1 Kor 15
15
Ukuvuka kwabafileyo
1Bazalwane, ngithanda ukulikhumbuza ngevangeli engalitshumayeza lona, lelalamukelayo lelimi kulo, 2lelisiliswa ngalo uba libambelela kulo, uba kambe lingakholwanga ize. 3Okokuqala ngalinika lokho engakwamukelayo okukuthi uKristu wafela izono zethu njengokwemibhalo,#Isa 53:5–12 4lokuthi wambelwa, lokuthi wavuswa kwabafileyo ngosuku lwesithathu njengokwemibhalo,#Hubo 16:8–10; Mat 12:40; Seb 2:24–32 5lokuthi wabonakala kuKefasi, wasebonwa ngabalitshumi lambili.#Mat 28:16, 17; Mark 16:14; Luka 24:34, 36; Joha 20:19 6Ngemva kwalokho wabonakala ngesikhathi sinye kubazalwane abedlula amakhulu amahlanu, ubunengi babo basekhona lalamhla, lanxa abanye sebafa. 7Wabuya wabonakala kuJakobe, wasebonakala lakubaphostoli bonke. 8Ekucineni kwabo bonke wabonakala kimi enginjengozelwe kungakabi yisikhathi.#Seb 9:3–6 9Ngoba ngingomncinyane kubaphostoli, engingafanele ukuthiwa ngumphostoli, ngoba ngazingela ibandla likaNkulunkulu.#Seb 8:3 10Kodwa ngomusa kaNkulunkulu ngiyikho lokho engiyikho khona, umusa wakhe kimi kawubanga yize; isibili, ngisebenze kakhulu kulabo bonke; kanti kasimi engasebenzayo, kodwa ngumusa kaNkulunkulu okimi. 11Ngakhoke loba kuyimi loba kuyibo, sitshumayela ngokunjalo, lakholwa ngokunjalo.
12Uba uKristu etshunyayelwa ukuthi uvusiwe kwabafileyo, batsho kanjani abanye phakathi kwenu ukuthi kakukho ukuvuka kwabafileyo na? 13Uba kungekho ukuvuka kwabafileyo, kavuswanga laye uKristu. 14Uba uKristu engavuswanga kwabafileyo, ukutshumayela kwethu kuyize, lokukholwa kwenu kuyize. 15Lathi sifunyanwa singofakazi bamanga ngoNkulunkulu, ngoba safakaza ukuthi uNkulunkulu wamvusa uKristu; kodwa yena engamvusanga, uba kanti abafileyo bengavuswa. 16Ngoba uba abafileyo bengavuswa, kavuswanga laye uKristu. 17Uba uKristu engavuswanga, ukukholwa kwenu kuyize, lisesezonweni zenu. 18Lalabo asebafa bekuKristu sebaphela. 19Uba singabathembela kuKristu kulokhukusila kuphela, singabokukhalelwa kulabantu bonke.
20Kodwake uKristu wavuswa isibili kwabafileyo, waba yingqabutho yabafileyo. 21Ngoba lokhu ukufa kweza ngomuntu, ukuvuka kwabafileyo lakho kweza ngomuntu. 22Njengalokhu kuAdamu bonke bayafa, ngokunjalo futhi kuKristu bonke bazakuvuswa baphile. 23Kodwa yilowo lalowo ngesigaba sakhe, uKristu kuqala, besekusiba ngabakaKristu ekufikeni kwakhe, 24andubana kufike ukuphela, lapho esenikela umbuso kuNkulunkulu uYise, lalapho esechithile konke ukubusa, lobukhosi, lamandla. 25Ngoba umele ukubusa, aze abeke izitha zakhe ngaphansi kwenyawo zakhe.#Hubo 110:1 26Isitha sokucina esizakuchithwa siyikufa. 27Ngoba izinto zonke uNkulunkulu uzibekile ngaphansi kwenyawo zakhe. Kodwa nxa kuthiwa izinto zonke zibekiwe ngaphansi kwakhe, kusobala ukuthi ungaphandle kwazo yena ozibekileyo izinto zonke ngaphansi kwakhe.#Hubo 8:6 28Nxa izinto zonke sezibekiwe ngaphansi kwakhe, laphoke layo iNdodana izakuzibeka ngaphansi kwalowo owabeka izinto zonke ngaphansi kwayo, ukuze uNkulunkulu abe yikho konke kukho konke.
29Pho, bazakwenza njani ababhaphathizelwa abafileyo na? Uba abafileyo bengavuki isibili, babhaphathizelwani ngenxa yabo na? 30Futhi sizifakelani thina engozini izibanga zonke na? 31Bazalwane, ngiyaqinisa ngokuziqhenya kwami ngani engilakho ngoKristu Jesu iNkosi yethu ukuthi ngiyafa insuku zonke. 32Uba ngalwa lezilo eEfesu, njengokutsho kwesaga sabantu, ngazuzani na? Uba abafileyo bengavuki, asidle sinathe, ngoba kusasa sizakufa.#Isa 22:13 33Lingakhohliswa; ukujwayelana lababi kuyonakalisa ukuziphatha okuhle. 34Phaphamani ngokufaneleyo, lingoni futhi; ngoba abanye kabamazi uNkulunkulu; ngitsho lokhu ukuba libe lenhloni.
35Kodwa omunye uzakuthi: Abafileyo bavuswa kanjani, bazakuba lemizimba enjani? 36Wena siphukuphukundini! Lokho okuhlanyelayo wena kakuphili uba kungafi. 37Futhi lokho okuhlanyelayo kawuhlanyeli umzimba ozakuba khona, kodwa uhlanyela uhlamvu oluze, loba olwebele, ingabe olokunye nje. 38Kodwa uNkulunkulu ulunika umzimba njengokuthanda kwakhe, ileyo laleyo inhlanyelo owayo umzimba. 39Inyama yonke kayisiyo yohlobo lunye, kodwa ikhona enye engeyabantu, enye engeyezinyamazana, enye eyenyoni, lenye eyenhlanzi. 40Ikhona lemizimba yasezulwini lemizimba yasemhlabeni; kodwa inkazimulo yeyasezulwini iyodwa, lenkazimulo yeyasemhlabeni iyodwa. 41Iyodwa inkazimulo yelanga, lenkazimulo yenyanga iyodwa, leyezinkanyezi iyodwa; enye inkanyezi yahlukile kwenye inkanyezi ngokukhazimula.
42Kunjaloke ngokuvuka kwabafileyo. Okuhlanyelwayo kulokubola, kuyavuswa kungelakubola; 43kuhlanyelwa kulokudelwa, kuvuswe kulenkazimulo; kuhlanyelwa kulobuthakathaka, kuvuswe kulamandla; 44kuhlanyelwa kungumzimba wemvelo, kuvuswe kungumzimba womoya. Uba ukhona umzimba wemvelo, kukhona lowomoya. 45Ngakho kulotshiwe ukuthi: Umuntu wokuqala uAdamu waba ngumuntu ophilayo; uAdamu wokucina waba ngumoya ophilisayo.#Gen 2:7 46Kodwa okokuqala kakusikho okomoya kodwa kungokwemvelo; besekusiza okomoya. 47Umuntu wokuqala wavela emhlabeni, ungowomhlabathi; umuntu wesibili wavela ezulwini. 48Njengoba enjalo owayengowomhlabathi, banjalo labo abangabomhlabathi; lanjengoba enjalo ongowasezulwini, banjalo labo abangabasezulwini. 49Futhi njengoba silesimo somuntu ongowomhlabathi, sizakuba lesimo somuntu wasezulwini. 50Ngithi, bazalwane, inyama legazi kakulakudla ilifa lombuso kaNkulunkulu; lokubola kakulidli ilifa lokungaboli.
51Khangelani, ngilitshela imfihlakalo. Kasiyikufa sonke, kodwa sizakuphendulwa sonke#1 Tes 4:15–17 52ngesikhatshana, ngokuqwayiza kwelihlo, ekukhaleni kophondo lokucina; ngoba uphondo luzakukhala, abafileyo bazakuvuswa bengelakubola, thina sizakuphendulwa. 53Ngoba lokhu okubolayo kumele ukwambatha okungaboliyo, lalokho okufayo kumele ukwambatha okungafiyo. 54Nxa lokho okubolayo sekwambethe okungaboliyo, lalokho okufayo sekwambethe okungafiyo, kuzagcwaliseka okulotshiweyo kokuthi:
Ukufa kuginyiwe ekunqobeni.#Isa 25:8
55Kufa, kungaphi ukunqoba kwakho na?
Kufa, lungaphi udonsi lwakho na?#Hos 13:14
56Udonsi lokufa yisono; lamandla esono ngumlayo. 57Kodwa kabongwe uNkulunkulu osinika ukunqoba ngeNkosi yethu uJesu Kristu. 58Ngakhoke, bazalwane abathandekayo, manini, lingasikinyeki, likhuthale kakhulu emsebenzini weNkosi, lazi ukuthi ukusebenza kwenu kakusilo ize eNkosini.
Currently Selected:
1 Kor 15: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
