ዛረዋ 12

አሳይ ጎሸትያ መጽ እት ሳኣ

1“ህንተ ላታናዳን፥ መና ጎዳይ ህንተ አዎቱዋ ጾሳይ ህንተንቶ እሜዳ ጋድያን ህንተ ደኤዳ ኬሻን ኡባን ህንተ ባለናን ኦና አዋዮቱነ ህገቱ፥ ሀዋንታ። 2ህንተ ላትያ ካዉተቱ ደርያ ቦላን፥ ዞዚያ ቦላንነ ምቱዋ ጻጱዋን ባረንቱ ጾሳቶ ጎይንያ ሳኣ ኡባ ኡባና ይስተ። 3ኡንቱንቱ ያርሽያ ሳኣ ኮልተ፤ ኡንቱንቱ ጎይንያ ሹቻቱዋካ መንሬተ፤ አሼሮ ግያ ኡንቱንቱ ጾሳት ምስልያ ታማን ጹግተ፤ ማሰቴዳ ኡንቱንቱ ጾሳቱዋ ምስለቱዋ ይስተ፤ ኡንቱንቱ ሱንቱዋካ ሄ ሳአቱዋፐ ቁጭ ድግተ።#ዛረ. 7:5

4“መና ጎዳ ህንተ ጾሳዉ ኡንቱንቱ ባረንቱ ጾሳዉ ጎይንያዋዳን ጎይኖፕተ። 5መና ጎዳይ ህንተ ጾሳይ ዛረ ኡባይ ደኢያሳፐ ባረ ሱንይ ሄዋን ጼሰታናዳን ዶሬዳ ሳኣ ኮይተ። ሄ ሳኣ ህንተ ባናዉ ኮሼ። 6ህንተ ህንተ ጹግያ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋ፥ ህንተ ሺቁዋ፥ ህንተ ዶሲደ እምያ እሙዋ፥ ህንተ መህያነ ዶርሳፐ ባይራ ሄ ሳኣ አህተ። 7ሄዋን መና ጎዳይ ህንተ ጾሳይ ደእያ ሳን ህንተነ ህንተ ሶ አሳይ ማና፤ ቃይ ህንተ ኩሺ ኦዳባን ኡባንነ መና ጎዳይ ህንተ ጾሳይ ህንተና አንጄዳባን ህንተ ናሸታና።

8“ሀእ ሀዋን ህንተ ኦያዋዳን፥ ሄ ዎደ ህንተ አይፍያን ሎአ ማላትያባ ኦክታ። 9አያዉ ጎፐ፥ መና ጎዳይ ህንተ ጾሳይ ህንተንቶ እምያ ሸምፖ ቢታ ብሮን ጋክበይክታ። 10ሽን ህንተ ዮርዳኖሳ ፕኒደ፥ መና ጎዳይ ህንተ ጾሳይ እምያ ሄ ቢታ ላቲደ፥ ህንተ ያን ኡታና። ህንተና ዶዴዳ ሞርከቱዋፐ ህንተና እ ሸምፕስያ ድራዉ፥ ህንተ ዎፑ ጊደ ሄዋን ደአና። 11ሄ ዎደ መና ጎዳይ ህንተ ጾሳይ ባረ ሱንይ ሄዋን ጼገታናዉ ዶሬዳ ሄ ሳኣ፥ ታን ህንተና አዛዝያዋ ኡባ፥ ጹግያ ያርሹዋ፥ ሀራ ያርሹዋ፥ ህንተ አስራታ፥ ህንተ እሙዋነ ህንተ መና ጎዳዉ ሺቄዳዋ ኡባ ሄዎ አሂታ። 12ህንተ፥ ህንተ አቱማነ ማጫ ናናይ፥ አቱማነ ማጫ ቆማቱነ ህንተናና ላታ አክቤና ህንተ ካታማን ደእያ ሌዋቱዋናካ እትፐ ሄዋን መና ጎዳ ህንተ ጾሳ ስንን ናሸትተ። 13ህንተ ጹግያ ያርሹዋ ህንተ ኮዬዳ ሀቃንነ ጮ ያርሸናዳን ናገትተ። 14ህንተ ህንተ ዛራቱ ደኢያሳ ኡባፐ እቱዋን፥ መና ጎዳይ ዶሬዳ ሳኣን ህንተ ጹግያ ያርሾ ያርሽተ፤ ታን ህንተና አዛዝያዋ ኡባካ ሄዋን ኦተ።

15“ሽን ህንተ ደእያ ሳን ሀቃንነ ህንተ መህያፐ መና ጎዳይ ህንተና አንጄዳዋዳን ሹኪደ ሚተ፤ ዎጋን ጌሻ አሳ ግድና ዎይ ጌየና አሳ ግድናካ ኡባይካ ጋራ አሹዋነ ገንእያ አሹዋ ምያዋዳን ህንተ መህያፐ ሹኪደ ሚተ። 16ሽን ሱ ሃዳን ሳኣን ጉስተፐ አትና ሞፕተ።#ዶመ 9:4፤ ዎጋ 7:26-27፤ 17:10-14፤ 19:26፤ ዛረ. 15:23

17“ህንተ ህንተ ካፐ፥ ዎይንያፐነ ዛይትያፐ እምያ አስራታ፥ ህንተ መህያፐነ ዶርሳ ዉድያፐ ባይራ፥ ጾሳዉ እማናዉ ሺቄዳዋ ኡባነ ህንተ ህንተ ዶሱዋን ጮ እምያ እሙዋ ኡባ ህንተ ደእያ ሄራን ሙለካ ሞፕተ። 18ሽን ህንተ፥ ህንተ አቱማነ ማጫ ናናይ፥ ህንተ አቱማነ ማጫ ቆማቱነ ህንተ ካታማቱዋን ደእያ ሌዋቱዋናካ እትፐ፥ መና ጎዳይ ህንተ ጾሳይ ዶሬዳ ሳኣን መና ጎዳ ህንተ ጾሳ ስንን ሀ ያርሹዋ ኡባቱዋ ሚተ፤ ሄዋን ህንተ ዳቡራን ሺሼዳዋን መና ጎዳ ህንተ ጾሳ ስንን ናሸትተ። 19ህንተ ህንተ ጋድያን ደእያ ላይ ኡባን ሌዋቱዋ ሸነኮ ጌናዳን ናገትተ።

20“እ ህንተንቶ ገሌዳ ቃላዳን መና ጎዳይ ህንተ ጾሳይ ህንተ ዛዋ አስያ ዎደ፥ ህንተና አሹዋ ማናዉ ኮሽያ ዎደ፥ ህንተ ኮዬዳ ኬና ሚተ። 21ሽን መና ጎዳይ ህንተ ጾሳይ ባረ ሱንይ ሄዋን ጼሰታናዳን ዶሬዳ ሄ እት ሳአይ ህንተንቶ ሃኮፐ፥ መና ጎዳይ ህንተንቶ እሜዳ ህንተ መህያ ዎይ ዶርሳ ዉድያፐ ሀቃዋ ግድናካ፥ ታ ህንተና አዛዜዳዋዳን፥ ህንተ ኮዬዳ ኬና ህንተ ካታማን ሹኪደ ሚተ። 22ዎጋን ጌሻ አሳ ግድና፥ ዎይ ጌየናዋ ግድናካ፥ አይ አስካ ጋራ ግድና፥ ገንእያ አሹዋ ካሰ ምያዋዳን ሞ። 23ሽን ሱይ ደእያ አሹዋ ሜናዳን ናገትተ፤ አያዉ ጎፐ፥ ሸምፑ ሱን ደኤ፤ ሄዋ ድራዉ፥ ደኡዋ አሹዋና ሞፕተ።#ዎጋ 17:10-14 24ሱ ሃዳን ጋድያን ጉስተፐ አትና ኡሾፕተ። 25ህንተ መና ጎዳ ስንን ህንተ ሎኦባ ኦያዌ ህንተዉ፥ ህንተፐ ጉይያን፥ ህንተ ናናቶካ ሎኦ ግዳና ማላ፥ ሱ ኡሾፕተ።

26“ሽን ህንተ ዱማዬዳዋነ ሺቄዳዋ አኪደ፥ መና ጎዳይ ዶሬዳ ሳአዉ ቢተ። 27ቢደ ህንተ ጹግያ ያርሹዋ፥ አሹዋነ ሱ፥ መና ጎዳዉ፥ ህንተ ጾሳዉ፥ ያርሽያሳን ሺሽተ፤ ህንተ ያርሹዋ ሱ መና ጎዳዉ፥ ህንተ ጾሳዉ፥ ያርሽያ ሳኣ ማታን ጉስተ፤ አሹዋ ህንተ ሚተ። 28ታን ህንተና አዛዝያ ዎጋ ምንሲደ ናግተ፤ ሄዋ ኦፐ፥ ህንተንቶነ ህንተ ናናዉ ሎአ ግዳናዋ፤ አያዉ ጎፐ፥ ህንተ ልከባነ መና ጎዳ ህንተ ጾሳ ናሸችያ ሎኦባ ኦታ።

ኤቃ ምስልያዉ ጎይነናዳን እመቴዳ ሴራ

29“ህንተ ላታናዉ ብያ ካዉተ መና ጎዳይ ህንተ ጾሳይ ህንተ ስንፐ ይስያ ዎደነ ህንተካ ኡንቱንቱ ቢታ ላቲደ ደእያ ዎደ፥ 30ኡንቱንቱ ህንተ ስንፐ ይክችና ህንተ ኡንቱንታ ካላናዉ፥ ኡንቱንታ ጲርያን ኦይቀተናዳን ናገትተ፤ ‘ኑንካ ኡንቱንቱዳን ጎይናናዉ፥ ሀ ካዉተቱ ባረንቱ ጾሳቶ ዎት ጎይኒኖ’ ያጊደ፥ ካል ኦቼናዳን ናገትተ። 31ኡንቱንቱ ባረንቱ ጾሳቶ ጎይንያ ዎደ፥ መና ጎዳይ እጽያ ቱናባ ኡባ ኦያ ድራዉ፥ ህንተ መና ጎዳዉ፥ ህንተ ጾሳዉ፥ ሄዋዳን ጎይናናዉ በሰና። አያዉ ጎፐ፥ ኡንቱንቱ ሀራይ አቶ ባረንቱ የሌዳ አቱማነ ማጫ ናናቱዋ ባረንቱ ጾሳቶ ያርሺደ፥ ታማን ጹጊኖ።

32“ስም ህንተ ታ ህንተና አዛዜዳዋ ኡባ ኦተ፤ አ ቦላ አያነ ጉጆፕተ፤ አፐ አያነ ፓጭሶፕተ።#ዛረ. 4:2፤ ሳፃ 22:18-19

Currently Selected:

ዛረዋ 12: DFBE

Highlight

Copy

Compare