ዛረዋ 17

1“መና ጎዳዉ፥ ህንተ ጾሳዉ፥ ትላ ቦላና ደኤና መህያ፥ ዎይ ህንተ ዶርሳ ያርሹዋ ኦደ ሺሾፕተ፤ ሄዌ አ ስንን ሸነይያባ።

2“መና ጎዳይ ህንተ ጾሳይ ህንተንቶ እምያ ካታማቱዋፐ ሀቃዋንካ አቱማዋ ግድና ማጫዋ ግድና አ ጫቁዋ ኮሊደ፥ መና ጎዳ ህንተ ጾሳ ስንን ኢታ ኦዳ አሳይ ህንተ ግዶን ቤቶፐ፥ 3ቃይ ታ አዛዙዋ መንደ፥ ሀራ ጾሳቶ ጎይኔዳ ኡራይ፥ አዋዉ፥ ዎይ አግናዉ፥ ዎይ ሳሉዋ ጾልንተቶ ጎይኔዳ ኡራይ ደኦፐ፥#ከሳ 22:20 4ሄዋ ማላባ ህንተ ስሶፐ፥ ሄ የዉዋ ምንሲደ ፓይድተ። ህንተ ቆርና፥ ሄዋ ማላ ቱናባይ እስራኤልያ ግዶን ኦሰቴዳዌ ቱማነ ጌሻ ግዶፐ፥ 5ሄ ኢታ ኦዳ ብታንያ ዎይ ምሽራቶ ህንተ ካታማፐ ጋጻ ከሲደ፥ ሹቻን ጫዲደ ዎተ። 6ሄ ዎያ አሳይ ሀይቃናዉ በስያዌ ላኡ ዎይ ሄዙ ማርካይ ማርካትና ግዶ፤ እት አሳ ማርካ ቃላን አይ አሳይነ ሀይቆፖ።#ፓይ. 35:30፤ ዛረ. 19:15፤ ማቶሳ 18:16፤ 2 ቆሮ. 13:1፤ 1 ጽሞ. 5:19፤ እብራ. 10:28 7አ ዎናዉ ማርካቱ ኮይሮ ሹቻን አ ጫድኖ፤ ኡንቱንታ ካሊደ አሳይ ኡባይ አ ጫዶ። ሄዋዳን ኦደ፥ ኢታ ህንተ ግዶፐ ድግተ።#1 ቆሮ. 5:13

8“ህንተ ህንተ ካታማቱዋን ፕርዳናዉ ሎይ ዴጽያ ሸምፑዋ ሞቱዋ ግድና፥ ሾቻ ማዱ ሞቱዋ፥ ዎይ ቃይ ታዉ በሰ ግያ አቆ ሞቱዋ ግድናካ ደንዶፐ፥ ሄ ዎደ ህንተ መና ጎዳይ ህንተ ጾሳይ ዶሬዳ ሳኣ አህተ። 9ሄዋን ሌዋቱዋፐ ቄሰ ግድያዋኮነ ሄ ዎድያን ዳና ግዲደ ፕርድያዋኮ ሺሽተ፤ ሄ የዉዋ ኡንቱንቱ ፕርዳና። 10መና ጎዳይ ዶሬዳ ሳኣን ኡንቱንቱ ፕርዴዳዋዳን ኦተ፤ ኡንቱንቱ ፕርዴዳዋፐ አሸናዳን ናገትተ። 11ኡንቱንቱ ህንተና ታማርሴዳ ህግያዳንነ ኡንቱንቱ ኦዴዳ ፕርዳዳን ኦተ፤ ኡንቱንቱ ፕርዴዳ ፕርዳፐ ኡሸቻነ ሀድርሳ አይነ ሸርእ ጎፕተ። 12ሄዋን መና ጎዳዉ፥ ህንተ ጾሳዉ፥ ኦያ ዳናዉ፥ ዎይ ቄስያዉ አዛዘተናን እጺደ፥ ኦቶረትያ አሳይ ደኦፐ፥ ሄ አሳይ ሀይቆ፤ ሄዋዳን ኦደ፥ ኢታ እስራኤልያ ግዶፐ ድግተ። 13ሄዋፐ ጉይያን ሄዋ ስሲደ፥ አሳይ ኡባይ ያያና፤ ላኤን ኦቶረተና።

ካትያ ጼልያ ዎጋቱዋ

14“መና ጎዳይ ህንተ ጾሳይ ህንተንቶ እምያ ቢታ ላቲደ፥ ያን ደኡዋ ዶምያ ዎደ፥ ህንተ ዩሹዋን ደእያ ካዉተቱዋዳን፥ ህንተካ፥ ‘አነ ኑንካ ኑ ቦላን ካትያ ካተዬቶ’ ያጊደ ቆፖፐ፥ 15ህንተ ካተያናዌ መና ጎዳይ ህንተ ጾሳይ ህንተንቶ ዶሬዳዋ ግድያዋ ኤርተ። ሄዌካ ህንተ አሳ ግዶፐ ዶረቴዳዋ ግዶፐ አትና፥ ሀራ ቢታ አሳ ህንተ ቦላ ካተዮፕተ። 16ሄ ካቲ ፓራ ዳሩዋ ሺሻናዉ በሰና፤ ቃይ አሳይካ ፓራ ጮራያናዉ ላኤን ግብጼ ስማናዳን ኦፖ። አያዉ ጎፐ፥ መና ጎዳይ፥ ‘ሄ ኦግያና ላኤን ሙለካ ስሞፕተ’ ያጌዳ።#1 ካታ. 10:28፤ 2 ኦዱዋ 1:16፤ 9:28 17አ ዎዛና ባለናዳን፥ ካቲ ጮራ ማጫ አሳ አኮፖ። ዎርቃካ ብራካ ዳሪ ሺሾፖ።#1 ካታ. 10:14-22፣ 27፤ 11:1-8፤ 2 ኦዱዋ 1:15፤ 9:27

18“እ ባረ ካዉተ አራታን ኡትያ ዎደ፥ ሌዊያ ዛረ ግድያ ቄሳቱ ናግያ ማጻፋፐ ሀ ህግያ ዱቂደ ባረዉ አኮ። 19እ ሀ ህግያ ቃላነ ዎጋ ናግያዋንነ ኡንቱንታ ኦያዋን መና ጎዳዉ፥ ባረ ጾሳዉ፥ ያይያዋ ታማራና ማላ፥ ሀ ማጻፋይ አናና ደኦ፤ እካ ሀ ማጻፋ ባረ ደኦ ላይን ኡባን ናባቦ። 20ያቶፐ፥ እ ባረ ዎዛናን፥ ‘ታን ታ ላገቱዋፐ አይ’ ጊደ ባረ እሻቱዋ ቦላ ኦቶረተና። እካ ጾሳ ህግያፐ ሀድርሳነ ኡሸቻ ጌና። እ ባረ ካዉተን አዱቂደ ደአና፤ አ ናናይካ እስራኤልያ ጋድያን ካትያ ግዳናዋ።

Currently Selected:

ዛረዋ 17: DFBE

Highlight

Copy

Compare