ba imbi Ñammi Filip Budoyahu jamaŋo m'ankarankunehne letaro inno no Pol añaañurne ñanfiyunku Yensa m'angune Filip
Budoyahu jamaŋo m'ankarankunehne letaro inno no Pol añaañurne ñanfiyunku Yensa m'angune Filip
Letaro inno úbuuñuraaŋo m'aretuhne Pol añaañne. Agida f'añaañne letaro inno, úmár Pol n'akimbenaa a kasoŋo a gubaarhu n'aŋane bupaasunku Kúmbuuñaamo Kúnsuuminno. Angu, wúur pájiireŋ a kasoŋ nooraŋ gañaañne letaro inno. Apirenpiren aguy a kasoŋ no bukoku Rom gañaañne letaro.
Úpájuleŋ, a buñaañhu letaro inno, Pol galóbohne k'angu ufiyunku Yensa m'aretuhne Timonte añaañah balókunom.
A letaro inno Pol, índinenkinem ñanfiyunku Yensa mi bukooro b’aretuhne Filip gañaañurne. Agida, a waathintor no maŋ inini, bukoku Filip a didiiraŋo d'ayéjuhne Gures gatohne. Angu, jamaŋo m'anjahne letaro inno, immereŋ guyroŋoŋ Ñanyahud. Ñammi bukooro b'ayéjuhne Rom, ingi ñansooninkeŋo índukoŋo anrumunrumun a bukoku Filip.
Angu, horaŋ akanne ki Pol añaañureeniŋ letaro inno?
Holabayeŋ akanne ki Pol añaañureeniŋ letaro inno. Aji úfegi añaañureeniŋ letaro inno, fam Pol adékdek ba a bukoku Filip k'akawandineeniŋ Kúmbuuñaamo Kúnsuuminno. F'akawandineeniŋne Kúmbuuñaamo Kúnsuuminno, ñanlabahi anfiyum Yensa. Angu, Pol asíibáásiib bubecindiku immereŋ ñanfiyunku Yensa immi Filip jamméej ingi sembe a hafitenkinin. Ingi faka, asíibáásiib ba buramunkánin a gubaarhu bakodiŋo b'ambúuñuremne ba bulahinkinem nintiku dohohu Díino n'aŋane bukaano. Ingi mees, asíibáásiib bubecindikinin jamméj ki nim anlah aliŋ bufiyunku Yensa. Ingi faka mees, haman jamaŋo anyeheneeniŋ, asíibáásiib búteekinkinin maro aññantay anlah aliŋ bufiyinku Yensa.
Angu, Pol bañaañi letaro inno mees, abúuñ Timonte ingi údiigeeno m'aretuhne Epafurodit ba a bukoku Filip k'andék annér ñanfiyunku Yensa m'angune bim.
Angu, letaro inno anafanafa, kanda guyroŋ karo jamanku Filip bareŋ ganafane. Wówo! Mintoroŋ nip ganafane. Anafanafa mintoroŋ nip mara alóbaalob na dáde a gubaarhu bupoko búdenno bu Díino apokunne mintor, ingi mees a gubaarhu ni Yensa apokunne mintor f'alóki biniiroŋo k'acaam júnubonkintor. A letaro inno Pol afak añaañaañ ni mintor ñanfiyunku Yensa iññantahoŋne índokoorumoŋ a duniyaŋo inno. Afak alób a gubaarhu básuumo ba ñanfiyunku Yensa ampirenne anyik a hafitenkinin. Agida, fo Pol añaañne letaro inno, úmár n'aguy a kasoŋo k'atúyoh da kitiŋo, karo ambénhinem karo ambujom. A letaro inno Pol alininlinin jamaŋo maro ufiyunku Yensa, haman a waathu baléero gagune, apirenpiren ayik básuum a hafithinem.
Highlight
Copy
Compare
Share
Want to have your highlights saved across all your devices? Sign up or sign in
Copyright Vision Intégrale, Senegal