Acts 5
5
1ထိုအချိန်တွင် အာနနိအမည်ရှိသောသူတစ်ဦးသည် ဇနီးဖြစ်သူရှဖိရေနှင့်အတူ ဥစ္စာပစ္စည်းကို ရောင်းချပြီးလျှင် 2သူတို့သည် ရောင်းရသောငွေမှ အချို့ကိုထိန်ချန်ထားခြင်းဖြင့် လှည့်စားပြောဆိုရန် သဘောတူဆုံးဖြတ်ကြပြီးလျင် ကျန်သောငွေအချို့ကို ယူဆောင်လာ၍ သာဝကတို့ထံ ယူလာပေးကြလေ၏။ 3သို့သော် ပေတရုက "အာနနိ၊ သင်သည် မာရ်နတ်အာ သင်၏စိတ်နှလုံးထဲသို့ ဝင်ရောက်စေပြီး ဉာဏ်အလင်းတော်အား လိမ်ညာ၍ မြေဖိုးထဲမှအချို့ကို အဘယ်ကြောင့် ထိမ်ချန်ထားသရသနည်း။ 4ထိုအရာများသည် သင်မရောင်းချမီကတည်းကပင် သင်ပိုင်ဆိုင်သည့် ပစ္စည်းများဖြစ်ပြီး ရောင်းချလိုက်လျှင်လည်း ထိုငွေတို့အား သင်သည် ပိုင်ဆိုင်နေသေးသည် မဟုတ်လော။ ဤသို့ဖြစ်လျက်နှင့် ယခုသင်သည် လူတို့အား လိမ်ညာရုံမျှမက ဘုရားရှင်ကိုပါ လိမ်ညာခဲ့ပြီဖြစ်၏" ဟု ဆိုလေ၏။ 5အာနနိသည် ထိုစကားကိုကြားသောအခါ လဲကျ၍သေဆုံးလေ၏။ ထိုအဖြစ်အပျက်ကို ကြားရသူတိုင်းသည်လည်း အလွန်ကြောက်ရွံ့သွားကြလေ၏။ 6ထိုအခါ လူငယ်တို့သည်လာ၍ အလောင်းကိုရစ်ပတ်ပြီးလျှင် သယ်ဆောင်သွား၍ သင်္ဂြိုဟ်ကြ၏။ 7သုံးနာရီခန့်ကြာသော် အာနနိ၏ ဇနီးဖြစ်သူသည် မည်သို့ဖြစ်ပျက်ခဲ့သည်ကိုမသိဘဲ ဝင်လာလေ၏။ 8ပေတရုက သူ့အား "သင်တို့သည် ထိုမြေကွက်အား ဤငွေပမာဏနှင့်ရောင်းချခဲ့ခြင်း မဟုတ်လော" ဟုမေးလေ၏။ သူမကလည်း "မှန်ပါ၏။ ဤငွေပမာဏနှင့် ရောင်းချခဲ့ပါ၏" ဟုပြန်ဖြေလေ၏။ 9ပေတရုက "အဘယ်ကြောင့် သင်တို့သည် ဘုရားရှင်၏ ဉာဏ်အလင်းတော်အား စမ်းသပ်ကြသနည်း။ ကြည့်လော့။ သင်၏ခင်ပွန်းအား သင်္ဂြိုဟ်ခဲ့သည့် လူငယ်များသည် တံခါးအနီးတွင် ရောက်နေပြီဖြစ်၏။ သူတို့သည် သင့်ကိုလည်း သယ်ထုတ်သွားကြလိမ့်မည်" ဟုဆိုလေ၏။ 10ထိုအချိန်တွင်ပင် သူမသည်လည်း ပေတရု၏ခြေရင်းတွင် လဲကျသေဆုံးလေ၏။ ထိုအခါ လူငယ်တို့သည်ဝင်လာ၍ လဲကျသေဆုံးနေသော သူမကိုမြင်လျှင် သယ်ဆောင်သွားကြကာ သူမခင်ပွန်း၏နံဘေးတွင် သင်္ဂြိုဟ်ကြလေ၏။ 11အသင်းတော်တစ်ခုလုံးနှင့် ဤအဖြစ်အပျက်များကို ကြားရသူအပေါင်းတို့သည် အလွန်ကြောက်လန့်သွားကြလေ၏။ 12တပည့်တော်တို့သည် လူအများ၏ကြားတွင် အံ့ဖွယ်အမှုများနှင့် နိမိတ်လက္ခဏာများစွာကို လုပ်ဆောင်ခဲ့ကြပြီး ယုံကြည်သူများအားလုံးတို့သည်လည်း ရှောလမုန်မုခ်ဆောင်ဟုခေါ်သော နေရာတစ်ခုတွင် မကြာခဏတွေ့ဆုံကြလေသည်။ 13သူတို့သည် လူအများ၏အထင်ကြီးလေးစားမှုကို ခံရသော်လည်း သူတို့နှင့်အတူ အခြားမည်သူမျှ မပါဝင်ရဲကြပေ။ 14ကိုယ်တော်ယေရှုအား ယုံကြည်ကြသူ အမျိုးသားများနှင့် အမျိုးသမီးအမြောက်အမြားတို့သည်လည်း ပိုမို၍တိုးပွားလာလေ၏။ 15လူအများတို့သည် ပေတရုဖြတ်သန်းသွားစဉ်တွင် သူ၏အရိပ်သည် နာမကျန်းသူများအပေါ်သို့ ကျရောက်ပြီး ကျန်းမာစေရန်အတွက် နာမကျန်းသူများကို လမ်းမပေါ်သို့ခေါ်ဆောင်ကာ အိပ်ယာများနှင့်ဖျာများပေါ်တွင် ချထားကြသည်။ 16ယေရုရှလင်မြို့ပတ်ဝန်းကျင်ရှိ မြို့များမှ လူများသည်လည်း နာမကျန်းဖြစ်သူများနှင့် မကောင်းဆိုးဝါးပူးကပ်နေကြသူများကို ခေါ်ဆောင်လာ၍ စုဝေးကြရာ ထိုသူအပေါင်းသည်လည်း အကောင်းပကတိဖြစ်ကြလေ၏။ 17ထိုအခါ အကြီးဆုံးပုရောဟိတ်နှင့် သူ၏အပေါင်းအဖော်များဖြစ်ကြသော ဇဒ္ဒုကဲအဖွဲ့ဝင်များသည် မနာလိုစိတ်များနှင့် ပြည့်နှက်နေကြပြီး 18သာဝကတို့ကို ဖမ်းဆီးကာ မြို့တော်အကျဉ်းထောင်ထဲ၌ ထည့်ထားကြလေ၏။ 19သို့သော် ညအချိန်တွင် ဘုရားရှင်ထံမှ နတ်ဒေဝါတစ်ပါးသည် ထောင်တံခါးများကိုဖွင့်၍ သူတို့အား အကျဉ်းထောင်မှ ခေါ်ထုတ်ပြီးလျှင် 20"ဗိမာန်တော်သို့သွားပြီး ဤအသက်တာအသစ်အကြောင်း မင်္ဂလာသတင်းကောင်းအား လူတိုင်းကို ပြောပြကြလော့" ဟု ဆိုလေ၏။ 21သာဝကတို့သည်လည်း ထိုစကားကိုကြားလျှင် မနက်မိုးမလင်းမီအချိန်၌ ဗိမာန်တော်ထဲသို့ဝင်၍ သွန်သင်ကြလေ၏။ ထိုအချိန်၌ အကြီးဆုံးပုရောဟိတ်နှင့် သူ၏အပေါင်းအဖော်တို့သည် တရားလွှတ်တော်အဖွဲ့ဝင်များနှင့် အစ္စရေးလူမျိုးအကြီးအကဲတို့ကို စုဝေးစေပြီးနောက် သာဝကတို့ကိုခေါ်ဆောင်ရန် အစောင့်တပ်သားများအား အကျဉ်းထောင်ထဲသို့ စေလွှတ်လိုက်လေ၏။ 22သို့သော် အစောင့်တပ်သားတို့ အကျဉ်းထောင်ထဲသို့ရောက်ရှိသွားချိန်တွင် သာဝကများကို မတွေ့ရတော့ချေ။ ထိုအခါ သူတို့သည် ပြန်လာ၍ 23"ထောင်တံခါးသည် လုံခြုံစွာ ပိတ်ထားပြီး အစောင့်များသည်လည်း တံခါး၏ရှေ့တွင်ရပ်နေကြသည်ကို ကျွန်ုပ်တို့တွေ့ခဲ့ရပါ၏။ သို့သော် တံခါးအား ဖွင့်ကြည့်လိုက်သည့်အခါတွင် အထဲ၌ မည်သူ့ကိုမျှ မတွေ့ခဲ့ပါ" ဟုသတင်းပို့ကြလေ၏။ 24ထိုသတင်းကို ကြားရသောအခါ ဗိမာန်တော်အစောင့်အရာရှိနှင့် ပုရောဟိတ်အကြီးအကဲတို့သည် မည်ကဲ့သို့ဖြစ်သည်ကို ဝေခွဲမရဖြစ်နေကြလေ၏။ 25ထိုအခါ လူတစ်ဦးသည် ရောက်လာ၍ "ထောင်ထဲတွင် အကျဉ်းချထားခံရသည့် သူတို့သည် ဗိမာန်တော်တွင်ရပ်၍ လူတို့အား ဟောပြောသွန်သင်နေပါ၏" ဟုလျှောက်တင်လေ၏။ 26ထိုအခါ ဗိမာန်တော်အစောင့်အရာရှိနှင့် အစောင့်တပ်သားများသည် လူတို့က ခဲနှင့်ပေါက်မည်ကို စိုးရိမ်သဖြင့် ရုန်းရင်းဆန်ခတ် မဖြစ်စေဘဲ သာဝကတို့အား သွား၍ခေါ်ဆောင်လာကြလေ၏။ 27အကြီးဆုံးပုရောဟိတ်မှ စစ်ဆေးမေးမြန်းရန် သာဝကတို့အား တရားလွှတ်တော်ရှေ့သို့ ခေါ်ဆောင်စေကာ 28"ဤအမည်နာနှင့် ဟောပြောသွန်သင်ခြင်း မပြုကြရန် သင်တို့အား တင်းတင်းကျပ်ကျပ် အမိန့်ပေးထားခဲ့ပြီးဖြစ်၏။ သို့သော် သင်တို့သည် ဂျေရုဆလင်မြို့ သင်တို့၏သွန်သင်မှုများအား ပျံ့နှံ့စေကြပြီး ယေရှုသေဆုံးသည့်အမှုတွင် ငါတို့အား အပြစ်ဖြစ်စေရန် ကြံရွယ်နေကြ၏" ဟုပြောဆိုလေ၏။ 29သို့သော် ပေတရုနှင့် သာဝကတို့က "ကျွန်ုပ်တို့သည် လူတို့၏စကားများထက် ဘုရားရှင်၏စကားကို ပို၍နာခံသင့်၏။ 30ကျွန်ုပ်တို့ ဘိုးဘေးများ၏ ဘုရားရှင်သည် လက်ဝါးကပ်တိုင်ပေါ်တွင် သင်တို့ကွပ်မျက်ခဲ့ကြသည့် ကိုယ်တော်ယေရှုအား အသက်ပြန်ရှင်စေတော်မူခဲ့။ 31ဘုရားရှင်သည် အစ္စရေးလူမျိုးများ နောင်တသံဝေဂရပြီး သူတို့၏အပြစ်များအား ခွင့်လွှတ်ပေးရန်အတွက် ကိုယ်တော်ယေရှုအား ကျွန်ုပ်တို့၏ခေါင်းဆောင်နှင့် ကျွန်ုပ်တို့ ၏ကယ်တင်ရှင်အဖြစ် သူ၏လက်ယာဘက်တွင် ထားရှိ၍ ချီးမြှောက်တော်မူခဲ့၏။ 32ကျွန်ုပ်တို့သည် ဤအကြောင်းအရာများအား သက်သေခံကြသည့်သူများဖြစ်ပြီး ဘုရားရှင်သည် သူ၏စကားတော်အား နာခံကြသူတို့အား ပေးအပ်သည့် ဉာဏ်အလင်းတော်သည်လည်း သက်သေဖြစ်တော်မူ၏" ဟုပြန်ဖြေကြားလေ၏။ 33ထိုစကားကို တရားလွှတ်တော်အဖွဲ့ဝင်များ ကြားကြသောအခါ ဒေါသအမျက်ထွက်ကြပြီး သာဝကတို့အား သတ်ပစ်ချင်နေကြလေ၏။ 34လူအပေါင်းတို့၏ ဂုဏ်ပြုခြင်းကိုခံရသော ကျမ်းတတ်ဆရာတစ်ဦးဖြစ်သည့် ဂါမလျေလအမည်ရှိသော ဖာရိရှဲတစ်ဦးသည် တရားလွှတ်တော်ထဲတွင်ထရပ်၍ လူတို့အား အပြင်သို့ထွက်သွားကြရန် အမိန့်ပေးခဲ့လေသည်။ 35ထို့နောက် သူက "အစ္စရေးလူမျိုးအပေါင်းတို့၊ ဤလူတို့အပေါ် မည်သို့လုပ်ဆောင်မည် ဆိုသည်အား သတိထားကြလော့။ 36လွန်ခဲ့သည့်အချိန်တုန်းက သုဒဆိုသောသူသည် ပေါ်လာပြီး သူ့ကိုယ်သူ ကြီးမြတ်သည့်သူတစ်ယောက်ဟု ပြောခဲ့သည့်အတွက် လူပေါင်းလေးရာလောက်သည် သူ၏အဖွဲ့ထဲသို့ ဝင်ခဲ့ကြ၏။ သို့သော် သူသည် အသတ်ခံခဲ့ရပြီးနောက် သူ၏နောက်လိုက်များသည် တကွဲတပြား ဖြစ်သွားကြသည့်အတွက် သူ၏လုပ်ရပ်များသည်လည်း အရာမထင်ဖြစ်ခဲ့၏။ 37ထို့နောက် ဂါလိလဲပြည်သား ယုဒဆိုသည့်သူသည်လည်း တိုင်းပြည်တွင် သန်းခေါင်စာရင်းကောက်ခံသည့်အချိန်၌ ပေါ်လာပြီး လူတို့အား သူ၏နောက်သို့လိုက်ကြရန် သွေးဆောင်ခဲ့၏။ သူသည်လည်း အသတ်ခံခဲ့ရပြီး သူ၏နောက်သို့ လိုက်ကြသူများသည် တကွဲတပြားဖြစ်သွားခဲ့ကြ၏။ 38ထို့ကြောင့် ယခုတွင်လည်း သင်တို့သည်လည်း ဤလူများနှင့် ကင်းကင်းနေပြီး သူတို့အား လွှတ်ထားလိုက်ကြလော့။ သူတို့လုပ်ဆောင်နေခြင်းများသည် လူတို့၏အကြံအစည်များနှင့် လူတို့၏အလိုအတိုင်းသာဖြစ်လျှင် သူတို့သည် ပျက်စီးသွားကြလိမ့်မည်ဖြစ်၏။ 39သို့သော် ဘုရားရှင်၏အလိုတော်ဖြစ်မည်ဆိုပါက သင်တို့သည် သူတို့အား တားဆီးနိုင်ကြမည်မဟုတ်သည့်အပြင် သင်တို့သည်လည်း ဘုရားရှင်ကို ဆန့်ကျင်သည့်သူများ ဖြစ်သွားနိုင်၏" ဟုပြောဆိုလေသည်။ 40တရားလွှတ်တော်အဖွဲ့ဝင်များသည်လည်း သူ၏အကြံပေးချက်ကို လက်ခံကြလေ၏။ ထို့နောက် သူတို့သည် သာဝကတို့ကို အတွင်းသို့ခေါ်၍ ရိုက်နှက်ကြပြီးလျှင် ကိုယ်တော်ယေရှု၏ အမည်နာမတော်ကို ပြောကြားခြင်းမပြုကြနှင့်ဟု အမိန့်ပေး၍ ပြန်လွှတ်လိုက်ကြလေသည်။ 41သာဝကတို့သည် ကိုယ်တော်ယေရှု၏ နာမတော်အတွက် အရှက်ခွဲခြင်းကို ခံထိုက်သူများဟု မှတ်ယူခံရသောကြောင့် ပျော်ရွှင်စွာဖြင့် တရားလွှတ်တော်မှ ထွက်ခွာခဲ့ကြလေသည်။ 42ထိုအချိန်မှစ၍ နေ့စဉ်နေ့တိုင်း သူတို့သည် ဗိမာန်တော်၌လည်းကောင်း အိမ်တစ်အိမ်မှ တစ်အိမ်သို့လည်းကောင်း ကိုယ်တော်ယေရှုသည် မေရှိယဖြစ်ကြောင်း စဉ်ဆက်မပြတ် ဟောပြောသွန်သင်ကြလေ၏။
Currently Selected:
Acts 5: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
