ዛረዋ 14

ዬኩዋ ዎደ ድገቴዳ ዶያቱዋ

1“ህንተ መና ጎዳ ህንተ ጾሳ ናናቱዋ፤ ህንተ ሀይቄዳ አሳዉ ህንተና ጎምኦሮፕተነ ስን ባጋ ሁጲያ ሜዶፕተ።#ዎጋ 19:28፤ 21:5 2አያዉ ጎፐ፥ ህንተ መና ጎዳዉ፥ ህንተ ጾሳዉ፥ ጌሻ አሳ፤ መና ጎዳይ ህንተና ባረዉ አልኦ ሚሻ ግዳናዳን፥ ጋድያን ደእያ አሳ ኡባፐ ዶሪደ ዎዳ።#ከሳ 19:5-6፤ ዛረ. 4:20፤ 7:6፤ 26:18፤ ቲቶ 2:14፤ 1 ጰጽ. 2:9

ሜተትያነ ሜተተና መሄቱዋነ ዶአቱዋ

(ዎጋ 11:1-47)

3“ህንተ ቱናባ አያነ ሞፕተ። 4ህንተ ማና መሄቱነ ዶአቱ ሀዋንታ፤ ቦራ፥ ዶርሳ፥ ዴሻ፥ 5ገንእያ፥ ዶግያ፥ ዋሻ፥ ዎራ ዴሻ፥ ጮጎሹዋ፥ ጋራነ ደርያ ዶርሳ። 6ጹጉንይ ዉር ጳልቀቴዳዋንታ፥ ዋሞትያ መሄቱዋነ ዶአቱዋ ኡባ ሚተ። 7ሽን ዋሞትያዋንታ ግዲደ፥ ጹጉንይ ጳልቀትቤናዋንታ ሞፕተ፤ ሄዋንቱካ ጋሉዋ፥ ሀርባይንያነ ጉፓልያ። ሀዋንቱ ዋሞቲኖ፤ ሽን ኡንቱንቱ ጹጉንይ ጳልቀትቤና ድራዉ፥ ኡንቱንቱ ህንተንቶ ቱና። 8ጉዱንይካ ጹጉንይ ጳልቀ ግዶፐነ ዋሞተና ድራዉ፥ እ ህንተንቶ ቱና። አ አሹዋ ሞፕተ፤ አ ባኩታካ ቦቾፕተ።

9“ሃ ግዶን ደእያ መታቱዋ ኡባፐ ህንተ ማናዋንቱ ሀዋንታ፤ ሞልያ ማላ ቀፊነ ፖቁ ደእያ ኡባ ሚተ። 10ሽን ሞልያዋ ማላ ቀፊነ ፖቁ ባይና ሀቃዋነ ሞፕተ። ሄዋንቱ ህንተንቶ ቱና።

11“ጌሻ ግዴዳ ካፉዋ ኡባ ሚተ፤ 12ሽን ካፎቱዋፐ ህንተ ሜናዋንቱ ሀዋንታ: አርጋን፥ ባዙዋ አንኩዋ፥ ካረ አንኩዋ፥ 13ጎሉዋ፥ ጽንግልያ ዛረ ኡባ፥ 14ቁሩዋ ዛረ ኡባ፥ 15ያንቻ፥ ጫንጭያ ጉቱዋ፥ ሃ ካፉዋ፥ ጋጭያ ዛርያ ኡባ፥ 16ቄር ጉቱዋ፥ ዎጋ ጉቱዋ፥ ሃ ኩቱዋ፥ 17ባዙዋ ጉቱዋ፥ ይንዱዋ፥ ጋንጋኑዋ፥ አዱሳ ቆ ደእያ ሃ ካፉዋ፥ 18ሳቢሳ ግያ ካፉዋ ዛረ ኡባ፥ ጅንጅላትያነ ሻልያ። 19ቀፍያና ደእያ ቄር መታቱ ኡባይ ህንተንቶ ቱና፤ ኡንቱንታ ሞፕተ። 20ሽን ሄ ቀፍያና ደእያባቱዋፐ ጌሻ ግድያዋንታ ሚተ።

21“ህንተ መና ጎዳዉ፥ ህንተ ጾሳዉ፥ ጌሻ አሳ ግድያ ድራዉ፥ ባኩቴዳዋ ኡባ አያነ ሞፕተ። ሄዋ ህንተ ካታማን ደእያ በተቱ ማናዳን ኡንቱንቶ እማናዉ ዳንዳዪታ፤ ዎይ ሀራ ቢታ አሳዉ ዛልአናዉ ዳንዳዪታ።#ከሳ 23:19፤ 34:26

“ዴሻ ማራ አ ዳይ ማን ዶይሶፓ።

አስራታ ከስያ ዎጋ

22“ህንተ ህንተ ጋደፐ ላይን ላይን ጋክያ ካ አይፍያ ኡባፐ አስራታ ከስተ።#ዎጋ 27:30-33፤ ፓይ. 18:21 23ህንተ ኡባ ዎደ፥ መና ጎዳዉ፥ ህንተ ጾሳዉ፥ ያይያዋ ታማራና ማላ፥ እ ባረ ሱንይ ጼሰታና ማላ ዶሬዳ ሳኣን፥ መና ጎዳ ህንተ ጾሳ ስንን፥ ህንተ ካ፥ ዎይንያ ኤሳነ ዛይትያ አስራታ፥ ህንተ ዶርሳፐነ መህያፐ ባይራ የለቴዳዋ ሄዋን ሚተ። 24መና ጎዳይ ህንተ ጾሳይ ባረ ሱንይ ጼሰታና ማላ ዶሬዳ ሳአይ፥ ህንተ ደኢያሳፐ ሎይ ሃኮ ግዶፐ፥ መና ጎዳይ ህንተና አንጃና ማላ፥ ህንተ ህንተ አስራታ ያ ቶካናዉ ዳንዳየናን እጾፐ፥ 25ዛልእተ፤ ሄ ሚሻ ኩሽያን ኦይቂደ፥ መና ጎዳይ ህንተ ጾሳይ ዶሬዳ ሳኣ ቢተ። 26ቢደ ሄ ሻሉዋን ህንተ ኮዬዳዋ ሀቃዋነ፥ ሚዛ ግድና፥ ዶርሳ ግድና፥ ዎይንያ ኤሳ ግዶ፥ ዎይ ሀራ ምኖ ኡሻ፥ ዎይ ሀራ ህንተ ኮይያዋ አያነ ሻሚደ፥ ህንተነ ህንተ ሶ አሳይ ኡባይ መና ጎዳ ህንተ ጾሳ ስንን ሄዋ ሚተነ ናሸትተ።

27“ሄዋ ህንተ ኦያ ዎደ፥ ህንተ ካታማን ደእያ ሌዋቱዋ ዶጎፕተ፤ አያዉ ጎፐ፥ ኡንቱንቱ ህንተናና ግሽ አኬዳ ሀራ ላታይ ባዋ። 28ሄዘን ላይን ላይን ኡባ ዎደ፥ ህንተ ካ አስራታ አሂደ፥ ህንተ ካታማን ሺሽተ። 29ሄዋ ህንተ ካታማን ደእያ ህንተናና ግሽ አኬዳ፥ ሀራ ላታይ ባይና ሌዋቱ፥ በተቱ፥ አዉ ባይና ናናቱነ አምኤ ማጫ አሳቱ ዪደ ሚኖ፤ ሚድካ ካልኖ። ያቶፐ፥ ህንተ ኦያ ህንተ ኩሽያ ኦሶ ኡባን መና ጎዳይ ህንተ ጾሳይ ህንተና አንጃና።

Currently Selected:

ዛረዋ 14: DFBE

Highlight

Copy

Compare