1 Qoronttoosa 2

Kiristtoosa suxuntto

1Ta ishuntso, taanii yinttago Xoozze qaala yinttis ohitera yi7ize wode qaalaran cinccatitsara aadhii yi7ikaaya. 2Taanii yinttara yeze wode Yesuus Kiristtoosa ezin masqalalla afa suxunttideppa melle erodes koyoos ga7i ta qofa accida. 3Ta yinttara yeze wode labitsimora, zhashimoran gaama goqera yezida.#Hawa. 18:9 4Ta ohitan ta sabbakita sa7a eraran doona cinccatitsara maaqqikaayzin Xoozze Geeshi Ayyaana wolqqa qonccitsite. 5Yinnan, yin ammantta Xoozze wolqqara fattin as cinccatitsalla kataame fana.

Xoozze cinccatitsi

6Ayyaana de7o dicciduntsis nuunii cinccatitsi qaalara ohine. Yezin yinna cinccatitsita, hyanna alame cinccatitsito woy dhabodes yeze hyanna alamito ahizunts cinccatitsito baaya. 7Yezin nuunii ohize cinccatitsita, gaama wodeppa tiino Xoozii nu bonchchos giigizidannon aachintti yeze Xoozze cinccatitsito. 8Hyanna alamtto ahizuntsappa ooden hyanna cinccatitsito erikaaya. Un erizebaz maaqqezako, bonchcho Laatstse masqalalla afa suxxaama yeshsha. 9Yezin Geeshi Maxaafite,

«Aafe bi7ikaayze baz,

hyaye si7ikaayzebaz,

wozina qoppikaayzebaz,

Xoozii fana siiqizuntsis giigizida» yagaane.#Isa. 64:4

10Nuus Xoozii Geeshi Ayyaana baggara qonccizida. Geeshi Ayyaana melle atto yezin Xoozze gaatsi qofa ubba qurichchane. 11As gidda yeze baz atstse gidda yeze ayyaanza fattin as baz ooden eroos. Yinnii gaar, Xoozze baz Xoozze Ayyaana fattin ooden eroos. 12Xoozii nuus hyarii inggidanno nu erode gaar Xoozze Ayyaana ekkida fattin hyanna alamtti ayyaana ekkikaaya.

13Yinnii gisho nuunii ayyaana qofa, ayyaana asuntsana tamaarssizanna as cinccatitsara maaqqikaayzin Xoozze Ayyaana inggize cinccatitsara. 14Yezin Geeshi Ayyaana baayze asi Xoozze Ayyaanappa ingginttize imo ekkodes dandda7oos. Yinna ees eeyatitsi; ubbanna Geeshi Ayyaanara qurichinttizanni gisho E erodes dandda7oos. 15Yezin Geeshi Ayyaana yeze asi ubba baz qurichchane, yezin eza ooden qurichchoos. 16Geeshi Maxaafite,

«Laatstse wozintto erize oode?

eza zorodes dandda7ize oode?»

ga7intti xaafinttidanni fana. Yezin nuus Kiristtoosa wozina yene.#Isa. 40:13

Currently Selected:

1 Qoronttoosa 2: OydaNTL

Highlight

Copy