እምባቆማ 1
1
እምባቆማ ማጋናነ ጎዳ ዛሩዋ
(1:1—2:4)
1ትምቢትያ ኦድያ እምባቆማዉ መና ጎዳይ ሳጻን እሜዳ ኪታይ ሀዋ።
እምባቆም ሱረ ፕርዳይ ዬዳዋ መና ጎዳዉ ማጋኔዳ
2እምባቆመ፥ “አቤት መና ጎዳዉ፥ ኔን ማዳናዳን ታን ጼስያ ዎደ፥ አዉደ ጋካናዉ ስሰናን እጻይ? ቃይ ታን ማካላዉ ነዉ ዋስያ ዎደ፥ አዉደ ጋካናዉ አሸናን እጻይ? 3ሀ ናቁዋነ ባይዙዋ ታና አያዉ በሳይ? ማካላነ ባሻ ጼላደ ኔን አያዉ ጮኡ ጋደ ዳንዳያይ? ዋታይነ ኦሻይ ቢታ ኡባን ዳሬዳ። 4ሄዋ ድራዉ፥ ህጊ ለፔዳ፤ ቱሙ ከስ ኤረና። ቃይ ናጋራንቻቱ ጽሎ አሳቱዋ ዶድ ኦይቄዳ ድራዉ፥ ፕርዳይ ጌላቴ” ያጌዳ።
መና ጎዳይ እምባቆማዉ እሜዳ ዛሩዋ
5ጾሳይ ዛሪደ፥ “ህንተ ዩሹዋን ደእያ ካዉተ ጼሊደ ማላለትተ! አያዉ ጎፐ፥ ህንተዉ ኦድንቶካ ህንተ አማነና ኦሱዋ ታን ህንተ ዎድያን ኦና ሀናይ።#ኪታ 13:41 6ታን ባብሎናዌቱዋ፥ ሄ መቀ ባይና ድርቢያ አሳቱዋ ደንይ። ኡንቱንቱ ባረንቱባ ግደና ቢታ ኦሊደ ኦይቃናዉ ቢታ ኡባን ዩዪኖ።#2 ካታ. 24:2 7ኡንቱንቱ ያሽስያዋንታነ ዳጋንያዋንታ። ኡንቱንቱ ፕርዳይነ ቦንቹ ኡንቱንቱፐ ከሴ። 8ኡንቱንቱ ፓራቱ ማሄቱዋፐካ አዳ ድርቢያነ ኦማርሳ ኦኮራቱዋፐካ አዳ ኢታ። ኡንቱንቱ ፓራ አሳቱ ፕሪጺደ፥ ሃኮ ሳፐ ዪኖ፤ ኡንቱንቱ አርጋንይ አየንቶ ኦይቃናዉ ፓልያዋዳን ፓሊኖ። 9ኡንቱንቱ ኦላንቻቱ ኡባይ ማካላባ ኦናዉ ባዞ ጫርኩዋዳን ጫርኪደ ዪኖ። አሳ ኦሞዲደ፥ ሻፍያዳን ሺሺኖ። 10ኡንቱንቱ ካተቱዋ ቦላ ቅሊጪኖ፤ ሞድያዋንታካ ሚቻ ከሲኖ፤ ቃይ ሹቻን ድረቴዳ ጌሳቱዋ ኡባን ኡንቱንቱ ሚጪኖ። ሄ ጌሶቱዋ ኦሞዳናዉ ኡንቱንቱ ላንቂያን ቢታ ኬሊኖ። 11ሄዋፐ ጉይያን፥ ኡንቱንቱ ጫርኩዋዳን አና። ሄ ናቂያዋንቶ ኡንቱንቱ ዎልቃይ ኡንቱንቱ ጾሳ” ያጌዳ።
እምባቆም ላኤንዋካ ጾሳዉ ማጋኔዳ
12አቤት መና ጎዳዉ፥ ታ ጾሳዉ፥ ታ ጌሻዉ፥ ኔን መናፐ ዶማደ ደእያ መና ጎዳ ግድኪ? ኔን ኑ ዛላ ግድያ ድራዉ፥ ኑን ሀይቆኮ። አቤት ጾሳዉ፥ ባብሎናዌቱዋ ኑ ቦላ ፕርዳ ፖላናዳን፥ ኔን ደንደ ዎልቃካ ኡንቱንቶ እማዳ። 13ነ አይፈቱ ዳሮ ጌሻ ግድያ ድራዉ፥ ኢታባ ጼላናዉ ዶስክኖ፤ ኢታባይ ኦሰትያ ዎደ በኣደ ጮኡ ጋናዉ ዳንዳያካ። ያትና፥ ሀ ጭምያዋንታ አያዉ ጮኡ ጋደ ጼላይ? ናጋራንቻቱ ባረፐ ጽልያ አሳቱዋ ምትያ ዎደ አያዉ ጮኡ ጋይ?
14ኔን አሳ አባ ሞለቱዋዳን፥ ካለያዌ ኡንቱንቶ ባይና ትራን ጎሸትያ መታቱዋዳን ኦዳ። 15ባብሎናዌቱ ጋድያ አሳ ኡባ ቃጲያን ቆሪደ ከሳና፤ ኡንቱንቱ ኡንቱንታ ባረንቱ ቀሪ ግትያን ኦይቃና፤ ቃይካ ኡንቱንቱ ኡንቱንታ ባረንቱ ዎጋ ግትያን ቡሪደ ሺሻና፤ ያቲደ ኡንቱንቱ ናሸታናነ ሀሹ ጋና። 16ሄዋ ድራዉ፥ ኡንቱንቱ ባረንቱ ቄራ ግትያዉ ያርሺኖ፤ ባረንቱ ዎጋ ግትያዉ እጻና ጩዋዪኖ። አያዉ ጎፐ፥ ኡንቱንቱ እሻሉዋን ደእያዌነ ማልኡዋ ምያዌ ሄ ግተቱዋ ዎልቃና። 17ያትና፥ ኡንቱንቱ ባረንቱ ግትያ ቆቆፊደ ካዉተቱዋ ኡባ ዎደ ቃረት ባይናን ዎደ ደአኔ?
Currently Selected:
እምባቆማ 1: DFBE
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
