ba imbi Ñammi Filip 2

Ka Pol akiinane jamaŋo k'ampokunay anyennehinay.

1Ingah! Mintor, k'enguyoŋne inini, amburayburay dáde ingi k'enguyoŋerne fam, maro inini mintor immemiye ingi Umaasaŋo mu Díino Acaabenne. Inini eke n'inguyoŋne ingi Umaasaŋo mu Díino Acaabenne, hómár honj h'asúum dáde? Inini, ginlentálahoŋ hómár, eke hómár gabocindebocind mintor sembe a hafitenkintor? Te faka Umaasaŋo mu Díino Acaabenne ayikyik bupok b'apokun mintor. Angu, aji inlentahoonuŋ bupoko búmár b'apokunne mintor, bupoko búmár gajodjodinejodjodin mintor a baléero k'ataahul h'abemane mintor. Ingi faka mees, a gubaarhu Jamméejhu Díino Jarenninno j'agune a binentor ginyennehinayoŋyennehinay dáde. Ingi faka mees, eke biriman f'enfiyumoŋne Yensa ginyikhoŋyik bankabaŋo dáde k'inlahinayhoŋ? Angu inho nip, aji úfegi aguy a binentor, a sabaabhu Umaasaŋo mu Díino Acaabenne gaguyuntne. 2Angu, ninkinan jamanku Filip, a gubaarhu inho nip h'oyikeŋne a sabaabhu Yensa, ayikyik nuko h'ésiibane gukiinahánan. Aji ukaaneŋ h'édekehne gukiinahánan, asúumhunum dáde. H'ésiibane gukiinahánan, hómár agune, upokunayeŋ maŋ ni Yensa apokunoonuŋne. Ikiinahoonuŋ mees, k'uyennehinayeŋ fanfaŋ, ukaanaŋ gúlokunan kantíg inkanduk.

3Ninkinan, ifak ikiinahoonuŋ moŋon moŋon, hoŋon hoŋon guŋane bukaano, dahi aguy bukaan k'útib ki gurethen ayéega k'úbenn na údinhen. Wówo! Moŋon moŋon uñantay utiirilinoora k'uyoofun údinhen. 4Jandiŋ butopotor bigokon, utopotor údinhen fanta! Nim gísiibane k'ukaanaŋ.

5Fégeŋ baŋ, mintor m'inguyoŋne ingi Umaasaŋo mu Díino Acaabenne, jikohintor añantay amíir ingi jikohu Yensa.

Ni ufiyunku Yensa añantane atiirilinoora, maŋ ni Yensa atiirilinorane

6Angu, jikohu Yensa neeraŋ gamíirne? Horaŋ anohulinne Umaasaŋo mu Díino Acaabenne a jikohánom k'adék akaan h'akanne?

Ingah! Ho Díino nip inho na imbi Yensa mara úmár atohtoh imbi Díino. Angu, ayikyik jikohánom ingi bahathánam. Kanda, úmár, ii, haman ineeŋ, dooroŋ hómár akaan a bigokunom. 7Awuraŋwuraŋ gusolhunom gu bamaasayaŋo k'adooh bumburunku arinenkintor ki nim amíir ingi mintor ñanraagofoŋo. Mukuroŋ na deh! Úmár atiirilinooratiirilinoora k'aguy údool. 8Mukuroŋ na faka deh! Úmár ii, fuuhurinooraraŋ haman hotir. Abúuñabuuña Díino f'adék aniiro. Ingah! Úmár, ii alókiloki biniiro b'arohunorne. A dinlihano ganiirone iniman urifa. 9Angu, gúmár akanne, Díino bafégi n'abúuñahemne k'atiirilinoora, aŋoyindem búuñahánam k'ayoofunom baman a kantígo k'afaŋunumne n'ayik buuñaŋo. 10Nim Díino akanne ki nim biyabenku Díino nip, ganyennehini gurethu Yensa, anruŋa k'ambúuñaham. H'agune arjanna ingi h'agune imbi a duniya ingi h'agune a bukenum nip adékidirdek ambúuñahánam. 11Ingah! Hómáráŋ ho Díino ayabne nip adékidirdek anramunkuneh Umaasaŋo Mu Díino Acaabenne k'anruŋaram k'anyéj: «Yensa Umaasaŋo Mu Díino Acaabenne agune Umuyhintor!» Angu, a gubaarhu hómár jamaŋo anfékineh bafuku Díino Báábám, k’angu anfuuhurin ámár Díino Amánduko.

Ni ufiyunku Yensa añantane ayaaŋárin bumurulo b'agune a duniyaŋo

12Ninkinan, índinenkum m'ipokunne dáde; Túyomuŋ baŋ k'ílob a gubaarhu gúbuuñaŋo g'iññantahoŋne ímbuuñahoŋ Díino. Ingah! Ífefeg mara f'eguyerne ingi ninkinan, gíyejoonuŋ «Inini Díino asíibane k'inkaanoŋ,» gukankankaŋ maŋ nim. Kanda inini, n'iŋŋantinayoŋne, ísiibáásiib k'ufaŋunumaŋ úbuuñahaŋ Díino dáde. Ingah! Ninkinan, Díino apahunoonuŋpahun. Inini n'apahunoonuŋne, uñantaheŋ úbuuñahamaŋ ingi búuña n'apút a hafitenkinan. Moŋon moŋon uñantay ubenuh gufuusihu gúloku Díino. 13Ingah! Ninkinan, Díino inno na a hafititenkinan. Ingah! Maŋ ámár Díino faŋo ganéerumehne buhaamiŋo k'upiren ukaan h'asúumhunehne ámár Díino. Te faka, Díino anékuno mees bahathánam k'upiren ukaan ajóon h'asúumhunomne.

14Iyoo. Ninkinan! Inini gísiibane k'ukaanaŋ. Hogurumaareŋ guŋayeŋne bukaano a duniya, buku uhunhunineŋ, buku úbááhayeŋ. 15-16Angu, aji úbenneŋ hómáráŋ, wúur danéeroonuŋ kayúulen. Urennhineŋ fet. Ninkinan, jaraku Díino, jamaŋo m'uŋayeŋne bukawando jamaŋ m'anlápur ingi m'anhalaki mees. Anfak anguy a burumurul. Kanda, a gubaarhu n'uŋayeŋne búteekinkinin kúmbuuñaamo k'ajébinimehne, ninkinan imme bim buyaaŋárinku bumurulo. Inini, moŋon moŋon uyaaŋárinne jamaŋo m'angune a bumurulo a gúbidhu Díino, fi ureejihineh a duniyaŋo inno iniman bahúuro b'afútne a raafo. Angu, n'uŋayeŋne buyaaŋárinku bumurulo, da Yensa aŋoolinekinehne, dam ungu me iyikhineh básuum b'ayik sembe a hafithum a gubaarhu ninkinan ñammi Filip. Ipiren íyej angu dohoŋo n'edohone nip a binanan ayikyik nafa. 17Agida, ninkinan, gufiyumo g'ufiyumeŋne Díino ingi dohoŋo n'odohoheŋne nip, akankaan ininkaman sada. Me mungu, aji ambujeem, akankáneh iniman me bigokum leeya imbi Díino n'ankokayhinehne ingi sadahánan, te leeyaŋo nómár aguyhuneh honj h'asúumhunehne Díino. Ingah! Ibendurbendur duniyahum nip Díino, maŋ ni ninkinan ubendureŋne mees duniyahánan Díino. Angu, haani n'amparerne ba bubujhum, hafithum fam gafaŋunumne kireŋ n'agillen dáde a gubaarhu ninkinan, jamanku Filip. 18Agida mintoroŋ nip fo inseewohoŋ a gubaarhu n'imbenduroŋne duniyahintor nip Díino.

Ka Pol abúuñne Timonte ingi Epafurodit ba a bukoku Filip

19Inini, ásibaŋo innoŋ íbuuñokuneh Timonte ba a binanan ki nim ípájuldir n'uguyeŋne bim a básuum, me fankum inik iyikhineh básuum a hafithum. Nim gísiibane bukaano, aji asúumi Umuyhintor Yensa.

20Aji úfegeŋ íbuuñuri Timonte, mara maŋ ni me ipokunoonuŋne, maŋ nim mees úmár apokunoonuŋne. Faka mees, búlokiŋo b'alókine ba butopotokánan, fégiri imbi índukoŋo. 21Fégeŋ baŋ, índukoŋo mingu imme bim butopotoku haajankánin deh! Ŋayraŋaŋ butopotoku dohohu Yensa, Umaasaŋo mu Díino Acaabenne. Kanda Timonte ummo na butopotoku h'ayikne nafa imbi Yensa. Angu, gúmár akanne íbuuñurem ba a binanan. 22Agida, Timonte mungu, úmár ajellihinne jamaŋo mara abábár bufiyum. Ninkinan mees, hómár úpájuleŋpájul arenn fet. Gadóolodool ingi me ba búteekinku jamaŋo Kúmbuuñaamo Kúnsuuminno iniman ni wolo adóolohunehne ingi báábám. Agida dohoŋo nómár agune a jamméejhu Timonte. 23Gúmár akanne, Timonte gísiibane búbuuño ba a binanan. Me mungu, fanti bípájul n'andékehne ba bukankum, kanda aji ípájuli, íbuuñokuneh Timonte.#2.23 Agida a waato nómár Pol pájiireŋ karo ambenhinem a sinkimbeno s'ankimbenemne, karo ba bubujhunom gandékehne. 24Kanda akankaan iniman Umuyhintor asíibáásiib ki me faŋo ídekoora k'ínfegayoonuŋ. Agida nim faŋo gísiibane.

25Angu inini, ba balóbo a gubaarhu údiigeeno m'úbuuñanteŋne ba a binaam, údiigeeno m'aretuhne Epafurodit.#2.25 Agida ñanfiyunku Yensa m'angune Filip ambúuñbuuñer Epafurodit ingi bakodiŋo ba imbi Pol. Kanda akankaan ininkaman anyéjemyej mees anooh bim Rom k'alahin Pol a dohohunom. Kanda Epafurodit bapúti imbi Pol jébireŋer dáde. Hotir k'aniiro. Úmár údonkum ufiyunku Yensa. Eke úbuuñuremeŋbuuñ ba a binaam k'adék anéereem bakodiŋo b'okelaheŋne ingi k'afak akááñinahineem a nintiku haajankum? Angu nim gakanne. Kanda mukuroŋ na. Epafurodit alahineemlahin mees a gubaarhu kunjunku Kúmbuuñaamo Kúnsuuminno. Angu inini, waathánam no guŋoolino abábár. 26-27Úpájuleŋ, úmár ahaamihaami ba búfekinan. Kanda úmár jébireŋer. Hotir afallane k'afahaa a halakum. Kanda hómár nip, Díino ayikyik bankabaŋ a binaanam k'ajébinem. Upiren úyej, me mees, Díino ayikyik bankabaŋ a binaam, mara aji afahaaherifahaa a halakum, agumb aléerunkumer fanfaŋ. Angu, gúmár gíyejoonuŋne, Díino a hómár nip, ayikyik bankabaŋo fanfaŋ n'anéerne Epafurodit kanjébo. Angu, Epafurodit mungu, f'ayennehinne mara ninkinan uyennehineŋyennehin banérhinem, aléerumem dáde. Agida ni síibaaraŋ k'ukoriheŋ a gubaarhu úmár. 28Angu me, gúmár gihekane k'aŋooliner ba a binanan. Nim ungu, úfegemeŋdir, uyikeŋ baaruŋ bagillen a hafitenkinan. Me mungu, iyennehindir maro apútput básuum a binanan, bulaahum awaanaháneh. 29-30Angu, aji Epafurodit apútri, ukucunomoŋ hóbun iniman ni ñandóolhu Umuyhintor añantane ankucunaa. Ímbuuñahunomoŋ mara ninkinan nip pirendoŋ k'údekireŋ úduk ukaanaŋ dohoŋo no úmár akanne. Úpájuleŋ, f'apúturne a binaam, úmár akankaan dohohu Umaasaŋo mu Díino Acaabenne, agida a bukaano nim ñankindenkinem a gukoobhu gujankari gaguyerne. Gúmár gíyejoonuŋne, gapútri úbuuñahamaŋ hóbun, k'ukucunomoŋ hóbun, úmár ingi ñandóolhu Umaasaŋo mu Díino Acaabenne índukoŋo m'ammajane dáde iniman Epafurodit. Immereŋ nip uñantaheŋ úbuuñaheeniŋ dáde k'ukucuneeniŋ hóbun.

Currently Selected:

ba imbi Ñammi Filip 2: GD

Highlight

Copy

Compare