ba imbi Ñammi Filip 1

Ka Pol ingi Timonte aŋŋane buramhu ingi guduwaku jamanku Filip m'anfiyumne Yensa

1Básuumo! Me Pol ingi Timonte, ñandóolhu Yensa Umaasaŋo Mu Díino Acaabenne, mint imme bim n’iramuruhoonuŋ dáde. Ninkinan m'uguyeŋne a bukooro b'aretuhne Filip, mint imme bim n’iramuruhoonuŋ. Mint imme bim n'uramururaahaŋ dáde, ninkinan nip m'uguyeŋne jamanku Díino te, aji úfegeŋ iretoonuŋ jamanku Díino, a gubaarhu n'uguyeŋne ingi Yensa, Umaasaŋo mu Díino Acaabenne. Gúmár akanne iretoonuŋ nim. Angu, me Pol ingi Timonte, mint imme bim n'iramuramiŋ mees ñanlaameku dayrahánan no Filip ingi ñandóolhu dayraŋo mees. Ninkinan nip, mint imme bim n’iramuruhoonuŋ dáde.

2Angu, Me Pol, me mo bim n’ikiinah Díino Bááhintor ingi Umuyhintor Yensa, Umaasaŋo mu Díino Acaabenne, k’ambonkeroonuŋ, ingi faka mees, k’ankucundutoonuŋ básuumo a hafitenkinan.

Ka Pol aŋane buramunku Díino a gubaarhu jamanku Filip m'anfiyumne Yensa

3Ingah! Ninkinan ñanfiyunku Yensa mi Filip, gilentálahoonuŋ, iramun Díino. 4Ingah! Waatowaat me mo bim n'iduwatuhoonuŋ fanfaŋ. Angu, giŋay guduwakánan, giyikeyik básuum a hafithum. 5Te, aji úfegeŋ n'iyikehne básuum a gubaarhu ninkinan, mara ninkinan imme bim gumajaŋo bukanku dohoŋo amánduko ingi me. Dohoŋo nómár agune búteekinku jamaŋo Kúmbuuñaamo Kúnsuuminno. Ninkinan, biriman d'ofiyumeŋne Yensa, ninkinan imme bim búteekinku jamaŋo kúmbuuñaamo kúmár. Ufak úkááñinemuŋkááñin a nintiku haajankum. Angu, gúmár akanne iyik básuum a hafithum gilentálahoonuŋ. 6Angu, afeereemfeer mara Díino, doho ajóoni#1.6 Horaŋ ingine dohoŋo ajóoninno no Díino atoŋne bukaano imbi ñanfiyunku Yensa mi Filip? Úpájuleŋ, fo immereŋ ankubulne jamméejenkinin imbi Díino, antoŋ bubénnhu hójondoŋo h'ankaanaherne. Kanda uraagofoŋo kasáraŋ búfeku hójondoŋo nip h'akaanahne. Fo Díino ajellihino k'úbenn. Marigen, uraagofoŋo afékineh waas mara añantay abénn hódugo wola basango. Kanda nínwosenoorunkintor mees gúduk jóndoŋ, te na fo Díino akimbir ígihintor k'impirenoŋ ínfegoŋ hómár. Ingi mees, ufiyunku Yensa aliinaháneh hotir hotir a gubaarhu hójooninno ho Díino asíibane k'akaan. Hómár nip atohtoh a dohoŋo ajóoninno no Díino atoŋne bukaano imbi jamankánam. gatoŋne bukaano a binanan. Afak aféereem mara dohoŋo ajóoninno nómár no Díino akirne bukaano a binanan, dabénn bukaano. Ingah! Adék abocinkineh dohoŋo nómár fo adék adétilin da Yensa Umaasaŋo mu Díino Acaabenne aŋoolinekinehne.

7Ninkinan, me ininkoonuŋnink a hafithum. Angu, gúmár akanne, maŋ ni íyejne faliiho, gilentálahoonuŋ iyik básuum. Fégeŋ baŋ, ninkinan nip utoheŋtoh a badooŋo básuuminno ba Díino adohulineemne. Badooŋo bámár agune búteekinku jamaŋo Kúmbuuñaamo Kúnsuuminno. Agida me iñantay íkeekir jamaŋo Kúmbuuñaamo Kúnsuuminno fo ayaaŋumeeniŋ, mara hómár atohtoh a badooŋo básuuminno ba Díino adohulineemne. Me mo bim mees n'iwonn aliŋ tiw bujellihinku jamaŋo mara Kúmbuuñaamo Kúnsuuminno ingine marigenku Díino. Angu, badooŋo imba, bámár agune badokum básuuminno. Angu me, haman nanka k'annebeemne k'ankimbeneem, ninkinan mingu utoheŋtoh a dohoŋo nómár. 8Angu nanka, k'egune inini, ihaamihaami ba búfekánan fanfaŋ. N'ihaamine búfekinan faŋo, Díino bareŋ apájulne haamo nómár n'amurne. Ninkinan! Ingah! Ipokunoonuŋpokun fanfaŋ iniman ni Yensa, Umaasahintor mu Díino Acaabenne apokunoonuŋne.

9Angu me, giŋay gukiinahu Díino, gikiinahamkiina ki bupoko b'upokuneŋne jamaŋo, Díin akaan bupoko b'upokunayeŋne afaŋunum n'away. Díin akaan bupoko búmár abocina baman dagurumaareŋ. Gikiinakiina Díino k'upireneŋ ulahaŋ babariŋo a nunom. Gikiinahamkiina mees k'ufaŋunumaŋ n'úpájuláŋ Díino. Maro, aji úpájuleŋ Díino, úpájhineŋ n'uñantaheŋne údekoorumoŋ a duniyaŋo inno. 10Ingi mees, me mo bim gukinakánan Díino ki k'úpájuleŋ h'ayikne nafa ingi ho yikereŋne nafa a duniyaŋo inno. Ingah! Aji úpájuleŋ h'ayikne nafa, níndokoorunkánan arennhineh fet, baman a hafitenkinan. Angu, aji maŋ nim, da Umaasaŋo mu Díino Acaabenne aŋoolinekinehne, duyikeŋ kayúulen. 11Dam uguyhunoŋ ñanraagof m'anwúuh m'ankanne hójooninno jup a duniyaŋo inno. Agida hómáráŋ nip upireneŋ ukaanaŋ a sabaabhu sembehu Yensa, Umaasahintor mu Díino Acaabenne. Angu jamaŋo, ganfégi níndekorunkánan n'ajónne a duniyaŋo, anramunkuneh Díino, k'anfak anfuuhurin gurethinem a duniyaŋo. Angu, me ummo bim gukiinakánan Díino hómáráŋ nip.

Ni Kúmbuuñaamo Kúnsuuminno apasoorumne

12Inini, ninkinan índoonenenkum ingi indimaanankum imbi Yensa, ísiibáásiib k'úpájuláŋ h'ayikne a gubaarhu n'ankimbeneemne nanka a kasoŋo. Ingah! A gubaarhu hóleerinno inho h'ayikeemne, Kúmbuuñaamo Kúnsuuminno apaspas angu imbi jamaŋo jup. 13Ingah! Gusiirhu ñammi básedeŋo m'ammarahumne k'anfak ammarah díku umaasaŋo, immereŋ nip ampápájul angu mara h'ankimbeneemne, hómár agune n'iŋayne bupaasunku gurethu Umaasahintor mu Díino Acaabenne. Jamaŋo índukoŋo mees, immereŋ nip ampápájul hómár arenn. 14Angu, faka, a gubaarhu sinkimbeno s'ankimbeneemne, índoonenenkintor ingi indimaanankintor imbi Yensa, immereŋ mingu, anfaŋunum n'anfiyum Umuyhintor. Angu, a waato inno, immereŋ, anaman nip, anfaŋunum n'ambollen bupaasunku Gúloku Díino. Angu, inini, immereŋ mingu déwundeŋeŋ honj.

15-17Ingah! Marigen, jamaŋo imme na bupaasunku kúmbuuñaamo ku Umaasahintor mu Díino Acaabenne. Kanda, n'iyennehinne, imbi immereŋ, índukoŋo, mingu, imme na sinnohundinayo búteekinku jamaŋo gu Yensa. Kandaŋaŋ ingi hafit h'arenn. Kanda immereŋ, h'ekanne a nintiku búteekinku jamaŋo a gubaarhu Yensa, apaareeniŋpaar. Ansíibáásiib k'anyik jamaŋo anfaŋándam, ki nim abemaham. Nim sinkimbeno s'ankimbeneemne afaŋunum n'aléer. Nim gantibehne bukaano. Kanda ayikyik jamaŋ índukoŋ m'aŋŋay bupaasunku gu Umaasahintor mu Díino Acaabenne ingi hafit h'arenn. Immereŋ, ii, aji úfegeŋ n'ampasunne Kúmbuuñaamo, bupoko b'ampokunne Díino ingi bupoko b'ampokunne índinenkinin ñanraagofoŋo. Gúmár akanne ampaasuni Kúmbuuñaamo Kúnsuuminno. Immereŋ mees ampápájul hóbun h'ekanne. Ampápájul mara iwonnwonn aliŋ bupaasunku Kúmbuuñaamo Kúnsuuminno, ifak ijellihin jamaŋo mara kúmbuuñaamo kúmár marigenku Díino. Angu gúmár akanne ñammi Rom anlaheem k'ankimbeneem a kasoŋo.

18Angu, úfegeŋ, índukoŋo imme bim n'antéekineh jamaŋo Kúmbuuñaamo Kúnsuuminno ingi hafit h'arenni. Kanda, índukoŋo mingu, imme bim n'antéekineh jamaŋo ingi hafit ha rennireŋ. Kanda neŋen neŋen gagune, jamaŋo anyennehinkineh gu Umaasahintor mu Díino Acaabenne. Angu, a gubaarhu hómáráŋ nip giyikumne básuum. Te, hómár asúumhunum baman dagurumaareŋ. 19Ninkinan! Ingah! Afeereemfeer maro inho h'ayikeemne nip adék ajónkáneh a binaam. Bísiba Díino apahunkunum.#1.19 Nanka wúur pájiireŋ arenn ho Pol asíibane balóbo. Angu, apirenpiren aguy awosenwosen mara m'ankimbenemne andék anfékineh mara úmár yúulendeŋ. Angu, a waato nómár andék ambénnhinem. Afak apirenpiren aguy mees Pol ayéjyej hoŋon hoŋon ho jamaŋo ankaanemne, aniiro wola ajébi, jamaŋo m'anfoyemne pirendeŋeŋ honj a binaanam. Nim gilahne maro ninkinan imme bim guduwakum. Ingi mees Jamméejhu Yensa, Umaasahintor mu Díino Acaabenne injanjiye bulahinkum ki nim ipiren ífur básuum.

20Ingah! Me Pol síibaari bukanku honj h'ejiigunkunehne gucum tápár. Ihaamihaami dáde ki jamaŋo nip anfég, a sabaabhu me, bafuku Umaasahintor mu Díino Acaabenne. Nim gísiibane ingi sembehum na nip, te ísiibaháneh hómár baman dagurumaareŋ. Haani iguy a duniya, haani iniiro mees, ísiibáásiib ki jamaŋo nip anfég bafuku Umaasahintor mu Díino Acaabenne. 21Me duniyahum nip, imbi Umaasahintor mu Díino Acaabenne gininkne jamméejhum. Buyoofunku gurethinem gítibehne. Aji iniirohi, arjanna akohumeem duniyaŋo inno. 22Kanda aji íjebi, k'inooh a duniyaŋo inno, ipiren isunkurin buyoofunku gurethu Umaasaŋo mu Díino Acaabenne. Hómár mees ísiibáásiib. Angu, me pájiiri h'afaŋunumne n'ajóon! 23Me Pol ilahlah habídeŋo hanakaŋo nip. Ihaamihaami k'ífur a duniyaŋo k' ídek iguyer ingi Umaasahintor mu Díino Acaabenne. Ninkinan! Me hómár akohumeemne fuf buguyo a duniyaŋo inno. 24Kanda, a binanan, íjeb k'íkááñinoonuŋ a binaahu Umuyhintor, hómár akohumoonuŋne. 25Ooh! Hómár afeereemfeer. Angu, gumár akanne afeereem maro dambujoom. Ingah! Ninkinan! Afeereemfeer maro íjebhineh ki nim ipiren ídeker ibecindoonuŋ jamméej a gubaarhu Yensa. Nim upireneŋ uyikeŋ sembe a binaahánam. Angu, aji ídekeri k'ikawandinoonuŋ, ninkinan ufaŋununkánaŋ n'uyikeŋ básuum a hafitenkinan a gubaarhu úmár, Yensa. 26Ingah! Aji ambéneem a gukimbeno g'ankimbeneemne k'ídeker ba a binanan, ikaanumi ninkinan uyikhineŋ básuum báde a hafitenkinan. Ingah! Aji íputri a binanan, úfekineŋ mara Umaasahintor mu Díino Acaabenne akimbireemne binaalo, te na uramunkunamaŋ dáde.

Kunjumo a gubaarhu Kúmbuuñaamo Kúnsuuminno

27Ninkinan, neŋen neŋen gagune, ikiinahoonuŋ ki ukaanaŋ a níndokoorunkánan moŋon moŋon maŋ ni antéekinoonuŋne f'oyennehineŋne Kúmbuuñaamo Kúnsuuminno guliih. Aji ukaaneŋ nim, karo ipiren ídeker, karo dídeker, neŋen neŋen angu gagune, íyennehinkineh imbi jamaŋo maro ninkinan imme bim n'ulahaŋ aliŋ Kúmbuuñanku Umaasaŋo mu Díino Acaabenne. Te faka, aji ulaheŋ kúmbuunaamo aliŋ, íyennehinkineh mees mara ninkinan imme bim n'uyennehinayeŋ ingi n’ulahayeŋne aliŋ tew. Ingi mees, iyennehinkineh mara ukaaneŋkaan gúlokánan kantíg ínkánduk. Ifak iyennehinkineh maro ninkinan imme bim kunjumo ki nim Kúmbuuñaamo Kúnsuuminno apiren apas imbi jamaŋo. Nim gídekehne buyennehino a gubaarhu ninkinan aji ulaheŋ kúmbuunaamo aliŋ. 28Iyennehinkineh faka mara ninkinan benihuroŋ m'anhacoonuŋne. Ninkinan! Ingah! Dahu ubeniheŋ muk m'anhacoonuŋne. Bollenteeniŋ! Úpájuleŋ, aji anfégi n'ubolleneeniŋne, hómár akankáneh tamaseer k'ampájul mara dampiren k'anfáŋunamoonuŋ. Ingah! Immereŋ, ii, aji anfégi n'ubolleneeniŋne, hómár aguyhuneh tamaseer a binanin mara Díino fankánam apahunkunoonuŋ, kanda immereŋ mungu dapahuneeniŋ. Díino ankoomunkuneeniŋ. Gúmár akanne íyejoonuŋ m'anhacoonuŋne, buku úbenuheeniŋ muk. 29Ingah! Mintor, aji úfegeŋ n'infiyumoŋne Umaasaŋo mu Díino Acaabenne, a sabaabhu kabonkerhu Díino. Kanda ingah! Díino, kabonkerhinem mukuroŋ na! Díino afak akibkib mintor gukibo gu kunyoho a gubaarhu Umaasaŋo M'Acaabenne. Gúmár akanne inyohoŋ ineeŋ. Te kunyoho kúmár duwa ajóoni.#1.29 A gubaarhu kunyoho kúmár ímpájihunoŋ Díino ingi bankabankánam. 30Ingah! Ninkinan, kunjumo k'oŋayeŋne ingi m'anfoyne kúmbuuñankintor, kunjumo kúmár únkonduko ingi kunaam a waato n'eguyerne a bukokánan Filip. Agida úfegeŋfeg hómár. Te baman bísibaŋo bi gub me mo bim kunjumo a gubaarhu kunwonno k'ewonnáne a nintiku Yensa.

Currently Selected:

ba imbi Ñammi Filip 1: GD

Highlight

Copy

Compare