Ku̱lu̱gha 15

Kilimbo kya Musa

1Niibuwo Musa na Banai̱saaleeli̱ baalimbiiye Mukama kilimbo kini bati,

“Nkulimbila Mukama, nanga aasi̱ngu̱u̱ye kwonini,

aaku̱bi̱ye mu nanja nkai̱na nʼoghu aghi̱ni̱i̱ni̱yʼo.

2 Mukama niiye akumpaagha maani̱ kandi kilimbo kyanje.

Niiye akunjunagha

kandi niiye Luhanga wanje, nkumusinda.

Niiye Luhanga wa tita kandi nku̱mu̱ku̱ghi̱ja.

3 Mukama ni mulwani̱ wamaani̱

kandi Mukama niiliyo li̱i̱na liye.

4“Bigaali̱ bya Falaaho na mahe ghe aabi̱ku̱bi̱ye mu nanja,

bakulu be baa mahe baamaani̱ baadhikiiye mu Nanja Mutuku.

5Nanja etobheeye yaabameli̱ye

kandi baadhikila hansi yayo nga ebaale.

6Ai̱ Mukama, mukono ghwawe ghwabuliyo ghuli na bu̱toki̱ bwamaani̱,

Ai̱ Mukama, mukono ghwawe ghwabuliyo ghwasabanguuye ngi̱ghu̱.

7Ku̱si̱ngu̱la kwawe kwamaani̱

kwaleki̱ye waaweelekeeleli̱ya ngi̱ghu̱ syawe

kandi ki̱i̱ni̱gha kyawe kikubaagha nga mulilo

kandi okwoki̱yagha ngi̱ghu̱ syawe nga bisunga.

8Obu waahu̱u̱hi̱ye lwoha lwʼomu mihuli yaawe

maasi ghaaba ntuumo,

mighina yeemilila nga kisiika

kandi nanja etobheeye yaakwatana.

9“Ngi̱ghu̱ aaghila ati, ‘Nkubahuma kandi mbakwate.

Nkutambulana etungo lyabo kandi nkutwala byona ebi nkubbala.

Nkubhulayo kihiyo kyanje

kandi mukono ghwanje ghukubahwelekeeleli̱ya.’

10Okahuuha lwoha lwawe kandi nanja yaabamela,

baadhikila hansi nga kyoma mu maasi ghaamaani̱.

11“Ai̱ Mukama ni ani̱ ali ngaawe mu baaluhanga?

Ni ani̱ ali ngaawe mu ki̱ti̱i̱ni̱sa, bu̱hi̱ki̱li̱i̱le,

oghu bantu boobahi̱ye kandi oghu akukolagha byakuswekani̱ya?

12Okananula mukono ghwawe ghwabuliyo,

nsi yaamela ngi̱ghu̱ syatu.

13“Kukunda kwawe kwamaani̱ kukaleka waahikila

bantu baawe aba waacunguuye

kandi haabwa maani̱ ghaawe

waabatwala mu kyalo kyawe ki̱hi̱ki̱li̱i̱ye.

14Bantu bʼomu mahanga ghanji baku̱u̱ghu̱wa eki kandi bakutukumila.

Bantu abaakaaye mu Fi̱li̱si̱ti̱ya bakwobahila kimui.

15Beebembeli̱ bʼomu Edomu batuntuuye.

Basaasa baamaani̱ baa Mowaabu niibuwo baatukumila

kandi bantu boona abaakaaye Kanaani̱ mitima ebakangami̱ye munda.

16Ai̱ Mukama, bantu aba boona boobahi̱ye kandi niibuwo baatukumila,

haabwa mukono ghwawe ghwamaani̱.

Ai̱ Mukama, bantu aba baku̱holi̱ya nga ebaale

ku̱hi̱ki̱ya bantu baawe aba waacunguuye basaaye.

17Ai̱ Mukama, okubatwala kandi obate haa mwena ghwawe,

mu ki̱i̱kalo eki waakomi̱yemu kuukalamu.

Ai̱ Mukama, ki̱i̱kalo ki̱hi̱ki̱li̱i̱ye eki waakoli̱ye na mikono yaawe.

18 Mukama akulema bilo nʼebilo.”

19Obu nkai̱na sya Falaaho, bigaali̱ biye na basaasa be abaaghendagha basi̱ni̱i̱ni̱yʼo baakoti̱ye mu nanja, Mukama aaku̱u̱ki̱ya maasi agha kandi ghaabamela. Bhaatu Banai̱saaleeli̱ bakaba mbaamali̱ye kubhasuka nanja eghi haagati mbalubhatangila haa etaka lyomi̱ye. 20Niibuwo Mi̱li̱yamu mulangi̱ wabukali̱, mwani̱na Alooni̱, aakwete kaaciki-ciki mu ngalo yee. Bakali̱ banji boona baaghenda bamulabhi̱ye mbateela buuciki-ciki bwabo kandi mbabi̱na. 21Mi̱li̱yamu aabalimbila naaghila ati,

“Mulimbile Mukama, nanga aasi̱ngu̱u̱ye kwonini,

aaku̱bi̱ye mu nanja nkai̱na nʼoghu aghi̱ni̱i̱ni̱yʼo.”

Maasi ghasaaliiye

22Niibuwo Musa aahikiiye Banai̱saaleeli̱ ku̱lu̱gha haa Nanja Mutuku, baaghenda mu elungu lya Suula. Baalubhatanga bilo bisatu mu elungu eli kandi bataabona maasi. 23Obu baaki̱dhi̱ye e Maala, tabaagubha kunuwa maasi ghaayo, nanga ghakaba ghasaaliiye, nahabweki ki̱i̱kalo eki baakiluka li̱i̱na Maala.#15:23 Maala likumani̱i̱si̱ya kusaalila. 24Bantu aba baatongana na Musa bati, “Buuye tukunuwa biki?”

25Musa ataaghila Mukama kandi Mukama aamwoleka ki̱twi̱ke kya lukui. Musa aakikuba mu maasi agha, du̱mbi̱ ghaaleka kusaalila.

Mu ki̱i̱kalo eki Mukama aateelʼo Banai̱saaleeli̱ kilaghilo na ntu̱wamu naabbala kubalengesa. 26Aabaghila ati, “Kaakuba weekamba ku̱hu̱ti̱ya si̱ye Mukama Luhanga waawe, okola ebi̱ndheedhi̱ye, okwata bilaghilo byanje na ntu̱wamu syanje, tankukuha kifubilo kya ndwala esi naaleki̱ye Banami̱si̱li̱ baalwala, nanga ni̱i̱si̱ye Mukama oghu aku̱ku̱ki̱li̱yagha.”

27Banai̱saaleeli̱ baalu̱gha Maala kandi baaki̱dha Eli̱mu̱, hambali baasangi̱ye nsulo eku̱mi̱ nʼebili na bi̱ti̱na nsanju̱ bya mba, baaghoona mu ki̱i̱kalo eki haakpengbu̱ ya maasi.

Currently Selected:

Ku̱lu̱gha 15: Lubwisi

Highlight

Copy