تیتوس 1

1اژ پولُس، خُلُم خدا ئو رسول عیسی مسیح، گه مَیِّن بیمَ تا ایمو کسَلی گه خدا دیاری کِردِن تقویت کَم ئو حخیختی گه مِطابق دینداریَ، بوشِم. 2ایی حخیختَ مِطابق امید اَر ژییاین ابدیَ، گه خدای گه هرگِس دِرو نِموشی، وِر اژ بِنیا زمونَه‌ل وَدَه اَوَه داءَ بینمو، 3ئو اِ وخد دُریس، اَ وَدَه اِ کلومی گه اِلوم کِردِنی وَه فِربو نجاددهندَه‌مو خدا سپارتیاءَ مِه، آشگارا بی.

4وَه تیتوس، گه مِطابق ایمونی گه کُل اَژی بیَر دیریمونی کُر حَخمَ:

فیض‌وسِلامتی اژ جونِم خداءِ باوَه ئو نجاددهندَه‌مو مسیح عیسی اَر تو بو.

صفتَل یِه شیخ

5اَژونَبیَ تونِم اِ کْرِت هُیشتِ جا تاگَه کارَل ناتموم، راسِ‌ریس بِهِین ئو هَرهُنَ گه فِربونِم داین‌ئون، اِ هر شیَری شیخَلی مَیِّن کِین.

6شیخ کلیسا باس چیئی اِنوم زِنِه‌ی ناوتی گه وَه‌سونگَ اَوا لارَ بوتی اَری ئو میردَه یِه ژَن بو ئو آیلَل باایمونی داشدوئیتی گه اژ هر جور بُختِم خیزی ئو توری دویر بوئن. 7اَرِیَگه اُسقُفی گه پیشکار خداءَ باس چیئی اِنوم زِنِه‌ی ناوتی گه وَه‌سونگَ اَوا لارَ بوتی اَری. او نَباس قُرات یا پِرچَ‌شرهاتی یا عِرَخی یا تُن‌تیوَت بو یا هَر هَلگ اَرِه پیل بِ، 8بلکِم هُن‌هاوو ئو دوسدار خوئی بو ئو نوا ووژ بِگِری ئو آم دُریس ئو مقدّس ئو مِنظمی بو. 9او باس سفدِسخد بچسبی‌ اَر کلوم لائق اِتِمادی گه گِرتیَسیا، تاگَه بتونی مِطابق تیَلیم دُریس تربیت کِ، ئو هَمیش خِض بِهِه اَر کسَلی گه اَرضد یَئنَ.

10اَرِیَگه فِرَه کسَل هَن گه تور، چِنَه‌مِفت ئو رِنگَرِن، مصخوصاً اونَلی گه اژ دسَه طرفدارَل ختینَه‌ن‌. 11اونَل باس دَمو بوئنی، اَرِیَگه وَه خاطر فادَه ناحخ، چیئَلی تیَلیمَ میَن گه نَباس تیَلیم دَن، ئو هُنَ خانوادَه‌ل بِن‌کُل نابودَ مَهَن. 12یَکی اژ پِخَمَرَل ووژو وِتیَسی: «کْرِتیَل هَر آمَل دِروزِن ئو جونورَل وَشی ئو لَم‌پِرَسَل تَمَلی کِن.» 13ایی شاتیَ راسَ. اِسَه سخد خِض بِهَه اَرینو تا اِ ایمو دُریس بوئن، 14ئو گوش نَگِرِنَ پاچائَل یهود ئو حکمَل کسَلی گه اژ حخیخت دویرا بینَ. 15اَرِه آمَل پاک، کُل چی پاکَ، مِنتائای اَرِه اونَلی گه نِجس ئو بی‌ایمونِن، هُیچی پاک نیَ، بلکِم هم فگِرَلو نِجسَ هم وِژدانو. 16اونَل ادعا مَهَن گه خداءَ مَشتاسِن، مِنتائای وَه کارَلو حاشا مَهَنی. تویک‌تیَل ئو کورفِربونِن ئو اَرِه هر کار خوئی بیلاوِن.

Currently Selected:

تیتوس 1: LBT

Highlight

Copy