Acts 6
6
1ထိုကာလ၌ တပည့်တော်အရေအတွက် များပြားလာသည်နှင့်အမျှ ဂရိစကားပြောသော ဂျူးလူမျိုးများသည် အာရမိတ်စကားပြောသော ဂျူးလူမျိုးများအား ပြစ်တင်ဝေဖန်ခဲ့ကြလေ၏။ အဘယ်ကြောင့်ဆိုသော် သူတို့တွင်ရှိသော မုဆိုးမများသည် နေ့စဉ်နေ့တိုင်းစားနပ်ရိက္ခာဝေမျှရာတွင် မျှတစွာ မရရှိကြသောကြောင့်ဖြစ်သည်။ 2ထိုအခါ သာဝကတစ်ဆယ့်နှစ်ပါးတို့သည် နောက်လိုက် တပည့်တော်အပေါင်းတို့ကိုခေါ်၍ "ဘုရားရှင်၏ နှုတ်ကပတ်တော်အား စွန့်ပယ်ပြီး အစားအစာ ဝေငှနေခြင်းသည် မှန်ကန်သင့်လျော်မှုမရှိပေ။ 3ထို့ကြောင့် ညီအစ်ကိုတို့၊ သင်တို့ထဲက ဉာဏ်အလင်းတော်နှင့်လည်းကောင်း ဉာဏ်ပညာနှင့်လည်းကောင်း ပြည့်စုံသည်ဟု သင်တို့သိကြသည့် သူများထဲက လူခုနှစ်ယောက်အားရွေးချယ်ပြီး ဤတာဝန်ကို ဆောင်ရွက်စေလော့။ 4ငါတို့မူကား ဆုတောင်းခြင်းနှင့် နှုတ်ကပတ်တော်တရားများ ဟောပြောခြင်းကို ဆက်လက်ဆောင်ရွက်ပါမည်" ဟု ပြောဆိုလေ၏။ 5ထိုအဆိုပြုချက်အား လူအားလုံးတို့က နှစ်သက်ကြသည့်အတွက် သူတို့သည် ယုံကြည်ခြင်းအရာ၌လည်းကောင်း၊ ဉာဏ်အလင်းတော်အရာ၌လည်းကောင်း ပြည့်ဝသည့် သတေဖန်၊ ဖိလိပ္ပု၊ ပြောခေါ်၊ နိကနော်၊ တိမုန်၊ ပါမေနနှင့် ယခင်က ဂျူးဘာသာဝင်အဖြစ် ကူးပြောင်းခဲ့သူ အန္တိအုတ်မြို့မှ နိကောလတို့ကို ရွေးချယ်၍ 6သူတို့ကို သာဝကတို့၏ရှေ့သို့ ခေါ်ဆောင်၍ သာဝကတို့သည် သူတို့အပေါ်တွင် လက်တင်၍ ဆုတောင်းခဲ့ကြ၏။ 7ဤသို့ဖြင့် ဘုရားရှင်၏ နှုတ်ကပတ်တော်သည် ပျံ့နှံ့သွားပြီ ဂျေရုဆလင်မြို့၌ တပည့်တော်အရေအတွက်သည် များစွာတိုးပွားလာကာ ပုရောဟိတ် အပေါင်းတို့သည်လည်း ယုံကြည်လက်ခံလာကြလေ၏။ 8သတေဖန်သည် ကျေးဇူးတော်၊ တန်ခိုးတော်တို့နှင့် ပြည့်ဝလျက် လူအများကြားတွင် ကြီးစွာသော အံ့ဖွယ်အမှုများနှင့် နိမိတ်လက္ခဏာများစွာတို့ကို လုပ်ဆောင်လေ၏။ 9ထိုအခါ "လိဗေရတိန်"ဟုခေါ်သည့် ဓမ္မာရုံမှ လူအချို့ဖြစ်ကြသော ကုရေနေမြို့သားများ၊ အလက်ဇန္ဒြိယမြို့သားများမှစ၍ ဆီလီဆီးယားပြည်နှင့် အာရှပြည်တို့မှလာကြသောသူအချို့သည်ထ၍ သတေဖန်နှင့် စတင်ငြင်းခုံကာ ပြောဆိုကြလေ၏။ 10သတေဖန်သည် ဉာဏ်အလင်းတော်ပေးတော်မူသော ဉာဏ်ပညာတို့ဖြင့် ပြောဆိုသောကြောင့် ထိုသူတို့သည် ပြန်လည်ငြင်းခုံခြင်းမပြုနိုင်ကြပေ။ 11ထို့နောက် သူတို့သည် လူတို့အား လာဘ်ထိုး၍ "ဤသူသည် မောရှေနှင့် ဘုရားရှင်ကို ဆန့်ကျင်စော်ကားသည့်စကားများ ပြောနေသည်ကို ငါတို့ကြားခဲ့ရ၏" ဟုပြောဆိုစေ၏။ 12ဤနည်းအားဖြင့် လူမျိုးခေါင်းဆောင်များ၊ ကျမ်းတတ်ဆရာများနှင့် လူအပေါင်းတို့အာား လှုံ့ဆော်၍ သတေဖန်ကို ဖမ်းဆီးကာ တရားလွှတ်တော်ရှေ့သို့ ခေါ်ဆောင်သွားကြလေ၏။ 13ထို့နောက် သူတို့သည် မမှန်သောသက်သေများကိုခေါ်ဆောင်လာကြပြီး "ဤသူသည် မွန်မြတ်သည့်နေရာနှင့် မောရှေ၏ပညတ်တရားများအား စဉ်ဆက်မပြတ် စော်ကားပြောဆိုနေပါ၏။ 14'နာဇရက်မြို့သားယေရှုသည် ဗိမာန်တော်အားဖြိုချပြီး မောရှေပေးအပ်ထားသည့် ဓလေ့ထုံးတမ်းအားလုံးကို ပြောင်းလဲစေမည်' ဟုသူသည်ပြောဆိုခဲ့သည်ကို ကျွန်ုပ်တို့ ကြားခဲ့ရပါ၏" ဟုထွက်ဆိုစေကြ၏။ 15တရားလွှတ်တော်တွင် ထိုင်နေကြသော လူအပေါင်းတို့သည် သတေဖန်ကို စိုက်ကြည့်လိုက်သောအခါ သူ၏မျက်နှာသည် နတ်ဒေဝါတစ်ပါး၏ မျက်နှာကဲ့သို့ ဖြစ်နေသည်ကို တွေ့မြင်ကြရလေ၏။
Currently Selected:
Acts 6: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
