ዛረዋ 16

ፓስጋ ባላ

(ከሳ 12:1-20)

1“አቢባ አግናን መና ጎዳ ህንተ ጾሳ ፓስጋ ባላ ቦንችተ፤ አያዉ ጎፐ፥ መና ጎዳይ ህንተ ጾሳይ ህንተና አቢባ አግናን ቃማ ግብጼፐ ከሴዳ።#ዎጋ 23:5-8፤ ፓይ. 28:16-25 2ህንተ ዶርሳ ዉድያፐነ መህያ ዉድያፐ መና ጎዳይ ባረ ሱንይ ጼሰታናዳን ዶርያ ሳኣን፥ መና ጎዳዉ፥ ህንተ ጾሳዉ፥ ፓስጋዉ ያርሽተ። 3ሄ ያርሹዋ ህንተ ምያ ዎደ፥ እርሹዋ የግ ኡኬዳ ኡክና ሞፕተ፤ ሽን ላፑን ጋላሳ ኩመን እርሹዋ የግቤና ኡክና ሚተ። ህንተ ግብጼፐ ኤለካ ከሴዳ ድራዉነ ህንተ ደእያ ላይ ኡባን ህንተ ግብጼፐ ከሴዳ ጋላሳ ሀሳያናዳን፥ ሄ መቱዋ ኡክ ሚተ። 4ህንተ ጋድያን ኡባን ላፑን ጋላሳዉ አያ እርሹነ ቤቶፖ። ቃይ ህንተ ኮይሮ ጋላሳ ኦማርስ ያርሼዳ አሹዋፐ ዎንታዉ አያይነ አቶፖ።

5“ህንተ ፓስጋ ያርሹዋ መና ጎዳይ ህንተ ጾሳ ህንተንቶ እምያ አይ ካታማንነ ጮ ሹኮፕተ። 6መና ጎዳይ ህንተ ጾሳይ ባረ ሱንይ ጼሰታናዳን ዶርያ ሳኣን ህንተ ፓስጋ ያርሹዋ ሹክተ፤ ቃይ አዋይ ዉልያ ዎደ ህንተ ግብጼፐ ከሴዳ ድራዉ፥ ሄ ሳትያን ሹክተ። 7መና ጎዳይ ህንተ ጾሳይ ዶርያ ሳኣን፥ ሄዋን ካደ ሚተ፤ ያቲደ ሳአይ ዎንትያ ዎደ፥ ህንተ ዱንካንያ ዱንካንያ ቢተ። 8ኡሱፑን ጋላሳ ኩመን እርሹዋ የግቤና ኡክ ሚተ፤ ላፑን ጋላሳን መና ጎዳዉ፥ ህንተ ጾሳዉ፥ ጎይናናዉ ጌሻ ሺቁዋ ሺቅተ፤ ሄ ጋላስ አያ ኦሶነ ኦፕተ።

ቆይቻ ባላ

(ከሳ 34:22፤ ዎጋ 23:15-21)

9“ህንተ ካ ጫካናዉ ኮይሮ ዶሜዳ ዎድያፐ ዶሚደ፥ ላፑን ሳምንታ ኩመን ፓይድተ።#ፓይ. 28:26-31 10ያቲደ መና ጎዳይ ህንተ ጾሳይ ህንተና አንጄዳዋ ኬና ህንተ ህንተ ዶሱዋን ጮ እምያ እሙዋ አሂደ፥ መና ጎዳዉ፥ ህንተ ጾሳዉ፥ ቆይቻ ባላ ቦንችተ። 11ሄዋን ህንተ፥ ህንተ አቱማ ናናይ፥ ህንተ ማጫ ናናይ፥ ህንተ አቱማ ቆማቱነ ህንተ ማጫ ቆማቱ፥ ህንተ ካታማቱዋን ደእያ ሌዋቱ፥ በተቱ፥ አዉ ባይና ናናቱነ ህንተ ግዶን ደእያ አምኤቱ ኡባይ መና ጎዳይ ህንተ ጾሳይ ባረ ሱንይ ጼሰታናዳን ዶርያ ሳኣን፥ ናሸትተ። 12ህንተ ግብጼ ጋድያን አይልያ ግዴዳዋ ሀሳዪደ፥ ሀ ዎጋ ባለናን ናግተ።

ዳስያ ባላ

(ዎጋ 23:33-43)

13“ህንተ ኡዱማፐ ህንተ ካ፥ ቃይ ዎይንያ የያሳፐካ ህንተ ዎይንያ ሺሼዳዋፐ ጉይያን፥ ላፑን ጋላሳ ዳስያ ባላ ቦንችተ።#ፓይ. 29:12-38 14ህንተ፥ ህንተ አቱማ ናናቱነ ማጫ ናናይ፥ ህንተ አቱማ ቆማቱነ ማጫ ቆማቱ፥ ህንተ ካታማቱዋን ደእያ ሌዋቱ፥ በተቱ፥ አዉ ባይና ናናቱነ አምኤቱ ኡባይ ሀ ባላን ሎይ ናሸትተ። 15መና ጎዳይ ዶርያ ሳኣን ላፑን ጋላሳ መና ጎዳዉ፥ ህንተ ጾሳዉ፥ ባላ ቦንችተ፤ አያዉ ጎፐ፥ ህንተ ኡባይካ እትፐ ናሸታና ማላ፥ ህንተ አይፍሴዳባን ኡባንነ ህንተ ኩሺ ኦያባን ኡባን መና ጎዳይ ህንተ ጾሳይ ህንተና አንጃና።

16“ህንተ ጋድያን አቱማ አሳ ግዴዳ ኡባይ ላይን ሄዙ ገደ፥ ማጋገ ኡክ ባላ ዎደ፥ ሳምንታቱዋ ባላ ዎደነ ዳስያ ባላ ዎደ፥ መና ጎዳ ህንተ ጾሳ ስንን እ ዶርያ ሳኣን ቤቶ። ኡንቱንቱ መና ጎዳ ስን ዪደ፥ መላ ኩሸ ዮፕኖ። 17መና ጎዳይ ህንተ ጾሳይ አንጄዳዋ ኬና ኡባይካ ባረ ዳንዳይያዋ ኬና እሞ።

ጽሎ ፕርዳ ፕርድያዋ

18“ህንተ ዛራቱ ኡባዉ መና ጎዳይ ህንተ ጾሳይ እምያ ካታማቱዋን ኡባን ህንተ ዳናቱዋነ ካፓቱዋ ሱንተ፤ ኡንቱንቱካ አሳዉ ጽሎ ፕርዳ ፕርድኖ። 19ጽሎ ፕርዳ ጌላዮፕተ፤ ሶምኡዋ ጼሊደ ማዶፕተ። ማጋንጻ አኮፕተ፤ አያዉ ጎፐ፥ ማጋንጻይ አዳ ኤራንቻቱዋ አይፍያካ ቆቅሲደ፥ ጽሎቱዋ ቃላካ ጌላዬ።#23:6፤ ዎጋ 19:15 20ህንተ ደኡዋን ደአና ማላነ መና ጎዳይ ህንተ ጾሳይ ህንተንቶ እምያ ቢታ ህንተ ላታና ማላ፥ ጽሎ ፕርዳ ፕርድተ።

21“ህንተ መና ጎዳዉ፥ ህንተ ጾሳዉ፥ ኬጽያ ያርሽያ ሳኣ ማታን አሼሮ ግያ ጾሳትዉ ምፐ መቴዳ ምስልያ ማላ አያነ ኤሶፕተ።#ከሳ 34:13 22ህንተ መና ጎዳይ ህንተ ጾሳይ እጽያ ጎይንያ ሹቻ ህንተንቶ ኤሶፕተ።#ዎጋ 26:1

Currently Selected:

ዛረዋ 16: DFBE

Highlight

Copy

Compare