ba imbi Ñammi Filip 3

Ninwonnoorunkintoroŋ ingi Díino a gubaarhu gufiyunku Yensa

1Angu inini, ninkinan índoonenenkum ingi indimaanankum imbi Yensa, añantay asúumoonuŋ ni Umuyhintor agune ingi ninkinan. Ingah! Uñantay uguyoŋ jamaŋ mi hafitenkinin agillen a gúbidhu ho Umuyhintor akandoonuŋne, ingi mees a gubaarhu ni Umuyhintor amíirne, hómár mees añantay asúumoonuŋ. Me ípápájul mara iŋoolinkinŋoolinkin balókum fanfaŋ a letaro inno. Aji úfegi n'iŋoolinkinne balókum, ípápájul mara guŋoolinkino gúmár gadékehne bukooñhánan a binaahu Díino. Angu, gúmár akanne iŋoolinkini balókum a letaro inno.

2Ninkinan! Káánánteŋ! Ingah! Índiigeen m'anlápur imme bim buŋoosunku Gúloku Díino. Immereŋ, ii, gankawandakawand ammincineh anyéjeh jamaŋo: «Moŋon moŋon sunniraane, fi, Díino dapahuno a kunyoho ku bandór!» Nim ganyéjehne, te hómár marigen gireŋ. Ninkinan mungu, káánunteŋ, daha andék anjodoonuŋ! 3Fégeŋ baŋ, eke mintor, ímpájuloŋpájul angu mara ayikyik gusunnaŋo g'apútohne baman a hafithu wúuro? Angu, gusunnaŋo gúmár agune gúsunna dakat gu Díino asíibane. Angu, gusunnaŋo gúmár gílobumohne yikayereŋeŋ honj ingi gusunnhu arino. Gusunnaŋo dakat gúmár, a sabaabhu Jamméejhu Díino Jarenninno gaguyuntne. Te a gubaarhu gusunnaŋo gúmár upiren útuy Díino ni ámár Díino asíibane. Kanda gusunnahu arino mungu, dapiren alahin wúur a nintiku bújooninku bajégenenkinem ingi Díino. Hómár dapiren akaan ki wúur atúy Díino ni ámár Díino amiihulne. Ingah! Ninkinan, Díino gapahunapahun uraagofoŋo a kunyoho ku bandóro a gubaarhu ho Yensa akanne a dinlihano. Mintor, eke hómár ginfiyumoŋne? Mintor, ímpájuloŋpájul angu mara uraagofo dapiren k'apah a kunyoku Díino a gubaarhu h'akaanaane a arinkinem. Mintoroŋ angu, n'infiyumoŋne Yensa, impirenoŋ ínyejoonuŋ na insunnaahoŋsunnaa gusunnaŋo g'apútne a hafitenkintor.#3.3 Upiren uning mees letaro no Pol añaañurne jamanku Rom. 2:28,29.

4-6Kanda, aji Díino gapahunapahuner wúuro a gubaarhu bukanku hadeemayhu mint Ñanyahudo, wola ni uraagofoŋo asunnahaane, na mungu, me ipiren íyej ipahpah. Angu na, me ipirenpiren iñaagárayer ifaŋ índukoŋo. Ipiren ifak íyej gunaam adédet! Ipahpah faŋo! Ningeŋ baŋ! Ingah! D'ebosaane, d'eyikne lóokum, dam gisunnahaane, iniman ni luwahu Musa amiihulne. Afúrumi na, me údin Israyel, siyo no Díino acaabenne. Te, nunkum ingi bááhum mees, a siyo nómár ganfúruntne. Faka immereŋ, ii, anfúruntifurunt a bádim báde, a bádinku Bensamin ganfúruntne.#3.4-6 M'anfúruntne a muhenku Bensamin gayikeyik búuña dáde imbi Ñanyahudo a waato nómár. Ingah! Me ummu Israyel#3.4-6 Agida, na Pol añaaññaañ ayéj, «Me Úheburo.» Kanda upiren ugaasahin hómár ingi 'buhebhu wúuro.' Ñanheburo ingi Ñanyahudo ingi jamanku Israyel maŋ siyo amánduko. Gúmár akanne m'aññaañne Gúloku Díino ingi guñaamolo aññaañi na «ummu Israyel.» Hómár afaŋumne n'asúum buwuto. dakat. Angu, úfegeŋ, me ipirenpiren iñaagára faka a gubaarhu h'eyikne imbi ñanraagofoŋo. Me faka itoheritoher a dayrahu ñanfarasiyaŋo. Na íbuuñabuuña Luwaŋaŋo nip. Me ísiibáásiib dáde bukanku ho Díino amiihulne nip, angu fam giyeheneyehener jamanku dayrahu Yensa k'ilah karo nim Díino asíibane k'ikaanah. Yikireŋ Uyahud m'apirenkinehne anéereem kayúulen, mara immereŋ nip anyéjhineh maro Luwaŋo nip no Díino amiihulne, ikankaan! Angu, ninkinan, ningeŋ baŋ, aji ubabahini hómáráŋ nip k'úyej Díino gapahunumapahunum a gubaarhu hómáráŋ, jamaŋo angumb anyéjer me ipahpah a kunyoho ku bandór. Kanda guyroŋ hómár deh! Díino gara apahunumah a gubaarhu hadeemayhu Ñanyahudo ingi gusunnaŋo. K'egune inini, ŋayri gufiyum faŋo hómár sah.

7Ingah! Fam ilahlaher mara h'ekaanaherne anafaheemnafayer dáde, mara a gubaarhu maŋ hómárer Díino apahunkunumne a kunyoho ku bandór. Kanda k'egune inini, afeereem maro ho Umaasaŋo Mu Díino Acaabenne akanne a dinlihano, homár ba bareŋ apirenne apahunam a kunyoho ku bandór.

8Fégeŋ baŋ, k'egune inini, me símpájulayo s'ípájulayminne ingi Yensa, Umaasaŋo mu Díino Acaabenne, m'amuyeemne, hómár afaŋunumeemne n'anafa honjoŋo nip. A gubaarhu símpájulayo símár ingi úmár, h'anafaheemerne fam, hómár nip idoodooh ijogun k'icucun a japoño. Hómár nip gicucunne ki nim ipiren iguy ingi Umaasahintor mu Díino Acaabenne k'ípájálám. 9Fégeŋ baŋ, k'egune inini, me buguyo ingi Umaasaŋo mu Díino Acaabenne gísiibane waatowaat. Agida me ípápájul a waato inno mara Díino lahurum mara me úwuuhi n'íbuuñahne Luwaŋankánam. Nim gireŋ deh! Alahemlah wúur m'awuuh a gubaarhu gufiyumo g'efiyumne Umaasaŋo mu Díino Acaabenne. A gubaarhu hómár bareŋ galaheemne wúur úwuuhi. Ingah! Moŋon moŋon ufiyumne Umaasaŋo mu Díino Acaabenne, fi, Díino alahenlah wúur m'awuuh. Angu, waato inno ípápájul hómár. 10Fégeŋ baŋ, me simpájulayo ingi Umaasaŋo mu Díino Acaabenne gísiibane. Ingi mees, me ísiibáásiib k'iyik sembehinem a duniyahum. Agida sembeŋo nómár afuhfuuh dáde! Angu, nómár akanne ki Yensa akeng dam a biniirohánom.#3.10 Sembeŋo nómár agune sembeŋo no Umaasaŋo mu Díino Acaabenne anékinehne ufiyinkinem k'apiren abénn bukanku hójondoŋo k'ankokay ingi úmár Yensa a duniya awunkul. Te duniyahánam awunkulo nómár damíir ingi duniyahánam no famo. Ninger Letaro no Pol añaañurne jamanku Rom. 6:4 Me, ílokiloki k'iyoh maŋ ni Umaasaŋo mu Díino Acaabenne ayoherne, ki nim ipiren iguymiŋ ingi úmár a kunyoho únkonduko. Ingah! Sinkokayo ingi úmár Yensa a kunyoho gísiibane baman da biniirohum apútokunehne. Nim gísiibane. Fégeŋ baŋ, Yensa, d'ambujemne alókoloki. Asabarisabari. Me mees nim gísiibane bukaano. 11Ingah! Neŋen neŋen gaguyoorunkunehne, haani iniiro, Díino akengunkunum a biniiroŋo bímár maŋ ni adékehne bukengunku índukoŋo m'anfiyumne Yensa. Nim gíjikine.

Íngiroŋ butifilinku Yensa baman d'eniirohunoŋne

12Ingah! Me ísiibáásiib butifilinku sídiku Umaasaŋo mu Díino Acaabenne ki nim hakaanankum amíir ingi hakaanankánam. Angu, aji ikaani nim, iguyhuneh wúur m'apút iniman úmár Umaasaŋo mu Díino Acaabenne agune wúur m'apút. Kanda me nanka k'egune, fanti bíput. Haman maŋ nim, me mo bim hágiro baman maŋ na. Agida Yensa, Umaasaŋo mu Díino Acaabenne asíibáásiib k'ídek baman maŋ na, k'ipiren k'iguy wúur m'apút. Kanda me, fanti biyik galoŋo nómár. Me mo na hágiro baman maŋ na.

13-14Me mo na hágiro deh! Ninkinan indimaanankum ingi índoonenenkum imbi Yensa, me mungu ípápájul mara fanti biyik galoŋo nómár. Hómár ingine, fanti bímiirmiŋ ingi Umaasaŋo mu Díino Acaabenne ingi hakaanankum nip. Angu, gúmár akanne iŋay hágiro k'itifihem a mángákánám ki nim ipiren iyik galoŋo nómár. Angu, a kunwonno unku k’ewonnáne wó, haani mángákum diningila deh! Ho déegen idabundabun k'ining a jannokum bareŋ. Angu, me mo na gumajaŋo dáde k'ímiirmiŋ ingi Yensa a hakaanankánam. Nim gikankánehne f'édek íput arjanna. Agida a gubaarhu Yensa, Umaasaŋo mu Díino Acaabenne, Díino ahuyeemne ba bim. Te bim Díino adékehne búnekum galoŋo nómár. 15Angu, inini mintoroŋ m'immiñoŋne butifilinku binaahu Díino, h'éfuruntne balóbo nip, hómár giññantahoŋne inlahoŋ a jamméejenkintor. Inini, m'angune a binanan mi kawosenenkinin amburayne ingi kanaam, ikaanumi na Díino ajellihinkunoonuŋ n'uñantaheŋne uwoseneŋ. 16Kanda mintor nip, inlahoŋ aliŋ h'enliinahoŋne ki nim índokoŋ a jannoho. Dahi iŋŋoolinoŋ mángáár a bukanku hójondoŋo h'enkankoŋne fam.

17Ninkinan nip, indimaanankum ingi índoonenenkum imbi Yensa, kuku uningeŋ a hakaanankum k'utifilinemuŋ. Gúfegeŋ mees índukoŋo m'ankaanahne h'ejellihinoonuŋne a binaahu Díino, immereŋ mees ku k'utifilineeniŋ a hádikinin. 18Fégeŋ baŋ, ípápájul mara ayikyik ñanlabahi m'anyéjeh ingi Yensa gangune. Nim ganyéjehne, kanda jamaŋo immereŋ mungu, aji úfegi hakaanankánin, úpájihineh mara anfoyfoy kúmbuuñaamo a nintiku ho úmár Umaasaŋo mu Díino Acaabenne akanne a dinlihano.#3.18 Fégeŋ baŋ, a dinlihano Yensa acaamcaam júnubonkintor. Kanda immereŋ imme n'anroŋoh bukanku hójondoŋo. Na ganfoyne ho Yensa akanne a dinlihano Fégeŋ baŋ, immereŋ gara ankaanah ho Díino amiihulne. Ípápájul mara ninkinan halabay gitengahoonuŋne hómár ho jamaŋo meŋen ankaanahne. Kanda túyoreŋ k'ibocin ifak itengahoonuŋ. Ingah! Me mo bim n'iwosendikeeniŋ f'ekuul 19mara immereŋ ba a kantíku kunyoho gandékehne. Ingah! Gankaanakaan h'asúumne agofonkinin ba bareŋ. H’arohunoorne dáde, hómár mees gankaanakaan k'aññaagáramah hómár. Básunku agofonkinin gakokukeeniŋkokur a honjoronku duniyaŋo inno ba bareŋ.

20-21Kanda mintor mungu, ímbennoŋbenn hómáráŋ nip mara tohuroŋoŋ angu ingi duniyaŋo inno. Bukokintor, búmár agune arjanna. Mintor, bútuyo ingi haamo giŋŋayoŋne Upahunkintor m'afúrumokunehne bim. Ninkinan! Ingah! Arinenkintor yikireŋ sembe. Apuñapuña mees. Kanda da Umuyhintor Yensa, Umaasaŋo mu Díino Acaabenne aŋoolinekinehne, dam, akúbihineh arinenkintor ki arin noŋon noŋon amíir ingi anaanam. Hómár ingine, arinenkintor ajónkáneh dáde, te dapurahar. Ayikhineh kanjébo ka bandór. Te Umaasaŋo mu Díino Acaabenne, a gubaarhu sembehinem nómár gakaanunkunehne hómár. Agida, a sabaabhu sembehinem, úmár apiren akaan ki honjoroŋo ho Díino ayabne nip ambúuñaham.

Currently Selected:

ba imbi Ñammi Filip 3: GD

Highlight

Copy

Compare