Luk 24
24
Fo Yensa akengne a biniirohánom
1Angu, afúrumi na, fo bísibaŋo bi guyohálaŋo awusunane, dimanso, indikaamo immereŋ m'ansorne busuturahu Yensa, ankengintin táptápáro. Bankengi andék andék andoohor kárámánjo n'amparerne arjumo, k'andék ba butopotoku búgáku Yensa. 2Angu, andék f'andék ampút a búyindo. Bampúti a búyindo, anlahun dawaalo dádenno d'anrokumerne burukumbaano n'apádulaane aninkaa beŋen.#24.2 Agida immereŋ Ñanyahudo gandoohodooh dawaal dadehinem k'anrok buruhu búyindo. Matiya añaaññaañ a Injilhinem mara banroki búyindhu Yensa mees, ñammi básedeŋo andooh honj k'amparparin adorla bakaranku dawaalo ki nim wúur dapiren k'afúnn dawaalo k'aŋan na afúnn búgáku Yensa. Faka Pilat abúuñbuuñ ñammi básedeŋo k'ankoñ búyindo biki wúur amapun. 3Angu, immereŋ aŋŋan. Baŋŋanaane a gufaco angu, lahundaŋaŋ na búgáku Umuyhintor Yensa. 4Angu, immereŋ anwonn maŋ na a gufaco k'angu anningeh, ammiihorah anyéjeh, «Kaaraŋ búgááro aguyhunehne?» Angu, f'anwonnáne na, índiigeen inak anfúror m'ankaana bayaah b'areñeh. 5Angu immereŋ, f'anfégne índiigeeno m'ankaanahne bayaaho b'areñehne, anjuhula, angu aŋŋoya. Angu na índiigeeno anyéjeeniŋne:
- Ninkinan! Horaŋ gútibeheŋne imbi inini? Ingah! Wúuro m'útibeheŋne ajébjeb! Jadaŋ k'útibeŋ wúuro m'ajébne imbi a búyindo k'anninkuhne agááráŋo!
6Ambocin anyéjeeniŋ:
- Ninkinan! Yensa guyroŋ nanka deh! Díino akengunemkengun a biniirohánom ingi bumburunku arinkinem nip.
Anyéjeeniŋ:
- Ninkinan! Ku k'ulentálahaŋ ho Yensa atéekinoonuŋne a didiirahu Galile! 7Eke ayéjyej andokuneh úmár, Údiigeeno M'acaabenaane, k'andékirem k'ambénnem a halaku ñanjóndoŋo?
Anyéjeeniŋ:
- Eke Yensa afak ayéj maro úmár, Údiigeeno M'acaabenaane, andak anfaaŋunahinkinem a dinlihano k'ambénnem na f'adék aniiro, ki bísibaŋo bilallinno akengunkunuh a biniirohánom? Eke nim Yensa asaarahoonuŋne fam a gubaarhu h'añantane ayikem, úmár Údiigeeno M'acaabenaane?
Nim índiigeeno m'ankaanane bayaaho b'areñehne anlentálinne indikaamo ho Yensa atéekineeniŋne fam.
8Angu indikaamo, banyennehini hómár, ankir anlentála ho Yensa alóbeeniŋerne fam.
9Afúrumi na, anfúror a búyindo k'andék f'andék anlahun ñambúuñuraaŋo Haalaŋo ingi Úmánduko ingi ñantaalibeŋo índukoŋo k'anjógne. Banlahunteeniŋ na, antifureeniŋ h'anfégne a búyindhu Yensa ingi h'anyennehinne na dam nip. 10Túyomuŋ baŋ k'íteekinoonuŋ harethu indikaamo m'anfúruntne dam a búyindhu Yensa k'andéker antífur Ñambúuñuraaŋo h'anfégne na : Mariyama mu Magdala ummo na, Johanna ummo na, Mariyama nunku Jak ummo na, indikaam índukoŋ imme na mees. Angu, immereŋ nip andékne imbi Ñambúuñuraaŋo ba búteekinkinin h'anfégne a búyindo. 11Angu, fo indikaamo antéekineeniŋne h'anfégne, angu ñambúuñuraaŋo, immereŋ dómároŋoŋ ho indikaamo anlóbne k'anyéjeh balókánin anaman taalintaal. Angu, anfant annooh maŋ na. 12[Kanda Piyer mungu, bayennehini ho indikaamo anlóbne, akeng maŋ fam k'agír ba a búyindo. Angu, f'apútne a burukumbanku búyindo, aŋoya k'ayoogárina. F'ayoogárinane, afég mara búgáku Yensa gireŋ na. Kasankeŋo k'angubinumemne bareŋ gafégne na. Angu, Piyer bafégi hómár abinem dáde k'angu aŋúñ.]#24.12 v12 H'agóbaane ñañiira a kayereŋo nip ka Gúloku Díino.
Fo Yensa afútne imbi ñantaalibeŋ índukoŋ a binaahu Emawus
13Angu afúrumi na, bugaanigo, ayikyik ñantaalibeŋ inak m'anfúrumor Jerusalem aŋŋay hadéko ba a saariŋo n'ayéjuhne Emawus. Agida gulahumo Jerusalem ba Emawus apútput kilometreŋ haala ingi anakaŋ. 14Angu, ñantaalibeŋo inako, f'aŋŋayne hadéko ba Emawus, angu andékeh anwoññoh gu Yensa ingi h'ayikemne ásibaŋo ámáráŋ. 15Angu, baŋŋay hadéko, Yensa fankánam afúror k'ankokay ingi immereŋ. 16Kanda immereŋ anfégemfeg f'arenn fet, kanda a waato nómár ígihinin pirendeŋ buyithinem. Pájiireŋeŋ mara ingi Yensa fankánam gankokayehne.
17Angu, Yensa ankokay ingi immereŋ k'andékeh. Bandékiidek, Yensa ayéjeeniŋ:
- Ninkinan, horaŋ guŋayeŋerne buwooño?
Fo Yensa amiiheeniŋne nim, angu immereŋ abineeniŋ tor. Angu, anwonn maŋ na anjígun, agírenkinin afoña a gubaarhu biniirohu Yensa. 18Agida, údiigeeno úduko gurethinem Káleyopas. Angu fo Yensa amiiheeniŋne a gubaarhu h'aŋŋane buwooño, Káleyopas ayéjem:
- Kanda m'angune Jerusalem nip ampápájul h'ayikne bim ásibaŋo inno! Karo fi ba bareŋ pájiirone baŋ?
19Ayéjeeniŋ:
- Angu horaŋ ayikne Jerusalem?
Anyéjem:
- Angu fi, karo yennehindo h'ayikne Yensa mu Nasaret? Úmár ii, anabiyo adé, imbi Díino ingi imbi jamaŋo mees. Háh! Kawandhánam ayikyik sembe deh! Faka mees, hoŋon hoŋon gaŋane bukaano, hómár mees gayikeyik sembehu Díino.
20Ambocin anyéjem:
- Kanda úmár ii, ñanlaameku alimaamankintor ingi ñanlaamekintor índukoŋo lókiridom. Angu adékiidek, immereŋ andak anlaham. F'anlahemne mees, andékirem imbi ñammi Rom m'ammarahne didiirahintor, k'ambénnem na a halakánin. Angu f'ambénnemne a halaku ñammi Rom, angu ñanlaamekintor annotoheeniŋ anrukoh ki k'anfaaŋunahinem a dinlihano. Angu, ñammi Rom nim gankaanemne. Anfaaŋunahinemfaaŋunahin a dinlihano k'ambénnem na f'adék aniiro. 21Agida, mint mingu ilahmiŋlaher maro údiigeeno úmár, Yensa, úmár agune Umaasaŋo mu Díino Acaabenne mu Díino ajíkirindne mintor, te úmár adékridek ba bupahunku mintor, jamanku Israyel. Nim gíjikiyerminne. Kanda ífegmiŋfeg angu mara Yensa dapiren k'aguy Umaasaŋo mu Díino Acaabenne. Ningeŋ baŋ, ambujembuj dandahan.
Ambocin anyéj Yensa:
22- Angu, hómár ayikne dandahan. Kanda gub, maŋ gub táptápuro, ayikyik indikaam índukoŋ m'andéker a binent. Agida immereŋ antohtoh ingi mint ñantaalibehu Yensa. Angu indikaamo immereŋ f'ampúturne, antéekin mint gúlob g'úpájul g'alaal mint fanfaŋ. Úpájuli, immereŋ andékdek a búyindhu Yensa táptápuro. 23Angu, n'antifurne mint, immereŋ f'ampútne a búyindo lahundaŋaŋ na búgáku Yensa. Búgákánám gireŋ na deh!
Índiigeeno ambocin anyéj Yensa:
- Angu, ni indikaamo antifurne mint ii, immereŋ fégireŋeŋ Yensa a búyindo; maleekaŋaŋ anakaŋ bareŋ ganfégne na. Angu, maleekaŋaŋo nómáráŋ anyéjeheeniŋ ammincin na mara Yensa ajébjeb a biniiroŋo angu. Nim indikaamo antífurne mint gub tápáro. Anyéjyej Yensa ajébjeb.
24Índiigeeno anfak ambocin anyéj Yensa:
- Angu, m'antohne ingi mint, fo indikaamo anlóbne nim, immereŋ andék ba buningo a búyindo ka búgáku Yensa aninkaane. Angu, f'andékne anlahun nip maŋ ni indikaamo antéekineeniŋne. Búgáku Yensa gireŋ na deh. Nim ganfégne.
25Angu, índiigeeno inako bantífuri Yensa hómár nip, Yensa akir ayéjeeniŋ:
- Háh, ninkinan! Ninkinan, bénnuroŋ na jamméejenkinan! Ninkinan kasároŋ buwuto deh! Horaŋ akanne k'ukerkereheŋ a gubaarhu ho anabiyoŋoŋo anlóbne a Hañaañeno? 26Eke aññaañaañ na mara Umaasaŋo mu Díino Acaabenne añantay ayoh ineeŋ? Nim gaññaañne a Hañaañeno. Anfak aññaañaañ na maro añantay ayoh jandiŋ banoohum a bunoohunkunom bu maasayaŋo.
27Angu, Yensa balóbi nim mees, atoŋ gukeekirikinin h'aññaañne a Hañaañeno a gubaarhu úmár, Umaasaŋo mu Díino Acaabenne. Dam kaŋan kaŋan a Hañaañeno k'anlóbne gunaanam, Yensa ajellihineeniŋjellihin. A kánkirunku Hañaañeno, a líibárenku Musa gatoŋuntne k'adék hotir hotir ajellihineeniŋ h'añaañaane a Hañaañeno gu úmár Yensa. Atéekineeniŋ ho Musa añaañne. Ajellihineeniŋ mees ho anabiyoŋoŋo adúkoŋo aññaañne a gubaarhu h'añantane ayikem, úmár, Umaasaŋo mu Díino Acaabenne. Nip gajellihineeniŋne k'akeekireeniŋ fo ayaaŋeeniŋ waw.
28Angu, nim Yensa akawandineh ñantaalibeŋo inako bim a binaalo b'aŋŋane hadéko ba Emawus. Angu, afúrumi na, immereŋ ilallo ankokay f'andék andas saariŋo nómár no ñantaalibeŋo andékumehne. Bandasi saariŋo, Yensa akaan ininkaman ba guwusunahu saariŋo nómár. 29Inini ñantaalibeŋo inako anyéjem:
- Wówo! Fi, bonkerer, dókulo k'úduk úduuf a binent. Bísibaŋo añuñun!
K'ammincin na annotuhom fo Yensa alóki k'anguy ingi immereŋ. Úpájuleŋ, ñantaalibeŋo immi inako, baman manini, yitireŋeŋ Yensa.
Angu, ankokay immereŋ ilallo baman a dígo k'aŋŋan a gufaco. 30Angu, f'annoone ba guyaahálahu dibugaanigo, Yensa adooh úmbuuro. F'adoohne úmbuuro, aramun Díino. Baramunaane Díino, Yensa adooh úmbuuro k'afac k'anéereeniŋ moŋon moŋon kokibhinem. 31Angu, f'afacne úmbuuro k'anéereeniŋ, akaan iniman ígihu índiigeeno inako ayaaŋ k'anyitem. Maŋ ni anyitemne, úmár aniimeeniŋ na met.
32Angu, fo Yensa aniimeeniŋne na, angu immereŋ ammiihayeh anyéjeh:
- Ingah! Me deh, fo Yensa aŋane búkeekirikintor h'aññaañne a Hañaañeno, isewosewo baman a hafithum! Hóge fi mees, usewosewo baman hafithen baŋ?
Úduko ayéjem:
- Oo! Ninkeekulorunku Yensa Hañaañeno asúumeemsuum fanfaŋ! Gúlobo gúmár aŋaneemŋan baman a hafithum k'ipiren iwut hóbun h'añaañaane a Hañaañeno! Hafithum ahar agillen yititit maŋ fam. Gúlokunom asúumeemsuum a hafithum fanfaŋ!
- Oo! Me mees maŋ nim ganik amíirne a binaam!
33Angu, f'anlóbne nim, immereŋ ankeng maŋ fam jaketo nómár k'aŋŋoolin ba Jerusalem. Bampúti Jerusalem, andék anlahun ñantaalibeŋo Haalaŋo ingi Úmánduko#24.33 Agida afúrumi da Yensa aniirone, ayik ñantaalibehu Yensa haalaŋo ingi úmonduk bareŋ. Úpájuleŋ, utaalibeŋo m'akanne haalaŋo ingi unakinno n'aniiro. Gurethinem Judas. Úmár ajuliyane bigoku Yensa. a gufaco, ingi índukoŋo mees m'anrahne na. 34Kanda ñantaalibeŋo m'anfúruntne Emawus, bampútri, m'anrahne na a gufaco annohum antéekineeniŋ, anyéjeeniŋ:
- Ingah! Ninkinan! Umuyhintor Yensa akengkeng a biniirohánom deh! Simon faŋo apiren aséediya hómár, mara úmár afégemfeg jaháraŋ ingi bumburunku arinkinem n'ajéb!
35Angu ñantaalibeŋo m'anfúruntne Emawus, f'anyennehinne hómár, antif nuko h'ayikeeniŋne a binaalo. Anyéjeeniŋ:
- Mint ii, hadéko giŋayerminne ba Emawus, úmár afúror a binent a binaalo, kanda mint yitiremmiŋ maro úmár agune Yensa. Angu, ídekmiŋ f'édek íputmiŋ a dígo, iŋaymiŋ guyaahálaŋo. F'eŋayminne guyaahálaŋo, úmár adooh úmbuuro k'afac k'akib mint. F'aŋane bukibhint, fam gikir iyitminne maro úmár ingine Yensa.
Nim ñantaalibeŋo m'anfúruntne Emawus antifurne ñambúuñuraaŋo Haalaŋo ingi Úmánduko ingi índukoŋo m'angune na.
Fo Yensa afútne fus imbi ñantaalibehinem Jerusalem
36Angu, fo ñantaalibeŋo m'anfúruntne Emawus aŋŋane balóbo, Yensa fankánam ahar afúror fus a jégenenkinin ayéjeeniŋ:
- Díin akaan uyikeŋ básuum a hafitenkinan!
37Kanda, fo Yensa afútne, immereŋ anjuhula k'anfak ambenuh dáde k'anyéj kari jífur afútne. 38Angu Yensa mungu, f'afégne n’anjuhulane, ayéjeeniŋ:
- Ninkinan, horaŋ gujuhulahaŋne? Horaŋ akanne k'umantekeŋ karo me íjebjeb? 39Ningeŋ baŋ halato h'agune a halakum ingi a hádikum. Maŋ me me faŋo Yensa! Inini, mapunamuŋ baŋ k'uninginkinemuŋ ! Ninkinan, jífuro gira ayikeh ahar, gira ayikeh jahun! Kanda me mungu, mapunmapinemuŋ baŋ!
40Yensa f'alóbne nim mees, atukul halaho k'ajellihineeniŋ bi dimperegeŋo annuhne halakánam ingi hádikinem mees. 41Angu anninginkin. F'anfégne asúumeeniŋ dáde, kanda dómuroŋoŋ mara úmár m'awonnáne na a jégenenkinin úmár ingine Yensa. Úpájuli, h'anfégne abineeniŋbin dáde k'angu anningeh, ammantereh. K'angu Yensa amiiheeniŋ ayéjeeniŋ:
- Hóge nanka yikuroŋ jafoola baŋ?
42Angu, annétem buneefhu fakat f'aginaa. 43Yensa ajah k'akáb a sígihinin.
44F'akábne mees ayéjeeniŋ:
- Ninkinan! Túyomuŋ baŋ k'ilentinoonuŋ a gubaarhu h'éloboonuŋne fam f'enkokayhoonuŋne: Eke íyejoonuŋyej mara h'aññaañne gu me a hañaañenku Musa ingi a inha anabiyoŋoŋo índukoŋo ingi a Jabuuro mees, hómáráŋ nip añantay ayik? Íteekinoonuŋteekin bandór mara jamaŋo anyehenkunum dáde. Ningeŋ baŋ! Maŋ hómár ayikne ásibaŋo innoŋ.
45Angu Yensa, f'alóbne nim mees, akeekireeniŋ arenn fet ki moŋon moŋon apiren awut hóbun h'aññaañne a Hañaañeno gu úmár Yensa. 46Afak ayéjeeniŋ:
- Úpájuleŋ, aññaañaañ a Hañaañeno maro Umaasaŋo Mu Díino Acaabenne, anyehenkinem f'adék aniiro. Aji aniiroy, ayikdir ásibaŋ alallaŋ, akengunkunuh a biniirohánom k'aŋoolin ajéb kaŋ. 47Anfak aññaañaañ a Hañaañeno maro jamanku siyeŋo nip aññantay antéekinaa maro aji ankúbuli jamméejenkinin imbi Díino, Díino akafarihineh jínubonkánin nip. Ingah! Jamanku didiira deŋen deŋen aññantane antéekinaa hómár f'adék apaasunaa beŋen beŋen a duniyaŋo. Kanda kantoŋunku gudantehu kúmbuuñaamo kúmár aguyhuneh maŋ nanka, Jerusalem. Afúrundir na, akir adék apaasunaa a duniyaŋo nip a tonkoŋo arenekeŋo. Eke nim gaññaañne a Hañaañeno?
48Inini, ninkinan nip uguyeŋne ñanséediyahum maro úfegeŋfeg jaháraŋ h'ayikeemne. Inini, fo údekeŋ imbi jamaŋo k'úseediyahamuŋ.
49Ayéjeeniŋ:
- Kanda, jantenemuŋ baŋ! Ingah! Me mungu ba guŋoolin ba arjanna gídekehne. Íputdir, ikucundutokunoonuŋ Jamméejhu Díino Jarenninno. Eke Bááhum, biriman fam ajíkirindoonuŋjikirind maro akucundutokunoonuŋ Jamméejhinem Jarenninno? Angu, maŋ nim gídekehne ba bukaano.
Ayéjeeniŋ:
- Kanda ninkinan mingu, ufant unoohoŋ maŋ nanka a bukooro umbu baman d'ekucundutokunoonuŋne Jamméejhu Díino. Ingah! Jámár anékunoonuŋ sembe dáde ba búteekinku jamaŋo gu me. Angu, gujaheŋ mees sembehu Jamméejhu Díino Jarenninno, ukur údekeŋ ba bukawandinku jamaŋo. Eke uyennehineŋyennehin?
Nim Yensa alóbne ñantaalibehinem dam.
Ka Yensa aŋoolinne ba arjanna
50Angu afúrumi na, Yensa ayéjeeniŋ:
- Kengereŋ k'índokoonuŋ!
K'ankeng na ankokay ki Yensa adékureeniŋ ba a kantíg k'ópájul k'atéeja saariŋo n'aretuhne Betani. Bampúti a kantígo kámár, Yensa aleem halakánam k'aduwareeniŋ. 51Angu, fo Yensa aleemne halakánam k'aŋay buduwakánin, Díino ayoofom k'aŋanam arjanna. Nim Yensa ambénnayne ingi immereŋ dam.
52Angu, fo Yensa adékne, ñantaalibeŋo anwonn na k'aŋŋay bufuuhurinkinem. Afúrumi na, aŋŋooliner ba Jerusalem ingi básuum báde a hafitenkinin.
53Angu afúrumi dam, gucum gucum andékeh ba a buteerehu Jaameŋo Adénno ba bufuuhurinku Díino. Nim gankaanahne a waato nómár.
Iyoo! Teyofil, nanka líibáro inno n'eñaañurenne a gu Yensa, amukne.
Currently Selected:
Luk 24: GD
Highlight
Copy
Compare
Share
Want to have your highlights saved across all your devices? Sign up or sign in
Copyright Vision Intégrale, Senegal
