1 JUAN 1
1
Reꞌ rikꞌormojic johtokkamahc chiwach i Dios
1Reꞌ hin maꞌ Wa̱n reꞌ cꞌahchiꞌ nitzꞌihminic reh hu̱j wili nanikꞌoric chiri̱j i Sakomonel Wach riNoꞌjbal i Dios keh hoj cꞌacharel eh aj Yeꞌol woꞌ reh Junelic Cꞌacharic. Reꞌ aj Sakomonel reꞌreꞌ xa wilic woꞌ cho nok cu jaꞌ nchꞌihquic ta cho wach acꞌal. Naxchalic ayuꞌ wach acꞌal, reꞌ hin chꞌi̱l take wich nahsil raj tahkanel i Sakomonel Wach riNoꞌjbal i Dios, xkilow wach eh xkabiraj woꞌ naxiban take cꞌuhbalanic. Jeꞌ reꞌ ajic chiꞌnchel nicꞌ paꞌ nimal xiban ribanaric i Sakomonel Wach riNoꞌjbal i Dios queh tinamit, reꞌ hoj til xkilow chi coric take eh maꞌ xa ta reꞌreꞌ xkilow jeꞌ laꞌ woꞌ naxuctic cho chi quixilac take camnak, xkatzꞌaꞌj woꞌ ro̱k rikꞌab. 2Chaj waꞌric nok cꞌahchiꞌ nitzꞌihmbam aweh tak i wili? Cꞌahchiꞌ laꞌ nitzꞌihmbam ruꞌum chi reꞌ hin chꞌi̱l take wich nahsil raj tahkanel nka̱j chi nawehtꞌalij tak chi reꞌ Dios naxitakꞌa̱ꞌ cho ayuꞌ wach acꞌal i aj Yeꞌol reh Junelic Cꞌacharic, xiban cho chi jeꞌ reꞌ reh chi reꞌ hoj cꞌacharel nakilom wach ruꞌ. Reꞌ hoj til xkilow wach i aj Yeꞌol reh Junelic Cꞌacharic reꞌreꞌ eh ruꞌum reꞌ yuꞌna nkayew kachi̱ꞌ chiri̱j i ricorquil chi reꞌ Dios xtakꞌanic cho reh. Ruꞌum aj reꞌ nankakꞌor aweh tak i kꞌoric chiri̱j i junelic cꞌacharic xyeꞌeric chic keh, nkakꞌor woꞌ aweh tak chi jeꞌ wili hat-tak aj niminel: Coric, reꞌ Yeꞌol reh Junelic Cꞌacharic keh hoj cꞌacharel xa wilic woꞌ nak cho ru̱cꞌ Ajabe̱s Dios xa reꞌ laꞌ reꞌ hin chꞌi̱l take wich nahsil aj tahkanel reh Yeꞌol reh Junelic Cꞌacharic reꞌreꞌ, til xkilow wach chi cꞌacharic china̱ acꞌal wili naxtakꞌabjic cho. 3Jeꞌ aj reꞌ kꞌuruꞌ reꞌ kilom cho chꞌi̱l kabiram cho ru̱cꞌ aj Yeꞌol reh Junelic Cꞌacharic, reꞌ woꞌ reꞌ cꞌahchiꞌ kakꞌorom ribiral aweh yuꞌna i hat-tak aj niminel reh chi jeꞌ reꞌ, reꞌ hat-tak eriban xa jenaj wach acꞌux tak ku̱cꞌ i hoj chi rikꞌormojic ribiral i Jesus reꞌ aj Yeꞌol reh Junelic Cꞌacharic jeꞌ ricab nankakꞌor i cꞌuhbal chiri̱j ruꞌ, til riban xa jenaj chic wach kacꞌux ru̱cꞌ Ajabe̱s Dios chꞌi̱l woꞌ i Jesus reꞌ Lokꞌ laj rAcꞌu̱n reꞌ Pahbamaj chi Kꞌatal Kꞌoric. 4Jeꞌ reꞌ ajic ru̱cꞌ take cꞌahchiꞌ nikꞌorom wili reꞌ ta nak reꞌreꞌ enbanic chi enchalic rinimal risukquil acꞌux tak eh chi jeꞌ reꞌ enponic pan awa̱mna tak i riholonquilal take kꞌoric cꞌahchiꞌ nitzꞌihmbam je aweh tak.
Curman chi reꞌ hoj aj niminelenkapahkaj cuybal kamahc chiwach i Dios
5Nok reꞌ Jesus xwihꞌic ayuꞌ wach acꞌal, xkabiraj cho ru̱cꞌ chi̱ꞌ jenaj tijbal reꞌ kapꞌutum chic cho rikꞌormojic aweh tak wichꞌi̱l take wich nahsil aj tahkanel eh yuꞌna nakakꞌorom woꞌ chic aweh tak. Jeꞌ aj wili rikꞌor i tijbal reꞌreꞌ:
«Reꞌ Dios, xa jeꞌ na ricab jenoꞌ sakom nok wilic cho chi kana̱ eh jeꞌ ricab nok reꞌ sakom maꞌ nwihꞌic ta soꞌ kꞌekom ru̱cꞌ jeꞌ woꞌ reꞌ i Dios maꞌ nmahcanic ta soꞌ xa reꞌ laꞌ i coric riban ribanaric, nqui rikꞌor.
6Ruꞌum chi jeꞌ reꞌ rikꞌor i cꞌuhbal reꞌreꞌ wilic take cꞌacharel nquikꞌor aweh tak chi jeꞌ wili:
«Reꞌ hoj wilco̱j pan jenaj wach cꞌuxlis chꞌi̱l i Dios. Ruꞌum aj reꞌ maꞌ reꞌ ta kꞌorel to̱b ta pa rikꞌekomil i mahc cꞌacharic nkaꞌn, nqui nquikꞌor.
Reꞌ take cꞌacharel reꞌreꞌ maꞌ coric ta laj kꞌoric cꞌahchiꞌ quikꞌorom, maꞌ woꞌ cꞌahchiꞌ ta quicꞌacharic soꞌ jeꞌ ricab rikꞌor i coric laj tijbal cꞌuhtumaj ruꞌum Jesus.
7Tzꞌa̱b ruꞌ, wi xa kojcꞌacharic woꞌ pan coric jeꞌ ricab riwi̱ꞌ ricꞌacharic i Dios chi xa reꞌ woꞌ i coric riban ribanaric ra̱j rikꞌorom chi til wilco̱j woꞌ pan jenaj wach cꞌuxlis quichꞌi̱l take kas kacha̱kꞌ jeꞌ woꞌ ru̱cꞌ i Dios eh ruꞌum reꞌ, wi xojmahcanic chi quiwach i kas kacha̱kꞌ on chiwach i Dios, reꞌreꞌ ericuy kamahc wi xkapahkaj reh chi naricuyum kamahc. Ruꞌum aj woꞌ reꞌ, reꞌ kAja̱w Jesus reꞌ rAcꞌu̱n i Dios reꞌ Pahbamaj woꞌ chi Kꞌatal Kꞌoric, xquimic reh chi reꞌ hoj ekojcahnic chi maꞌxta chic kamahc chiwach i Dios.
8Yuꞌna kakꞌor wi wilic jenoꞌ cꞌacharel pa rikꞌekomil i mahc cꞌacharic riban eh to̱b ta jeꞌ reꞌ riwi̱ꞌ ricꞌacharic cu rikꞌor chi reꞌreꞌ maꞌxta nechꞌ ok rimahc. Til nikꞌor chi reꞌ cꞌacharel reꞌreꞌ xa reꞌ woꞌ reꞌ rijotꞌ ri̱b ru̱cꞌ chucuj kꞌoric riban. Maꞌ xa reꞌ ta reꞌ riban cꞌacharel reꞌreꞌ, jeꞌ laꞌ woꞌ maꞌ cꞌahchiꞌ ta ribanam jeꞌ ricab rikꞌor i coric laj tijbal. 9Jeꞌ reꞌ kꞌuruꞌ wi reꞌ hoj xojmahcanic kakꞌor woꞌ tak johtok reh i Dios chi reꞌ hoj, hoj aj mahc chiwach maj wi jeꞌ reꞌ nkaꞌn reꞌ Dios reꞌ til riban chi nmanlajic wach take rikꞌorom cho eh reꞌ xa coric woꞌ nbanic, reꞌreꞌ ericuy take cho kamahc eh chi jeꞌ reꞌ, riban chi reꞌ hoj kojcahnic chi maꞌxta cꞌahbilal pan ka̱mna.
10Jeꞌ aj reꞌ kꞌuruꞌ was tak nicha̱kꞌ aj niminel, nok xa hab wach jenoꞌ xmahcanic rikꞌor chi maꞌ xiban ta nechꞌ ok mahc, reꞌreꞌ xa cꞌahchiꞌ ricojom i Dios chi aj chucul kꞌoric eh nikꞌor chi jeꞌ reꞌ maj reꞌ woꞌ Dios nkꞌoric chi reꞌreꞌ wilic pan mahc. Jeꞌ woꞌ chic, reꞌ cꞌacharel reꞌreꞌ ruꞌum chi maꞌ rikꞌor ta johtok chi aj mahc chiwach i Dios ricꞌuhtaj lok chi maꞌ cꞌahchiꞌ ta ricꞌamam na̱ riCꞌuhbal i Dios.
Currently Selected:
1 JUAN 1: poh
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.