اؤز بدنئنه ائختئیار صاحئبی دیئل، اونا ائختئیار صاحئبی اولان اَردئر. اِله اوجور ده ار اؤز بدنئنه ائختئیار صاحئبی دیئل، اونا ائختئیار صاحئبی اولان آرواددیر. 5بئربئرئزی محروم اله مهیئن، مگر راضیلیق ائنان، او دا مووقّتی بئر مودّت اوچون کی، اؤزوزی عئبادته وقف الئیهسئز. سورا گئنه ده بئرلهشئن کی، نفسئزئن قاباغینی آلا بئلمهدئیئزدن، شیطان سئزی وسوسهیه سالماسین. 6بونی اَمر کئمی یوخ، موساعئده کئمی دیئرم. 7گئنه ده آرزی الهیئرم کی، بوتون ائنسانلار منئم کئمی اولسونلار. آمّا هر کسئن تاریدان اؤز عطاسی وار؛ بئرئنئنکی بله، او بئرئنئنکی اِله.
8آمّا سوبایلارا و دوللارا دیئرم کی، منئم کئمی قالماق اولار اوچون یاخشیدیر. 9آمّا اگر نفسلرئنئن قاباغینی آلا بئلمئرلر، اِولنسئنلر. چونکی اِولنمک، شهوت اودی ائنن یانماقدان یاخشیدیر.
10آمّا اِولهنَنلره، من یوخ، بلکی رب امر الهیئر کی، آرواد ارئندن آیریلماسین. 11آمّا اگر آیریلسا، اَره گتمهمئش قالسین، یا دا اؤز اَری ائنن باریشسین. اَر ده اؤز آروادینی بوشاماسین.
12آمّا قالانلارینا، رب یوخ، من دیئرم کی، اگر بئر قارداشین آروادی ائمانلی دیئل و آرواد اونونان قالماغا راضیدیر، اَری اونی بوشاماسین. 13و اگر بئر آروادین اَری ائمانلی دیئل و اَری اونونان قالماغا راضیدیر، آروادی اوندان بوشانماسین. 14چونکی ائمانسیز اَر، آروادینین واسئطهسی ائنن تقدئس اولونور و ائمانسیز آرواد دا ائمانلی اَرئنئن واسئطهسی ائنن تقدئس اولونور. او بئری حالدا اوشاقلاریز ناپاک اولاردیرلار، آمّا ائندی موقدّسدئرلر. 15آمّا اگر ائمانلی اولمایان آیریلسا، قوی آیریلسین. بله وضعئیّتلرده قارداش و یا باجی آرتیق باغلی دیئل. آمّا تاری بئزی باریشا دعوت الهیئر. 16چونکی ای آرواد، هاردان بئلئرسن کی، اَرئنی نئجات ورمهیهجکسن؟ یا دا ای اَر، هاردان بئلئرسن کی، آروادینی نئجات ورمهیهجکسن؟
17آنجاق هر کس ربّئن اونا تعیئن الهدئیی کئمی و تاریدان آلدیغی دعوته گؤره رفتار الهسئن. بونی بوتون کئلئسالارا امر الهیئرم. 18اگر بئری ختنهلی اولاندا دعوت اولوندی، ختنهسئز کئمی اولماغا اللشمه سئن. اگر بئری ختنهسئز اولاندا دعوت اولوندی، ختنه اولونماسین. 19نه ختنهلیلئک موهومدور، نه ده ختنهسئزلئک. موهوم اودور کی، تارینین امرلرئنه عمل الئیهسئز. 20هر کس نه وضعئیّتده دعوت اولونسا، او وضعئیّتده قالسین. 21چاغیریلدیغین زامان اگر نؤکر ائدئن، بو بارهده فئکئر اله مه. آمّا اگر آزاد اولماغا ائمکانین وار، فورصتی الدن ورمه. 22چونکی رب طرفئندن دعوت اولونان زامان، نؤکر آدام ربّئن آزاد آدامیدیر. اِله اوجور ده دعوت اولوندوغی زامان، آزاد اولان آدام مسئحئن نؤکریدئر. 23سئز چوخ باها بئر قئیمته آلینیبسیز؛ ائنسانلارین قولی اولمایین. 24قارداشلار، هر کس نه وضعئیّتده چاغیریلیب، تارینین حوضوروندا اِله او جور قالسین.
25باکئرهلر حاقّیندا ربدن بئر امرئم یوخدور؛ آمّا او مقامدا کی ربّئن رحمتی ائنن اعتئماد اولونابئلن بئری یَم، اؤز نظرئمی دیئرم. 26من بله دوشونورم کی، ائندئکی زامانین چتئنئلکلرئنه گؤره، ائنسان اوچون بو یاخشیدیر کی، اولدوغی کئمی قالسین. 27اگر بئر آروادا باغلیسان، آیریلماق دالیسیجا اولما. اگر آرواددان آیریلیبسان، آرتیق آرواد آلماق دالیسیجا اولما. 28آمّا اِولنسن ده، گوناه الهمهیئبسن؛ اگر بئر قیز دا اَره گتسه، گوناه اله مهیئب. آمّا بله آداملار بو حیاتدا اذئیّت چکهجکلر و من اللشئرم کی، سئزی بولاردان حئفظ الهیئم.
29آمّا قارداشلار، بونی دمهلئیم کی، واخت قیسالیب. اونا گؤره ده، بوندان سورا آروادی اولانلار، اولمایانلار کئمی اولمالیدیرلار؛ 30آغلایانلار، آغلامامیشلار کئمی. شادلیق الهینلر، شادلیق اله مهمئشلر کئمی. مال آلانلار هچ شیه مالئک اولمامیشلار کئمی. 31بو دونیادان ائستئفاده الهینلر، ائستئفاده اله مهمئشلر کئمی اولمالیدیرلار. چونکی بو دونیانین ائندئکی حالی کچئب گدئر.
32آمّا ائستهیئرم کی، سئز بولارین قیدئندن آزاد اولاسیز. اِولی اولمایان کئشی ربّئن ائشلری قیدئندهدئر کی، اونی راضی الهسئن. 33آمّا اِولی کئشی، آروادینی راضی الهمک اوچون دونیهوی شیلرئن قیدئندهدئر. 34بله ده علاقهسی ائکی یره بؤلونور. اَرسئز آرواد و باکئره قیز ربّئن ائشلری قیدئندهدئر کی، نجه جئسمن و روحن موقدّس قالسین. آمّا اَرلی آرواد دونیهوی شیلرئن قیدئندهدئر کی، نجه اَرئنی راضی الهسئن. 35بونی سئزئن اؤز خیئرئز اوچون دیئرم. آزادلیغیزی محدود الهمک اوچون دمئرم. دیئرم کی، دئقّتئزی داغیتمادان ربّه وقف اولونوب، اونا لایئق بئر حالدا یاشایاسیز.
36اگر بئری اله گومان الهیئر کی، باکئره قیزینین حاقّیندا حاقسیزلیق الهیئر، اگر قیزین یاشی کچئر و اِولهنمهسی گرکدئر. او، نه ائستهیئر، الهسئن. گوناه الهمز. قوی اولار اِوله نسئنلر. 37آمّا اگر بئر کئشی، اؤز اورهیئنده قرارلیدیر و فئشاردا دیئل، بلکی اؤز ائرادهسئنه حاکئمدئر و اورهیئنده بو قرارا گلئب کی، باکئره نئشانلیسی ائنن اولنمه سئن، او کئشی ده یاخشی الهیئر. 38بله ده، او کی اؤز نئشانلیسی ائنن اوله نئر یاخشی الهیئر، آمّا او کی اوله نمئر لاپ یاخشی الهیئر.
39آرواد، اوزاماناجاق کی اَری دئری دئر، اونا باغلیدیر. آمّا اگر اَری اؤلسه، آرواد آزاددیر کی، ائستهدئیی هر کسه اَره گتسئن، آنجاق کی، او آدام ربده اولسون. 40آمّا بله دوشونورم کی، اگر اولنمه سه، لاپ بختور اولار؛ و گومان الهیئرم کی، منده ده تارینین موقدّس روحی وار.
Currently Selected:
۱قورئنتلیلره 7: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
