2 Kor 3
3
UPawuli uyaziveza ebandleni
1Sesiqala futhi ukuziveza na? Kumbe siyadinga yini njengabanye incwadi zokusiveza eziza kini loba ezivela kini na? 2Lina ngokwenu liyincwadi yethu elotshwe enhliziyweni zethu, eyaziwa ifundwe ngabantu bonke. 3Lina libonakalisa ukuthi liyincwadi evela kuKristu ivezwa yikusebenza kwethu, engalotshwanga ngeyinki, kodwa elotshwe ngoMoya kaNkulunkulu ophilayo, engalotshwanga ematsheni kodwa elotshwe enhliziyweni zabantu.#Eks 24:12; Jer 31:33; Hez 11:19; 36:26 4Linjalo ithemba esilalo ngoKristu kuNkulunkulu, 5kungesikho ukuthi silamandla thina ngokwethu okucabanga ukuthi ulutho luvela kithi, kodwa amandla ethu avela kuNkulunkulu; 6ngoba nguye futhi osinike amandla okuba yizikhonzi zesivumelwano esitsha, okungesiso sokulotshiweyo kodwa esikaMoya; ngoba okulotshiweyo kuyabulala, kodwa uMoya uyaphilisa.#Jer 31:31
Inkazimulo yevangeli iyayidlula eyomlayo omdala
7Uba umlayo owawulotshwe ematsheni waletha ukufa, kodwa wafika ulenkazimulo engaka, kwaze kwathi abakoIsrayeli bahluleka ukukhangela ubuso bukaMose ngenxa yokukhazimula kobuso bakhe, lanxa kwakuzakuphela.#Eks 34:29 8Phoke, umlayo kaMoya kawuyikuba lenkazimulo enkulu kulayo na? 9Ngoba uba umlayo wokulahlwa ubulenkazimulo, umlayo wokulunga umele ukudlula ngenkazimulo enkulu. 10Yebo, lokho okwake kwaba yinkazimulo, kakuseyiyo ngenxa yalinkazimulo eyidlulayo. 11Uba lokho ebekuzakudlula kwafika kulenkazimulo, lokho okumiyo njalo kumele ukuba kube lenkazimulo enkulu kakhulu. 12Ngakhoke, lokhu silethemba elinje, sikhuluma ngesibindi; 13kasinjengoMose owambomboza ubuso bakhe, ukuze abakoIsrayeli bangayijolozeli inkazimulo ephelayo.#Eks 34:33 14Kodwa ingqondo yabo yaba lukhuni. Ngoba kuze kube lamuhla, nxa kufundwa isivumelwano esidala, lesosimbombozo sisahlezi singambulwanga, ngoba sisuswa kuKristu kuphela. 15Yebo, kuze kube lamuhla, nxa kufundwa umlayo kaMose, isimbombozo sambese ingqondo yabo. 16Kodwa nxa umuntu ephendukela eNkosini, isimbombozo siyasuswa. 17LeyoNkosi inguMoya; lalapho akhona uMoya weNkosi, kukhona inkululeko. 18Thina sonke esilobuso obambuliweyo, sibona inkazimulo yeNkosi ngokungathi kusesibukweni. Siyaphendulwa sifane layo; siyakhula enkazimulweni, ngoba le ivela eNkosini enguye uMoya.
Currently Selected:
2 Kor 3: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
