۱قورئنتلیلره 5
5
عئفّتسئزلئیه یول ورمهیئن
1خبر ورئلئب کی، آرازدا عئفّتسئزلئک وار، اله بئر عئفّتسئزلئک کی، قیرییهودئلر آراسیندا بله یوخدور. بو کی، بئری اؤز آتاسینین آروادی ائنن یاشاییر. 2آمّا سئز شئشئب، فخر الهیئرسئز! عوضئنه یاس توتماییرسیز کی، بله بئر ائشی گؤرن آدام آرازدان گؤتورولسون. 3آمّا من، گرچی جئسمن یوخ روحن سئز ائنن وارام، یانیزدا ائمئش کئمی بو ائشی گؤرن آدامین حاقّیندا آرتیق حؤکم الهمئشم. 4او زامان کی، ربّئمئز عئسا مسئحئن آدیندا، ربّئمئز عئسا مسئحئن قودرتی ائنن بئر یره ییغیلیرسیز و من روح دا سئز ائننم، 5بو آدامی، جئسمئنئن هلاک اولماسی اوچون شیطانا تسلئم الهیئن کی، ربّئن گونونده روحی نئجات تاپسین.
6سئزئن شئشئب فخر اله مهیئز یاخشی دیئل. مگر بئلمئرسئز کی، بئر آز مایا بوتون خمئری تورشلادیر؟! 7اؤزوزی کؤهنه خمئر مایادان تمئزله یئن اله کی، تزه خمئر اولاسیز. نجه کی، حقئقتن ده مایاسیز خمئرسئز. چونکی بئزئم پاسخا قوزوموز مسئح، بئزئم اوچون قوربان اولوب. 8بونا گؤره گلئن نه کؤهنه مایا ائنن، نه ده کئن و پئسلئیئن مایاسی ائنن، بلکی صافلیغین و حقئقتئن مایاسیز فطئری ائنن بایرام توتاق.
9نامه مده سئزه یازدیم کی، عئفّتسئز آداملار ائنان قاریشمایاسیز. 10آمّا نه کی، اصلا بو دونیانین عئفّتسئزلری ائنن و یا طاماحکار و شیّادلاری ائنن، یا دا بوتپرستلری ائنن قاریشمایاسیز، چونکی او حالدا سئز بو دونیادان آرتیق چیخیب گتمهلی سئز. 11سئزه بونی یازیرام کی، قارداش آدلانان آمّا عئفّتسئز، طاماحکار، بوتپرست، سؤیوش ورن، کِفلَنَن و شیّاد بئر آدام ائنان اوتوروب دورمایین. بله آدام ائنان حتّا یمک ده یمهیئن.
12نه ائشئم وار کی، اشئکدهکئلره حؤکم الهیئم؟! آیا سئز کلئسا ائچئنده اولانلارا حؤکم اله مزسئز؟! 13آمّا اشئکدهکئلره تاری حؤکم اِلئیهجک. او شرور آدامی آرازدان اشئیه آتین.
Currently Selected:
۱قورئنتلیلره 5: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
